الأربعاء، 2 سبتمبر 2009

يوم المطعم الايطالى

زى ما ناس منكم عارفه انا وصلت مصر يوم الاربع اللى فات اللى كان 5 رمضان ..... طبعا البلد لما رجعت لقيتها زى ما سبتها ، حاجتين بس اتغيروا .... التاكسى الابيض الجديد اللى انا عرفت انه تاكسى تبع وزاره الماليه و ده طبعا يخلينى اشك فى نوايا التاكسى ده لانه كفايه انه جاى من ريحه الغالى ابن الغالى .... و الحاجه التانيه العربيات الاسبيرانزا ال1600 سى سى ملت البلد لدرجه انى سمعت انها بأت بالحجز عشان انتاج المصنع مش مكفى المطلوب منها مع انها عربيات خبؤه أوى و فيها مشاكل كتير ..... المهم .... بعد ما وصلت بيومين هل علينا يوم الجمعه و صديقه عزيزه قالتلى تعالى افطر معانا ..... انا وافقت بحسن نيه .... طيب يا بنتى هنفطر فين ... قالتلى انا هتصرف .... انا عايز اقولكوا انى فضلت لغايه يوم الجمعه الساعه 5 العصر مش عارف انا نازل افطر ولا لا .... و اقولها يا بنتى حجزتى فين تقولى فى مطعم ايطالى فى المعادى ... طيب يا بنتى المطعم ده انا معرفوش و لو على الاكل الايطالى فيه مطعم سبارو و فيه مطعم كارينوس و الاتنين كويسين مع انى انا شخصيا بحب سبارو اكتر .... قالتلى لا المطعم ده كويس .... المهم قالتلى انه فيه ناس صحابها جايين ولد و بنت ... انا قلت عادى و رمضان يحب اللمه ... انزل ادور العربيه ، مابتنطقش ... احاول معاها يمين شمال مفيش ... مع انى قبل ما اسافر كنت رافعها عشان ارجع الاقيها شغاله .... قلت مش مشكله و خدت تاكسى من فيصل للمعادى .... و بلاد تشيلنى و بلاد تحطنى لغايه ما وصلت عند المطعم ..... اتصل اسألها انتى فين تقولى فى الطريق ... المكالمه دى كانت اصلا الساعه 6 و ربع قبل 10 دقايق من المغرب ... و تقولى ادخل اقعد جوه مع محمد اللى هو الولد اللى معانا ... اقولها هعرفه ازاى ... تقولى الوحيد اللى هيكون قاعد على ترابيزه لوحده فى المطعم و هتعرفه لان المطعم مليان و هو لوحده .... اضرب بعينى جوه المطعم الاقيه فاضى خالص من جوه زى قلب المؤمن المطمئن كده و مفيش حد .... المهم قلت مش داخل و هستناها لغايه ما تيجى ... دقيقه و لقيت واحد بيقولى عمرو مش كده ، قلتله محمد ؟ قالى اه ... قلتله انت فين يا راجل و دخلنا سوا ... المهم قلنا للوايتر على اسم الحجز و بنسأله نقعد فين قالنا فى اى مكان يعجبكوا ... طبعا ... ما اصل المطعم فاضى و مفيش غيرنا ... المهم المغرب اذن علينا قمنا صلينا و رجعنا ... محمد مسك المنيو و لسه هيختار الوايتر قاله ان الانسه اللى عامله الحجز اختارت الوجبه بالفعل .... يعنى هناكل غصب عننا و مش هنختار ... ماشى مش مشكله .... اختارت ايه يا بنى ... لقيت الولد بيقول اختارت بسله و كباب حله و رز و جلاش .... انا ساعتها و على رأى محمد حسيت انى رايح افطر عند خالتى .... سيبكوا انى اصلا معرفش ان المطاعم الايطالى بأت بتقدم بسله و كباب حله و جلاش فى اكلها .... ساعتها افتكرت اعلان كوكاكولا زيرو بتاع انك تاخد مراتك مطعم سوشى و تلاقى الشيف بيعمل ملوخيه .... المهم سكتنا و شويه و محمد قال للشيف انا مش بحب البسله عايز باميه مكانها .... و شويه و جت الانسه اللى اختارت و قعدنا نتريق عليها لغايه مازهقنا اصلا .... المهم شويه و لقيت واحد صاحبنا بيتصل بيها و هى راحت قالتله يجى على المطعم يفطر معانا ... انا كنت عايز اقوله مايجيش عشان مايكلش باميه و جلاش معانا ... المهم هو جه .. طبعا احنا قاعدين مستنين مرضناش ناكل او بالاصح الوايتر مارضيش ينزلنا الاكل لغايه ماصاحبنا يجى عشان نبقى لمه و عيله و احده و ناكل سوا و لما جه صاحبنا قعدنا شويه كمان لغايه ما الوايتر نزلنا الاكل .... اه نسيت اقولكوا .... الوايتر اللى كان هناك كان لسه مستلم