الأربعاء، 14 يوليو، 2010

بحب مصر لدرجه انى عايز اموت فيها

البوست النهارده كئيب ... فاللى عنده اكتئاب او مستعد يدخل فى اكتئاب مايقراش البوست من الاول عشان انا مش عايز اشيل ذنب حد .... كفايه الناس اللى بترمى نفسها من على الكبارى
الموضوع ابتدى لما نادر و بلال كانوا فى يوم بايتين عندى ...... اكلنا كريب و شربنا بيبسى و حلينا ببسبوسه و كنافه و قاعدين مأنتخين بنتفرج على ميلودى هيتس و الجو كان مش حر أوى و ابتدى يبقى جميل و الحياه حلوه و جميله او على رأى سعاد الله يرحمها بمبى
المهم قلتلهم انا هسأل كل واحد فيكوا سؤال و هو نفس السؤال و هشوف الرد عليه .... قلتلهم كل واحد فينا بيكون فى حياته غلطات كتير ، بس بيبقى فيه غلطه محوريه أثرت على مسار حياتك كله .. السؤال ايه هى الغلطه المحوريه دى فى حياه كل واحد فيكوا
من غير الدخول فى تفاصيل كتير الاتنين اتفقوا ان الغلطه المحوريه انهم دخلوا كليه العلوم و انا اتفقت معاهم فى نفس الاجابه ..... الغريب ان الاجابه دى منطقيه منى او من بلال عشان انا قعدت 10 سنين و هو قعد 9 فى الكليه ... طيب نادر قعد 5 سنين فى الكليه يبقى ليه اجابته نفس اجابتنا
قعدت افكر كتير فى النقطه دى و عرفت اسبابها بالنسبه ليا انا و بلال اننا ضيعنا وقت كتير كان ممكن نستفيد بيه فى حاجات كتير أوى ، بس نادر اللى كان عاملى مشكله عشان مش لاقى اجابه مبرره ليه
اكتشفت ان الكليه بتاعتنا ، و مش بتاعتنا بس على فكره .. اى كليه بيكون ليها نفس التأثير على نفسيه اى حد بيحلم ، لأن الكليات عندنا متخصصه فى انها تقتل حلمك .... و ده طبيعى على فكره عشان احنا بندخل الكليات مش عشان بنحبها انما عشان مجموعنا هو اللى أمر بكده ، المجموع و الناس اللى عندك فى البيت و العيله و صحابك و تقريبا كل الناس
يعنى احنا فيه عرف سائد عندنا انك يبقى فى ايدك شهاده ... مش مهم يبقى عندك حلم و تحققه انما يبقى فى ايدك شهاده ، مع ان اللى معاه شهاده زى اللى معهوش دلوقتى و تساوت الرؤوس و القامات بعد ما بقى 70% من الشباب صيع و عاطلين و ال 30% اللى بيشتغلوا منهم 70% مش بيشتغلوا بشهادتهم .. يعنى بحسبه بسيطه تقريبا 1% بس هو اللى بيشتغل بشهادته و الباقى لا .. يعنى الشهاده مهياش اكتر من منظر اجتماعى
انا مش ضد الشهاده على فكره ، بس ضد فكره ان تقييم الانسان يكون بشهادته .. يعنى كده من الاولى ان الانسان يكون تقييمه بالفلوس اللى معاه لأن الفلوس ابقى من الشهاده ، و قبل ما حد يتحمق و يتحزق و يقولى ازااااااى و الشهاده و الكلام بتاع المسلسلات ده ... كام واحد اتخرج و عدى على تخرجه 3 سنين لسه فاكر ايه اللى خده فى الكليه ..... ده احنا كنا بنتكلم على المواد اللى اخدناها فى الكليه اتلخبطنا فيها و اخدناها امتى و مين ادهالنا ده غير انه طبعا فيه مواد وقعت من الذاكره اصلا
المهم انا السؤال بتاع الغلطات ده فضل فى دماغى و قعدت افكر فيه كتير ... لقيت فى حياتى كذا غلطه محوريه غير موضوع الكليه ده ، بس سالت نفسى سؤال مهم يا ترى لما قررت انى ارجع مصر تانى كانت غلطه ولا لا
بكل حسابات العقل و المنطق كانت غلطه و غلطه فظيعه لدرجه انى استحق الاعدام رميا بالقباقيب عليها ، بس انا مش حاسس انها غلطه .......... يعنى انا فى السنه دى عملت 2 دبلومه .. اتعرفت على ناس كتير كنت اكيد هخسر لو معرفتهمش .... عملت حاجه بحبها – و ان كنت اشك انى هعملها تانى فى المستقبل القريب على الاقل ... دخلت قصه عاطفيه بجد ، و كانت اول مره ليا بعد اكتر من 4 سنين كنت مقضيها – بغض النظر عن نهايه القصه دى ..... يعنى فى الاجمال انا عملت فى السنه دى حاجات كنت ممكن اعيش و اموت من غير ما اعملها
