الأحد، 22 مايو 2011

العسكر ... و ليه لازم تنزل يوم 27

يوم 24 يناير 2011 :
كانت الدعوات للثورة شغالة على الفيس و مع كده مظنش انه حد كان مصدق ان الثورة هتنجح

يوم 25 يناير 2011 :
لغاية الساعة 2 الضهر كنت قاعد فى البيت و كنت فاكر انه مفيش حاجة هتحصل ، بس شوية و لقيت تليفونات من اصحابى اللى نزلوا
شوية كمان و ابتديت اشوف الفيديوهات و اللايف ستريمنج من موبيلات ناس كتير و ابتديت احس ان المرة دى غير كل مرة و جايز تبقى اول و آخر مرة نقدر نعمل فيها حاجة و نزلت

يوم 11 فبراير 2011 .. الساعة 6 المغرب :
قاعد فى البيت بستريح و بدور على حاجة اكلها و بجهز نفسى انى اخد شاور عشان انزل الميدان تانى ، و ساعتها عشت احلى 30 ثانية فى حياتى لما طلع عمر سليمان علينا و عرفت اننا قدرنا لأول مرة نغير الامر الواقع و نرسم مستقبلنا بأيدنا مش حد يرسمهولنا

يوم 27 مايو 2011 :
ممكن اقولك اسباب كتير ملهاش اول من اخر يخليك لازم تنزل
منها مثلا ان المجلس العسكرى بأفعاله ضحك علينا و ممشى الامور زى ما هو عايز مش زى ما احنا اصحاب البلد و اصحاب الثورة عايزين

منها مثلا ان المجلس العسكرى بيتعامل معانا على انه الداخلية بس بشكل مطور و جديد و بيقبض على ناس و بيضرب ناس و بيسجن ناس .. يعنى طبق الاصل من الداخلية القديمة

منها مثلا ان المجلس العسكرى بيقول علينا نفس اللى مبارك و نظامه كان بيقولوه علينا اننا قلة و مغرضين و مندسين و هنتحرش بعناصر الشرطة و عناصر الجيش ... انا لما قريت الخطاب ده حسيت انى فى ايام ما قبل 11 فبراير مش كملنا اكتر من 100 يوم على تنحى المجحوم

منها مثلا ان مبارك و كل عيلته و كل وزارته و كل مجلس شعبه و كل رجال اعماله محدش فيهم اخد اى حكم و فى الغالب لو مدينا خط الاحداث الموجودة دلوقتى هنلاقى محدش فيهم هياخد احكام فى حين ان حته امين شرطة لبس البدلة الحمرا و اخد اعدام فى مفيش كام يوم عشان يا دوب قتل 18 متظاهر زى ما المحكمة قالت .... يعنى اهو فيه احكام اعدام و فيه قضاء سريع مش زى ما بيتقال لينا ان القضايا دى لازم تتظبط

منها ان مفيش ولا مطلب و بكرر ولا مطلب اتحقق لغاية دلوقتى من مطالب الثورة ... دى حتى اول مطلب فيها اللى هو الشعب يريد اسقاط النظام ماتحققش و النظام لسه موجود و صاحى و بيلعب

و طبعا فيه اسباب كتير جدا جدا جدا ...... بس انا هقول ايه اللى هيخلينى انزل يوم 27 مايو

انا هنزل عشان انا اتربيت على انى ماخدش عزا حد غير لما اخد حقه ، و لغاية دلوقتى كل الشهدا اللى ماتوا محدش اخد حقهم
يعنى انا ممكن اسامح فى حقى عشان ملكى .. انما مقدرش اسامح فى حقهم عشان مش ملكى و عشان اقدر ابص لنفسى فى المراية و مش احتقر نفسى

انا هنزل عشان الاحساس اللى عشته فى التلاتين ثانية بتوع خطاب التنحى كان احلى احساس عشته فى حياتى زى ما قلت و عايز اعيشه مرة تانية

و اهم سبب انا هنزل عشان لأول مرة بقول بقلب و يقين و اقتناع كامل ان دى بلدى و دلوقتى بلدى عيزانى و مينفعش انفض و اقعد فى البيت و ابقى من رواد حزب الكنبة
مش عارف اذا كانت الاسباب اللى انا قلتها كفاية بالنسبة ليك ولا مش كفاية ..... و جايز يبقى ليك اسباب تانية غير اسبابى
بس بغض النظر عن اى اسباب و عن اى اختلاف فى اى حاجة سواء فى عقيدة او وجهات نظر ... يوم الجمعة 27 مايو لازم الاقيك جنبى فى الميدان عشان فى الآخر الحاجة الوحيدة اللى انا متأكد منها ان دى بلدى زى ما هى بلدك

مقدرش اقول ايه اللى هيحصل يوم 27 مايو .. يمكن نتضرب .. يمكن نتسجن .. يمكن نموت ..... الله اعلم
بس اللى اقدر عليه و عارف انه هيحصل هو ان فيه تضحيات لازم تتم عشان البلد دى تبقى احسن و انضف و عشان الثورة ماتتسرقش مننا لأننا دفعنا تمنها غالى أوى و بأغلى حاجة ممكن تدفعها و هو دم الناس اللى ماتت عشان انا النهاردة اكون بكتب البوست ده و تكون انت النهاردة بتقرا البوست ده

لو انت نزلت يوم الجمعة 27 مش هنبقى لا قلة و لا مندسين ، بس لو منزلتش هنبقى قلة و مندسين ..... الفرق الوحيد انى هبقى قلة و مندسين و انا فى الميدان و انت هتبقى قلة و مندسين و انت فى بيتك .... الاختيار ليك

سلام دلوقتى و اشوفكوا يوم 27 لو لينا نصيب و لينا عمر

هناك 4 تعليقات:

MaNoOoSh يقول...

مصر للشعب المصري مش للعسكر

Tears يقول...

برافو

عمر ما خاب ظنى ان اللى فاهم ح يضحك عليه و اذا كان التيار الدينى عمل صفقة فمن الاول هو عمره ما كان معانا و السلفيين كانوا بيحرموا المظاهرات و الاخوان طول عمرهم بيلعبوا على الجانبيين و كدابيين

على فكرة حتى امين الشرطة موضوعه فيلم لان دى محاكمة غيابية يعنى هو هربان و حتى لو اتمسك فسهل جدا يستأنف الحكم و يطلع منها

اقرا ده و انشره على قد ما تقدر لو اقتنعت...انا بعته لكل اللى اعرفهم

http://nothing10111.blogspot.com/2011/05/blog-post.html

غير معرف يقول...

يا رب .... خليك معانا :)

شمس النهار يقول...

صح كلامك كله صح

وهو ده اللي مخوفني واللي حصل مش عارفة ازاي

ازاي المصريين اتفرقوا كده وبسرعة وكل واحد افتكر هو مين بعد ماكنا كلنا انصهرنا تحت كلمتين انا مصري ومصلحة مصر

الله كبير