الثلاثاء، 8 سبتمبر 2009

اعرف شخصيتك من ايميلك

الفراغ حاجه وحشه جدا ... دى حقيقه معروفه عند كل الناس ..... المهم انى كنت قبل ما اعمل العمرة كان عندى حاله من حالات الفراغ دى .... مش لاقى حاجه اعملها ... الهارد بتاع اللاب اتملى افلام و مسلسلات بس مكسل اتفرج على اى حاجه منها مع انى لازم اتفرج عشان ارمى اللى اتفرجت عليه عشان انزل الجديد ، و مع كده مش بتفرج عشان نفسى مش جايبانى .... العمرة لسه كمان يومين و اليومين هنا بيعدوا بسنتين ... انزل اخرج ... مليش نفس برضه
المهم فتحت الايميل بوكس بتاع الياهوو و قلت انظمه .... انا فى حياتى الشخصيه شخص ابعد ما يكون عن التنظيم انما فى الكمبيوتر و النت و المكتبه بتاعتى تلاقينى مرتب كل حاجه ... حتى لو اتهايئلك انى مش مرتبها بس الحقيقه انى بكون مرتبها بترتيب انا بس اللى عارف نظامه ..... نرجع لموضوعنا .... انا عندى ايميلات على الياهوو و الهوت و الجوجل ... بس اكتر حاجه بحبهم فيها و بستخدمها كتير جدا هى الياهوو و حتى كل معارفى اللى بكلمهم بكلمهم على الياهوو .. مش بلجئ للهوت او الجوجل الا للشديد القوى .... قلت اشوف فيه كام رساله فى البوكس نفسه مش فى الفولدرات اللى انا عاملها و حاطط جواها شويه ايميلات ... لقيتهم تقريبا 7 الاف ... يا حوسه ... هقعد ارتب فيهم دول اد ايه ... انا كده عايز شهر او على الاقل اسبوعين عشان بس اكون قريت عناوينهم و عرفت هادخلها فى انى فولدر من الفولدرات اللى انا عاملها ده غير انى اكيد هحتاج اعمل فولدرات جديده ..... المهم لقيت رسايل كتير من الفيس بوك ، سواء ريكويستات او رسايل خاصه ده طبعا غير التاجات اللى انا بكرهها عشان بتملى الايميل على قله فايده و الانفيتز سواء ايفينتز او جروبات جديده .. ابتديت الم كل الرسايل دى فى فولدر .... شويه و قلت انا لازم الم التعليقات اللى بتيجى على المدونات بتاعتى فى فولدر لوحده و فعلا لميتها و هكتب عنها فى بوست مخصوص حوالين التعليقات دى و هيكون بوست ضرب نار و اراء صريحه و ناس كتير هتقاطعنى لما تقرى البوست بتاع التعليقات ده ... شويه و لقيت شويه ايميلات من الشغل ابتديت المها بس دول كانوا حبه صغيرين مش مستاهلين ... و شويه و لقيت ايميلات بعتها لنفسى من ايميلات تانيه عشان افكر نفسى بحاجات بدل ما انساها ، طيب ما الاسهل اعملها ريمندر على الموبايل و كده كده هفتكرها بس تقول ايه
المهم انا قعدت يوم تقريبا فى فرز الرسايل و تصنيفها و ترتيبها و قلت كده فل و عملت حاجه شغلتنى و ضيعت يوم ........ صحيت تانى يوم و لسه فاضى و عندى نفس حاله الفراغ .. طيب اعمل ايه .... قلت ابتدى ابص على الرسايل بأه و اعمل فلاج للمهم فيها عشان لما احتاجه ماقعدش ادور عليه و يطلع عينى ..... تخيلوا بأه بتفرز 7 الاف رساله عشان تشوف المهم منها ايه و اللى مش مهم ايه و تعمل فلاج للمهم و اللى مش مهم تنفضله .... طبعا خدت يوم كمان فى الموضوع الشائق ده بس خلصته .... فاضى بأه مش ورايا حاجه
المهم انا لما عملت الموضوع ده طلعت بفكرتين .... الاولانيه البوست بتاع التعليقات اللى ربنا يسهل و انشره بس بجد ده محتاج مجهود كبير و لما تقروه هتعرفوا ليه ... و الفكره التانيه عامله زى الاختبارات بتاعت الفيس بوك .... اختبار اعرف نفسك من ايميلك ....... و الاختبار ده فكرته سهله جدا .... احنا اغلب حياتنا على السايبر مرتبطه ارتباط وثيق بالنت ... انا مثلا لقيت انه اخر شهرين ليا كنت مدمن فيس بوك اكتر من الاربع سنين اللى فاتوا كلهم ... و الفتره اللى قبل كده كنت مدمن المدونات و التعليقات ..... و الفتره اللى قبليها كانت المواقع الاخباريه و الجروبات و المنتديات ..... و اول فتره كنت عامل الايميل منظر عشان اقول للناس انه عندى ايميل و كان فااااااااااضى و ابيض من قلب الخسايه
السؤال بتاع الاختبار هو سؤال واحد بس .... من ايميلك انت شخصيتك ايه ..... معلش يمكن يكون بوست سخيف بس السبب فى كده انه اتكتب فى حاله الفراغ ..... مستنى ردكم ..... سلام

