احنا اتفضحنا يا رجاله + تحديث للروايه و واحد جامعه

تم نشر الفصل السادس فى الروايه بعد طول غياب دوسوا على روايتى عشان تقروه و مستنى رأيكو

تم نشر البوست الجديد فى واحد جامعه دوسوا على اللينك عشان تقروه و مستنى رأيكو فيه

_________________________________________________________________

كنت باتكلم مع حنون و بعدين قالتلى انا هابعتلك صورة و بعتتلى الصورة اللى انتوا شايفنها دى .... انا اتخضيت لما شفتها و رجعت 3 سنين لورا للحظه اللى الصورة دى اتلقطت فيها ... الصورة دى بتجمعنا كلنا بلال و نادر و امير و فناجيلى و انا و القيادى الشاب و معانا بيتر و ده واحد صاحبنا بس انا علاقتى بيه ماكنتش قويه اوى و معانا كمان يوسف و ده بأه معيد بعد ماخلصنا ( بس معيد بجد مش معيد زينا عشان محدش يفهم غلط ) و اتنين كمان انا معرفهمش .. طبعا انا مش هاقول احنا مين عشان الفضايح و الحسد و كده .... والله و اتفضحنا على الفيس بوك يا رجاله و بأينا انترناشيونال .... و بعد كده قعدت اتكلم مع حنون على الصور و ان الصورة دى تانى صورة ليا فى الجامعه لانى مخدتش غير صورتين و صورنا فيديو واحد ( بس والله كان مؤدب عشان محدش دماغه تروح لبعيد ) .. انا مش من هواه الصور عموما عشان باطلع فيها وحش عشان كده صورى قليله جدا عموما ، لدرجه انى عندى صورة بالبدله و كل مابتخلص باطلع عليها و صوره تانيه من غير بدله و برضه باطلع عليها لما باحتاجها .. بعكس حنون اللى قالت انها كل مابتخرج بتتصور و كل مابتروح الجامعه بتتصور و هيصه بأه عشان هى لما كنا فى الكليه ماكنتش بتتصور خالص و بالتالى بتعوض النقص بأنها تتصور على اد ماتقدر دلوقتى ... ساعتها قعدنا نتكلم عن ان الصور هى اللى بتفضل فى الذاكرة .. يمكن انا مش حاسس الموضوع ده دلوقتى عشان اغلب الاحداث اللى مرت عليا موجوده فى ذاكرتى بس اكيد كل ما الوقت يعدى التفاصيل الصغيرة بتاعت الاحداث دى بتقل و بتقع من دماغى و فى احداث كتير بتقع من دماغى اصلا .. ده غير ان الصور اصلا كمان بتحتفظ بلحظه معينه من الزمن و فى الغالب بتكون اللحظه سعيده لاننا نادرا ما بنتصور و احنا متضايقين الا الصور بتاعت المقالب و الرحلات ... يعنى مثلا تتصور و حد عاملك قرنين كنايه عن ودان اسمه ايه ده ... الصبور ده ... يااااه مش فاكر اسمه بس انتوا اكيد فاهمين انا قصدى ... فى برضه صور الحبيبه و العشاق و نظام علمنى العوم و النبى يا احمد بس بلاش تاخدنى فى الغويط .... الصورة دى بجد لما انا شفتها رجعت لايام الكليه ، و على اد ما كانت ايام ايام سوده و كلها هم و غم بس برضه كان فيها لحظات حلوة و ناس حلوة برضه ، و ده طبيعى مفيش حاجه بتكون كلها سوده ولا حاجه كلها بيضه بس الفكرة انك تتقبل الفكرة نفسها ان الدنيا مش بتمشى زى ما انت عايز و بجد دى فكرة صعب جدا تقبلها ... المهم نرجع لمرجعونا تانى ... الصورة دى كانت و احنا فى رابعه اول .. تقريبا فى الترم التانى ، الاوقات اللى الناس بتستعد تفارق فيها الكليه فبيبتدوا يتصورا مع بعض من باب اننا صحاب لغايه ما الموت يفرقنا و النظام ده مع ان ساعات لما واحد بيشوف الناس اللى معاه و تيجى تسأله دول مين يقولك اهى مصايب بتتحدف علينا ( فكرتنى بالحكايه المشهورة لما الملك فاروق اتنكر فى يوم و نزل ركب حنطور ، و بعدين بيسأل العربجى فى رأيه فى الملك فاروق قاله ابن كلب .. قام فاروق قاله طيب و رأيك فى ابوه الملك فؤاد قال الله يرحمه كان ابن كلب زيه ) .... الصورة دى كانت تانى صورة اتصورتها فى الكليه .. اول صورة كانت فى اول سنه .. لسوء الحظ انا معيش نسخه منها عشان تشوفوا الاختلاف من باب Before & After بس برضه الصوره الاولانيه دى عزيزة جدا ( عزيزة جلال ... ههههه ، معلش القافيه تحكم ) عليا عشان كانت و الواحد لسه برئ و ابيض من جوة ، بس مش معنى كده انى مش برئ و ابيض من جوة دلوقتى انما تقدروا تقولوا ان الواحد فى اوله غير اخره عشان بيتعلم حاجات و الا لو مابيتعلمش يبقى يستاهل القرنين اللى يتحطوا ورا دماغه فى الصور .... برضه انا اتذكر انى ليا كام صورة فى كام رحله كده بس بعيد عن رحلات الكليه ، لانى من كتر عشقى و حبى للكليه مكنتش عايز اى حاجه تربطنى بيها ..... بس اللى اشد من الصور دى كلها كان الفيديو اللى اتصور ساعه ما كان ايمن و وجدى و مراتتهم فى رابعه و انا كنت فى تالته اياميها و كانوا فاكرين انهم خلاص سايبين الكليه بس الحقيقه ان ايمن بس اللى سابها و باقى الناس فضلت فى رابعه و انا فضلت فى تالته .... ايام سوده مش بقولكوا ... بس دى حكايه تانيه و صورة تانيه .... سلام

