الأربعاء، 16 يونيو 2010

اسماء .... حجه علينا لا لنا

فى سنه 2001 كنت فى الجامعه .... اغلب الناس اللى بتقرا البوست ده كانت فى اعدادى ساعتها و الكبير فيهم هيكون فى ثانوى ...... ساعتها كان آرييل شارون لسه ماسك الوزاره فى اسرائيل و عمل اجتياح شامل لغزه و الضفه الغربيه بالجيش مع استخدام القصف و العساكر و كل حاجه كأنك فى حاله حرب عاجله مش حرب قعدت 60 سنه و لسه هتقعد تانى الله اعلم اد ايه
المهم الجامعه ساعتها حصلت فيها مظاهرات قعدت تقريبا 3 اسابيع مستمره ، مظنش انى شفتها فى الجامعه تانى لدرجه ان بعض الناس خلت عيالها ماتروحش الجامعه ايامها عشان البهدله اللى كانت بتحصل بشكل دورى و مستمر هناك ...... انا هنا هقول اللى انا شفته من غير تحيز لطرف على حساب طرف رغم ان كلامى مش هيعجب بعض الناس
اللى انا شفته ان عساكر الامن المركزى دخلت الجامعه تطارد بعض المتظاهرين برغم ان ده ممنوع بنص قانون الجامعات ان الامن يدخل جوه الجامعه و حتى عشان كده هتلاقوا مكاتب الامن موجوده على الابواب بس ......... برضه شفت عساكر الامن المركزى بتضرب المتظاهرين بجنازير حديد و العصيان بتاعتهم ، و كانت الجنازير و العصيان دى مش بتفرق بين ولد و بنت ، و على فكره .. الضرب ده كان جوه الجامعه مش براها
شفت الامن المركزى و هو بره الجامعه و بيضرب قنابل مسيله للدموع على المتظاهرين جوه الجامعه ..... تقريبا اسلوب الامن المركزى ما اختلفش كتير من ايامها الا انه اصبح اكتر احترافيه انه يعمل كردون حوالين المتظاهرين لغايه مايجوا ناس فى لبس مدنى يظبطوا المتظاهرين دول و يبقى الامن معملش حاجه غير انه حافظ على النظام و محدش يقدر ينتقده نتيجه لكميه الانتقادات الكتير اللى كانت موجوده ايامها
على الناحيه التانيه من المظاهرات شفت حاجات تانيه عجيبه ، و انا اللى هكتبه هنا هكون شفته بعينى مش اتحكالى و سمعت و الكلام المايع بتاع المصريين بتاع بيقولك معرفش ايه ..... شفت ناس من اللى كانوا المفروض بيتظاهروا بيضربوا كنتاكى اللى كان ايامها ادام باب تجاره مكان كشرى التحرير و مؤمن على اعتبار انه امريكانى و ان امريكا هى الراعى الرسمى لاسرائيل ... انا ممكن اقبل التصرف ده على مضض .... بس اللى مش ممكن اقبله انى لقيت ناس من نفس اللى بيتظاهروا عشان غزه طلعوا كنتاكى بعد ما اللى شغالين فيه هربوا بحياتهم و سرقوا الشاشات الكومباكت ، مكن الكاشير بالفلوس اللى جواها طبعا ، اجهزه الكومبيوتر ، التلاجات و الافران بالاكل اللى فيها ..... و جرى تبرير ده على انه دى نسبه قليله لا تمثل اللى بيتظاهروا ( و ده صحيح لان الناس دى كانت مجرد حراميه مش متظاهرين ) .... يعنى دول ممكن تسميهم الكولاترل داميدج او السايد ايفكت بتاعت المظاهره
طبعا كان كنتاكى قفل من اول يوم و بعد كده نقل مكانه اصلا من ادام الجامعه .... اللى حصل فى الايام اللى بعد كده كان اغرب ...... المحلات بتاعت المصريين اللى ادام باب تجاره و اشهرها صبرى و كل المحلات اللى جنبه اتكسر ازازها بالطوب برضه و جرت محاوله لسرقتها ، بس اللى بيشتغلوا فى صبرى مش زى اللى بيشتغلوا فى كنتاكى ..... فضلوا جوه و اللى كان بيهوب ناحيه المحل كان ممكن يموت
شفت برضه فى المظاهرات دى ناس بتحاول تكسب نقط على قفا الكفاح ..... و اشهر الناس دى كانوا الاخوان ...... و انا هنا بتكلم على الناس الكبيره فى الجماعه ، مع اقتناعى التام ان الشبيبه بتاعتهم دلوقتى بكره هيبقوا كده برضه و عشان كده عمرى مامشيت فى مظاهره فيها الاخوان تانى لأنى عندى كرامه ماتسمحليش انى ابقى لعبه فى ايد حد
المهم الرغى اللى فوق ده كان مجرد تبرير و مقدمه للى هقوله دلوقتى ....... طبعا كلنا قرينا عن خالد محمد سعيد الله يرحمه و شفنا صوره ...... الموضوع تطور بسرعه عندنا فى مصر لأننا بنتبع نظريه اللبن ... نطلع بسرعه بسرعه و ننزل على مفيش .... صفحات بتتعمل بأسمه ، و ناس بتتكلم بلسانه ، و كل اسكندريه اصبحوا فى يوم و ليله اهله و اصحابه و جيرانه .... يعنى اللى كان بيحصل كان فيه جزء من من استغلال خالد ميتا اكتر ما استغلوه حيا