الشغل فى اليوم اللى رحنا فيه و مكنش فيه غيره ... لدرجه ان صاحبه المطعم و جوزها كانوا هما اللى بيعملوا الاكل ..... مطعم ايطالى ايطالى يعنى .... المهم كلنا و خلصنا اكل و حمدنا الله الذى لا يحمد على مكروه سواه ... و قعدنا ... شويه و لقيتها بتقولى ان البنت اللى معانا عيد ميلادها النهارده و انها عايزه تروح تجيبلها تورته .... ماشى يا ستى ... طبعا كان فى خلال الفتره دى لقيت بشر كتير جت ماكنتش اعرف منهم غير 3 بس ، بنتين و ولد ... و سبحان الله كنت بسترخم التلاته ... يمكن بنت فيهم كنت مش بسترخمها أوى ، بس هى بأت مرتبطه فامش هينفع اقعد اهزر و كده .... المهم قال يعنى البنت اللى عيد ميلادها النهارده مش واخده بالها ان عيد ميلادها النهارده ... لقيت البنت اللى عازمانا على المطعم " الايطالى " بتقولى انا هقول انك عايز تشترى حاجه و نروح نجيب التورته و نرجع ... انا قلتلها شغال ... المهم و احنا فى الطريق بسألها سؤال عابر .. فين المحل اللى انتى حاجزه التورته منه ... تقولى انا مش حاجزه تورته .. امال يا بنتى هنجيبها منين .. قالتلى من اى حته ... يابنتى انتى مش بتصومى زينا و عارفه اننا رمضان .. قالتى أه ... قلتلها كل المحلات بتعمل حلويات شرقيه و نادر اللى بيعمل جاتوه و تورت ... قالتلى لا هنلاقى ... قلتلها طيب ... المهم طلعنا على شارع 9 و دخلنا لابوار و سألنا على تورته ، طبعا الناس بصولنا كأننا عبط و قالوا مفيش .. و شويه واحد منهم تطوع و قال فيه تورته ايس كريم ... قلنا لا ... دخلنا محل تانى برضه مفيش ... المهم رجعنا على المطعم " الايطالى " و لما دخلنا لقينا الناس قلت ... انا بسأل قالولى فيه ناس راحت تصلى التروايح .... قعدنا و شويه و جت الناس دى و جت ناس تانيه ... و بعدين صديقنا مختار اقترح علينا مكان نجيب منه تورته و فعلا رحنا لقينا هناك تورت مش تورته واحده ... طبعا صاحبتنا اللى كانت مش لاقيه و لا تورته فى المعادى لما لقيت تلاجه مليانه تورت قعدت تتأمر عليهم و هتختار انى تورته ... يا بنتى ماتمثليش ، احنا كنا مش لاقين اصلا ، هاتى اى واحده و خلصى ... و نعزم عليها بفلوس تقول لا .. طيب يا بنتى نشارك معاكى ... برضه واخده الدنيا بصدرها و تقول لا ... انتى حره ... المهم رجعنا على المطعم .... نسيت اقولكوا اننا كنا دفعنا شيك الفطار اللى كان بمبلغ 400 جنيه ل 5 افراد ... تخيلوا انى اكلت باميه و كباب حله و جلاش ب 400 جنيه .... طبعا دفعنا و احنا ساكتين ( بس ساكتين ادام الوايتر بس ) لما مشى قعدنا نتريق على البت طبعا .... و صاحبه عيد الميلاد البنت قايلالها انها عازمها ... تقريبا فاكره اننا هندفع 20 جنيه زى رحلات القناطر كده ... لما لقت اشيك ب 400 راحت بايعه البت و قالتلها ادفعى تمن اكلك ... الحاجه اللى تضحك ان البنت دى اصلا ماكلتش حاجه ... يمكن شربت كبايه كركديه و كلت معلقتين سلاطه بس و سابت الباقى ، و مع كده دفعت زيها زينا .. سبحان الله و له فى خلقه حكم ... طبعا التورته اتقطعت و غنينا و كلنا و هزرنا و قمنا روحنا و انا لغايه دلوقتى بذل البنت بحكايه المطعم الايطالى دى و تقريبا هفضل اذلها لغايه ما اموت .... نسيت برضه اقولكوا ، انا جالى زهايمر ولا ايه ... الشيك التانى بتاع البيبسى و الشاى و القهوه و الحاجات بتاعت التورته لما جه جه برضه ب 350 جنيه ... تحس اننا قاعدين فى الشيراتون مثلا ... بس مختار اتصرف و راح و خلى الشيك ب 155 جنيه بدل 350 و جنيه و برضه دفعنا و احنا ساكتين .... انا فى اليوم الجميل ده نسيت اقولكوا على احلى حاجه كانت موجوده فيه .... قرد صغير كان معانا و كان قالب حياتنا جحيم و احنا قاعدين .... بس هخلى حكايه القرد الصغير ده للمره الجايه ...... سلام

