الثلاثاء، 26 مايو 2009

اه يا بلد

عندى شويه حاجات هاتكلم عليها النهراده الرابط الوحيد اللى بينها ان كلها خاصه بالاكل او المم فى مقولات اخرى
يعنى مثلا سمعت فى التليفزيون ان السمك فى مصر غلى جدا عشان الناس مش ضامنه الفراخ عشان انفلونوا الطيور و كمان قللوا اكل اللحمه عشان انفلونزا الخنازير و ان فى بعض ناس بتبيع لحمه الخنازير على انها لحوم بقر و جاموس ( واخدين بالكوا ان الناس قللت اكل اللحمه مش عشان الكيلو بأه داخل على خمسين جنيه انما عشان انفلونزا الخنازير ، سيبكم برضه النزيه نزيه ) .. ماعلينا و سمعت ارقام تخض زى البلطى من عشرين لخمسه و عشرين جنيه و البورى من خمسه و تلاتين و انت طالع ، طيب مثلا واحد زى كان بيحب ياكل السمك البوربون و كنت باكل الكيلو تقريبا بخمسه و اربعين جنيه ايام ما كان البلطى بخمستاشر جنيه ، يعنى معنى كده لما انزل مصر المرة الجايه هاجيب الكيلو بتسعين جنيه على الحسبه دى ، طبعا انا هنا مش باتكلم على الاكلات البرجوازيه زى الجمبرى و الكليمارى و الاستاكوزا انا باتكلم على السمك ، سيبك ان ساعات الواحد بيحب يطرى على قلبه بكيلو مشكل من الحاجات دى كلها بس كده بالكتير الماهيه هتكفى كيلو مشكل واحد فى الشهر و يقضى باقى الشهر بطاطس
سيبنا من السمك و الجمبرى و اللحمه و الفراخ و كل الحاجات اللى بتحتاج غسيل ايد بعد اكلها ( الا اذا كنت من الناس اللى بتمسح فى هدومها لما تخلص اكل و بعد كده تعمل حاجات و الناس تقولك صحه و عافيه ، ولو فى وسط ناس محترمه هيزودوا على الصحه و العافيه كلمه قله ادب ) و تعالوا نتكلم على حاجه تانى برضه حوالين لحمه الخنازير .... من كام يوم محافظ القاهرة قالك ان لحمه الخنازير بتتخلط مع اللحوم المجمده و ساعات بتروح المطاعم و بتتخلط مع اللحوم البقرى هناك و كده ، و فجاه الناس هاجت كأن الراجل كان واقف فوق البرج و عمل بيبى على الناس اللى فى الشارع ، طيب مهو الكلام اللى قاله المحافظ مش جديد .. يعنى مثلا فى ماركه بتاعت لانشون مشهورة جدا و حتى غيرت اسمها التجارى من كام سنه عشان الضرايب و كده كانوا بيجيبوا فول الصويا و بيخلطوه مع اللحوم المجمده اللى بتطلع منها اللانشون ، لغايه هنا و جميل جدا و حلو خالص بس الفكرة ان فول الصويا كان بيجى فى اشوله و طبعا بما اننا ناس نضيفه و بنخزن الاشوله دى صح فبيكون دايما فيها فيران و احنا من طيبه قلبنا و عشان الرفق بالحيوان بنسيب الفيران تاخد رزقها ، بس لما الاشوله بتتفضى طبعا الفيران بتنزل فى الخلاط الكبير و بتتخلط مع اللحوم المجمده على اساس انها مصدر للبروتين او على اساس اننا فى الصاعقه او من غير اساس زى اى حاجه فى بلدنا ، و حاجه كمان اسألوا اى كبابجى مهما كان اسمه او كان نضيف ( و انا هنا مش بالقح على رئيس الوزرا ) عن اذا كان اللحمه اللى بيشويها لحمه صافى او لا و اذا قالك اه قوله طيب حد حته و شوف هيعمل ايه ، لان الحقيقه يا افاضل ان لحمه الكبابجيه اردأ انواع اللحوم ده غير الشغت و الدهن اللى بيتخلط بيها و قال ايه عشان تمسك و يبقى ليها ريحه و طعم بس مش مهم الفايده الغذائيه او بمعنى ادق الضرر الغذائى لانه فى النهايه على رأى احسان عبد القدوس لا شئ يهم
برضه سيبنا من الكباب عشان الناس مش لاقيه تاكل عيش و انا بأتكلم على الكباب ، نتكلم على العيش نفسه ... من كام شهر قريت عن انهم شحنه قمح مسرطن و انهم حجزوها ، ساعتها انا قلت طيب ما اعدموش الشحنه ليه مدام مسرطنه يعنى هو احنا ناقصين سرطان عشان نستورد من بره مثلا ، وفضلت اسأل نفسى السؤال ده لغايه مانسيت زى كل الناس عندنا فى مصر مابتنسى لغايه ما من كام يوم سمعت منى الشاذلى فى العاشره مساء بتتكلم عن نفس الشحنه دى و ان فى كميات منها اتسربت و ساعتها عرفت الحكمه العميقه اللى كانت ورا عدم اعدامها ، و جابوا ناس اتكلمت ان الحكومه بتشترى منهم اردب القمح ب 380 جنيه و نفس الحكومه بتبيعلهم التقاوى اللى تزرع الاردب ده ب 900 جنيه ... طيب ازاى .. معرفش و لا تتعجب انها قدرة الله .. و بعدين يقولك ان الوزير راح اوغندا عشان يتفق معاهم انهم يأجرولنا ارض نزرع عليها قمح ، طيب هى ارضنا كفرت و لا الفلاحين عندنا ولاد كلب مثلا عشان كده بنخلى الاجانب يزرعولنا ولا احنا اتعودنا على سياسه القرع اللى دايما بيمد لبره ، المهم انى افتكرت الوزير اللى قبل الوزير ده او اللى قبل اللى قبله ساعات ماراح كندا برضه عشان برضه يأجر ارض نزرع فيها قمح زى ما تكون ارضنا كخه او البوبى عملها فيها و جرى مثلا و عشان كده مينفعش نزرع فيها ، طيب ماينفعش الحكومه بدل ماتأجر من الاجانب تأجر من الفلاحين الارض و تعاملهم معامله مرات الاب يعنى مش عايزين حنيه و كده و نحلى الفلاحين هما اللى يزرعوا القمح بس فى نفس الوقت يبقى فيه عائد مجزى ، لانهم اكيد مصريين بس ماينفعش يزرعوا لله و للوطن و يجوعوا هما و عيالهم لان كده يبقى حرام و كده كلنا نستفيد بس بما ان الحكومه مش مرات ابونا و بس انما السجان و الجلاد و كل حاجه عمرها ماهتعمل حاجه عدله للناس عشان احنا ربنا بيبتلينا او بيعاقبنا او بيخلص مننا ذنوبنا عشان نطلع على الجنه عدل
انا زهقت من الكلام و عشان كده هاقول سلام

