السبت، 9 يناير، 2010

عن ليلى اتحدث ... الاول

قبل اى حاجه لازم ابارك لصاحبى مايكل على كتابه الجديد اللى هينزل خلاص ... مايكل للى ميعرفش هو العميد ... اكتر واحد عمل انترفيوهات فيكى يا مصر ... الكتاب بتاع مايكل اسمه وظيفه ما تمت .... لما ينزل الكتاب مستنى كل الناس تشتريه ... مبروك يا مايكل و عقبال الكتاب الجديد ... مدونه مايكل هنا
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
ليا زمان واخد اجازه و بصراحه نفسى مش جايبانى انى اكتب ... الحاجه الغريبه ان اللى هكتبه موجود فى دماغى ، بس معنديش اى طاقه انى اكتبه فى شكل كلمات بدل ما يفضل افكار
النهارده هتكلم على موضوع ليلى مع انى عارف ان الموضوع خلص من زمان و ناس كتير اتكلمت عليه ، بس معلش .. استحملونى شويه
اى حاجه الانسان بيبقى نفسه يعملها بيبقى اسمها هدف ... هدف الانسان نفسه يحققه .. بغض النظر عن الانسان نفسه او الهدف او قيمته او اى حاجه تانيه .... نيجى لنقطه مهمه ... الهدف ده بيبقى ليه دافع و بيبقى ليه حافز ... الدافع يعنى الحاجه اللى بتزقك انك تعمل الهدف ده .... الحافز بيبقى الشئ اللى منتظره من تحقيق الهدف نفسه .... اهم نقطه فى الموضوع كله ، ان الهدف اللى انا عايز اوصله يبقى عندى الامكانيات انى احققه ... والا كده هيبقى اسمه حلم مش هدف
سيبنا بأه من المقدمه النظريه دى و اللى كل اللى درس مبادئ علم اداره هيبقى عارفها و نيجى للموضوع نفسه .... انا لازم اعترف انى مش مطلع أوى على فكره حمله ليلى ، بس عموما فاهم الفكره الاساسيه بتدور حوالين ايه .... هنا لازم اسأل سؤال مهم من واقع المقدمه اللى انا قلتها ، لأنها على اد ما هيا كلام نظرى بس موجوده بشكل عملى فى اى حاجه فى الدنيا .... الهدف اللى المشاركين فى الحمله عايزين يوصلوله هو تغيير نظره المجتمع ككل للأنثى و احترامها و التعامل معاها بنوع من انواع المساوة ... و مره تانيه بعترف انى مش متأكد من اهداف الحمله بس فى الغالب هتطلع من الاهداف اللى انا قلتها ، لأن كل المنظمات ، او الحملات للى مش بيحب تسميه كلمه المنظمات بيكون هو ده هدفها ..... السؤال هو ، ايه الدافع الموجود لدى المشاركين ، و ايه الحافز او ايه اللى مستنينه لما الحمله تنجح و تحقق هدفها
انا شخصيا معرفش دوافع المشاركين ، بس ربنا عرفوه بالعقل و محدش شافه ... اكيد الدافع هو نوع من انواع القهر اللى واقع على المرأه فى مجتمعنا .... بغض النظر عن ان المشاركين فى الحمله تعرضوا للقهر ده ولا شافوه ... لأنه مثلا احنا كشعب مش هنبقى مش عاجبنا الحكومه الا لو شفنا بلاوى من الحكومه دى ، سيبكو من كميه القهر اللى بنتعرضه بشكل منظم و مدروس .. يعنى انا لو مش حاسس انى عايش فى مجتمع ديكتاتورى مكنتش هقول انا نفسى فى ديموقراطيه ... لو مش شايف حريتى الشخصيه بيتم الاعتداء عليها ، مكنتش هقول انا مع الحريه الشخصيه حتى لو كانت هتبقى غلط فى التطبيق .... لان الغلط فى تطبيق الحريه احسن من عدم تطبيقها خالص و اننا نعيش فى قهر و ناس تانيه تحدد لينا طريقنا و هنعمل ايه
ننقل على نقطه تانيه ..... المفروض فى اى هدف ان يكون ليه نظره مستقبليه ، مش يكون مجرد هدف لمرحله وقتيه ، اللهم الا لو انك بتتكلم على الاهداف قصيره المدى ... بس اظن هدف زى نظره المجتمع للمرأه ده لازم يبقى هدف ليه نظره و نظره بعيده كمان .... يعنى مينفعش احط الهدف ده و ابص تحت رجليا بس ..... و هجيب من الاخر عشان اريح الناس و اريح نفسى معاهم ... فى فكره نظره المجتمع للمرأه مش عيب اننا نبص للمجتمعات الاوربيه لأنها متطوره عننا ... و محدش يقولى اننا مجتمع شرقى و الكلام ده .... لأن مبدأ الحريه مش بيتجزأ على حسب المكان .... انا موافق اننا ندى المرأه حقوقها لأن ده الصح ... و موافق ان البنت تمشى متطمنه فى الشارع لأن ده حقها علينا ... مينفعش زى ما صديقى العزيز مايكل قال ان المجتمع يبقى عايز يحتك بيا لمجرد انى احمل جسد انثى .... بس طريق الحريه دى مينفعش نمشى خطوه فيه و بعدين نقف ... لازم نمشيه للأخر .... يعنى لو مشيناه للأخر مينفعش نرجع نقول عادات و تقاليد لأن اساس الفكره اننا نغير العادات و التقاليد دى
انا افتكر انى مره حضرت ندوه كانت واحده من منظمات حقوق المرأه هيا اللى عملاها ، و الكلام كان على ان الراجل كائن همجى و انه بيتحرش بالانثى دايما و ان الانثى من حقها انها تلبس اللى عايزه و تمشى فى الشارع فى امان .... المهم انى قمت و قلت تعليق بسيط بس هما زعلو منى و مش عارف زعلو ليه لغايه دلوقتى .... اولا يا جماعه للناس اللى مخدتش احياء فى ثانوى او فكرتهم عن علم الاحياء بسيطه ... فيه حاجه اسمها هورمونات ، الهورمونات دى بتتفرز بطريقه لا اراديه ... يعنى انا لو شفت واحده ماشيه عريانه فى الشارع او بلاش عريانه و نقول لابسه لبس مثير ليا ( و طبعا مفهوم الاثاره بيختلف من شخص للتانى و من ثقافه للتانيه ) ... وضع طبيعى انه يتفرز عندى هورمونات تحفزنى جنسيا .... الفكره هنا هو انا هتعامل ازاى مع الهورمونات دى ... يعنى مثلا هبص فى الارض و امشى بعيد عن الواحده دى ... ولا هقولها كلمه معاكسه او حتى تحرش لفظى ... ولا هيتطور الموضوع معايا للتحرش الجسدى .... طبعا الموضوع ده بيفرق من شخص للتانى و بيعتمد على العوامل اللى فوق .... لغايه هنا و الناس كان معندهاش اعتراض و كلام زى الفل ... جيت قلت النص التانى ... قلت انه من حق البنات و الستات يلبسو اللى هما عايزنه و يمشو فى الشارع ... بس سألت سؤال .. قلت انه كان من مده فيه فيديو نزل عن الموضوع ده تحديدا و كان فى شكل اعلان ساخر ... شويه شباب اخترعو بنطلونات تبقى المناطق الحساسه للرجاله فيها باينه ، يعنى البنطلون مقطوع من عند المناطق دى ... يا ترى قياسا على حق البنت انها تلبس اللى هيا عايزاه و تمشى فى الشارع ، انا من حقى انى البس البنطلون ده و امشى بيه برضه فى الشارع ... و هنا كانت الثوره ... قالو لا اللى انت بتتكلم فيه ده عوره انما احنا بنتكلم على لبس ميبينش عورات ... قلتلهم لو هنتكلم بالدين يبقى جسد المرأه كله عوره .. بالنسبه للى مش عايزين نتكلم بالدين و عايزين الموضوع يبقى علمانى يبقى فيه اعتراضين ... الاول اننا اتفقنا ان مبدأ الحريه مينفعش يتجزأ ... التانى لو انهم بيقولو انهم مش بيتكلمو على عورات يبقى كده تفكيرهم هما اللى جنسى مش انا ... لانهم هما اللى قالو على موضوع العورات ده مش انا ... و اقتبس هنا من دكتور احمد خالد توفيق انه مينفعش تيجى تكلمنى على الاحترام و انى لازم مابصش عليها و انتى لابسه بادى مبين نص صدرك و بنطلون لو مش متبقع مكنتش هاخد بالى منه ، يعنى اللى مارستيه عليها ده نوع من انواع التحرش البصرى ...... و لو جيتى قلتيلى اللبس حريه شخصيه يبقى انتى كده رديتى على النقطه بتاعت انه حريتى الشخصيه انى البس اللى انا عايزه
نكمل الطريق شويه .... بعد مرحله الحريه هتيجى نقطه المساواه ... انا موافق تماما على المساواه دى ... بس تلاقى فيه نقطه لازم تطلع و فعلا فيه ناس اتكلمت فيها على استحياء ... مدام قلنا مساواه يبقى فى توزيع المواريث لازم ندى للراجل زى الست ... يعنى نبتدى نفصل فى الدين على مزاجنا و بما يناسب اهوائنا ... و على فكره فيه فعلا جمعيات و منظمات نسائيه قالت على النقطه دى
نيجى لنقطه المساواه برضه انه يتم منع ان الراجل يتجوز اكتر من ست لان الست متقدرش تتجوز اكتر من راجل ... و يستمر مسلسل تفصيل الدين .... و فى النقطه دى انا عايز بس اوضح حاجه ... فيه اعتقاد منتشر عند الستات ان الراجل يحق ليه ان يتجوز على مراته لو مراته فيها عيب ... المفهوم ده مغلوط ... لأنه لو صح يبقى انا لو اتجوزت على مراتى و هيا مفيهاش عيب يبقى انا كده زنيت و عملت ذنب و ده مش صح ... و هدى مثال عشان محدش يقول انى بقول كده عشان انا راجل ... كلنا طبعا عارفين سيدنا على ابن ابى طالب و مش هتكلم عنه لأنه اكبر من انى اتكلم عنه و مفيش كلام يوفيه حقه .... سيدنا على كان متجوز السيده فاطمه بنت الرسول ... الرسول كان حماه ... كان مخلف الحسن و الحسين سيدا شباب اهل الجنه ... يعنى بمنطق الستات اللى منتشر اليومين دول معندوش حجه ... مراته من نساء العالمين و واحده من اربع نساء كاملات ... نسبه هو الرسول نفسه ... مخلف ولدين يعنى معندوش مشكله ان مراته مابتخلفش ... و مع كده اتجوز على السيده فاطمه .... يبقى لو كلامهم صح مكنش سيدنا على عمل كده .... و على فكره المعلومه دى موجوده فى كتب التاريخ و السير و سهل ان الواحد يتأكد منها

