الجمعة، 25 سبتمبر 2009

المدونات و سنينها

البوست بتاع النهارده عن المدونات و البلوجز و شويه حاجات موجوده فيها ... هديكوا مثال عشان مانتهوش من بعض من اولها و تكون سكتنا رايقه و على بياض بأذن الواحد القهار ..... طبعا كلنا بنقرى ساعات بوستات و مش بنسيب تعليق عليها ... لاسباب عديده ... منها مثلا ان البوست مش عاجبك ، او انك مكونتش فى حاله مزاجيه تسمحلك بأنك تكتب تعليق ... او جايز مش لاقى كلام تعلق بيه على البوست .... طبعا كلنا عملنا كده و اكتر من مره كمان و اللى يقول ان كل بوست بيقراه بيعلق عليه يبقى بيكدب و الكدب حاجه وحشه و بتضيع الصيام بمناسبه صيام السته البيض .... انا شخصيا فيه مدونات كتير جدا بدخلها و بقرا البوستات اللى فيها و بقفلها تانى .... جميل كده ..... حاجه من اكتر الحاجات اللى بتضايقنى انى الاقى صاحب المدونه حاطط الكاونتر اللى بيبين مين دخل عنده و امتى .... طبعا انت كده اتقفشت يا حلو .... دى مش هتبقى مشكله لو انك و صاحب او صاحبه المدونه ماتعرفوش بعض .... انما بأه لو تعرفوا بعض تلاقى صاحب المدونه بيسأل انت ليه عملت كده و ساعات ياخد موقف منك و ساعات تانيه يزعل منك و ممكن يمسحك اصلا من قايمه معارفه لمجرد انك دخلت عنده و ماسبتش تعليق ..... فبالتالى انا تلافيا للمشاكل دى ببطل ادخل المدونه تانى او لو خلاص هموت و ادخل اروح اعمل سيجن اوت من الجوجل و ادخل عنده عشان ميعرفش انى دخلت .... بس فى الغالب بكسل و بستسهل انى مدخلش اصلا و بكون خسرت مدونه انا بحبها ........ انا مش عارف رأيكوا ايه فى النقطه دى بس دى بتضايقنى جدا
نيجى لنقطه تانيه بتضايقنى بس مش أوى ..... انك تلاقى حد معلق عندك و تدوس على اسمه و تشوف البروفايل بتاعه و تدخل على مدونته تلاقيها للقراء المسموح بيهم بس اللى هو حاططهم عنده ..... انا مش مختلف معاه ... بس انا لغايه دلوقتى مش لاقى مبرر للحركه دى .... يعنى مثلا انت اكيد مش بتكتب اسرار الامن القومى فى مدونتك عشان تقفلها ... ساعات ناس تقولك انها عامله المدونه دى للفضفضه .... ماشى ... بس لو للفضفضه يبقى حاطهها فى البروفايل بتاعك ليه ... عشان تحنسنا مثلا لما نيجى ندخل و نلاقيها مقفوله فى وشنا .... ناس تانيه تقلك اصل انا بتشتم فى التعليقات فعملتها للناس اللى عارف انها مش بتشتم .. طيب يا جماعه الخير فيه حاجه اسمها موديريشن ... يعنى تنشر التعليق اللى يعجبك و اللى مايعجبكش تمسحه ..... سيبك انه مفيش مدون ولا مدونه ماتشتمش قبل كده .. و مع كده مش كلنا قافلين مودناتنا ..... بس برضه عادى
انما اللى بيضايقنى جدا انك تلاقى مدونه كانت مفتوحه عادى و فجأه بأت قاصره على القراء اللى صاحب المدونه حاططهم فى الليست بتاعته .... تبتدى تسأل نفسك ايه اللى حصل ... هو ليه عمل كده ... و شويه تتضايق من صاحب المدونه لو انت تعرفه انه ماضافكش للقراء بتوع المدونه .... و تبتدى تكتيكات مضاده .... انك تضطهده مثلا ... ماتنشرش تعليقاته ... تمسح تعليقاته ... مع ان الموضوع ابسط من كده و فى الاخر مع اننا فى عالم افتراضى الا اننا بنمارس حريتنا على اكمل نطاق فى العالم ده ..... يمكن عشان اغلبنا اجبن من انه يعمل كده فى العالم الحقيقى ... او مثلا احنا على النت بنكون منفصلين عن واقعنا ... يعنى ممكن تلاقى رقاصه عامله عالمه فتوى و ارشاد و العكس صحيح ..... او تلاقى حد مؤدب جدا بس بيمارس دور الصايع على النت و العكس صحيح برضه ..... بس ده نتيجه الازدواجيه اللى احنا عايشين فيها و حاله النفاق العامه اللى موجوده جوانا
حاجه تالته .... تلاقى حد فاتح مدونته عشان يعيش على قفا غيره .... يعنى ملوش اراء خاصه بنفسه خالص .... انما فاتح المدونه عشان يشوف المدونات التانيه فيها ايه و ينتقدها و يكتب بوستات طويله مفيهاش و لا كلمه من دماغه انما بتكون البوست اللى هو قرر يهاجمه المره دى و التعليقات اللى عليه و الهجوم على التعليقات و تحاول تدور على اى حاجه من دماغ صاحب المدونه ماتلاقيش .... و فعلا فيه " مدود " عامل كده و يمكن ناس كتيره تعرفه ..... المدونات دى بتفكرنى بيوسف البدرى .... الراجل ده عامل نفسه شيخ مع انى ماقرتش ليه اى رأى .... كل شغلته فى الحياه انه يرفع قضايا على الناس و ياخد احكام عليهم .... و يقولك انا بدافع عن الاسلام زى ما يكون الاسلام اللى عاش اكتر من 1400 سنه و هيعيش ليوم القيامه مستنى سى يوسف يدافع عنه .... انا طبعا ليا رأى تانى فيه بس مش هقدر اقوله عشان انا بكتب البوست و انا صايم و عايز اكمل صيامى من غير ما افطر
نيجى بأه للنوع التانى من المدونات .... و انا بسميها مدونات المطبطباتيه .... صاحب المدونه فاتح المدونه عشان يعلق عند الناس و يقولهم الله يا ست لو بيعلق عند واحده او غنى يا وحيد لو بيعلق عند واحد و الناس تعلق عنده و نظام نجاملكم فى الافراح و مردودالك يابو ساميه .... و يطبطب على كل واحد شويه و تخرج من مدونته و انت حاسس انك كنت قاعد على حجره و هو بيهشكك كمان ... و برضه تدور على حاجه فى مدونته من دماغه ماتلاقيش ... تحس ان مدونته صفحه الاجتماعيات فى الجرنان ... النهارده فرح فلان .... النهارده ميتم علانه ... النهارده طهور ترتان ابن بلانه .... و على هذا المنوال و المدونه ماشيه و كله عند البقر صابون
مش عارف رأيكوا ايه بس اتمنى انى اعرفه ..... سلام

