الأربعاء، 16 مارس 2011

اه و لا

مش هتكلم كتير على نص التعديلات الدستورية لأنه تقريبا احنا لينا اسبوع مش بنتكلم غير على التعديلات دى ، انا عايز اتكلم على شوية حاجات تانية النهاردة

اول نقطة :الاستفتاء ده هيكون على التعديلات الدستورية لدستور 1971 .. صح كده .... اظن صح
معنى كده انك ضمنيا رايح تستفى على انك عايز دستور 1971 يفضل موجود و لو لفترة مؤقتة ولا لأ

تانى نقطة : فيه ناس رايحة تقول اه لمجرد انها تستريح و خلاص و ده بيفكرنى بالمقولة الشهيرة اللى كانت موجودة ايام الثورة ما تخلصوا الثورة بأه عشان ورانا اشغال و متعطلين .... و كان الرد الاشهر على المقولة الجامدة دى هو اننا شفنا ثورات بتنجح و ثورات بتفشل بس مشفناش ثورات الناس عايزاها تخلص عشان وراها شغل الصبح و العيال عندهم مدرسة و مش بيروحوا النادى و مؤخرا على رأى الحاجة عفاف شعيب عشان محلات البيتزا قافلة و مش عارفة تجيب لبنت اختها بيتزا و فى نفس الوقت ( و شوف حكمة ربنا يا مؤمن ) الكبابجية قافلين و ابن اخوها اللى عنده سنتين بيقول ريشة ريشة عايز ياكل ريش
ناس تانية بتقول عشان الجيش يمشى ، مع انه لو بصينا لكلام اللواء مختار شاهين النهاردة فى المصرى اليوم قالك انه بعد الاستفتاء لو قلنا اه الانتخابات البرلمانية هتتم فى شهر سبتمبر ، و مجلس الشعب و مجلس الشورى فى اول اجتماع هينتخبوا اعضاء الهيئة التأسيسية اللى هتحط الدستور فى خلال 6 شهور ، و الاعضاء دول هياخدوا 6 شهور لغاية ما يحطوا الدستور ... يعنى بالبلدى الجيش قاعد معانا سنة كمان على الاقل بفرض ان رئيس الجمهورية تم انتخابه على طول ، لأنه اكيد الجيش مش هيسلم البلد لرئيس مجلس الشعب ، و لا لرئيس المحكمة الدستورية اللى موجود بالمناسبة من اول الثورة لغاية دلوقتى ، يعنى لو كان الجيش عايز يسلمه السلطة كان سلمهاله من بدرى
ناس تالتة عايزة تقول اه عشان الكلام الفاضى بتاع الفراغ الدستورى ، و الحجة دى بتفكرنى بنفس الحجة اللى اتقالت بالنص لما قالوا لو مبارك استقال هيحصل فراغ دستورى و اديه استقال و مفيش فراغ ولا اى حاجة و احنا ماشين 100 فل و 14 و بريفكس
بالمناسبة اللواء مختار شاهين قال انه فى حالة الموافقة او الرفض على الاستفتاء هيتم عمل اعلان دستورى مؤقت البلاد تمشى بيه ، الفرق الوحيد انه فى حالة الموافقة هتكون المواد المعدلة هى اساس الاعلان الدستورى

تالت نقطة : الناس اللى بتقول اه 3 فئات فى المجتمع .... الحزب الوطنى ( و يحز فى نفسى انى بقول الحزب الوطنى مش بقول فلول ولا بقايا ) .. و الفئة التانية الاخوان .. و الفئة التالتة السلفيين و معاهم كمان حمدين صباحى ( اللى طلع بعد كده و قال انه بيقول لا و مش فاهم ايه سر ان عصام العريان و الاخوان بيسيحوا و يقولوا انه قال اه مع انه بيقول لا ) و هو الوحيد من المرشحين للرئاسة اللى موافق على التعديلات المشبوهة دى
باقى البلد بتقول لا ... يعنى كل القضاة ( بأستثناء القضاة اللى حطوا التعديلات ) .. كل مرشحين الرئاسة ( بأستثناء حمدين صباحى زى ما قلنا قبل كده اللى طلع بيقول لا ) .. كل الكتاب السياسين اللى بيعتد برأيهم ( بأستثناء فهمى هويدى ) .. و انا و كل صحابى .... و برضه فيه استثناء بس مش هقول مين :)

رابع نقطة : الناس اللى هتقول اه عشان عجلة الانتاج تمشى .. انا هسأل سؤال واحد بس ، هو الموظف اللى رئيسه حرامى ، او رئيسه مش عاجبه و عامل اضراب ....... الموظف ده ايه علاقته بالدستور انه يكون فيه دستور ولا مفيش من اساسه
انا اللى اعرفه ان العجلة هتمشى لما كلنا نبدل عليها و يكون الجنزير مظبوط