نيجى لنقطه ان الست بتقول من حقها تتطلق لو جوزها اتجوز عليها .... و ده صحيح من حقها تطلب الطلاق للضرر النفسى اللى وقع عليها .... بس مع القرار ده فيه عواقب الستات مش بتقبلها .... شرعا و قانونا ( و انا قلت شرعا الاول ) فى الحاله دى الست ميحقلهاش انها تطلب اى حاجه من زوجها ... لا نفقه و لا مؤخر صداق و لا اى حاجه .... لأنها طالبه الطلاق مع عدم وجود عله فى الزوج ... و ده برضه موجود فى الشرع و اللى مش مصدق يتعب نفسه شويه و يتأكد
اللى حاصل فى نقطه الجواز دى انه فى بلد عربيه مسلمه اسمها تونس جرمت الجواز التانى ... مع العلم ان ده غير جائز شرعا ... على فكره انا بقول اللى هيحصل لما نكمل مشى فى طريق المساواه
اهم من ده كله انه فيه نقطه مهمه جدا .... الانثى و نظره المجتمع ليها دى حلقه من حلقات المجتمع مش حاله منفصله ... يعنى مينفعش اصلح نظره المجتمع للأنثى و طريقه معاملته ليها من غير ما اصلح المجتمع نفسه ... و على فكره دى مش فلسفه ولا انى بقول اصلح الكون ، بس دى حقيقه
البوست الجاى هكمل كلام و هناقش ردودكو عليا .... سلام

هناك 23 تعليقًا:

adel يقول...

الصراحة مفيش تعليق حاليا
غير ان الكلام عاجبني ومستني الباقي

حلوة حكاية بنطلون بالعورة دي
ونسميه (ديرتي عورة) :)

حرروف يقول...

الكلام عاجبني ولا تعليق

خواطر شابة يقول...

انا عندي ملاحظة على قولك ان سيدنا علي تزوج على السيدة فاطمة انا الذي اعرفه من كتب السيرة أن الرسول صلى الله عليه وسلم رفض هذا الزواج وقال الا فاطمة وانا دائما استدل بهذا الحديث في التأكيد على حق كل واحد في رفض التعدد لكن دون انكار مشروعيته
بالنسبة لموضوع التحرش دعني اتفق معك في النموذج الذي طرحته لكن ما رأيك بمن يتحرش بالمنقبة والمحجبة فأي تحرش بصري تعرض له في هذه الحالة
المطالبة بالمساواة مقبولة لكن في اطار ما يعطيه الدين اي ان ثوابث الدين وتشريعاته لانقاش فيها
تحياتي لك

فتاه من الصعيد يقول...

انا رايي في الموضوع ده انه موش ينفع في دوله في القرن الواحد وعشرين تعتمد على العادات والشهامه في حمايه الافراد

لازم يكون في امان في الشارع وتطبيق قانون حاسم على المتحرش




موش علشان موش لابسه محتشم اتحرش بيها .... لان مبدأ الاحتشام بيختلف من ثقافه للتانيه .... لكنه معروف في الدين ايه العوره

لكن ربنا ما قاتلش اتحرش بالمتبرجه .... قال غض البصر للولد والبنت

الزوجه التانيه حلال شرعا ... مقبوله في مجتمعات واخرى لا

فالضرر موجود في مجتمعات واخرى لا لان القبول بالمبدأ مختلف

تحياتي

سارة نجاتى يقول...

بس يا عمرو
أنت متعود منى نتكلم بصراحة
و أنا فضلت بقرأ كلامك
و أن فى طبع شوية أنى أحاول أجمل كلامى حبتين زيادة عن العادى لما أجى أختلف مع حد عشان ميزعلش منى و يفضل خلافنا على مستوى الأفكار بس
بس بما أنا المفروض احنا تعارفنا أكتر الفترة الأخيرة فمش ح أعمل الحساسيات دى.. و يظل اختلافنا اختلاف افكار و اراء بس..
أولا أنت عارف أنى مش مع منظمات حقوق المرأة دى عشان تلات ارباعهم هم اللى بوظوا القضية أساسا و بيدوا صورة مغلوطة...
ما علينا ...
ثانيا ده بوست مالوش أى دعوة خالص بالدعم و الاتفاق و الكلام اللى اتكلمنا فى قبل كده الانبوكس
و لا حتى ده فى صلب التضامن مع قضية معينة و هى نظرة المجتمع المنحازة ضد الأنثى ..
ح تقولى أن رأيك كده و انى فهماك غلط زى زيكا
لأ , أنا مفهتمش زيكا غلط , أنا كتبت فى ساعتها و رديت على اللى قالوا له أن نظرته ذكورية

بس تخيل , تخيل ..
أنى جيبتك تدافع عن حقوق البهائيين فى ان يكون ليهم مكان عبادة , مثلا ( و انا عارفة أنك مؤيد ده )
طب و انت فى الندوة اللى بتعرض فيها رأيك قمت قايل أن الدين عند الله هو الاسلام ..
أنت مقلتش حاجة غلط , و احنا أكيد مؤمنيين أن الدين عند الله هو الاسلام الا مكناش بقينا على دينا ..
لكن فى السياق ده , ايه اللى يحصل ؟؟
أنت كده ضربت القضية فى مقتل و صرفت النظر عن حالحق فى العقيدة ..