هناك 32 تعليقًا:

Bella يقول...

عن نفسي مش كل مدونة بادخلها باعلق فيها الا لو تعليقي ح يضيف اضافة

يعني مش لمجرد التعليق وخلاص او اقول ايه الحلاوة دي\

لو التعليق له داعي ماشي
لو فيه تعليقات سبقتني اقراها ولو قالوا اللى عايزة اقوله لااعلق حتى لا يكون تكرار لكلام قاله غيري

لكن حكاية ان فيه عداد باين منه اني دخلت وماعلقتش دي مش فارقة معايا اصلا ولا اعتقد انها من مسببات الضيق ان اللى اعرفهم يحسوا اني دخلت مدونتهم ولم اترك تعليق

وطبعا لو حد دخل مدونتي وماعلقش لابازعل منه ولا حاجة

وكمان اصلا مش عاملة موديريشن على التعليقات

اما غلق المدونة على اصدقاء بعينهم فمتفقة معاك فيها واستغربت كمان لما لقيت مدونات كانت مفتوحة واصبحت مغلقة على دائرة معينة

وفي كل الاحوال الحكاية ابسط من كده

يعني التعليق او عدمه لن يفرق كثير خاصة واننا نتبادل المعلومات بالتدوين او التعليق لو فيه اضافة

فعدم التعليق لايستوجب العداوة او الضيق

والعكس صحيح

يعني مش شرط الواحد
تبقى علاقته وطيدة بالمدونين الجيران لانهم بيجاملوه ويردوا عنده

وكفاية كده لاني طولت

تحياتي

Polka Dotted يقول...

mata7'odsh el modawana ka 7arb... ya 3am eli yekteb yekteb weli y3alak y3alak... 3la fekra fi nas keter fat7a el modawenat w btekteb l mogarad enaha tla2y ta3leekat :D



seeeeeebak mn ay 7aga... e3ml eli yraya7ak

لبنــــــــــى يقول...