الله اعلم

منير و فيروز
فى حاجه غريبه انا خدت بالى منها ..... اغلب اللى بيحبوا منير بيكونوا فى نفس الوقت بيحبوا فيروز و بيسهروا معاها بليل .... يعنى انا مثلا باسمع فيروز لما باكون عصبى او قرفان و سبحان الله دايما بتخلينى اهدى و اروق و ابقى فريش مش عارف ليه .... و طبعا منير .. الكينج و الكبير كبير ... مهما اتكلمت على منير ماينفعش تديله حقه .... كمان تلاقى الناس دى ( اللى انا منها ) اننا بنحب عموما الاغانى القديمه و الناس القديمه و بنتكيف منها ليه .... الله اعلم

تموره
مدام اتكلمنا على منير و فيروز انا فى حاجه عايز اعرفها ... هو تمورة شعر الصدر حسين المشهو بتامر حسنى كان تعبان و هو بيمثل عمر و سلمى 2 ولا ايه ... اصلى خدت بالى انه مش مبين شعر صدره غير فى 3 مشاهد بس و باقى الفيلم لابس تشيرتات و ساتر نفسه .... كنت دايما باستغرب لما تامر يبين شعر صدره ، تقريبا فاكر ان ده بيزود فى السيكس ابيل بتاعه او مثلا انه هو الراجل اللى عنده شعر فى صدره و احنا كلنا ناس اجروديه مثلا .... كنت باقول هو محدش قاله ليه ان السبعينات ايام ما كانوا بيفتحوا القميص لغايه نص صدرهم فى مصر و لغايه سرتهم فى لبنان خلصت خلاص و اننا دلوقتى بنمشى بهدوم مفتوحه ..... و جايز يكون تامر عايز ينافس المطربات اللى بيبينوا صدرهم مثلا فهو كمان بيبين صدره و محدش احسن من حد ... الله اعلم

الزمالك
يا ترى بعد ما مرتضى خسر الانتخابات هيطلع الملفات ( اللى شكله عامل لكل واحد فى مصر ملف و شايله عنده ) هيطلع ملفات ممدوح عباس امتى .... بس عموما انا متفائل ... الزمالك السنه الجايه هيلعب على المركز الرابع مش المركز السادس زى السنه دى عشان السنه دى كانت كبوة .... و الى كل عشاق الزمالك ... الزمالك راجع تانى ... بس هيتأخر شويه عشان راجه فى تك تك ..... تفتكروا هيوصل امتى ..... الله اعلم