ثالثا: أنا ضد المبالغة فى العرى لأنه ببساطة بيحولنى لسلعة , بس عندى نقطة هنا .. أنت كنت حكيت قبل كده على مشهد شفته فى كافيه لما اتنين بنات شواذ قعدوا يبوسوا بعض ..
و قلت أن ده حقهم و هما حورين و المفروض محدش يبقى واصى على حد
الناس حتى تقريبا يوميها هاجمتك ...

الفرق بين اللى لابسه بادى مبين نص صدرها و ده ؟؟
ما هو أنا من حقى لما أشوف منظر مقزز زى ده أمسك النتين دول أطردهم و و أجيبلوهم البوليس , و مش بعيد نجيب الناس تتلم عليها تضربهم لأنهم بيمارسوا فحشاء..
؟؟
و بعدين هى الهرمونات الجنسية عند الراجل المصرى بس, طب ما هى عند كل الرجاله فى الدنيا و و أوعى تقولى أن الراجل اللبنانى مثلا أو الاندونيسى بيستثار زيه زى المصرى
احنا فى أخر احصائية رقم واحد فى التحرش ( يبقى الموضوع له بعد اقتصادى و اجتماعى أبعد بكتتتتتتتتتتير أوى من بنطلون مبقع و صدر مكشوف)
و ده طبعا علىأساس أن كل البنات ماشيين لابسيين زى نانسى عجرم
ده أنا مشفتش ناس ى حياتى لابسين بالوصف ده غير مجموعة تتعد علىالصوابع هههههههه
و بعدين أنا مندهشة جدا جدا من منهجك فى تناول الموضوع
متقوليش متن كلامك ايه
أنت عارف ساعات
أن
ال
approach
لتناول موضوع ممكن يكون مؤثر أكتر من اى كلام تانى ..
يعنى لما أنت تمسك خيط الحرة لتقف بيه عند نقطتين ملهمش دعوة ببعض و هما ( حق الراجل فى الزواج حتى لو الست مفيهاش عيب + أن الست بثير الراجل )
يبقى أنت كده أخليت بمضمون الكلام اللى أنت بتنادى بيه من يوم ما عرفتك

و هو الحرية الحرية فوق كل شىء , صح؟؟
اللى حاصل فى نقطه الجواز دى انه فى بلد عربيه مسلمه اسمها تونس جرمت الجواز التانى ... مع العلم ان ده غير جائز شرعا ... على فكره انا بقول اللى هيحصل لما نكمل مشى فى طريق المساواه

و مين قالك أن ده اللى ح يحصل لما نكمل فى طريق المساواة ؟؟
خلاص و احنا شعب مش قد الديموقراطية ,, و منقدرش نمارسها و مش واعيين كفاية ليها و لو خدنا ديموقراطية ح نطلع فى الشوراع زى ما طلعوا فى السبعينات و ح يقولوا علينا ثورة الحرامية ..
و لو البهائيين خدوا حقهم للأخر ح يعملوا تبشير و ده مش دين أصلا , و كده ح نخرج عن الاسلام
و بالمناسبة أنت مش من حقك تقعد تشرب شيشة فى مكان عام لأنها حرام ( من ضمن الأسباب لانها اهدار للمال )و نفس الكلام للسجاير لانها قطعا حرام
و ساعتها نصادر حريتك الشخصية

و متحضرش معرض فنى تشكيلى و نقفل المعارض لأن الأزهر أفتى بأن التماثيل حرام و نصادر حرية الابداع
و شيل فلوسك من البنك لان الفوايد حرام ...

طبعا انت ح تقولى ان الأمصلة اللى بقولهم دى فيها مبالغة و ملهاش دعوة بكلامك
ما هو خلط المساواة بالدين و قلنا ماشى
كمان تطلعها منافية لروح الدين
عشان توقعك بأنها ح تمشى فى مسار معين

يلا أنا سخنت عليك أوى ههههههههه

معلش بس ده مجرد خلاف فى الرأى
بس لسه عليك الاستراجانوف هههههه

سلام

أه بليز متحطش التعليق بتاعى فى البوست اللى جاى , علق عليه براحتك بس متحطهوش عشان مش ناقصه جيش هجوم على مدونتى , أصلها حصلت معايا قبل كده ههههههه

magi يقول...

شكرا على المشاركه ولو انها متأخره ,موضوع مبذول فيه جهد وواضح انه اخد منك تفكير كتير
انا متفقه معاك فى نقطه ان اصلاح المجتمع ضرورى لاصلاح وضع المرأه لان المجتمع كله محتاج اعاده هيلكه لكن فى عده نقط انت كتبتها احب اوضحهالك
• على ابن ابى طالب رضى الله عنه لم يتزوج باخرى طول مده زواجه بالسيده فاطمه هو حاول الزواج باخرى ولكن الرسول (ص) رفض وخيره بين استمرار زواجه بالسيده فاطمه وزواجه باخرى ونتيجه لده لم يتزوج عليها حتى وفاتها وده ثابت فى اكتر من مرجع و ان كان بعد وفاتها تزوج عده مرات
• لعلى ابن ابى طالب ولدين وبنتين من السيده فاطمه منهم ام كلثوم والتى على ما اذكر تزوجت من عمر بن الخطاب
• من حق الزوجه التى تطلب الطلاق لزواج زوجها باخرى حقوقها كامله لو القاضى حكم لها بالطلاق وده من قانون الاحوال الشخصيه لانه بيعد طلاق للضرر
• شرعا نفس الشئ قياسا على موقف الرسول صلى الله عليه وسلم وعلى ابن ابى طالب وممكن تسأل اى حد متخصص هيقولك نفس الكلام لان طلب الطلاق للضرر مختلف عن الخلع سواء من الناحيه الشرعيه او القانونيه .
• نقطه مهمه تانيه ان الزواج باخرى صحيح ليس مشروطا بموافقه الزوجه لكن ليها الحق فى قبول او رفض الوضع الجديد وطلب الطلاق للضرر على اساسه
• بالنسبه للوضع فى تونس والى بتعده انت غير جائز شرعا فى قاعده فقهيه صريحه ان بيحق للحاكم او ولى الامر تقييد المباح وتحريمه ولان التعدد مباح وليس فرض فهنا جائز شرعا تقييده للمصلحه العامه او على حسب السبب الى اقتضى منعه فى تونس بغض النظر عن رأى الخاص فى تقييد المباح ودليل على صحه ده ان عمر بن الخطاب رضى الله عنه ابطل حد من الحدود وهو حد السرقه فى زمن المجاعه وده حد مش نص بالاباحه زى نص التعدد
غير كده انا مفهمتش وجهه نظرك برده من حقوق المرأه انت مع ولا ضد لان ده مش واضح من البوست ,
برده انت قولت انك مع الحريه ومش بتحب حد يتعدى على حريتك الشخصيه تحت اى اساس وفى نفس الوقت لما جيت تتكلم على حقوق المرأه ذكرت الدين وناقشت من وجهه نظر دينيه ودى حاجه دهشتنى جدا !!
بالنسبه لنقطه التحرش بقى بتقول ان اللبس سبب رئيسى وكل واحد مفهمو اللبس المثير مختلف عنده يعنى ده معناه ايه بالظبط كل واحده قبل متنزل تمشى تمر على كل واحد فى الكوكب عشان تتأكد لبسها ده مثير بالنسبه له ولا لا
مفروض فى قواعد الحشمه المعقوله ودى سواء راجل او ست مفروض يلتزموا بيها