رح احكيلك تجربة صارت معي
كنت بكتب بموقع للمدونات قبل بلوجر
كان في اخ بيعتقد انو شاعر و اله شعبية طبعا مش لانو بكتب شعر لا لانو في ناس بتجاملوا
كان الاخ بعلق عندي و كنت بزور مدونتوا بلاقي حالي ما بقدر علق باشي لانو اللي كاتبوا تقريبا لا يعتبر شعر ابدا ابدا بكل المقاييس
المهم كتبلي و سالني ليش ما عم علق عندو و انا تحججت باشياء كتيرة و في الاخر قلتلوا اني ما بستسيغ اسلوبوا و اني انا بحب نوع من الشعر الحر و غيروا
و شن حملة علي هو و بعض الناس هناك
انا مش كاتبة او شاعرة بس انا ما قدرت استسيغ اللي بكتبوا ابدا
و بهيك انتقلت لموقع بلوجر لانو الموقع هناك ما بيعتمد الا على المجاملات الشخصيية
و بزور مدونتي هناك ما تركتها بس لقيت انو المجتمع هناك كتير بحب المجاملات و كتير من الناس اللي كانوا بعلقوا عندي ما كانوا بقروا شو كاتبة هم بس بثبتوا حضور لازورهم و اعلق عندهم
تخيل

اما بالنسبة للنوعيات اللي انت ذكرتها ما تنسى انو نحنا هون للبحث عن مساحة حرية شخصية و كل واحد حر شو يعمل و يكتب بمدونتوا لكن ما يطلب اكتر من الاخر

و انا شخصيا بزور مدونتي تقريبا 22 شخص و اللي بعلقوا 3 او 2 و ما بزعل
يمكن انا ما بعرف اكتب بنظرهم ؟
طولت كتير صح ؟
عن جد طولت

سمكه واحده يقول...

اذيك يا عمرو
اولا كل سنه وانت طيب
وايون كده خليك شاطر اسكت لحد ما تفطر
صوما مقبولا ان شاء الله
اه صح عندك حق تصدق انا بدخل عند ناس بحب اوي وسعات معرفش اعلق وامشي وببقي موجوده عندهم واقول دلوقتي شكلي بقي وحشششششششش
بس بقيت اعمل حركه لئيمه كده هبقي اقلك من غير ما حد ما يعرف هوسسس ولا كلمه
هو الواحد بيكسف فعلا وسعات مش بيعرف يعلق وسعات من حلاوه البوست بردو مش بيلاقي كلام ويقول ان الرد هيبقي عبيط وهايف فيمشي ويقول يبقي يرجع تاني لما يحضر كلمتين مفتخرين كده وهوب ينسي
بس زي منتا بتقول ده عالم افتراضي بس مش معاك في حاجه
هو اه عالم افتراضي بس ارتبطنا بيه كلنا يمكن اكتر من العالم الخارجي يمكن عشان بتبقي بحريتك اكتر تكلم برحتك محدش شيفك محدش عارفك فبتالي بيبقي احساسك اصدق مفيش مجاملات
علي العكس ان ممكن يكون فيه زي ما بتقول كل واحد بيطلع اللي ميقدرش يطلعه في الحقيقه وانا معاك جدا في دي
تلاقي واحد مبيعرفش يكلم كلمتين علي بعض وخجول جدا وبيكسف في الحقيقه ومتنيل علي عينه
وتلاقيه علي النت ايه ده العكس تماما
او واحد محترم ومؤدب وعلي النت يظهر شخصيه تانيه
ده علي اساس ان احنا كعرب بنعاني من حجات كتير مش عاوزه اقول امراض ياعم
وكفايه كده
اصلي عشطاااااااااااانه
شكلك مدعتليش في رمضان ابطل رغي
ومش هجملك ولا هقول كلام من الكلام ده
بس انت عارف ان بوستاتك بتعجبني وافكارك وبستناها
تحياتي

adel يقول...