المهم انى قررت انى مش ناوى اكمل فى البلد ... و الحقيقه انه مش انا بس اللى مش عايز يكمل فى البلد ، تقريبا كل الناس مش عايزه تكمل فيها الا شويه ناس قليله ...... المهم انه فيه رابط مشترك بين كل الناس اللى رافضه فكره انها تكمل فى البلد – و انا هنا مش عايز حد يزعل منى لأنى والله مقصدش اى حاجه غير انه فعلا ده الرابط المشترك اللى انا لقيته
يعنى الناس اللى رافضه فكره السفر دى مقسومه لشريحتين كبار ... يا اما بنات ، و طبعا نتيجه لحاجات كتير منها التربيه اللى اتربينا عليها و العادات و التقاليد اللى بترفض فكره سفر البنت وحيده ، ده غير طبعا ان البنت مش مطالبه بأى حاجه ... يعنى فى بيت ابوها بتاخد مصروف ، عايزه تنزل تشتغل تنزل ، مش عايزه اديها قاعده فى البيت معززه مكرمه ، و حتى لما تتجوز هى مش مطالبه انها لا تجهز نفسها و لا تصرف على البيت ولا اى حاجه ..... يعنى السبب الرئيسى للسفر اللى هو ان الواحد يحسن من ظروفه و من حياته مش متواجد عندها من الاساس
الشريحه التانيه و هيا شريحه الشباب .... و العامل المشترك بينهم هو صغر السن ، يعنى اكيد انا لو اصغر من سنى ده ب 3 سنين مش ههقول 5 او 10 كنت هفكر فى موضوع السفر ده كذا مره ، و اقول لا البلد بكره مسيرها تروق و تحلى ... بس اللى انا عايز اقوله للشباب دول انى من سنه 2000 و انا بقول البلد بكره مسيرها تروق و تحلى ، يعنى من 10 سنين و البلد زى الزفت اهى و ازفت من الاول كمان ، و لسوء الحظ العمر مفيهوش الف 10 سنين عشان اضيع منه 10 سنين تانى ... اللى انا متأكد منه ان الشباب دى كمان 10 سنين لو فضلوا مستحملين 10 سنين هيفتكروا كلامى ده ، الا لو حصلت معجزه و البلد حالها اتشقلب و بأت بلد بتاعت بنى آدمين بجد
ناس كتيره شايفه سبب انى عايز اسافر انى انا عشان فى حاله صدمه عاطفيه و كده و ده مخلينى مش عارف اخد قرارت صح .... انا كان ممكن اوافق على تفسيرهم ده ، بس المشكله الوحيده ان حتى الموضوع بتاعى كان كمل بجواز برضه كنت هسافر ، و كان الدافع كان هيبقى اكبر ... عشان انا نفسى عيالى يتعلموا فى مدارس نضيفه ، يكونوا زى احسن حد يعرفوه ، يكونوا احسن منى انا شخصيا
و لسوء الحظ برضه كل ده مش ممكن يتحقق فى مصر .... احنا فى مصر نسينا يعنى ايه احلام ، كل همنا اننا نعرف نعيش يومنا ، و بعد كده نكمل لغايه آخر الشهر .... و بعد ما العمر يعدى نكتشف اننا بطلنا نبقى بنى آدمين و بأينا مجرد تيران فى ساقيه بنلف و مش هنبطل نلف الا لما نموت ...... و انا مش عايز ابقى تور ، انا عايز افضل بنى آدم زى ما ربنا خلقنى
انا والله يا جماعه بحب مصر ..... مش لدرجه انى عايز اعيش فيها ، بس بحبها لدرجه انى عايز اموت و ادفن فيها ..... انا مسأله السفر بالنسبه لى بأت مجرد وقت و اختيار و انا عايز افكر كويس عشان اخد قرار السفر المره دى صح خصوصا انى ادامى كذا اختيار مش اختيار واحد بس
معلش اذا كان البوست المره دى كئيب بس هو ده حال البلد مش حالى انا بس ..... و يا ريت يا جماعه اللى شايف غير كده يقولى ... بس يدينى 5 امثله مش مجرد مثال واحد ..... سلام