العلاج بالتدوين
مكنتش اعرف انه فى حاجه اسمها العلاج بالتدوين ... يعنى مثلا الايام اللى كنت باكتب فيها كتير كنت باعتبر نفسى عندى اسهال فكرى و بخلص منه على البلوج و كنت لما تجيلى الحاله دى ابطل اخد لاكتيلوز و اكل حمص عشان راسى تمسك شويه و ابطل كتابه
بس قريت عند Isolde و عند Enjy كمان انه فى حاجه اسمها العلاج بالتدوين و طبعا انجى دكتورة نفسيه فاكيد فاهمه هى بتقول ايه ... بس لو كده يا ريت كانت كل مشاكلنا ينفع تتحل بالتدوين ... انما انا بحس اننا بنكتب عشان مانطقش و تجيلنا نقطه مثلا ... الكلام ده صح ولا غلط ..... الله اعلم

تليفزيون الحياه
اللى بيتفرج على الحياه يحس ان رمضان خلاص الاسبوع الجاى .... عمالين يجيبوا اعلانات على مسلسلات رمضان قبل رمضان ما يجى بشهرين تقريبا ، يمكن على اساس اننا تفضى نفسنا بأه فى رمضان عشان المسلسلات ... جايز .. الله اعلم
تانى حاجه على تليفزيون الحياه هى برنامج بنى ادم شو بتاع احمد ادم .. انا عندى سؤال واحد بس ... المزز اللى بتبقى قاعده فى الاستديو دول بيبقوا جايين مع البرنامج ولا متأجرين ولا ايه ..... حد سمع الضحكه اللى كل واحده فيهم بتفقعها ... بحس انى قاعد فى كباريه او ديسكوتيك على احسن تقدير ... ولا يمكن عشان انا فى بلد مفيهاش ستات فى الشارع فبحس الضحك ده اوفر شويه و هو ده بأه العادى بتاعنا فى مصر .... الله اعلم
تالت حاجه و اخر حاجه على الحياه برضه ....... هما ليه لما بيجيبوا اعلان عن مسلسل بيقولوا اسامى كل ابطاله و مابيقولوش اسماء فنين الاضاءه و مساعدين المخرج و كده .. يعنى هى جت على دول .... الله اعلم