هناك 16 تعليقًا:

MaNoOoSh يقول...

استنى بس.. نطلع على الجنة عدل بأمارة ايه.
طب دة حتى بيقولوا الساكت عن الحق شيطان أخرس.. ازاى بقى هيدخل الجنة خبط لزق كدة.
بكرة لو ربنا كاتبلنا عمر نقول لولادنا احنا على ايامنا كانت ال100 جنية بردو ممكن تجيب اتنين كيلو لحمة.

Che يقول...

منوش
نطلع على الجنه عشان متحملين حاجات كتير و راضيين بيها
و يعنى هى دى بس كلمه الحق الوحيده فى بلدنا .... احنا بلدنا مليانه حقوق بس ضايعه
بالنسبه لمسأله ولادنا انا اظن اننا هنقول كده لو اللحمه مغليتش عن الخمسين
نورتينى يا جميل

رحلتنا في الحياة يقول...

كلام جميل بس مين يسمع احنا بناذن فى مااااااااااالطا
شوية شوية مش هنلاقى الهواء اللى بنشمه
ربنا يرحمنا :(

سمكه واحده يقول...

عشان تعرف بس ان السمك مش اي كلام الغالي غالي بردو سيبك انت
كل حاجه فيها نيله الا السمك ههههههه
الله اعلم هيعملوا في ايه هو كمان

انت زهقت من الكلام يا اااه كلنا زهقنا والله علي رئيك هما بيأجروا ارض بره ليه
العيب في قله الضمير اللي مليه البلد
برغم خفه دم المصريين الا ان احنا وبلافخر عندنا قله ضمير غير عاديه وطناش وسكوت وتكبير دماغ
ومن رحمه ربنا ان معدتنا حديد بتفرم اللي يجي ادمها ودي من حكمه ربنا عشان نصبر علي البلاء ده بجد لو بصيت حوليك مش هتلاقي حاجه صحيه
السرطان ملي بلدنا في كل حاجه
قمح فراخ لحمه هوي مايه
طب منزرع زي زمان والفلاحين يطلعوا علي عربيات وهما بيبيعوا عنب ونغني
ياللي علي الترعه حود علي المالح
ووله يا وله يعرباوي
والبت بيضه بيضه بيضه وانا اعمل ايه
يمكن لما نغني الاغاني دي نرجع نزرع قطن وقمح وذره وحجات حلوه ونسقف وياهو وكده يعني

عارف سعات بحس انه ابتلاء من ربنا وعلي بيحصل والفوجر اللي البلد بقت فيه والله وربنا يرحمنا وانه غضب من ربنا

بقلك ايه
متشوفلي حاجه عندكوا والواحد يهج من البلد دي
طب الواحد هياكل ايه من بره في الخروجات والصيف ده ويدلع نفسه يعني
مهو خايف ياكل اي حاجه ينفع كده يعني
ياله بقي ناكل اسماك وامرنا للله
سلام

سوبيا يقول...