هناك 12 تعليقًا:

ستيتة حسب الله الحمش يقول...

انا جاية اسلم ع الماشي
البوست قرأته ولي فيه "فضفضات"
بس لما أروق لأن مزاجي مش عنب ولا برقوق من ابو عشرة جنيه
انا مزاجي مدي على الفرغلي بتاع الستات ميعرفوش يحكموا
وبما اني عمة مؤدبة ومش عاوزاك تلاقيني في نص البوست بقول ما يحكوووووووووووومش

خليني لبكرة حفظا لماء برستيجي

adel يقول...

بص يابني
انا قولتلك وانا الموضوع مش عاطفي بالنسبة ليا نهائي

انا مش ناوي اسيبها
الا لو هي طردتني

انا البلد دي عندي بالدنيا
مهما كانت زبالة و وشحة و نظامه فاسد
عاوز تسافر سافر
بس صدقني هترجع

فتاه من الصعيد يقول...

لو هتتحمل الغربه سافر

واكيد هترجع تاني ... بس ماتخاليش الغربه تسرق سنين عمرك

تحياتي

jafra يقول...

مسا الخير

هم كل اللي دخلوا كلية العلوم احلامهم تحطمت ؟
انا كمان خريجة علوم
شكلو هادا التخصص نحس
السفر ؟مممم بس نصيحة
لو قررت تسافر مع اني ضد الهجرة لاني مجربتها قسريا مش على كيفي
يعني لو قررت . اختار البلد الصح اللي تهاجر و تعيش فيها و اكيد رح ترجع بس على الاقل ما تكون دفنت حالك مرتين

Che يقول...

العمه ستيته بنفسها هنا .. يا هلا هلا
فينك يا عمه و فين ايامك
طبعا يا عمه كل اللى تقوليه على الراس من فوق و مقدرش اقول غير كده
و ادينى مستنى بكره اللى لسه مجاش من اسبوع :)
منورانى دايما يا عمه

Che يقول...

عادل
فاهم والله وجهة نظرك ، بس عندى سؤال واحد
مستنى ايه من البلد عشان ساعتها تقول انها طردتك
و طبعا يا عادل مسيرى هرجع هنا فى الاخر .. لأنها مهما كان بلدى
نورتنى يا دولا و مستنى ردك

Che يقول...

فتاه
صدقينى انا مليش نفس للسفر ، بس مجبر اخاك لا بطل
كده كده سنين عمرنا بتتسرق هنا .. يبقى تتسرق و اكون عملت فيها حاجه مفيده
منورانى يا فتاه

Che يقول...

jafra
كلامك صح ... بس هقولك على حاجه صغيره
فيه فرق بين الابعاد و الابتعاد .. الاول بنجبر عليه و التانى بنختاره
بالنسبه للتفكير اكيد كلامك صح لأنه قرار العمر كله
منورانى يا جفرا

غير معرف يقول...

عندك حق ومليووووووووووووون حق ياريت تطلع من البلد دي خالص ولو مش عاوز تبص عليها تاني يبقي احسن اصلا لا هي ولا ناسها بقوا كويسن وينفع يتعاش معاهم ناسها دول انا اتلسعت منهم كتير جدا ولا فيهم حد عدل وانا من ضمن البنات اللي نفسها تبعد وتسيب البلد دي خالص هي وناسها
الكلام اللي انت كاتبه دامن 4 سنين ياريت تكون قدرت واتلعمت حاجات احسن بس كلامك اثر فيه جدا ابقي طمنا عليك

غير معرف يقول...

عندك حق ومليووووووووووووون حق ياريت تطلع من البلد دي خالص ولو مش عاوز تبص عليها تاني يبقي احسن اصلا لا هي ولا ناسها بقوا كويسن وينفع يتعاش معاهم ناسها دول انا اتلسعت منهم كتير جدا ولا فيهم حد عدل وانا من ضمن البنات اللي نفسها تبعد وتسيب البلد دي خالص هي وناسها
الكلام اللي انت كاتبه دامن 4 سنين ياريت تكون قدرت واتلعمت حاجات احسن بس كلامك اثر فيه جدا ابقي طمنا عليك

dodo يقول...

عندك حق ومليووووووووووووون حق ياريت تطلع من البلد دي خالص ولو مش عاوز تبص عليها تاني يبقي احسن اصلا لا هي ولا ناسها بقوا كويسن وينفع يتعاش معاهم ناسها دول انا اتلسعت منهم كتير جدا ولا فيهم حد عدل وانا من ضمن البنات اللي نفسها تبعد وتسيب البلد دي خالص هي وناسها
الكلام اللي انت كاتبه دامن 4 سنين ياريت تكون قدرت واتلعمت حاجات احسن بس كلامك اثر فيه جدا ابقي طمنا عليك

Che يقول...

@dodo
اول مرة ارد على تعليق من 3 سنين و يمكن ازيد شوية
انا احسن فى حاجات كتير و اوحش فى حاجات كتير
معلش اخدت شوية لغاية ما نشرت تعليقك بس مش بدخل هنا كتير
انتى عاملة ايه؟