هناك 24 تعليقًا:

عاشقه وغلبانه يقول...

باميه وجلاش في مطعم ايطالي.....!!!!

هي مصر كسبت ايطاليا من شئ شويه
يلا عموما من خرج من داره اتقل مقداره
بربع اللي دفعتوه كنتوا تقدروا تعملوا عزومه مصريه محترمه
ولا ايطالي ولا اسباني

Che يقول...

ازيك يا دوك ... عامله ايه
على فكره مش عارف ادخل على البلوج بتاعك خالص
بالنسبه للعزومه فأنتى كنتى اكتر واحده علقت تعليق مؤدب عليها ... بس معلش ... الواحد مابيتعلمش ببلاش
نورتينى يا دوك

salwaa يقول...

تاكل ب400 جنيه ياوحش ومتعزمناشى..
مجموعه من المدونين كانوا بيتفقوا انهم حيلتقوا فى رمضان ويفطروا كباب وككفته ب20 جنيه!!وبالهنا والشفاء!!
وتعيش وتاكل غيرها!!

Che يقول...

سلوى
والله يا سلوى ماكلت لوحدى ... و بعدين المدونين دول انا معرفش حد فيهم ... و انا بعلن من هنا استعدادى التام انى افطر مع اى حد فى اى حته ... المهم مش افطر باميه و جلاش و كباب حله ب 400 جنيه ..... و بعدين كباب و كفته ايه اللى ب20 جنيه ... ليه بيتفقوا على اسعار الجنيه الاسترلينى مش المصرى ولا ايه
عموما ... انا فعلا كلتها ... بس يارب ماكلش غيرها
نورتينى يا سلوى

adel يقول...

ههههههههههه
الموقف ده بيحصلنا كتير
بس السبب نكون خارجين و عارفين انا مثلا المينيمم هيكون 50 جنية ولا حاجة و ناس تيجي و تمشي و نلبس احنا فرق الفلوس

بس مطعم ايطالي و عنده بسلة دي عادة لكن اللي مش عادي انا بيقدم كباب حلة
ههههههههههههههههههههه
اكيد بهزر ياعم
الاقي عندة صوابع لامؤاخذة زينب ؟؟

Che يقول...

عادل حبيب قلبى
اللى انت بتحكى عليه ده نظام مقالب و خزوقه ... مش معنى كده انى مضحكش عليا ... بس بمزاجى لا مؤاخذه... و بعدين هى صوابع لا مؤاخذه زينب فيها حاجه عيب ولا حاجه يا ريس
منورنى على طول يا عدوله

Mafrousa يقول...

ههههههههههههه
تعيشوا و تتفسحوا و تصرفوا
بس انا لومنكم اقعد اعيط على الالف جنية اللى اتصرفواهههههههههه
اكيد القرد ده ابن حد
ربنا يخلى
كل سنة و انتم طيبين

Unknown يقول...