سؤال تانى انت ليه بتربط بين الحريه وحقوق المرأه والدين انت كده بتدى معنى مش صح من وجهه نظرى وهو ان الحريه ضد الدين وده مش حقيقى الحريه انى اختار الدين واختار اطبق شعائره وده زى فى حاله الميراث متبعى الدين الاسلامى ليهم نظام ميراث معين وهكذا وده مش ضد المساواه ولا ضد الحريه

Zika يقول...

انا هارد في الاخر
لما تخلص الموضوع لاني مش عارف ابني حكم على كلامك

اسماء عوني يقول...

انا عاجبني البوست
وعجبني رد ساره وماجي
ودلوقت بس عرفت ان بوست زيكا كان منطقي جدا
للاسف انتوا كلكوا عمالين تختلفوا مع بعض
مع ان الاسس واحده تقريبا
لكن عمر ما كل واحد هايبص لوجهة نظر التاني ويخليها تبقا وجهة نظره كده بالعافيه
لان ببساطه انت يا عمرو تحديدا
دخلت في منطقه جديده في الاختلاف
وهي الدين
وطبعا راي الدين يفوق راي اي حد تاني
لكن لو دخلنا راي الدين يبقا زي ما قالتلك ساره
المفروض فيه حاجات كتير اوي تتلغي
نلغي الاغاني باعتبار انها حرام شرعا وده مش محتاج تأويل
نلغي السجاير
نلغي الشيشه ع القهوه
لو حد سمعك بتشتم .. تتجلد
ونطبق بقا شريعة ربنا
طب اشمعنا عايز تطبق شريعة ربنا عليا
ومش عايز تطبقها عليك وعلى الكل
وبعدين اللي انت بتسميه تحرش بصري
ده موجود بارضه عند الولاد
نقطة الخلاف جدليه
الجدل اللي بيؤدي الى ما لا نهايه
ياريت نقفل الحوار ده لان الخلاف فيه ساسا مش منطقي
انا رايي الاخير
وربنا يقدرني واعمل بوست ولو انها متاخره
بس
الرجل = المرأه = مجتمع فاشل
الرجل + المرأه = مجتمع متكامل
لو خدنا راحتنا في الكلام مش هانخلص
النقطه الجدليه انتهت من اولها
لما انت بتتكلم عن حقك كراجل
ولما ساره وماجي اتكلموا عن حقهم كبنات
وبما ان انتوا التلاته متفقين على اساس مبدا الحريه ومختلفين على مبدا الحقوق
يبقا المناقشه باطله . والخلاف باطل لان انتوا بتختلفوا على الجزء مش ع الكل
او على الخاص مش ع العام
والخاص او الجزء ده انتوا كل واحد بيعرض وجهة نظره من جهة مصلحه
ماتعملش بوست تاني في الحوار ده
اكتب عن اي حاجه تانيه لو سمحت يا عمرو

Che يقول...

عادل
مش مشكله التعليق دلوقتى يا دولا بس بعد ما اخلص هستنى اسمع تعليقك
نورتنى يا عادل

Che يقول...

حرووف
ربنا يخليكى و يا رب يفضل الكلام عاجبك للاخر يا سالى
نورتينى يا سالى

Che يقول...

خواطر شابه
النقطه بتاعت رفض التعدديه و موقف الرسول تحديدا هرد عليها فى البوست الجاى
نورتينى يا خواطر

Che يقول...

فتاه من الصعيد
كلامك صح كله ... و مع كده تلاقى انه لسه فيه ناس بتتكلم على العادات و التقاليد و انها اقوى من القانون و ليها السلطه المطلقه ... نقطه غض البصر نقطه صح تماما ... و هيبقى ليا اضافه فى البوست الجاى
نورتينى يا فتاه

Che يقول...

ساره
انا هرد هنا مع انى كنت عايز ارد فى البوست الجاى بس ماشى و طلباتك اوامر يا ساره
انا طبعا مش مستنى منك غير الصراحه المطلقه و دى احسن حاجه .... اولا انا مقلتش انى بكتب البوست ده للدعم و الاتفاق ، انا قلت انى موافق على حق الانثى انها تحس بالامان فى الشارع لأن ده حقها .... موضوع الدين انتى برضه مسكتى فى النقطه دى ... انا طبعا مينفعش فى وسط ندوه للبهائيين اتكلم على موضوع الدين لأنى كده هكون ضربت الموضوع كله فى مقتل .. بس اللى حصل و اللى بيحصل انه فيه ناس كتير لما بتتكلم على الموضوع ده بيقولو ردا على نقطه اللبس ان لو واحده ماشيه عريانه انا اغض بصرى ، و انا اظن ان غض البصر ده من صلب الدين عشان كده لازم ارد عليهم بمنطقهم ... باقى الناس اللى بتتكلم من زاويه تانيه غير الدين برضه رديت عليهم بمنطقهم .. يعنى انا مش بخلط الامور ببعض ، هما اللى بيعملو كده
مسأله التحرش و علاقتها بالبعد الاجتماعى و الاقتصادى صح جدا جدا و احنا اتكلمنا عليها فى الانبوكس و هرجع اتكلم عليها فى البوست الجاى بالتفصيل شويه
مسأله الدين انا اتكلمت عليها فى نقطه محدده ... قلت انه مينفعش افصل فى الدين على مزاجى ... يعنى مثلا انا بشرب شيشه و بشتم و بعمل حاجات كتير غلط و حرام ... بس عمرى ما فكرت انى اغير فى الدين عشان اخلى اللى بعمله ده صح و مش حرام ... بس المسأله المتعلقه بالمواريث و الزواج التانى تحديدا دى مينفعش فيها انى اقول انه بما انى بعمل حاجات حرام يبقى متكلمش لو شفت حاجه حرام بتتعمل ... الفكره انى اعترف ان اللى بعمله غلط ولا صح
مسأله الابروتش دى تعبانى أوى يا ساره ... انا لما اتكلمت على الجواز التانى تحديدا بأستفاضه شويه كان من باب الشئ بالشئ يذكر .. يعنى انا لو مكنتش شرحت كانت ناس هتيجى تقولى ايه ادلتك ان الجواز التانى ينفع من غير اسباب .. و اخر حاجه انتى لا سخنتى ولا حاجه ... براحتك خالص و هرد بأستفاضه اوسع فى البوست الجاى

Che يقول...