انا عن نفسى بجد حزين على اللى حصله ، و عارف ان ده ممكن يحصلى انا شخصيا او يحصل لأى حد اعرفه فى البلد دى فى الوقت الطين اللى احنا عايشينه ده .... بس زعلان على الاستغلال ده ..... و طبعا فيه ناس هتقول ان اللى حصل كان تعريف مصر و العالم باللى حصل لخالد .... انا موافق على نقطه اننا نعرف الناس ، بس اللى حصل كان اكتر من تعريف .... و دى وجهه نظرى الشخصيه
يوم الاحد اللى فات تم تنظيم مظاهره ادام وزاره الداخليه فى لاظوغلى عشان خالد ، بعد مظاهرات فى اسكندريه ايام الجمعه و السبت .... انا عرفت كده يوم الجمعه عشان انا بعدها قفلت النت و الفيس بوك عشان كان عندى امتحان يوم الاحد فى الدبلومه اللى انا فيها دى
لما رجعت للنت و الفيس بوك يوم الاتنين العصر تقريبا بعد ما كنت خلصت امتحانى و نمت ، لقيت ان فيه حد جميل اعرفه اسمه اسماء بوكى و هى صديقه مشتركه عند اغلب المدونين كانت فى المظاهره يوم الاحد ..... طبعا انا ابتديت اقرا التعليقات بأثر رجعى
واحده صاحبتها اخدت الباسورد بتاع الاكونت بتاعها من اخوها عشان تتواصل مع الناس القلقانه على اسماء على الاكونت بتاعها ..... بعد كده هما مش عارفين عنها حاجه خالص و انها مرجعتش البيت لغايه الساعه 10 بليل يوم الاحد .... بعد كده لغايه الضهر يوم الاتنين كل اللى يعرف حد ممكن يسأله على اسماء بيسأل عليها بس هى اسمها مش فى اسامى الناس اللى اتاخدوا ، مع حاله قلق لأن اسماء عندها قرحه و واضح انها حاده عشان بيجلها نزيف من القرحه دى .... بعد كده عصر يوم الاتنين الناس عرفت انها كانت فى مستشفى و ان اهلها راحوا يجيبوها و راحت بيت اخوها و ان حالتها النفسيه وحشه عشان الضرب اللى حصل للمتظاهرين و لغايه هنا الاخبار وقفت بس بعد ما الناس اتطمنت
انا معرفش اذا كانت اسماء قالت انها رايحه الوقفه الاحتجاجيه دى ولا لا لحد من صحابها ... و معرفش لو قالت صحابها نصحوها بأيه ..... بس اللى اعرفه ان اسماء مش حاولت بأى صوره من الصور انها تستغل ده فى انها تبان بطله قوميه ، بعكس ناس اعرفها بتطلع مظاهرات و فيه اغراض تانيه غير خدمه البلد و التغيير و الكلام اللى بيقولوه بيكون فى ضمايرهم و الله اعلم باللى فى القلوب ..... اسماء عملت اللى حست انه صح لمجرد احساسها انه صح و من غير ما يكون فيه اى تبرير او مكاسب مستقبليه ليها من ورا الموضوع ده
انا عايز اقول ان اسماء باللى عملته ده فضحتنا كلنا و حطت مرايه كبيره ادام كل واحد فينا .... المرايه دى خلتنى لازم اعترف انى سلبى جدا و مش معترف بأى فايده للمظاهرات دى .... انا عارف ان البلد دى مش هتتغير بالمقاومه السلبيه بتاعت غاندى .... معندكش سلاح تقدر تبقى مركز قوه بواسطته يبقى مش هتغير حاجه و الحكومه هتتعامل معاك بنظريه سيبه يهوهو شويه عشان يهدا و لو طولت الهوهوه شويه الحكومه هتعاملك زى الكلاب السعرانه و ملكش غير الرصاص .... احنا مفيش اى ثورات ولا تغييرات فى بلدنا حصلت عشان الشعب عايز كده من ايام الفراعنه ... مش احنا بتوع الثورات الشعبيه ..... و برضه دى رأيى الشخصى
برضه المرايه دى اتحطت ادام الناس اللى بتكافح من ورا الكى بورد و بتغير صورها بصور خالد و بتشترك فى الجروبز اللى معموله بأسمه و بتكتب كومنتات ناااار ...... عايز تكافح بجد و تغير حاجه عندك الشارع زى ما اسماء عملت ... و اسماء بنت يعنى لو بنت قالت هتبهدل ، مهى اسماء بنت و اتبهدلت قبلها .... لو ولد قال هتبهدل يبقى يخليه فى حضن مامته احسن
آخر حاجه عايز اقولها .... اسماء مليون حمدلله على سلامتك و بجد شكرا انك عرفتينا حقيقتنا فى وقت كل واحد بيهرب فيه من الحقيقه و بيعيش فى حلمه ...... و مفيش سلام المره دى