كلامك صح يا هاجرني

بص انا للاسف بكره المجاملات و بعمل كومنتات اغلب اللي بقراه بس مش بقول كويس جميل و هايل و الكلام الحمصي ده ... بدخل شمال علي طوول الصراحة

وساعات مبعلقش...والناس حاطة الابلكيشن ده اللي بيقول اني كنت موجود
بس عادي ...ااقولك الانقح
في ناس مش بتعلق خالص عندي و بتتطلب مني العكس اني اعلقك بقي
هههههه
اللي هو نظام ادخل ا علق بعيدا هيعجبك او لا
ده غير موضة الاحتلال ...تدخل تلاقي حد بيكتب بال30 كومنت و ده حصل عندي كتير بس انا بتقبلها قطة كنوع من الشات بس في ناس بتنزل بوستات عشان الهبل ده

حكاية المدونات المقفولة دي مش بتفرق ممعايا ....هو يكتب او لا دي حاجة بتاعته ياعموونا

مين بقي اللي بيعيش علي قفا غيره ؟؟
انا معرفوش :)
ابعتليا للينك و انا هامسحه علي طول بس اتفرج :):):)

مدونات المطابطية متفرقش كتير عن كلامي فوق و حكاية 40 تعليق من نفس الشخص

كفاية بقي
ههههههه

عاشقه وغلبانه يقول...

انا مثلا قريت البوست وفي دماغي رد وكلام عايز يتقال بس ماليش نفس اقوله
ههههههههههههههههههههه
عموما مين المدود اللي انت بتقول عليه ده انا ماروحتش هناك خالص

وفي مره روحت مدونه ولاقيتها مقفوله في وشي زعلت اوي
حسيت اني رايحه زياره لناس مارضوش يفتحواالباب
موقف بااااااااااااايخ
عموما احنا بنحب نحط روحنا في المواقف دي
هههههههههههههه
فكر لما كنت بتفتح مدودتي هههههه ماكنتش بتفتح معاك ههههههه اكيد كنت متغاظ اوي
نياااااااااهااااااااا
ضحكات شريره متقطعه
بس العيب من المتصفح بتاعك مش مني

انا زعلانه اوي ياعمرو ومش عارفه ليه
ماعندكش حل

*البت المشمشية *حلوة بس شقية * يقول...

حبيب هارتى
ايه يا معلم
بص يا سيدى
انتا عارف انى من اكتر الناس ولله الحمد اللى اتشتمت واتمسح بكرامتى بلاط المدونات
بس ايزى جدا هقولك
سعات بتبقا مضطر تعلق
ليه بقه
ممكن يبقا مدون صاحبك
ويزعل انك معلقتش عندو
وممكن تكون بتعمل كدة
عشان تزيد من عدد زوار مدونتك
وممكن تكون بتعمل كدة
عشان بجد الموضوع عجبك
لدرجة انك تفسك انتا اللى تعلق

بس خلاص

Che يقول...

بيلا
انا بصراحه مش فاكر اذا ده اول تعليق ليكى ولا لا ... بس على كل حال يا هلا و غلا بيكى
انا متفق معاكى فى تعليقك ... انا بس عايز اوضح ان نقطه التعليقات دى مش فارقه بالنسبه ليا ... انا بتكلم على الناس اللى بتتقمص من اللى مش بيعلق عندها ... و طبعا الناس اللى قفلت مدوناتهاانا بجد مش فاهم معنى التصرف ده لغايه دلوقتى ... بالنسبه لنقطه الموديريشن انا عاملها مش عشان انا مش بحب التعليقات او بمارس نوع من انواع الديكتاتوريه .. بس الفكره انه عارف نفسى ... لو حد علق تعليق سخيف هرد عليه بسخافه اكتر منه ... يبقى ليه بأه
نورتينى يا بيلا و بجد تعليقك جميل جدا لدرجه انى ممكن انشره على انه بوست مستقل

Che يقول...

بطوطه
والله مش حرب ولا حاجه .... انا بس كنت بقول شويه حاجات انا رصدتها و منها اللى ضايقنى و منها اللى استغربته .. و بالنسبه لنقطه التعليقات دى مش هقولك مش بتفرق معايا ... بس مش بضايق أوى لما الناس ماتعلقش ... عادى .. اللى يعلق يعلق .. واللى مش بيعلق بلاش
نورتينى يا بطوطه

سارة نجاتى يقول...

تشى عمورة حبيبى

عظمة على عظمة يا عمورة ههههههههه
متفقة معاك مية فى المية
بالذات على اللى عايشين على قفا غيرهم دول ههههههه
المشكلة فى رأيى و اللى قلتها أوى ما بدأت تدوين خالص
أننا ناسيين أو بنعمل هبل أن التدوين بيعتبر قمة ( الفردية )
بس كده
تسلم يا باشا

Che يقول...