ماجى
better to be late than never
ده عشان مسأله الوقت ... و على فكره الموضوع مخدش وقت اكتر ما الوقت ضاع فى انى اكتب .. يعنى انا و زيكا و ساره قعدنا نتكلم فى الموضوع ده يمكن لمده 3 ايام او اكتر
نتكلم على نقط الخلاف اللى بينا
* مسأله جمع سيدنا على ابن طالب لزوجه مع السيده فاطمه عليها خلاف ، لأنه فيه بعض المراجع بتقول انه فعلا تزوج ام البنين و الرسول اجبره على تطليقها ... النقطه اللى انتى اتكلمتى عليها بالنسبه لتخيير الرسول ليه للزواج بأخرى او تطليق السيده فاطمه كانت محدده لما ناس قالو للرسول انه سيدنا على هيتجوز بنت ابو جهل .. و قاله لا تجتمع ابنتى و ابنه عدو الله تحت سقف واحد لأن فاطمه منى و ما يسيئها يسئنى و انا اخاف عليها ان تفتن فى دينها ... و قال الرسول معاذ الله ان احرم ما احل الله او احل ما حرمه
* ابناء سيدنا على زى ما انتى قلتى .. بس انا لما ذكرت الحسن و الحسين تحديدا كان لسببين ... انهم ليهم قيمه تاريخيه و دينيه و ثانيا انهم ذكور و انتى عارفه انه بعض الناسو لغايه دلوقتى بيبقى نفسهم فى الذكور ... يعنى قلتاه عشان انفى رغبه سيدنا على فى الزواج لأنجاب الذكور
* الزوجه من حقها تطلب الطلاق لزواج زوجها عليها فى خلال سنه ميلاديه من تاريخ علمها بالزواج ده ... و اللى بيحصل انها بتطلبه للضرر .. و القاضى يمكن يحكم بطلاقها اذا ( و خلى بالك من اذا لأنها محوريه فى نص القانون ) استطاعت الزوجه اثبات الضرر .. و من حق القاضى انه يبعث حكمين لتقصى الاحوال بين الزوجه و زوجها و ليه الحق برضه اذا رأى عدم وقوع ضرر عليها انه ميحكمش ليها بأى حاجه و يلزمها كمان بمصاريف ... و ده من واقع قانون 100 لسنه 1985 اللى هو تعديل لقانون 1979 ... و انا هنا مش بتكلم على قانون الخلع اللى هو 1 لسنه 2000 لأن الاتنين مختلفين عن بعض
* بالنسبه للضرر شرعا يجب على الزوجه اثباته سواء بسوء معامله .. او بعدم انفاق ... ده من ناحيه الشرع
* الزواج التانى غير مقرون بموافقه الزوجه زى ما انتى قلتى ... و طلب الطلاق على اساسه للضرر يجب اثباته زى ما قلنا فوق
* القاعده الفقهيه اللى بتدى الحاكم الحق فى تقييد المباح و تحريمه صح .. بس بتكون لمده محدده مش بتكون مطلقه .. و قياسا على كده تعليق حد السرقه ايام المجاعه فى زمن سيدنا عمر و الحد رجع تطبيقه بعد انتهاء زمن المجاعه ... انما اذا كان التقييد و المنع ده هيبقى دائم يبقى ده اسمه تغيير فى الشرع و العقيده ... قياسا على كده هل من حق الحاكم انه يوقف العمل بالمواريث الشرعيه مثلا
* انا طبعا مع حقوق المرأه .. مش عشان هى مرأه انما عشان هيا كائن حى ... يعنى انا مع حقوق البهائيين زى ما ساره قالت لأنهم فى الاخر بشر برضه
* انا لما ناقشت الموضوع من ناحيه دينيه ناقشته لأنى اتكلمت على نقطتين مينفعش اغفل دور الدين و هما نقطه المواريث و نقطه الزواج التانى و دول من اولويات الجمعيات و المنظمات النسائيه
* طبعا انا مش هفرض على كل واحده تشوف رأى الناس فى لبسها ... انا كل اللى اتكلمت عليه هو اختلاف الطبقات الاجتماعيه فى نظرتها للبس و تعريفه ... يعنى مثلا الفستان اللى بتلبسيه و انتى رايحه فرح فى الهيلتون او فى سيتى ستارز اكيد هيعتبر اوفر لو روحتى بيه فرح فى ناهيا مثلا ... او المايوه اللى بتلبسيه فى بورتو مارينا مينفعش تلبسيه فى بلطيم .. يعنى المسأله ليها علاقه بالبعد الاجتماعى مش اكتر
* انا بربط بين الحريه و المرأه و الدين مش عشان الخلط .. انما عشان لو فيه حريه حقيقيه مكناش هنبقى بنتكلم على حقوق المرأه ... و بالنسبه لنقطه الدين لأن فيه ناس كتير بتتكلم على دور الدين .. يعنى انا هنا بحاول اكون محايد و انقل وجهه نظر المجتمع للموضوع ده ... و طبعا الحريه انك تختارى الدين اللى يعجبك ... و مش كده و بس .. انما كمان تختارى تعملى ايه فى الدين ده و تسيبى ايه ... بس الفكره متجيش تعملى حاجه غلط و تقولى لا هيا صح ... الحريه الحقيقيه انك تتحملى نتيجه قراراتك مهما كانت النتايج
تعليقك طويل أوى يا ماجى بس دسم و انا استمتعت سواء بقرايته او بالرد عليه ... مستنى تعقيبك عليه و على البوست الجاى
نورتينى يا ماجى

Che يقول...

زيكا
ماشى يا زيكا انا مستنى اشوف ردك فى الاخر
نورتنى يا زيكا

Che يقول...

اسماء
والله يا اسماء انا لو عارف ان البوست ده هيخليكى تعلقى و تبانى كنت نزلته من بدرى ... ههههه
انا فرحان ان البوست عاجبك ... و طبعا لازم رأى ساره و ماجى يعجبك .. فاكره ايام ماكنتو هتكهربو الفيس بوك كله عشانى انا و زيكا .. ما علينا
اللى انتى بتقوليه صح بالنسبه لوجهات النظر ... على فكره انا قلت لساره اننا زيكا و انا مش مختلفين معاها .. بالعكس .. احنا بنتكلم على نفس الحاجه بس من وجهتين نظر غير بعض
مسأله الاختلاف فى الدين انا اللى اتكلمت عليه الاختلاف فى الثوابت مش اكتر ... يعنى مينفعش اغير فى الدين و اقول ان دى وجهه نظرى ... مسأله الشيشه و الشتيمه فأنا معترف انها غلط و حرام و عمرى ما قلت انها صح ... بس مينفعش اجى اقول انا لما اشرب حشيش ده حلال ... انا كده ابقى بقول كلام مش سليم
و بعدين انا مش عايز اطبق الشرع عليكو و مطبقوش عليا ... بالعكس .. كلنا لينا رب هيحاسبنا ... انا اللى قلته مينفعش نغير فى الدين عشان يناسبنا
انا فعلا هقفل الحوار فى الموضوع ده بس بعد ما اكتب البوست الجاى بس يا سمسم
نورتينى يا اسماء

magi يقول...