هناك 17 تعليقًا:

حروف يقول...

ولا فاهمة الهوا
كل سنة وانت طيب
ههههههه

مي يقول...

ياروقانك يا معلم 7 الاالاالاالاف يا سيدى على المشغوليات لالالالالالالالا هو انت حاجة قليلة انت بقالك كام سنة مش فتحت بس حلوة اوى حكاية الريميند دى هههههههههه بتيعت لنفسك
انت عارف مرة جربت حكاية تفتح اكتر من ايميل ياهو وعملت 10 وقعدت اضيف نفسى بقى والعب هههههههه فاضية بقى بس تانى يوم نسيت طبعا اسم الايميلات ههههههههههههه
بقولك ايه ماتشغلنى سكرتيرة عندك وانا افرزلك ايميلاتك
هستنى بوست التعليقات بس تبقى اختفى بعديها هههههههههههه
تحياتى يا اجمل صديق

adel يقول...

7000 و تقولي منظم
اوريك النظام بقي
انا معنديش ولا ميل مابفتحوش
والفيس بوك بطل يبعتلي ميل لاي حاجة اشاسا و دي حاجة حلوة قوي
ومعنديش اي حاجة متاجلة
يبقي انا شخصية منظمة قوي قوي
لاني منظم حتي الزبالة و الايميلات المرسلة و كل حاجة
ومعلش انا بعشق الهوتميل
عشان الياهو ده بجد مش قد كده و مليان حاجات غريبة
كفاية ياخي الشات بتاعه
الهوت ميل براقبه اي حاجة منهم اصلا

فاروق عادل يقول...

7 الاف رساله ومنظم

فعلا ونعم التنظيم
متابعك على طول بس اول مرة اعلق كل سنه وانت طيب

اللى استفدت منه من موضوع التعليقات ان اسمى مش هنزل فى البوست بتاع التعليقات
مستنيه جدا

زهور الامل يقول...

بقولك ايه يا عمرو
انا لسة راجعة من الشغل همدانة وحاسة ان جسمي مكسر
وماما عايزاني اطبخ واشطب المطبخ وانظم اوضتي والم الغسيل ومش قادرة اعمل كل ده

مادام عندك فراغ اوي كدة تعالى ساعدني يا اخي
واهو تاخد ثواب فيا

بقى جايلك 7 الاف رسالة
امال انا محدش بيعبرني ليه

يلا اهي حاجة تشغلك بدل الملل ده

ولا اقولك اسيب الشغل بتاعي الميل ده واجي اشتغل عندك وارتبهملك

تحياتي

Che يقول...

حروف
عادى والله يا ينتى .... انا شخصيا مش فاهم .... ههههه
و انتى طيبه يا جميل
نورتينى يا جميل

Che يقول...

مى
والله يا بنتى كل الناس فاهمه غلط ..... انا عندى 7 الاف رساله منهم 600 بس انا لسه ماقرتهمش .... المشكله انهم كانوا كلهم سايحين على بعض فى الانبوكس ... كل اللى انا عملته انى نظمتهم
حكايه الايميلات اللى انتى عملتيها و قعدتى تضيفى نفسك و تكلمى نفسك دى ليها دلاله سيئه ... بس انا مش هقولها .... هههههههه
لو اشتغلتى سكرتيره عندى هتخلصى شغل بسرعه جد ... لانى عندى 600 رساله بس مش قاريهم ..... هههههه
منورانى على طول يا مى

Che يقول...