جافرا
على فكره كل اللى انتى قلتيه ده صحيح ... عشان كده البلوجز هنا احسن من المنتديات ... لا فيها مشرفين و لا ردود مجامله ولا اى حاجه
على فكره اللى انتى قلتيه على مدونتك كلنا بنعانى منه بشكل او آخر ... الفكره مش بالتعليق ... الفكره بقيمه التعليق و لو هيضيف اضافه ليها لازمه ولا لا زى ما بيلا قالت
نورتينى يا جافرا

Che يقول...

سمكه
انتى بتغيبى تغيبى و ترجعى تانى .... كل سنه و انتى طيبه يا ست الكل .... اللى انتى قلتيه صح ... بس نقطه ان البوست ده يبقى حلو لدرجه انك تعتبرى التعليق عبيط ده فيه مجامله جدا ... يعنى انتى مجامله مش شتيمه عشان ماتفهمنيش غلط .... هههههههه
بالنسبه لنقطه العالم الافتراضى ده هو انا اللى مستغربله .... يعنى المفروض نبقى هنا زى بره ... مش نبقى هنا بشخصيه و بره بشخصيه تانيه
على فكره انا دعتلك و بذمه كمان ... بس يا انا ربنا مش رايدلك انك تبطلى كلام او ان ربنا يكون شايل الدعا بتاعى عشان يرفع بيه ضر عنك ... الله اعلم
نورتينى يا سمكه

Che يقول...

عادل
ازيك يا حبيبى يا اللى انا هاجرك .... على فكره كلامك كله صح ... و انت بجد واحد من اكتر الناس اللى بتعلق و بتعلق تعليق بجد مش مجرد تعليق و السلام ... كل ما اروح فى حته الاقيك معلق قبلى ... عقدتنى .... ههههه
على فكره مش عيب انك تبقى صريح ... بالعكس المفروض تكون صريح دايما ... بالنسبه للناس اللى بتتقمص منك انك مش بتعلق عندها و هى كمان مش بتعلق عندك نفضلهم يا عم
نورتنى يا دولا

Che يقول...

عاشقه
عامله ايه يا دوك و ايه اخبارك ... على فكره النغزه راحت ... شكلك دوك شاطره
بالنسبه للكلام اللى مش عايز يتقال عادى ... انتى تعملى اللى انتى عايزاه يا دوك ....ههههه
انا مش عارف انتى زعلانه ليه .... بس على كل حال حاولى تخرجى نفسك من الموود الوحش ده ... و لو دخلتى اون لاين قريب ممكن نتكلم اكتر
منورانى يا دوك

Che يقول...

شوشو
عارف والله يا شوشو .... بس موضوع الشتيمه ده مش بيفرق ... مدام مقتنعه باللى انتى بتقوليه يبقى خلاص .. مفيش حاجه تهم بعد كده
مسأله انك تعلقى عشان المدون صاحبك هو ده اللى انا بتكلم فيه ... يعنى مش عشان المدون صاحبى يبقى لازم اعلق عنده ... مسأله ان البوست بيبقى حلو لدرجه انك تعلقى ده بأه الطبيعى
منورانى يا شوشو

Che يقول...

سارة
على فكره يا سارة انا كنت عايز استعير كلمه من عندك ... انتى حاطاها على صفحه التعليقات " ده مش دفتر حضور و انصراف .. لو مش عايز متعلقش " ... بجد احلى حاجه قريتها فى صفح التعليقات بتاعت الناس ... و كانوا الكلمتين دول فى دماغى طول ما انا بكتب على التعليقات
على فكره ... فعلا التدوين قمه الفرديه .... و قمه الديكتاتوريه كمان ... يعنى انا مش مطالب اقول رأى الناس ... كفايه انى اقول رأيى انا بس و اللى مش عاجبه ممكن ميجيش تانى المدونه
تعليق قصير يا سارة بس فى الصميم
منورانى يا سارة

زهور الامل يقول...