اسفه على طول التعليق الاول واسفه برده لان التعليق ده هيبقى اطول

1- اى روايات الى بتذكر زواجه منها ولا روايه على حسب علمى او على الاقل فى صحيح مسلم والبخارى وانا راجعت على السريع سنن الترمزى والنسائى وابن ماجه وملقتش حاجه برده فياريت تجيب الروايه لانى مش لقياها
2-
حدثنا قُتَيْبَةُ حدثنا اللَّيْثُ عن بن أبي مُلَيْكَةَ عن الْمِسْوَرِ بن مَخْرَمَةَ قال سمعت رَسُولَ اللَّهِ صلى الله عليه وسلم يقول وهو على الْمِنْبَرِ إِنَّ بَنِي هِشَامِ بن الْمُغِيرَةِ اسْتَأْذَنُوا في أَنْ يُنْكِحُوا ابْنَتَهُمْ عَلِيَّ بن أبي طَالِبٍ فلا آذَنُ ثُمَّ لَا آذَنُ ثُمَّ لَا آذَنُ إلا أَنْ يُرِيدَ بن أبي طَالِبٍ أَنْ يُطَلِّقَ ابْنَتِي وَيَنْكِحَ ابْنَتَهُمْ فَإِنَّمَا هِيَ بَضْعَةٌ مِنِّي يُرِيبُنِي ما أَرَابَهَا وَيُؤْذِينِي ما آذَاهَا.
وده من صحيح البخارى
وده معناه كما هو واضح يعنى ان رفض رسول الله لزواج على بن ابى طالب رضى الله عنه من جويريه كان فى الاساس لرفض ابنته السيده فاطمه رضى الله عنها لهذا الزواج
كمان فى حديث تانى على ما اذكر انه ذكر اصهاره من بنى شمس وقال (ص) انه فى معناه ان صهره حدثه وصدق وهو زوج زينب على ما اتذكر برده وقريت فى احد التفاسير ان ده كان يقصد به ان زوج السيده زينيب وعد بعدم الزواج عليها زيه زى على ابن ابى طالب (ر(
ده معناه واضح جدا وهو ان الرسول عليه الصلاه والسلام لا يحل حراما ولا يحرم حلالا ولكنه فى نفس الوقت بيرسى قاعده ان الزوجه لها الحق فى طلب الطلاق عند ضررها من زواج زوجها بأخرى والا مكنش (ص) خطب فى الناس علانيه واكتفى باعلام على رضى الله عنه بكده واحنا كمسلمين وسنه بنعتبر اقوال وافعال الرسول عليه الصلاه والسلام من صميم مراجعنا للحلال والحرام والتشريع
2-
القانون 100 لسنه 1985 ماده 11 مكرر بتنص على انه يجوز للزوجة التي تزوج عليها زوجها ان تطلب الطلاق منه إذا لحقها ضرر مادي او معنوي يتعذر معه دوام العشرة بين أمثالها ولو لم تكن قد اشترط عليه فى العقد الا يتزوج عليها, فإذا عجز القاضى عن الإصلاح بينهما طلقها عليه طلقة بائنة.
مش بمزاج القاضى يعنى او لو ملقاش ضرر عليها لان الضرر المعنوى منصوص عليه فى نص الماده
وبالنسبه لرأى الشرع بقى
انا مازلت عند رأيى فيه قياسا على الموقف السابق
3- فى فرق بين تقييد المباح (وعلى فكره تقييده بيكون مشترط بظرف مش بمده زمنيه وعند انتهاء الظرف ينتهى المنع )
وبين تغيير المواريث لان المواريث من الحجات القليله الى ذكرت مفصله جدا جدا فى القران ومشدد جدا على تأثيم الى يخالف نظام المواريث ده وبعدين انا بتكلم على تقييد المباح مش على مخالفه نصوص قرانيه وعمل عكسها وفى فرق كبير بين ده وبين تقييد المباح
______________________________
* طبعا انا مش هفرض على كل واحده تشوف رأى الناس فى لبسها ... انا كل اللى اتكلمت عليه هو اختلاف الطبقات الاجتماعيه فى نظرتها للبس و تعريفه ... يعنى مثلا الفستان اللى بتلبسيه و انتى رايحه فرح فى الهيلتون او فى سيتى ستارز اكيد هيعتبر اوفر لو روحتى بيه فرح فى ناهيا مثلا ... او المايوه اللى بتلبسيه فى بورتو مارينا مينفعش تلبسيه فى بلطيم .. يعنى المسأله ليها علاقه بالبعد الاجتماعى مش اكتر
***
ده مش الى انت قايله فى البوست و وبرده مش فاهمه وجهه نظرك يعنى انت عايز تقول حاجه قولها بصراحه ومن غير تزويق للكلام لان ده هو الى انت بتعمله دلوقتى
يعنى مثلا قول والله يا جماعه انا شايف ان الستات هما سبب مشاكل الكون ساعتها هنحترم رأيك ونناقشه لكن انا بصراحه مش فاهمه انت رأيك ايه لانك كل شويه تغير الفكره الى بتناقش منها
مره تقول انا مع الحريه ووو ومره تقول اه بس الدين بيقول والقانون بيقول وفلان بيقول ومقلتلناش برده انت رأيك ايه ؟

Che يقول...

ماجى
مايهمكيش من طول التعليق ، اعتبرى المدونه مدونتك
* الروايه اللى بتذكر واقعه جمع على ابن طالب ام البنين على السيده فاطمه انا مش متذكرها لانى قريتها من زمان ، تقريبا فى على امام المتقيين لعبد الرحمن الشرقاوى او سيره على لخالد محمد خالد .. و لسوء الحظ الدنيا مكركبه عندى فى الشقه حاليا بس اكيد هطلع الكتاب و هقولك المصدر
*أخرج الشيخان وأبو داود وابن ماجه وأحمد من حديث المسور بن مخرمة أن رسول الله صلى الله عليه وسلم قال: إن فاطمة مني، وأنا أتخوف أن تفتن في دينها.. وإني لست أحرم حلالاً ولا أحل حراماً، ولكن والله لا تجتمع بنت رسول الله وبنت عدو الله أبداً .... ده الحديث موضع الخلاف و منه يتضح ان النهى كان بسبب ابو جهل انه ام العروس ... و مع ذلك تفضل النقطه المحوريه انه مش لازم الراجل يستأذن مراته قبل الجواز التانى ... الا لو كانت نصت عليه فى عقد القران انه لا يتزوج عليها ، بس النقطه دى انتى قلتيها قبل كده بالفعل
* القانون 100 لسنه 85 انتى ذكرتى الماده 11 مكرر من غير ما تذكرى الماده 6 اللى هى الاصل
مادة 6

اذا ادعت الزوجة إضرار الزوج بها بما لا يستطاع معه دوام العشرة بين أمثالها يجوز لها ان تطلب من القاضى التفريق وحينئذ يطلقها القاضى طلقة بائنة إذا ثبت الضرر وعجز عن الإصلاح بينها فإذا رفض الطلب ثم تكررت الشكوى ولم يثبت الضرر بعث القاضى حكمين وقضى على الوجه المبين بالمواد 11,10,9,8,7
... و المواد دى بتبين طبيعه عمل الحكمين ... و ارجو انك تبصى على الماده 10 و الماده 11 اللى فيهم يحق للقاضى بناء على تقرير الحكمين انه ممكن يسقط كل حقوق الزوجه ... يعنى زى ما انتى مش بمزاج القاضى انما بناء على تقرير الحكمين اللى بيرفعوه للقاضى ... النقطه الخاصه بتونس بخصوص تقييد المباح ... اللى حاصل هو تقييد المباح ام منعه منعا تاما ... و اكيد فيه فرق بين التقييد و المنع
* على فكره ان مش شايف ان الستات سبب مشاكل الكون ، فى اسباب كتير جدا و بعضها راجع للمجتمع و دى كان قصدى بالمثال اللى ضربته ان اللى يصلح لطبقه اجتماعيه معينه ميصلحش لطبقه تانيه ... و على فكره انا لغايه دلوقتى مع فكره الحريه ... و برضه انا معنديش مانع ان الواحد يعمل حاجه حرام .. هو حر ... بس مش يعمل الحرام و بعد كده يعمل عبيط و يقول معرفش ، او يعمل خبيث و يقول اللى بعمله مش حرام
و رأيى بصراحه انى مع الحريه الشخصيه حتى لو عملتى اى حاجه حرام ، لأن فى الاخر ربنا اللى هيحاسبك و بناء على قرارتك و اختيارتك هيكون حسابك .... كده رأيى واضح ولا لسه فيه حاجه مش واضحه ؟

مي يقول...

