فاضل اسبوع بالتمام و الكمال و المدونات تكون كملت سنه .... مدونتى البكريه هى واحد جامعه و هى احبهم لقلبى ... يمكن عشان البكرى بتكون ليه معزة خاصه .... بس ده ميمنعش ان خمسه جد اكتر مدونه بكتب عليها ... هى التانيه فى الترتيب
انا فى خلال الاسبوع ده هنشر 3 بوستات ان ربنا احيانى و كان ليا عمر و نصيب .... بعد التلات بوستات دول الله اعلم انا هعمل ايه
جايز ابطل تدوين ... جايز اخد اجازه طويله ... جايز معملش حاجه من ده كله و افضل اكتب .... ربنا وحده اللى عارف هو كاتبلنا ايه
كلمه اخيره .... انا بجد عرفت ناس كتير هنا ... مقابلتش ولا حد فيهم مقابله شخصيه بس بجد كأنهم اهلى و يمكن اكتر شويه ... اى حد زعلان منى انا غلطت فى حقه انا بعتذرله و بقوله حقه عليا ..... انا هخص شخصيه واحده بس بالاعتذار لانها طلعت اكبر منى بجد .... العمه ستيته حسب الله الحمش ..... اتكلمت عنى مرتين .... مره تلميحا و التانيه تصريحا .... و انا مهما كنت وحش بس اتعلمت ان اللى يزعل حد فى شارع لازم يصالحه فى شارع برضه مش فى حاره .... و العمه ستيته صالحتنى فى الجمهوريه كلها مع انى انا اللى كنت غلطان و كبرت الموضوع زياده عن اللزوم .... انما هقول ايه .... طيش شباب بأه يا عمه و انتى بجد الكبيره ... كبيره مقاما مش سنا عشان بس متقفشيش عليا تانى .... بس كبيره سنا عنى برضه .... ههههههه
شخصيه تانيه مش هقدر اقول اسمها لانى مخدتش الاذن منها انى اقول الكلام ده ... قالتلى فى يوم جرب تسامح الناس ، ده حلو علشانك مش علشانهم على فكره ...... انا على فكره رديت عليها بكل صراحه .... قلتلها انا غير قادر على مصالحه الناس لأنى مش قادر اصالح نفسى
كلامى خلص و ليكو عندى 3 بوستات فى خلال الاسبوع ..... سلام
هناك 24 تعليقًا:
عيد ميلاد سعيد لمدوناتك مسبقا وعقبال السنين اللي جاية ان شاء الله.
القدرة على الاعتذار وعلى الاعتراف بالذنب فضيلة لايتحلى بها كل الناس.
في انتظار بوستاتك القادمة تقبل تحياتي
اولا كل سنة وانت ومدوناتك بخير ويارب دايما ربنا مايحرمناش منك ولا من كتاباتك
ثانيا انا عرفتك ياعمرو واتكلمت معاك بس بجد هتكلم بالرغم انى مهيسة عالطول
بس بجد كان حلم عندى انى اتكلم مع شخصية موهوبة وليها تفكير معين احسدك عليه دايما بستفاد من كلامك بجد لان نظرتك للحياة ممزوجة بواقعية ليس لها مثيل حسيت انك ناضج بعقلك كرجل فى الهرم من عمره يمثل الحكمة
وشقاوة طفل ممزوجة بخفة دم رهيبة
غير انى لاحظت انك صريح حتى لو صارحتك دى بتألم اللى ادام بس انت مبتعرفش تلون كلامك
مش عارفة اقول لانك يتكتب فيك وفى مدوناتك كتب
اشكرك صديقى على وجودك فى حياتنا ويارب دايما تكون مبدعا ونستمتع بتدوينك معنا
مبروك ياعمونا
وايه ده يعني انا بكتب قبلك ؟؟
اول مرة اخد بالي :)
ولا هتكتب بس هتاخد اجاة تتفرج علي الناس انا عملت كده
وتقريبا بشخذ ذهني لكتابة حاجة مهمة بس مش كتاب اكبد
هههههههههههه
هاستني البوستات
كل سنه ومدوناتك طيبه وبخير
ونتمنى دوام الكتابه :)
تحياتي
و الله أنت حد طيب خالص يا عمرو
بكلم بجد
مساء الخير
كل سنه وانت طيب للعيد وللمدونه
وعايزه اقول لك ان الانسان اللي يقدر يسامح ده انسان بيكون جميل