اه يانا يا زوري
زوري بيوجعني من الصبح تقريبا داخل عليا دور برد جامد اوي

هو انا كنت داخلة هنا ليه
اااااااااااه صحيح انا كنت داخلة اقول لعمرو كل سنة وانت طيب وازيكواخبارك ايه وصوما مقبولا
وكمان اقوله اني انا كمان متغاظة اوي من الناس اللي بتقفل المدونة بتاعتهم ويكتبوا عليها للقراء المدعوين فقط ليييييه هو احنا مش قد المقام ولا ايه
الله بقى على الناس دي
والله بزعل بجد لما بتابع مدونة واحبها وتعجبني والاقيها اتقفلت

وكمان ساعات لما بيكون الكلام حلو اوي مش بقدر اعلق لما مثلا يكون شعر رومانسي بعجز عن التعليق مع ان الكلام بيعجبني
وكمان بدخل مدونات الاقيها في منتهى التفاهة والهيافة وتلاقي الناس داخلة تعلق وتحس فعلا انهم بيجاملوا ومش ده رايهم الصحيح في البوست
وساعات بكون مش فاضية اصلا ادخل النت علشان اشوف البوستات الجديدة
وساعات كتير اكتب بوست كويس واستنى راي ناس معينين بيهمني رايهم ومش بلاقيهم يعبروني
وحاليا اتضح ان في اطفال بقى عندهم مدونات سن 9 سنين و12 سنة وحاجات غريبة كدة

واهو الحياة بقت زبادي في الخلاط

لما اقوم بقى اشرب ليمون سخن وانام علشان عندي شغل بكرة

هو انا رغاية كدة ليه انهاردة
معلش يا عمرو صدعتك

تحياتي بقى وتصبح على خير

مي يقول...

تحس ان مدونته صفحه الاجتماعيات فى الجرنان ... النهارده فرح فلان .... النهارده ميتم علانه ... النهارده طهور ترتان ابن بلانه .... و على هذا المنوال و المدونه ماشيه و كله عند البقر صابون

هههههههههههههههههههههههههههههههههههههههههههههههههههههههههههههههههههه
ههههههههههههههههههههههههههههههههههه
والله كلامك ميه ميه وبص واقعى وده اللى بيحصل فعلا ومعظمنا بيعمله
انا بتغاظ اوى من اللى بيخلوا المدونة مقصورة دى بحس طب ليييييييييييييه انت تعلق عندى وتقول رايك وانا معرفش عن كتاباتك حاجة ولا اعرف شخصيتك
ثانيا بالنسبة للكاونتر هههههههههه انا حطاه
ه حب فضول مش اكتر بس مش بيهمنى مين زارنى اولالالالالاء
بس بزعل لما بتقفش ههههههههههه بس برضه بدخل عادى حتى لو المدون زعل لو معلقتش

ساعات بتبقى مش قادر تعلق او مش عارف تعلق على اييييه
طبعا المطبطبطية دى كتيرررررررررررر يامعلم
ههههههههههههههههه
بس هتعمل ايه

سيبك انت ايه دخل البقر بالصابون
هههههههههههههههه

تحياتى يا اجمل عمووووووورة

Che يقول...

زهور
سلامتك يا جميل و كل سنه و انتى طيبه .... شدى حيلك كده بسرعه و بطلى العيا ده
واضح ان موضوع قفل المدونات ده بيضايق الناس كلها .... كان نفسى واحد من اللى قافلين المدونه بتاعتهم يفهمنى ليه .... بس معلش
موضوع الناس اللى بتكونى مستنيه رأيهم ده بيحصلى برضه و ده موضوع البوست الجاى .... بس حكايه اطفال المدونات دى اول مره اعرفها منك
اشربى اللمون بأه عشان تخفى بكره ... او عشان تروحى الشغل بكره ... اه ... انا مش عايز زبادى خلاط ... عايز لمون ... هههههه
منورانى يا زهور

Che يقول...

مى
تصدقى انا مخدتش بالى انك حاطه الكاونتر ده ... و برضه و مره تانيه انتى كمان متضايقه من موضوع المدونات المقصوره على ناس معينه زينا كلنا
طبعا حكايه ان ساعات مش قادره تعلقى دى بتحصلنا كلنا .... لاننا مش مظبوطين على موجه واحده و نفس الاداء يعنى كل مره نعلق .... و المطبطباتيه دول كتير جداااااااا
علاقه البقر بالصابون هى ...... مليش نفس اقول ..... ههههه
نورتينى يا مى

الشعب لابد له من حكومه تشكمه يقول...