هناك 8 تعليقات:

adel يقول...

ممممممممم
طيب يعني هتنزل مظاهرات انت يعني ؟

Che يقول...

لا مش هنزلها لأنى متأكد انها لا هتودى ولا هتجيب يا دولا ... و عشان كده قلت انى شخص سلبى
انا احسن حل بالنسبه لى انى اسيب البلد كلها و اسافر زى ما زيكا قال ... ما تبقى تيجى معايا يا عادل و هنتغدى هناك كل يوم بدل الصيام اللى احنا فيه ده P:

حكاية يقول...

الرسول عليه الصلاة والسلام قالنا
من رأى منكم منكرا فليغيره بيده فان لم يستطيع فبلسانه فان لم يستطيع فبقلبه وذلك أضعف الايمان

يعني الدين اتكلم في الموضوع ده
اللي بيحصل في بلدنا ده منكر وماينفعش اننا نسكت عليه

والعمر واحد والرب واحد

يكفيني شرف اني اموت وانا مش جبانة لاني كدة هموت وكدة هموت ومفيش حد بيموت ناقص عمر
على الاقل احس اني مت وانا شريفة وشجاعة

كتير برضو من الناس اللي قلوبها مريضة بتدخل المظاهرات علشان تفعل المنكر بكل اشكاله وبيبقوا داخلين مظهرة بس ورسم قدام الناس وهما داخلينها في الاساس لاغراض تانية خالص

موضوعك حلو يا عمور كالعادة

تسلم ايدك

تحياتي

adel يقول...

تسافر ؟؟!!!
هو ده الحل
عيل غير منتمي صحيح
لا ياعم انا افطر هنا ولا اتغدي برة البد دي :):):)

غير معرف يقول...

اسماء بنت جدعه... وكل واحد المفروض يعمل اللي يقدر عليه

تحياتي

Che يقول...

حكايه
متفق تماما مع كل اللى انتى بتقوليه والله ... بس المشكله انه فيه ناس ملهاش غير فى الكلام و لما تقوليلهم يقولوا ده اللى نقدر عليه .. بس انا شايف انهم ماشين بمبدأ ان عامت انا معاكوا و ان غرقت انا مستنيكوا على الشط و ده مينفعش
مبسوط ان البوست عجبك
نورتينى يا حكايه

Che يقول...

عادل
ماشى يا عم عادل ... بس المشكله انك فى البلد دى مش ضامن انك حتى تلاقى الفطار اللى انت بتقول عليه ده
مش كده ولا ايه يا برنس

Che يقول...

فتاه
طبعا اسماء بنت جدعه .... و بالنسبه ان كل واحد يعمل اللى يقدر عليه ده صح .. بس لما اكون مقدرش غير على الكلام يبقى اكيد فيه مشكله موجوده
منورانى يا فتاه