انا حاسس انى كنت باهيس و دلوقتى لازم ابطل تهييس .... سلام

اه يا بلد

عندى شويه حاجات هاتكلم عليها النهراده الرابط الوحيد اللى بينها ان كلها خاصه بالاكل او المم فى مقولات اخرى
يعنى مثلا سمعت فى التليفزيون ان السمك فى مصر غلى جدا عشان الناس مش ضامنه الفراخ عشان انفلونوا الطيور و كمان قللوا اكل اللحمه عشان انفلونزا الخنازير و ان فى بعض ناس بتبيع لحمه الخنازير على انها لحوم بقر و جاموس ( واخدين بالكوا ان الناس قللت اكل اللحمه مش عشان الكيلو بأه داخل على خمسين جنيه انما عشان انفلونزا الخنازير ، سيبكم برضه النزيه نزيه ) .. ماعلينا و سمعت ارقام تخض زى البلطى من عشرين لخمسه و عشرين جنيه و البورى من خمسه و تلاتين و انت طالع ، طيب مثلا واحد زى كان بيحب ياكل السمك البوربون و كنت باكل الكيلو تقريبا بخمسه و اربعين جنيه ايام ما كان البلطى بخمستاشر جنيه ، يعنى معنى كده لما انزل مصر المرة الجايه هاجيب الكيلو بتسعين جنيه على الحسبه دى ، طبعا انا هنا مش باتكلم على الاكلات البرجوازيه زى الجمبرى و الكليمارى و الاستاكوزا انا باتكلم على السمك ، سيبك ان ساعات الواحد بيحب يطرى على قلبه بكيلو مشكل من الحاجات دى كلها بس كده بالكتير الماهيه هتكفى كيلو مشكل واحد فى الشهر و يقضى باقى الشهر بطاطس
سيبنا من السمك و الجمبرى و اللحمه و الفراخ و كل الحاجات اللى بتحتاج غسيل ايد بعد اكلها ( الا اذا كنت من الناس اللى بتمسح فى هدومها لما تخلص اكل و بعد كده تعمل حاجات و الناس تقولك صحه و عافيه ، ولو فى وسط ناس محترمه هيزودوا على الصحه و العافيه كلمه قله ادب ) و تعالوا نتكلم على حاجه تانى برضه حوالين لحمه الخنازير .... من كام يوم محافظ القاهرة قالك ان لحمه الخنازير بتتخلط مع اللحوم المجمده و ساعات بتروح المطاعم و بتتخلط مع اللحوم البقرى هناك و كده ، و فجاه الناس هاجت كأن الراجل كان واقف فوق البرج و عمل بيبى على الناس اللى فى الشارع ، طيب مهو الكلام اللى قاله المحافظ مش جديد .. يعنى مثلا فى ماركه بتاعت لانشون مشهورة جدا و حتى غيرت اسمها التجارى من كام سنه عشان الضرايب و كده كانوا بيجيبوا فول الصويا و بيخلطوه مع اللحوم المجمده اللى بتطلع منها اللانشون ، لغايه هنا و جميل جدا و حلو خالص بس الفكرة ان فول الصويا كان بيجى فى اشوله و طبعا بما اننا ناس نضيفه و بنخزن الاشوله دى صح فبيكون دايما فيها فيران و احنا من طيبه قلبنا و عشان الرفق بالحيوان بنسيب الفيران تاخد رزقها ، بس لما الاشوله بتتفضى طبعا الفيران بتنزل فى الخلاط الكبير و بتتخلط مع اللحوم المجمده على اساس انها مصدر للبروتين او على اساس اننا فى الصاعقه او من غير اساس زى اى حاجه فى بلدنا ، و حاجه كمان اسألوا اى كبابجى مهما كان اسمه او كان نضيف ( و انا هنا مش بالقح على رئيس الوزرا ) عن اذا كان اللحمه اللى بيشويها لحمه صافى او لا و اذا قالك اه قوله طيب حد حته و شوف هيعمل ايه ، لان الحقيقه يا افاضل ان لحمه الكبابجيه اردأ انواع اللحوم ده غير الشغت و الدهن اللى بيتخلط بيها و قال ايه عشان تمسك و يبقى ليها ريحه و طعم بس مش مهم الفايده الغذائيه او بمعنى ادق الضرر الغذائى لانه فى النهايه على رأى احسان عبد القدوس لا شئ يهم
برضه سيبنا من الكباب عشان الناس مش لاقيه تاكل عيش و انا بأتكلم على الكباب ، نتكلم على العيش نفسه ... من كام شهر قريت عن انهم شحنه قمح مسرطن و انهم حجزوها ، ساعتها انا قلت طيب ما اعدموش الشحنه ليه مدام مسرطنه يعنى هو احنا ناقصين سرطان عشان نستورد من بره مثلا ، وفضلت اسأل نفسى السؤال ده لغايه مانسيت زى كل الناس عندنا فى مصر مابتنسى لغايه ما من كام يوم سمعت منى الشاذلى فى العاشره مساء بتتكلم عن نفس الشحنه دى و ان فى كميات منها اتسربت و ساعتها عرفت الحكمه العميقه اللى كانت ورا عدم اعدامها ، و جابوا ناس اتكلمت ان الحكومه بتشترى منهم اردب القمح ب 380 جنيه و نفس الحكومه بتبيعلهم التقاوى اللى تزرع الاردب ده ب 900 جنيه ... طيب ازاى .. معرفش و لا تتعجب انها قدرة الله .. و بعدين يقولك ان الوزير راح اوغندا عشان يتفق معاهم انهم يأجرولنا ارض نزرع عليها قمح ، طيب هى ارضنا كفرت و لا الفلاحين عندنا ولاد كلب مثلا عشان كده بنخلى الاجانب يزرعولنا ولا احنا اتعودنا على سياسه القرع اللى دايما بيمد لبره ، المهم انى افتكرت الوزير اللى قبل الوزير ده او اللى قبل اللى قبله ساعات ماراح كندا برضه عشان برضه يأجر ارض نزرع فيها قمح زى ما تكون ارضنا كخه او البوبى عملها فيها و جرى مثلا و عشان كده مينفعش نزرع فيها ، طيب ماينفعش الحكومه بدل ماتأجر من الاجانب تأجر من الفلاحين الارض و تعاملهم معامله مرات الاب يعنى مش عايزين حنيه و كده و نحلى الفلاحين هما اللى يزرعوا القمح بس فى نفس الوقت يبقى فيه عائد مجزى ، لانهم اكيد مصريين بس ماينفعش يزرعوا لله و للوطن و يجوعوا هما و عيالهم لان كده يبقى حرام و كده كلنا نستفيد بس بما ان الحكومه مش مرات ابونا و بس انما السجان و الجلاد و كل حاجه عمرها ماهتعمل حاجه عدله للناس عشان احنا ربنا بيبتلينا او بيعاقبنا او بيخلص مننا ذنوبنا عشان نطلع على الجنه عدل
انا زهقت من الكلام و عشان كده هاقول سلام