شووووف ياسيدى ..
انا مش برد غير على الحاجه اللى تعجبنى وبسسسس ويووووه ياما مش برد على حجات لناس ممكن تعتبرهم اصحابى وبحبهم لو فى حاجه معجبتنيش.يعنى مثلا مره لقيتك شاتم فى بوست(من غير زعل يعنى)وانا مش بحب المدونات اللى فيها شتيمه قريت بس مسبتش كومنت :),,

ومش هيفرق معايا موضوع العداد ده انا حره اسيب كومنت او مسيبش ايه هيعلقولى المشنقه يعنى,كمان مش بعرف خاالص ارد على المدونات اللى فيها شعر طب قولى ارد اقول اييييييييه؟ فتلاقى اصحاب المدونات دى بيعاتبونى انى مش بسيب كومنت .
حاجه باه بينى وبينك كده اوقات الاقى ناس تقولى نتمنى زيارتك وكل بوست يقولوا نفس الجمله:(المشكله انى بدخل فعلا اشوف البلوج ومش بيعجبنى الكلام فمش برد فتقريبا فى ناس قاطعتنى علشان كده:(.وبعدين المفروض انى بتابعك لانى بحب اتابعك ولانى بحب اقرا افكارك ,العمليه مش واحده بواحده وتسيبلى كومنت اردهولك!!!!
بالنسبه لموضوع البلوج اللى بدعوات مره حد سابلى كومنت عندى وكنت اول مره اشوفه ودخلت اشوف المدونه بتاعته لقيتها بدعوات الفضوووول بيقتلنى هموت واعرف فيها ايه؟:)مش بحب موضوع الدعوات دى ومش بحب موضوع الموديريشن خااالص وتقريبا مش برد على اى حد عامل موديريشن غير اشخاص قليلين جداااااااا انت منهم:)لان للاسف مره اتناقشت مع حد عامل موديريشن وللاسف شال نص كلامى:(شال اللى مش عجبه:(

Empress appy يقول...

بما انى من الناس اللى حاطه الكونتر احب اقولك ولا فارقه معايا وغالبا مباخدش بالى منه اصلا بس حطاه علشان شكله كويس
وعمرى ما زعلت من مين ساب تعليق ومين لا اللى بيهمنى الناس تقرا وتفهم قصدى ولو انا صح خلاص لو غلط يبقى يعترض
موضوع المجاملات فقع مرارتى واخبار مين اتجوز ومين اطلق بتجيب ليه شلل
موضوع بينتقد على قفا حد تانى اوبيعمل موضوع على قفا حد تانى
عادى اهو بيشغل نفسه
عرفت بقىانا سالت سؤال ليه المدونات كترت وليه اصلا فتحوا مدونات

Che يقول...

شيمو
انا عارف البوست اللى انتى قصدك عليه بس ده كان بوست استثنائى بتاع الشتيمه .... موضوع الكاونتر ده واضح انه مش فارق مع ناس كتير .... بس انا شخصيا فى حد من اصحاب المدونات حاطه و زعل منى لما لقانى دخلت و معلقتش و عاتبنى على كده و مردتش ارد عشان ميزعلش من ردى اكتر
و انتى بما انك متضايقه من موضوع المدونات اللى بدعوه يبقى كلنا كده لسه رأينا واحد و كلنا بنكره الموضوع ده
انا بس عايز اوضح حاجه ... انا مش عامل الموديريشن عشان الرأى اللى ميعجبنيش مانشروش ... بس عشان فيه ناس بتشتم .... و لسوء الحظ انا لسانى طويل و برد الشتيمه بشتيمه اكتر منها ... و انا من ساعه ما ابتديت المدونه دى و انا مش بشتم ... عشان كده بس عامل الموديريشن .... سيبك انتى انه يسعدنى انى اكون واحد من القلائل اللى بتعلقى عندهم و هما عاملين موديريشن
منورانى يا شيمو

Che يقول...

آبى هانم
على فكره انا عارف انك بتفكرى كده فى مسأله الكاونتر ... عشان كده بدخل عندك و انا مطمن ... فى اغلب الاوقات بلاقى حاجه اعلق ... بس لو معلقتش عارف انك مش من الناس اللى بتشيل فى قلبها و تصر و كده
موضوع المجاملات ده زى ما انتى قلتى بأه مالى المدونات ... لدرجه انى بفكر اعمل مدونه مخصوص للاخبار و اسميها النشره ... فاضى بأه ... و الناس تيجى عندى تشوف اخبار بعض ... و بدل ما ابقى فاتح مدونه اقلبها قهوه بلدى و على رأيك اشغل نفسى شويه
الناس اللى بتنتقد دى انا مش هقول حاجه عليها عشان انا مش عايز اشتم ... خلينى ساكت احسن
و عارف انتى سألتى السؤال بتاع الناس بتفتح مدونات ليه ... بس يا ترى ايه الاجابه الصح
نورتينى يا آبى و اتمنى اشوف تعليقاتك تانى .... ده لو فيه حاجه تستاهل التعليق عليها .... هههههه

بتنفس حريه يقول...