خامس نقطة : انت لو قلت اه ، عد معايا هتنزل كام مرة
مرة بتاعت الاستفتاء على التعديلات ، مجلس الشعب ، مجلس الشورى ، الاستفتاء على الدستور الجديد ، مجلس الشعب تانى ، مجلس الشورى تانى ( عشان الدستور القديم هيكون اتحل و جه دستور جديد و لازم الانتخابات التشريعية تتم على الدستور الجديد ) ، انتخابات الرئاسة
يعنى المفروض اننا فى خلال سنة و نص على الاكتر هننزل من بيوتنا 7 مرات
سؤال و عايز اجابة واقعية عليه ... كام واحد من ال 42 مليون اللى يحقلهم الانتخاب و التصويت هينزلوا السبع مرات دول

انا كتبت خمس نقط بس عشان انا شايف ان دول اهم خمس نقط انما انا اقدر ازود عليهم 10 نقط كمان بس الخمس نقط دول كفاية عشان يهدموا حجج اللى هيقولوا اه فى استفتاء يوم السبت
انا عن نفسى هقول لا .... مش عايز كل الناس تقول لا .... بس عايز كل الناس تنزل و تقول رأيها سواء اه او لا ، و فى النهاية رأى الاغلبية هو اللى هيحكم و هيمشى و كلنا هنحترمه

من الناس اللى قالوا لا عباس الضو ، و من الناس اللى قالوا اه نادية الجندى فى مهمة فى تل ابيب ... يا ترى هتمشوا ورا عباس الضو ولا ورا نادية الجندى
حاجة أخيرة و يا رب اكون غلطان فيها ، انا من دلوقتى عارف ان النتيجة النهائية هتكون اه بغض النظر عن نسبة اللى هيقولوا لا ....... سلام

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
الجزء ده خاص بأتنين دايما بيشرفونى بمتابعتهم و ردودهم و هما تيرز و كارولين فاروق
انا مش عارف ايه ظروف الفيس و التويتر معاكوا ، بس اتمنى انكوا تكونوا من مستخدميهم لأن التواصل عليها اسرع و مستمر اكتر من البلوج و اتمنى الاضافة منكوا لو ده فى الامكان لمزيد من النقاشات معايا و مع غيرى


هناك 3 تعليقات:

Tears يقول...

تصحيحا حمدين صباحى قال لا امبارح على قناة اون تى فى مع يسرى فوده و شرح باستفاضة و ح تلاقى التسجيل على موقعهم انما عصام العريان ماشى فى كل قناة يقول انه قال نعم لدرجة ان حمدين قال ليسرى فودة انه مستغرب انهم بيروجوا ده عنه فى كل مكان و علق على كلام العريان بس طبعا ده اسلوب الاخوان و السلفيين و همه اساسا ماشيين بالاشاعات و الاكاذيب و بيقولوا للناس البسطاء فى الشارع ان لو قلت لا النصارى ح يلغوا الاسلام من مصر..ده غير اليفط و الاعلانات و المكرفونات اللى فيها كلام كدب فى كدب و ان دل على شىء فيدل على ان خلط الدين بالسياسة الذى طالما رفضناه هو افساد للسياسة و اساءه للدين

ايوه ح تطلع النتجية نعم حتى لو قالت البلد كلها لا و ده احساس عندى نتيجة ان الجهة المشرفة ليها رغبه فى نعم و المجلس العسكرى بيتبع نفس أسلوب مبارك و بيوجهه الناس احيانا بالتهديد و احيانا بترويج كلام مش قانونى

ما يأتينى من كل مكان هو أن من اشرفوا على انتخابات مجلس الشعب الماضية او من زوروها وصلهم خطابات تكليف لهذا الاستفتاء ايضا و هذا بشكل مركز فى القرى و النجوع

ايضا هناك ملحوظات غير مطمئنة من بعض الضباط الشرفاء على صفحتهم على الفيس بوك صفحة ضباط من أجل الثورة وصلتنى على الايميل

ح شوف موضوع الاكونت بتاع الفيس بوك لانى الصراحة مش معتادة عليه

اتفرج على الفيديو
http://www.youtube.com/watch?v=AhStDvGH3zA

;كارولين فاروق يقول...

مش عارفه اقولك ايه
انا دماغي فعلا مش عارفه تفكر
انا بصراحه لسه مابين اه ولأ
واكيد حاحدد ده قبل يوم السبت
لأن اللي بيقنعني بأه بقتنع بكلامه
واللي بيقول لأ بقتنع بكلامه برده
أما عن الفيس بوك والتيويتر
انا مش مشتركه فيهم للأسف

إنسان || Human يقول...

ههههههه حلو موضوع العجلة ده ...
عموما انا متفق معاك في اللي انت قولته
اما موضوع تنبؤك بفوز نعم ... مش عارف الله اعلم
بس ممكن فعلا زي ما انت بتقول لأنت عندكغالبية الشعب في الحضيض اللي سواق ميكروباص واللي قاعده على على عربية خضار , و العامل البسيط اللي مش عارف حاجه في الدستور واللي عمال يلاقي الورق بيتحدف عليه من كل ناحية وياريته كلام في مصداقية

دده حتى مضلل ... ربنا يستر