الدرس الأخير

بعد ما الاسماعيلى قال هنكسب الاهلى و ناخد الدورى .... الاسماعيلى فعلا خده .... بس مش الدورى انما خد الدرس الاخير من جوزيه و لعيبه النادى الاهلى و انا بحييهم فرد فرد كل بأسمه و انا و انت و سمعنى سلام والله و عملوها الرجاله

بعد ما الزمالك ساب الاسماعيلى يكسبه و بعد ما كل الزمالكويه كان نفسهم الاهلى يخسر الاهلى كسب برضه

الاسماعيلى ممكن يجيب شويه مانجه يفعص فيهم او يلعب فى مناخير الزمالك او يلعبله فى اى حته تانيه زى شعره مثلا عشان الناس اللى نيتها وحشه متفتكرش انى قصدى انه يلعبله فى حته عيب ولا حاجه مع انهم على حد كلام جماهيرهم ولاد عم يعنى هما احرار سوا او يلعبله فى ودنه مثلا لو شعره مش عاجبه

و اخيرا ...... اديك تقول ماخدتش يا ناكر الجميل .... تشوف تقول ماشفتش متشكرين يا اصيل

الاهلى فوق الجميع و الزمالك و الاسماعيلى على رأى دبور ياخدوا فيزا

تنويه هام

بعد طول غياب ( اكتر من شهرين و يمكن كملت 3 شهور و انا مش واخد بالى ) تم استئناف النشاط مره تانيه على واحد جامعه و تم نشر البوست الجديد و يا رب يعجبكوا

انا لله و انا اليه راجعون

فى حاجه زمان اتعلمناها ..... لا شماتة فى الموت و لا خلاف مع ميت .... يعنى على أد خلافنا مع الريس و ولاده بس من كل قلبنا بنقوله البقيه فى حياتك و لله ما عطى و لله ما أخذ و ربنا يصبر والديه و اهله و يرحم الفقيد