عادل
كفايه يا عدول عقدتنى .... يا جماعه حكايه ال 7000 رساله دول مش كلهم مش مفتوحين .... 600 بس اللى لسه ماقرتهمش .... كل العمليه انهم كانوا متلخبطين .... بالنسبه للهوتميل ... انا بكرهه ... بس مش أوى .. عشان خاطرك يا دولا
منورنى يا عادل دائما و ابدا

Che يقول...

فاروق
اهلا بيك يا باشا اول مره معلق بعد ماسمعت اعترافك انك قارئ و بس ... و بالنسبه لموضوع ال7000 رساله واضح انى اتفضحت بيه خلاص و مش هعرف الم الفضيحه دى .... يا ريس 7000 عموما ... اللى مش مقرى منهم 600 بس ... الفكره انى انظمهم فى فولدرات بس
نورتنى يا فاروق لاول مره و مستنى التعليق الجاى بأه

Che يقول...

زهور
على فكره يا زهور انا كمان بعمل اللى انتى بتعمليه دى بالظبط .... بنضف و بكنس و بمسح حمامات و بعمل اكل و اغسل مواعين ... يعنى انا محتاج مساعده برضه ... و المساعد ربنا
بالنسبه لموضوع الشغل عندى محسسانى انتى و مى انى مؤسسه ... و على كل تعالى يا ستى .... طقم السكرتاريه لسه موجود ... عندك 600 رساله عايزين يتقروا و يتفرغوا .... حلو كده .... طبعا انا نفسى اسألك انتى بتشتغلى ايه بس انا مش بتكلم فى الحاجات الشخصيه على العام كده ... هههههه
منوارنى يا زهور يا سكرتيره المستقبل

"أحلام حقيقية" يقول...

امممممممم شخصيتى من ايميلى انا بالظبط زى ايميلى مش مشتقرة نفسيا ههههه الايميل بغيره كل شهر تقريبا وبعمل واحد جديد :))
ودلوقتى كبرت دماغى وقفلت لايميلات ومش بفتح غير علشان اقرا رسايل الفيس بوك اللى انا برضو اكتشتفت انى ادمنته فى الشهرين اللى فاتو دول

"أحلام حقيقية" يقول...

صحيح يامدمن الفيس بوك انا مش بشوف على الفيسبوك غير انك بتلعب حرب العصابات :))

Che يقول...

احلام
انا مش فاكر اذا كنتى علقتى عندى قبل كده ولا دى اول مره تنورينى ... بس كده كده اهلا بيكى
بالنسبه لتعليقك انتى اول واحده تجاوبنى على السؤال و تفهم انا عايز ايه من البوست بشكل عام .... كل اللى دخل تقريبا علق على نقطه ال 7000 رساله و سابو باقى البوست
مسأله انك مش مستقره نفسيا دى حاجه تقلق ... يعنى احنا النهارده صحاب الله اعلم بكره هنكون ايه ... بس عادى ... كلنا كده بس بدرجات ... بس مش لدرجه انى اغير الايميل كل شهر ... ده انا الجوزاء اللى بزهق من نفسى مش بعملها
حكايه الفيس بوك و انى مابعملش عليه غير حرب العصابات فده صح و مش صح ... صح لان اكتر حاجه بعملها هناك هى دى .. و مش صح لان فيه حاجات تانيه انا بعملها هناك برضه .... بس عندى سؤال .... انتى اسمك ايه على الفيس بوك لانى بصراحه حاولت اعرف لوحدى و فشلت فشل ذريع
نورتينى يا احلام

micheal يقول...

هههههههههههههههه..صحيح الفاضي يشوف ايميلاته
وبما أني عميد الانترفيوهات فبالتالي أنا مقضيها بحوالي 15 إيميل
:)
تحياتي

Che يقول...

مايكل
صدقت يا حبيبى يا مايكل والله .... الفاضى يشوف ايميلاته .... بس انت المفروض بعد ما الانترفيهوات تخلص تبقى تقولى على حكايه ال15 ايميل دى
منورنى يا مايكل

-_- يقول...

600

لسة مقريتهومش !!!

ربنا معاك !!

Che يقول...

شارم
آمين يا رب
منورنى يا شارم