(حسيت انى رايح افطر
عند خالتى)مالله ياسيدى
الفطار عند الخالة:)على
الاقل لا بتدفع عشرين ولا
خمسين ولا بتلف الكرة الارضية
تدور على تورتية ومش عارفة
ايه:)هلكتنى من الضحك الله يشرح
قلبك يارب.انما انت كنت جاى منين
يااستاذ عمرو؟كنت مسافر ولا ايه؟

Che يقول...

مفروسه
هما مكانوش الف جنيه بالظبط ... ههههه
بس سيبك انتى .... اللمه الحلوه ماتتعوضش و الايام الحلوه بنعيش على ذكراها بعد كده
بالنسبه للقرد الصغير ده ماكنش ابن حد فينا ... ده كان اخو حد فينا .. بس انا مش هقول مين عشان هو او هى عارف او عارفه نفسها ... هههههه
نورتينى يا مفروسه

Che يقول...

نور
والله مش انا اللى قلت الفطار عند خالتى ده كان محمد مش انا والله .. بس انا موافقه فى كده ... و فعلا مش بيكلف حاجه خااالص
بالنسبه للتورته كانت تستاهل اللف و التدوير عليها ، ده غير انه كان عيد ميلاد البنيه ... يعنى لازم نعمل كده
و انا يا ستى كنت مسافر السعوديه و لسه راجع يوم الاربع زى ما انا قلت ... الله يسلمك ( ده عشان انتى قلتى حمدالله على السلامه فى سرك ) ... هههه
نورتينى يا نور

زهور الامل يقول...

ازيك يا عمرو
الف حمدالله على السلامة
وعودا حميدا
بس انت كنت مسافر فين كل المدة دي

بالنسبة للعزوومة بقى
مش المفروض هي عزماكم
بتدفعوا ليه بقى
كنت سيبها هي تتدبس في الدفع وتتحمل مصاريف المطعم الايطالي بتاعها
ماله اكل مامتك
رايح تتعزم بميات علشان تاكل محشي وبامية وكباب
يع يع يع

كل عام وانت بالف خير
واوعى توافق تتعزم برة تاني
واللي يمشي ورا كلام البنات يستاهل اللي يجراله هههههههههه

تحياتي

زهور الامل يقول...

على فكرة يا عمرو
انا جبتلك باقي الامثلة بس بطريقة مختلفة
ياريت تبقى تعدي عليا كدة وتقرا وتقول رايك

تحياتي

Unknown يقول...

على فكره تحفه ضحكت من قلبي

بس يا حرام البنت "عزرت" عليها يا زلمه:)

وشو هالطلعه المتكلفه على قولتكم؟ وبالاخر ما انبسطتوش كمان!!

يلا تعيش وتفتكر يا باشا:)

مي يقول...

ههههههههههههههههههههههه بجد وحشتنى بوستاتك
اعمل ايه فيك يعنى انا ادخل مدونتك ابكى على الاطلال وانت فى مطعم ايطالى
بس ايه ده بامية هههههههههههههه سبحان الله هما الايطالين بياكولها (وش متنح)ههههههههههه
لا وكمان التورتة مفيش فى رمضان فعلا
بس الشيك كان غالى اوىىىىىىىىىىى الحمد لله انكم مغسلتوش الاطباق
اما القرد بقى انا مستنياه اصل العزومة كان ناقصة القرد كمان هههههههههههه
تحياتى يا قمر والمرة الجاية احنا هنفطرك

Che يقول...

زهور
الله يسلمك يا جميل .... انا يا ستى كنت فى السعوديه و لسه راجع مصر من اسبوع
بالنسبه للعزومه هى ماكنتش عازمنا .. هى كانت عازمه صاحبه عيد الميلاد .... و حتى لو كده ينفع نسيبها تتدبس ، احنا صحيح اندال بس مش أوى كده .. هههههه
بالنسبه لمامتى هى مش معايا عشان تأكلنى و انا قدرت اكلها جدا بعد المطعم ده ... و عندك حق فى اللى يمشى ورا كلام البنات
هقرا البوست بتاعك و اكيد هسيب تعليقى
منورانى على طول يا مى

Che يقول...