يعنى ايه مصر

يعنى ايه مصر ... سؤال صعب أوى لانك مهما قلت مش ممكن تختصر بلدك فى كلام مهما كان الكلام ده
مصر عندى حاجات كتير هاقولها و حاجات اكتر مش هاقولها
مصر يعنى لما اعدى جنب الجامعه و افتكر سنينى فيها و ايامى الحلوة و المره فى قلبها .... مصر يعنى شارع عبد العزيز آل سعود و سينما جالاكسى و البروفيترول بتاع لارين و كووك دوور و جنينه النصر اللى ياما فطرنا فيها فى رمضان و كنا فاكرين اننا كل سنه هنفطر فيها انما مفيش حاجه بتفضل على حالها .... مصر يعنى وسط البلد و حمامات طلعت حرب مول اللى انا عامل معاها تعاقد و عربيه الكبده اللى ادام سينما اوديون و القهوة اللى ورا نفس السينما و قعداتى عليها مع نادر و بلال و امير او نادر و بلال او نادر و امير او حتى نادر لوحده يعنى نادر العامل المشترك دايما فى وسط البلد ..... مصر يعنى اسكندريه فى الشتا و ايام النوة و الترام اللى كنا بنركبه عشان الفسحه و ايامى الغامقه فى ابو خروف مع وجدى .... مصر يعنى العين السخنه و شط السادات اللى الميزة الوحيده اللى فيه الكوبرى اللى كنا بنط من عليه .... مصر يعنى راس البر و رحلتنا السوده لهناك باتوبيس تاتا هندى من مواليد سنه 70 و ازاى تاخد الطريق من هناك للجيزة فى سبع ساعات ... مصر يعنى شرم و سانت كاترين اللى لازم تطلعه قبل الشمس ماتطلع عشان تلحق تدعيلك دعوتين يمكن ربنا يستجيب منك زى ما استجاب من سيدنا موسى ....مصر يعنى الغردقه و السنوركلينج ...... مصر يعنى خط الصعيد و تربه ابويا اللى فى بنى سويف و اهلى اللى فى المنيا و اصحابى اللى فى كل محافظه لغايه شلاتين .... مصر يعنى الهيئه المصريه للكتاب و دار الكتب .... مصر يعنى بيتنا اللى دايما كان بيت اخواتى مش اصحابى بلال و نادر و امير و الموز اللى دايما كنت اطلبه من نادر لغايه ما افتكر انه جاى جبلايه لان الموز ده مهمت كانت كميته لازم يخلص ... مصر يعنى ايمن و مراته و وجدى و مراته و حجاج و مراته و الوكيل و مراته و عيالهم بالمرة .... مصر يعنى عبد الرؤوف و حكمت اللى زى ابويا و امى و اللى بيحبونى بجد و انا كمان بحبهم من جوايا .... مصر يعنى انمار اكتر واحد قريب منى مع انه زعلان منى انما اكيد مسيرى اصالحه عشان بجد هو واد جدع برغم انه دايما عيل بس قلبه طيب .... مصر يعنى كل اللى عرفتهم فى الجامعه و انا عرفت كتير ، حبيت منهم ناس و كرهت منهم ناس بس كلهم علموا فى حياتى و علمونى كتير .... مصر يعنى امى و عمتى و جوز عمتى اللى هما ابويا و امى التانين و اخويا اللى مهما بتخانق معاه انما هو الوحيد اللى من دمى و انا و هو بس أخر اتنين رجاله شايلين اسم العيله و الالحاح اننا لازم نتجوز عشان اسم العيله مايضيعش و يمكن اللى من الصعيد يفهموا اللى انا بتكلم عليه ... مصر يعنى كل بنت ارتبطت بيها سواء سيبتها او سابتنى ، كل بنت اعجبت بيها و عبرت عن اعجابى او احتفظت بيه عشان ماكنش ينفع انى اعبر عنه و اعتذر انى مش هاقول اسامى اى واحده فيهم لانى ماتعودتش اكون ندل .... مصر يعنى الحسين و تفتطر عند العهد الجديد و حمام فرحات مع ان فى ناس كتير مش بتحب فرحات ... مصر يعنى جامعه الدول و قدورة اللى ياما مشانى مفلس و كافيهات جامعه الدول اللى اكلت مننا كتير و خصوصا لوكيشن مع ان برضه فى ناس كتير مش بتحبه .... مصر يعنى الهرم الكبير اللى انا لحقت ادخله قبل مايمنعوا دخوله و معرفش اذا كانوا فتحوه تانى ولا لا ..... مصر يعنى تاخد الاتوبيس من موقفه لغايه اخره عشان تعرف بلدك و انت لسه فى ثانوى ..... مصر يعنى تلعب بلياردو لغايه ماتحس انك ممكن تدخل بطوله العالم و تبطله بعد كده .... مصر يعنى لعب البولينج لغايه ماتحس انك مش قادر ترفع ايدك و ان صوابعك بتوجعك موت من مسكه الكورة ... مصر يعنى الاهلى و تفرح لما يفوز و تتغم لما يتغلب و تغيظ الزملكاويه و الاسمعلاويه بتوع المانجه بعد الماتشات دايما او تستخبى منهم ..... مصر يعنى المرمطه فى الشوارع و شغل الميديكال ..... مصر يعنى قهوة التجاريه بعد الساعه اتنين بليل .... مصر يعنى سامح و حسين و اوسه و جارحى و الصياعه اللى لغايه الصبح .... مصر يعنى دورات الفيفا مع جيمى و تيفا و وليد و الافلام و المسلسلات الاجنبى اللى كنا بناخدها من بعض
زى ما انا قلت فى الاول مصر يعنى حاجات كتير انا قلتها و حاجات اكتر انا مقلتهاش
و اخيرا مصر يعنى حنون او حنوووووووووووووووووون زى ما انا بأقولها على طول
انتم بأه يعنى ايه مصر بالنسبه ليكم ............ سلام