وانا ليه راي في التسامح مش شرط انك تسامح حد لابد انك ترجع تتعامل معاه زي الاول
سامح وماتتعاملش زي الاول
تعامل بحرص مش اكتر
تحياتي
كل سنة وانت طيب يا عمور
بمناسبة عيد الاضحى المبارك ويارب ينعاد عليك بالخير واليمن والبركات
وكل سنة وانت طيب ومدونتك طيبة ودايما كدة منور عالم بلوجر وموجود بينا
تحياتي
سنه بس؟
ليش حاسه انو اكتر من هيك؟
على كل انا بستمتع هون كتير؛ خاصه ببوستات ايام الجامعه؛ ما شاء الله على ذاكرتك يا عمرو
طب يا عم..حنقعد نستني أهو
:)
خواطر شابه
و انتى طيبه يا خواطر و عقبال ما نحضر عيد ميلاد مدوناتك يا رب
بالنسبه لفكره الاعتذار انا معنديش فيها مشكله ... انما مشكلتى هى التسامح و بحاول اصلح نفسى
نورتينى و مستنى تعليقاتك على طول
مى
انا بجد مش قادر ارد على تعليقك و على فكره انا مستاهلش ربع اللى انتى قلتيه
منورانى على طول يا مى
عادل
و انت طيب يا دولا ... و بعدين يا باشا انتم السابقون و نحت اللاحقون يا فندم
فى الغالب هو ده اللى هعمله .. بس مش عارف الاجازه هتطول لامتى
منورنى دايما يا عادل
فتاه من الصعيد
و انتى طيبه يا فندم ... و بجد هحاول اكتب بس فى الغالب هيكون على فترات متباعده
نورتينى و مستنى تعليقاتك بأستمرار
سارة
ربنا يخليكى يا سارة ... مكسوف و مش عارف اقولك ايه
منورانى دايما يا سارة
دنيا
و انتى طيبه يا دنيا و عقبالك يا رب انتى و مدوناتك
على فكره اللى انتى بتقوليه بالنسبه للمعامله بيكون صح فى اغلب الاوقات ... لان الفعل نفسه بيفرق
منورانى يا دنيا
زهور الامل
و انتى طيبه يا زهور بمناسبه العيد و عقبال العيد الجاى تكونى عملتى كل اللى نفسك فيه
و كمان مره و انتى طيبه و عقبال مدونتك
منورانى على طول يا زهور
مياسى
تغيبى تغيبى و تظهرى يا مياسى ، بس بيكون ليكى وحشه
مسأله احساسك انه اكتر من سنه ممكن تتاخد بنيه كويسه انك حاسه انك تعرفينى من زمان .. و ممكن تتاخد بنيه وحشه انى تقيل لدرجه ان الايام مش بتعدى و عشان كده حاسه انها اكتر من سنه ... بس بناء على معرفتى بشحصيتك هقول ان نيتك كويسه ... ههههه
بالنسبه لواحد جامعه انا دايما بقول انها اكتر مدونه انا بحبها فى مدوناتى
منورانى على طول يا مياسى
مايكل
فينك يا عم موكا مش باين ليه .... على كل يا عم مش هتستنى كتير
منورنى يا مايكل
انا بعيط من السعادة يا واد يا عموكشة
دي تدوينة غالية قوي ويوم سعيد علي
اساشا
اساشا يا عزيزي انا لا أعادي الأعداء فما بالك بالحبايب
شكرا لذوقك وتفهمك وتقديرك
وكل سنة ومدونتك طيبة وانت طيب وربنا يحقق لك الأماني
هههههههه
لأ نيتي منيحه والله
يخرب بيت شيطانك يا عمرو:)
kolena fakarna keda fi awel sana
bas te3eesh w tkamel 10 snin ya rabb
happy birthday "che" Blogs :D
mine is almost 4 yrs now :D
العمه ستيته
شكرا لتعليقك الرقيق يا عمه و معلش على الدمعتين اللى انا اتسببت فيهم
كل سنه و انتى طيبه يا عمه
منورانى دايما يا عمه
مياسى
عارف والله يا قمر .... بس قلت انكشك كده
اى خدمه يا فندم
بطوطه
يعنى تفتكرى دى حاله و هتعدى و تروح لحالها ... يا ريت
على فكره انتى كده مدونتك اكبر من مدونتى بكتير ... لحقتى تقدمى ليها فى كى جى وان ولا لسه ... ههههه
نورتينى يا بطوطه
إرسال تعليق