اولا جميل البوست جدا وانا متفقة معاك فى نقاط كتيرة وبرضه احب اسمع نقاشك فى حاجات كتيرة
يمكن مش هقول حاجة احسن من اللى اتقالت من اللى قبلى بس احب برضه اتناقش معاك انت
وطبعا انت عارف مين دايما بيفوز فى النقاش(:
ماعلينا

بص انا تابعت عند مايكل وبصراحة الموضوع جميل جدا و مفيد اوى لنا بس
انا عندى اختلاف فى الحكاية دى وقلتها لمايكل
مساواة ايييييييييه احنا يعتبر خلاص بقينا متساووين ايه اللى ناقص بصراحة اوك فى بعض الارياف قهر من نوع ما ولكنه اصبح نادرا دلوقتى الست بتنزل تشتغل وتتعلم وتتزوج وتصرف يعنى حرية وكمان مناصب راقية جدا فى رجالة موصولهاش انا شايفة اى حركات هتكون جديدة يبقى كده بتفتح النار على ليلى وبتخرب بيتها بدرى بدرى
وليلى كده بدأت تكتسب الصفات الرجولية مع ان ديننا كرمها جدااا واعطاها حقوقها ولكن الندية والعناد وكلام الجمعيات !!
بخصوص الهدف معرفش ايه هو اصلا يمكن هيوأدوا الرجالة
مش شايفة لها هدف لاننا اصلا مش زى بره ياجماااااعة ولا هنكون زى بره ومينفعش افصل مجتمع ودين لان ده اساسنا من غيره نضييع
مينفعش اتكلم باسلوب علمانى وانا فى بلد مسلم او بلد ماشى شرع معين وتقاليد اسلامية

الحرية مش بتتجزأ انا معاك بس الحرية مش فجور الحرية لها قوانين الحرية مش نمشى عريانين ونقول الله ماتبصش !!! دى حرية
بص يا عمورة دلوقتى الحكاية لو انت زى مابتقول هرمونات
يعنى ايه هرمونات بتخليك تعمل حاجة يعنى ايه متقدرش تمسك نفسك طب ايه الفرق بين الانسان والحيوان ساعتها
وطبعا انا مش مع البنت اللى فاتحاها عالبحرى وتقول حرية لالالالالا طبعا
دى زى البضاعة المكشوفة لازم يجرى عليها الذباب ويدوق المعروض
وغالبا بتعمل كده عشان هى حابة كده
مع ان فى حكاية غريبة اوى طب ليه برضه الهرمونات بتلعب لما بيشوف واحدة منتقبة ها؟؟؟؟؟؟؟؟؟
اكتر بلد بتعجبنى السعودية حاطين معيار للبس محدش يقدر يتكلم لانهم صح كده بيحافظوا عالبنت حتى لو عقلها ناقص
حكاية البنطلونات اللى غريبة دى
دى يمكن رد من قبل الشباب الهايف
بس دى مش حرية دى دعوة للفجور ويلا انتوا يابنات بتبينوا طب واحنا كمان والحكاية تبقى هيصة وفرح وكل يوم نعرى اكتر تكسب اكترررررررر
وكده انهى النقطة دى ياريت يكون فيه قوانين تفرض زى معين على البنت وكده الرجالة بتوع الهرمونات يتهدوا بقىىىى

طبعا فى حكاية تفصيل الدين دى متنفعش
يعنى ايه مواريث تتوزع بالمساواة لا طبعا فى اعتبارات كتيرة واحنا كمسلمين نعلمها ومفيش مجال لشرحها لانها معروفة
فاى ست تقول كده مالهاش غير كلمة واحدة.........


هنا بقى بختلف معاك يعنى ايه راجل يتجوز تانى بدون اسباب ياسلالالام
اصل انتوا الرجالة ماتصدقوا اى حاجة وتخربوا البيت دى بقى ممكن تكون طفاسة فراغة عين الله اعلم ياسيدى الفاضل الاسباب ممكن تكون اولها انها تكون عاقر او مرض معين او انه بيحب امرأة اخرى لدرجة يخاف من الزنا او لعد الاستمتاع الجنسى بينهم
اعتقد دى اساليب مقنعة جدا غير كده تبقى دلع
ماهو متجيش بعد عشرتى معاك تقولى باى باى احب اغير العتبة
وبعدين ليها حق ترفض الطلاق للضرر النفسى لو هى مش عايزة ضره وده اقل حق ليها وليه بقى ميصرفش عليها لالالالالا طبعا ليها حق تاخد كله مادام انت اللى عايز تعيش حياتك اتفضل بس برضه هى لها حقوق وهى مسبتكش منها لنفسها لاهى سبتك عشان انت فضلت عليها اخرى واصلا فى القانون ليها حق نفقة اعتقد لمدة سنة واعتقد ان من حقها برضه ان الزوج يصرف على الاطفال للنهاية
وياسيدى نفترض انها موظف طلع عالمعاش دى اقل حاجة لها
الا طبعا لو اتجوزت هى يبقى خلاص

وعلى فكرة تعدد الزجات مشروط زى ماقلت فى الاول ومكروه
ومتقوليش الرسول ولا على بن ابى طالب لان مفيش راجل زيهم
الرسول (ص)
انتوا اعلم منى بشوؤن دنياكم
يعنى زماننا غير زمانهم ولا فى راجل زيهم ولا زى الصحابة يبقى مفيش وجه مقارنة

وحكاية زواج على طبعا الرسول رفض ده لانه ايذاء لمشاعر فاطمة
وخاف عليها من الفتنة والغيرة
ولانه اب فى المقام الاول حتى لو قلتلى حاكية بنت ابى لهب
والمعروف ان على اعتذر لفاطمة بعد هذا وانجب الحسن والحسين

فان خفتم الا تعدلوا فواحدة
وده صعب انك تعدل فى الحب والقلب
فمابالك الحياة الصعبة

احنا مش بنجرمالزواج التانى لان فى حالات كتيرة بتستدعى ده وانا الدين يييسر ولا يعسر
واخيرا وليس اخرا صعب تغير مجتمع
صعب تغير فلسفة احنا عشناها بالرغم انها كانت فلسفتنا زمان فلسفة راقية طب ما ممن 30 سنة كان ليه اللبس عادى ومفيش مضايقات
المساواة كويسة بس انا شايفة ان المرأة نالت الكثير والكثير فاضل ايه تانى
ياريت نبص للنصف المملوء

لاننا كده مجتمع اسلامى هيتمسك برغم انف الكل بالتقاليد اللى اتعودنا عليها
يظهر انى لتيت على قلبك كتير بس يلا انت دايما بترحب بده وده اللى عودتنا عليه معاك
وبجد سعيدة بنظرتك فىالبوست وكمل يا مان احنا معاك

magi يقول...