مياسى القمر
فينك يا قمر وحشانى من زمان و ملكيش طله كده زى العاده
الحمدلله ان البوست عجبك و انك ضحكتى من قلبك .... البنت عزرت ولا لا مش مشكلتنا احنا يا مياسى .. و بعدين انا لسه راجع اقوم اتصدم بالطلعه المتكلفه دى
بس الحقيقه اننا اتبسطنا باللمه ... بس دفعنا تمن اللمه دى غالى أوى .... هههههه
منورانى يا مياسى و ماتغيبيش عليا كتير كده

Che يقول...

مى
ربنا يخليك على المجاملات الكتيييييييييير اللى مغرقانى بيها ... و بعدين يا ستى ماتبكيش على الاطلال فى مونتى .... حسستينى انى مهاجر و عايش فى المطعم و سايبك انتى وسط اطلال مدونتى لوحدك .... ههههههه
انا زيك اتفاجأت ان الباميه و البسله وصلت للايطالين ... تقريبا بعد ماغلبناهم قالوا نشوف الفراعنه دول بياكلوا ايه و ابتدوا ياكلوا زينا
الشيك بأه كان فعلا ممكن نغسل الاطباق بيه ... بس تضافرنا عشان مانغسلش الاطباق و الحمدلله ربنا كلل جهودنا بالنجاح .... بس التورته كانت هايله الحق يتقال
القرد بأه انا مخبيه لسه ... هههههه
و ياستى مدام هتفطرينى المره الجايه انا مستنى المره الجايه دى ... بس بلاش مطاعم ايطالى عشان انا حرمت
نورتينى يا مى

Unknown يقول...

يالله منيح انكم انبسطوا
مع انو انبساط "متكلف برضك"

وعزرت يا عمرو معناها فضحت؛ يعني انت فضحت البنت-عالعزومه طبعا مش اشي تاني-بتعرف كيف حكي الشوام :)

Che يقول...

مياسى
تصدقى انا افتكرت عزرت دى يعنى اتزقت فى فلوس مش فضحت البنت
بس سيبك انا مافضحتهاش للاخر يعنى .... يعنى مثلا انا مقلتش هى مين .. عشان هى عارفه نفسها .... هههههه
و ماله يا ستى حكى الشوام .... اجدع حكى والله .... معندكيش عروسه بأه .. هههه
مستنى الرد على العروسه يا قمر

micheal يقول...

ههههههههههههههههههه..وكما قال الشاعر
والبيتزا باظت..أووووووه
أكل الحمص بدل البيتزا
ايه يا ابني ده كله بس..دي علاقتنا بإيطاليا حتنتهي
مستني المغامرة الجاية جدا
وعمار يا مصر

Polka Dotted يقول...

LOOOOOOOOOOOOL ya 3ini ya ebni !!!
italy eh bas abo besella b la7ma da :D


di a7'ret eli ye7'rog mn daro fi ramadan,

and 3la fekra... la poire beye3melo torat fi ramadan 3adi :D

Che يقول...

مايكل حبيبى قلبى
يا باشا انا مقصر معاك جدا فى البلوج بس سامحنى و خليك انت الكبير .... عامل ايه يا مايكل ... مستمتع آخر حاجه بتحليلاتك على الفيس بؤ يا عمنا
طبعا انا هعمل نفسى مش واخد بالى من نبره الفرح اللى فى صوتك و البيتزا و كده ... معلش .... انا الكبير فى دى .... هههههه
شفت يا مايكل عملوا ايه فى اخوك فى المطعم الايطالى
نورتنى و على طول منورنى يا مايكل

Che يقول...

بطوطه
والله انا تسائلت نفس التساؤل المشروع بتاع المطعم الايطالى و البسله و الباميه ده و لغايه دلوقتى مش لاقى اجابه
بس سيبك انتى .... الخروجه كانت حلوه بالناس اللى فيها .... مش كلهم يعنى
و بالنسبه للابوار والله مكنش عنده غير تورت ايس كريم .... اسألينى انا ... انا دخلت و شفت بعينى
نورتينى يا بطوطه

Che يقول...
أزال المؤلف هذا التعليق.