انا اول مره اعلق عندك وبصراحه دوختنى كل دى مدونات ومش عارفه انت فين :)!!!
ثانيا بقى المدونه دى احترعوها للمزاج الشخصى ..كل واحد يعمل فيها الى هو عايزه
الى عايز يكتب شعر اهبل يكتب الى عايز يعملها صفحه اجتماعيات يكتب الى عايز يعملها اغانى يعمل..الى عايز يبقى شيخ والى عايز يبقى صايع برضه حر...وهلما جرجرر

المهم ماحدش يلزم حد بحاجه

يعنى فى الفضاء السيبرى كل واحد حر

ولو انت عايز تعلق علق لو مش عايز انت حر
ولو واحد عايزك غصب و اقتدار تعلق يخبط راسه فى الحيط علشان برضه انت حر

فبليييييز متحولوش البلوجزز لفيس بوك تانى

Che يقول...

بتنفس حريه
اهلا بيكى ... بس دى على فكره تانى مره اشوف تعليقك لو ذاكرتى لسه شغاله ... و على كل اول تعليق ... تانى تعليق ... التعليق الالف .... اهلا بيكى على طول
انا متفق معاكى فى اللى قلتيه كله و مش مختلف فى ولا حاجه .... يعنى فعلا المدونه دى حاجه للمزاج الشخصى ... و انا فى ردى على سارة قلت ان المدونه دى قمه الديكتاتوريه كمان ... بس انتى قلتى الحاجه المهمه فى الموضوع كله ... متجبرنيش على حاجه ... يعنى متجبرنيش انى اروح اقرى بوست انتى نشراه مثلا ... او متجبرنيش انى اعلق عليه .... و لو معملتش كده تزعلى ... و فعلا اللى انتى بتقوليه صح ... و انا ياما اتكلمت على الحريه الشخصيه ... بس مثلا مينفعش تعملى مدونه مخصوص لشتيمه المدونين و تقولى انا حره اشتمهم .... لانك هنا دخلتى من باب الحريه الشخصيه بس طلعتى من باب الاعتداء و التشهير و ده غلط
مسأله الفيس بوك دى محيره ناس كتير جدا ... و على فكره انا كل اللى مستفيده من الفيس بوك انى بعرف اخبار صحابى من عليه لانه محدش عنده الوقت الكفايه انه يسأل على كل واحد
نورتينى يا فندم

Unknown يقول...

البوست فظييييييييع جدا‬
‫و‫في‬ مكانه‬

‫نهفه‬
‫وبتحس انو واقعي‬
‫خصوصا بلوجات الاجتماعيات والناس اللي بلشانه في بعض‬

وهايني تركت لك تعليق:)

Che يقول...

مياسى
متشكر جدا على تعليقك الجميل ... و متشكر انك سبتى التعليق
منورانى يا مياسى

micheal يقول...

الحمد لله احنا لا حاطين كونتر والبلوج علي عينك يا تاجر ومفيش حتى موديريشن
ولا ليا في ننظام أطبطب وأدلع
بس بجد كل النوعيات اللي ذكرتها موجودة
تحياتي

Che يقول...

موكا حبيب هارتى
يا باشا انت ملكش دعوه بالناس دى خالص .... انت راجل واضح ... عندك واحد زائد واحد يساوى واحد و نص ... و النص اللى فاضل بيروح للضرايب ... مصلحتك اولا
نورتنى يا موكا

Zika يقول...

تخرج من مدونته و انت حاسس انك كنت قاعد على حجره و هو بيهشكك كمان


يخرب عقلك يا عمنا والله مفتقد مدونتك دي يا جدع انت

Che يقول...

زيكا و تانى تعليق النهارده
و على فكره انا شفت التعليق التالت .. بس الرقم القياسى بتاعى 5 تعليقات يعنى ناقصلك تعليقين عشان تعادل الرقم ... هههههههه
والله يا زيكا ... يعنى بجد مش بتحس كده فى بعض المدونات ولا انا بتبلى عليهم ... انا مفتقدك جدا يا زيكا
منورنى على طول يا ابو الزيك