والله يا تشي
عندك حق

بيقولوا
لو كانت همومنا عبادة
كان يبأه مثوانا الجنة

برغم كل البلاوي اللي قلتها
الا اني معرفتش امسك نفسي من الضوحك وانا بقرأ
هو شر البلية ما يضحك ولا اييييييييييييييه ؟؟!!

Magi Mostafa يقول...

انا من زمان اكتشفت حاجه مهمه
بلدنا هى كده وهتفضل كده مش عاجبك روح اشرب من البحر او اخبط راسك فى الحيط
انت شفت حكايه مصل انفلونزا الطيور المصرى وتم تصنيعه فى المركز القومى للبحوث الى اخيرا انتج حاجه مفيده

وبيتم تعطيل انتاجه لمده سنتين مبدئيا
وطبعا كله عشان السمسره واستيراد البديل الاجنبى

وبدل منشكر فريق البحث لا نبهدله عشان ننتج المصل كأننا بنعاقبهم ونقولهم يا شطار متخترعوش حاجه تانى انتم فى مصر مش فى امريكا

عمرو يقول...

أنا هلكت من الضحك على فكرة يا تشي. مش معقول. انت مش ممكن. ماما قالت لي بتكلم مين وتضحك على الن لما قريت لها ما عرفتش تمسك روحها من الضحك (ما يروحش فكرك لبعيد)
روح يا شيخ.. وتعالى تاني
:)

Che يقول...

ايوشه
والله انا عارف اننا بندن فى مالطه بس هنعمل ايه ... يعنى مثلا انا كنت قلت انى هابطل ادن هناك بس طلعت عيل و معرفتش ابطل لانى غصب عنى مش قادر انسلخ عن البلد
و على رأيك ... ربنا يرحمنا
نورتينى يا جميل

Che يقول...

سمكه هانم
طول عمرى عارف ان السمك مفيد والله و انا اقدر اقول حاجه غير كده ( و حتى لو اقدر اتكلم على السمك هاتكلم عليه مع سمكه ، ده انا ابقى مجنون رسمى ... ههههه )
و النبى بلاش سيرة السرطان عشان انا باتشائم
نورتينى يا سمكه

Che يقول...

ماجى
طبعا قريت و سمعت عن مصل الانفلونزا و كنت مشفق على الفريق اللى اخترعه عشان فعلا زى ما انتى قلتى كان لازم حد يقول الناس دى اننا فى مصر مش فى امريكا عشان يبطلوا يخترعوا حاجه تانى ... و فى الاخر مينفعش غير نقول يا رب
نورتينى يا جميل

Che يقول...

عمرو باشا
اولا اهلا بيك فى بيتك لاول مره و عسى الا تكون الاخيرة
ثانيا تحياتى ليك و للسيده مامتك و سعيد انى خليتكوا تضحكوا شويه بعد الهم اللى احنا كمصريين بنكون مستمتعين اننا بنعيشه
ثالثا ربنا يخليك على مجاملتك
و اخيرا .. متخافيش مخى مش هيروح لبعيد .. او هيروح و يرجع تانى ... ههههه
نورتينى يا باشا

sandy يقول...

ازايك يا عمور اخبارك اه واحشنى موت طبعا اللى قلتو هوا الواقع فى مصر بس فيه والله حاجات تانيه حلوه كتير بتحصل فى مصر حاول برده تقولها عشان تدينا امل شويه وبطل بقى طريقتك فى الكلام اللى ميخلاش من الكلام الخارج من يوم ماعرفتك سيبك انتتا بس فعلن واحشنى موت ونفسى اشوفك سلام

أسما يقول...

تعرف، البلد دي و ناسها عايزين الحرق. الوحشين هيموتوا، و الطيبين و الغلابة هيستريحوا من بلاويها. و بعدين تيجي ناس نضيفة تبنيها من اول و جديد.

واضح ان فاتني كتير ف مدونتك، بس انا كنت باحارب ف ييجي 5000000 معركة اليومين اللي فاتو دوول. هاقرا و اعلق.
:)

Che يقول...

Sandy
انا طبعا مش هاعلق على كلامك على البلد و جلاوتها بعد اللى انتى قلتيه على المسنجر
على كل اكيد بدلنا فيها حاجات حلوة كتير بس اللحمه مش من الحاجات دى
نورتينى يا جميل

Che يقول...

Isolde
انا موافق على الحل بتاعك مع انه جذرى جدا بس واضح انه مابقاش ينفع غيره
مستنى اسمع حكايات معاركك و على كل مافتكيش غير شويه اكتئاب
نورتينى يا جميل و ماتغيبيش كده

Che يقول...

سوبيا
معلش يا قمر على انى اتأخرت فى نشر التعليق بس سقط سهوا و انا اسف جدا
جامد جدا المثل بتاع لو كانت همومنا عباده كان مثوانا الجنه ... بس الواضح ان برضه فى ناس مستكتره علينا اى مصلحه تطلع من الهم .. يعنى يتنكد علينا ببلاش
و انا سعيد انك ضحكتى و لو شويه صغيرين و انتى بتقرى البوست
نورتينى يا جميل