دلوقتى فى عده روايات لموضوع محاوله على رضى الله عنه الزواج من اخرى اصحها وادقها والى ذكرت فى الصحيحين الى انا قولتهالك فى التعليق الى قبل ده
غير كده فى الروايه الى انت ذكرت منها جزء
ودى برده فى الصحيحين لكن سندها اضعف
حدثنا ‏ ‏عبد الله بن عبد الرحمن الدارمي ‏ ‏أخبرنا ‏ ‏أبو اليمان ‏
أخبرنا ‏ ‏شعيب ‏ ‏عن ‏ ‏الزهري ‏ ‏أخبرني ‏ ‏علي بن حسين ‏ ‏أن ‏ ‏المسور بن مخرمة ‏ ‏أخبره ‏
أن ‏ ‏علي بن أبي طالب ‏ ‏خطب ‏ ‏بنت ‏ ‏أبي جهل ‏ ‏وعنده ‏ ‏ فاطمه بنت رسول الله ‏ ‏صلى الله عليه وسلم ‏ ‏فلما سمعت بذلك ‏ ‏ فاطمة ‏ ‏أتت النبي ‏ ‏صلى الله عليه وسلم ‏ ‏فقالت له إن قومك يتحدثون أنك لا تغضب لبناتك وهذا ‏ ‏علي ‏ ‏ناكحا ‏ ‏ابنة ‏ ‏أبي جهل ‏ ‏قال ‏ ‏المسور ‏ ‏فقام النبي ‏ ‏صلى الله عليه وسلم ‏ ‏فسمعته حين تشهد ثم قال ‏ ‏أما بعد فإني أنكحت ‏ ‏أبا العاص بن الربيع ‏ ‏فحدثني فصدقني وإن ‏ ‏ فاطمة بنت محمد ‏ ‏مضغة ‏ ‏مني وإنما أكره أن يفتنوها وإنها والله لا تجتمع بنت رسول الله ‏ ‏وبنت عدو الله ‏ ‏عند رجل واحد أبدا قال فترك ‏ ‏علي ‏ ‏الخطبة ‏
(
‏ الى يتفهم هنا ايه ان اعتراض فاطمه على الزواج -حتى ولو كان اعتراض على الزوجه التانيه- مش على الزواج نفسه هو شئ مقبول وقبل به النبى واعلنه علانيه على المنبر ومش حكم خاص بفاطمه وحدها

تانى نقطه على بن ابى طالب تزوج فعلا**
أم البنين بنت حزام
وولدت له العباس وجعفراً وعبد الله وعثمان
ولكن ده كان بعد وفاه السيده فاطمه
الى انت بتتكلم عليها هى جويريه -برده اسمها مش متأكده منه لان فى عده روايات ليه-فغالبا انت اختلط عليك الامر

تالت حاجه بالنسبه للقانون 100 لسنه 1985
فى الماده 11 مكرر معيار الضرر يعد معياراً موضوعياً وليس معياراً ذاتياً كالضرر في مفهوم المادة ( 6 ) وده مش كلامى انا وممكن تتأكد منه برده
اخر نقطه بقى احنا الاتنين بتوع كيميا ولو كملنا على كده هنبقى محتاجين لحاجتين خبير قانونى وعالم دين
فنكتفى بهذا القدر
خصوصا لان اصلا الى بنتكلم فيه ملوش علاقه اساسا بالموضوع الاصلى

بحر الالوان يقول...

قبل البحث عن الحل لابد من فهم المشكلة ..... فالحلول الجاهزة تعتبر كلاما مرسلا مضاف الي تلك المكلمة في هذا الار منذ عهود .

1- فكرة حقوق المراة ظهرت ابتداءا في المجتمع الغربي مع بدايات عصر التنوير التي ضاقت ذرعا بفكرة الدونية التي تتعامل بها كثير من الشرائح من البشر في مجتمع اقطاعي وطبقي وكهنوتي ايضا .

2- ما قبل تلك المرحلة كانت المراة في الفكر الغربي مصدرا للشر والغواية التي تتوافق مع بعض الاطروحات الوثنية وايضا الروايات الواردة في التوراه والانجيل ......وتلك الاطروحات ليس لها مثيل في التاريخ العربي او الاسلامي بشكل متاصل .... فالاسلام لا ينظر تلك الدونية للمراة ويساوي بينها وبين الرجل في الحقوق والواجبات بشكل يفي للمراة حقها .

3- تطور فلسفة التنوير في الغرب ادت الي ظهور ما يسمي بفلسفة الانسنة التي صاحبها فصل الدين عن الدولة والمعاملات ...... ومن هنا ظهرت دعاوي المساواة بين المراة والرجل في الحقوق والواجبات ...... ومع هذا ظلت فكرة المساواة من منظور فلسفي وليس حسابي

4- مع نهايات الحرب العالمية الثانية .... فوجئ الغرب بحاجاته الملحة لاعادة اعمار ما دمرته تلك الحروب الشرسة ..... مع وجود اشكالية وهي مقتل اكثر من 15 مليون شاب في تلك الحرب المريرة .... وهنا ظهرت الحاجة الملحة لوجود المراة في سوق العمل بشكل اساسي ...ومع علو المد الشيوعي الذي يري في الافراد سواء رجالا او نساء ابناءا للدولة ..... هنا اصبحت فكرة المساواة الحسابية بين المرأة والرجل امر واقع ...... وتغير مفهوم المساواة من منظور انساني الي منظور حسابي قائم علي فكرة الوحدات المتماثلة

5- لاشك ان هذه الاطروحات افادة المرأة في الغرب علي صعيد العمل وحقوقها القانونية والسياسية ...... ولكنه ادي الي تراجع اجتماعي رهيب لمركز المراة في الغرب ...... ولعل الملاحظ من الاحصاءات في الغرب يجد ان هنالك انهيار في مؤسسة الزواج .... ارتفاع في نسب المراة المعيلة .... كذلك فان فكرة التشريعات الموجودة في الغرب مثل الحماية من جرائم التلصص ( وهو امر مستغرب في مجتمعات قائمة علي الاباحية) ... والقوانين التي تمنع العنف الاسري والخطوط الساخنة ..... الخ ....هذه القوانين بدعة غربية ..... وهي دليل علي الخلل اكثر منه دليل علي التحضر

6- المشكلة لدينا في الشرق اننا نقفز علي اطروحات الغرب دون وعي منا بطبيعتها ....فالتجربة الانسانية الناجحة في مكان ما ليس بالضرورة ان تنجح في مكان اخر ...... لهذا لابدا ان يكون الحل نابعا من منظور متوافق مع طبيعة المجتمعات سواء تاريخية او سياسية او اقتصادية

7- اري ان كثير من المتحدثين والمعلقين يتحدث عن تفصيلات جزئية ومواقف شخصية ربما تكون نابعة من قصور امني او خلل اجتماعي ..... ليعتبرها برهانا علي دونية المراة في الشرق .... بالطبع هي تعاني من مشكلات حقيقة ولكنها ليست استهدافا للمرأة وانما هي واقع مرير يعاني منه الرجل والمراة علي حد سواء .
وهنالك من يرمي الشرق بالازدواجية او الشهوانية وكانها حكرا علينا دون العالم .....وهذا غير صحيح وانما الفارق ..... اننا نعاني في الشرق من اعلي نسب الشباب في العالم اجمع .... واعلي معدلات بطالة في العالم ....وبالطبع غياب مفهوم الدولة القانونية بكل انعكاستها علي غياب العدالة بكل مدلولاتها.

لهذا فالحل في تواجد الحد الادني من المعايير الانسانية المكفولة لكل الافراد واهمها بالطبع هي حالة الامن الشخصي ......كما اخالفك في فكرة الهرمونات لانها ليس مبررا للاذي .

تحياتي لك

غير معرف يقول...

علي لم يتزوج علي فاطمة حد علمي ومظنش يكون اعتراض الرسول السبب أظن علي كان بيحب فاطمة فعلا والرسول مكانش ينفع يمنعه يتجوز علي مراته لأنه هوه شخصيا متجوز تسعة منهم اتنين من سن أحفاده عائشة وحفصة فحتي الرسول لو مكانش مبسوط بالفكرة مظنش كان ينفع يعترض لأنه مش مثال في الالتزام بزوجة واحدة

Che يقول...

غير معرف
انا نشرت تعليقك برغم اختلافى معه ، بس انا مؤمن بحاجه اسمها حريه الرأى
بس ارجو انك تنشر بهويتك الحقيقيه ، و لو خايف من المشاكل ممكن تبعت تعليقاتك و انا منشرهاش و اناقشك فيهاعشان عندى الكنترول على نشر التعليقات
نورتنى