خمسه جد

جزيرة الميدان

2011-07-17T06:28:00.001-07:00

جربت تتخانق مع سواق تاكسى او سواق ميكروباص قبل كده ... لو عملت كده هتكتشف انك بمجرد ما السواق ينزل كل سواقين التاكسى او الميكروباص هيقفوا و ينزلوا و يساندوا زميلهم ( و انا هنا قلت زميلهم لأنه ممكن يكونوا ميعرفهوش اصلا او اصحاب ) ، و يبتدوا يتكلموا معاك بالذوق و خلاص و معلش يا استاذ ، لو انت اللى صح و هو اللى غلطان .. و لو لقوا انك هتبتدى تبلطج يبقى فى احتمال لا بأس بيه انك تاخد علقة محترمة تخليك تبوس ايد كل سواق تشوفه بعد كده .... انما لو انت اصلا اللى غلط و السواق اللى صح يبقى هيتحط عليك من غير كلام كتير و من غير ما حد يسمع اسبابك او دفاعك

جرب نفس الحكاية انك تتخانق على قهوة او فى شارع انت غريب عنه ، نفس الموقف هيحصل و هتلاقى الناس اتلمت عليك .... و نفس المثال بيمشى على كل طوائف و طبقات الشعب ....... كل الشعب الا الناس اللى موجودة فى التحرير

الحاجة المحيرة هنا هى امتى الانفصال ده حصل بين " الشعب " و بين باقى الناس اللى فى التحرير ... يعنى انا فاكر انه فى بداية الثورة و لغاية يوم 2 فبراير تحديدا كان فى ناس مع الميدان و ناس ضده ، بس بعد موقعة الجمل يوم 2 فبراير الشعب كله بأه مع الميدان و اللى كانوا ضد الميدان هتلاقيهم كل الناس اللى بتتحاكم دلوقتى ، و فضلت الناس فى حالة شهر العسل دى مع الميدان لغاية بعد التنحى بأسبوع كده

اول انشقاق حصل حصل بعد اللقاء الشهير بتاع علاء الاسوانى مع احمد شفيق ، بس كان انشقاق صغير و كان راجع لفكرة السلطة الابوية الموجودة عندنا فى مصر مش اكتر و كان مش مهم أوى ، لأن اغلب الناس شافت فيه انه اساءة ادب من الاسوانى تجاه واحد فى سن ابوه مش اكتر ولا اقل و كان موقف ناحية الطريقة اللى الاسوانى اتكلم بيها مع شفيق مش موقف من الثورة فى حد ذاتها

الانشقاق التانى و اللى حاليا هو ده اللى بنعانى تبعاته كان انشقاق الاستفتاء ... و الانشقاق ده فعليا قسم البلد قسمين ، ناس قالت آه و ناس قالت لأ ..... المشكلة ان اللى كان نازل يقول لأ قالها عشان مش عايز دستور 71 ولا عايز تعديلات عليه و عايز الدستور ده يتلغى و يتعمل دستور جديد او وثيقة دستورية او اعلان دستورى مؤقت ..... و اللى قال آه قالها عشان الاستقرار و انه بدل ما نعمل دستور جديد نعدل اللى باظ و اترقع فى دستور 71 الى ان يقضى الله امرا كان مفعولا

بس الغريب ان المجلس العسكرى ( بصفته القائم بأعمال رئيس الجمهورية ) قلب نتيجة الاستفتاء .. يعنى النتيجة الاحصائية كانت فى صالح اللى قالوا آه بنسبة 78 % تقريبا ، بس النتيجة الفعلية اللى اتطبقت كانت فى صالح اللى قالوا لأ لأن الدستور اتلغى و اتعمل اعلان دستورى ، و دى مجرد ملاحظة انا مش فاهمها لغاية دلوقتى

و عدت الجمع و المليونيات ما بين اقبال من كل الطوائف و الاحزاب و التيارات الى جمع مليانة اختلافات و انشقاقات و حسابات و توازنات سياسية .... بس حاليا الناس اللى فى التحرير حاسيين انهم واقفين لوحدهم ضد البلد كلها

يعنى ضد الجماعات الدينية عشان موضوع الدستور اولا ولا الانتخابات اولا ... و ضد المجلس العسكرى لأن المجلس العسكرى شايف ان بعض من فى التحرير و الميادين الاخرى زى الاربعين فى السويس و عند القائد ابراهيم فى الاسكندرية بعضهم مخربين او بلطجية او عايزين يوقفوا الحياة الطبيعية و يعطلوا عجلة الانتاج ، و ده بالمناسبة نص كلام المجلس العسكرى مش صياغة من عندى

و كمان ضد الحكومة لأن الحكومة بمباركة المجلس العسكرى او بأمره طلعت قانون تجريم الاحتجاجات اللى مطاطى جدا و ممكن فى اى وقت يتم تطبيقه و ساعتها ناس كتير هتضيع ... و الاهم و الاخطر من دول كلهم انهم حاليا فى حالة عداوة بتتراوح شدتها مع الشعب .. الشعب اللى هو الناس البسيطة اللى مش منتمية لأى حد ولا مسيسة ولا اى حاجة ، الناس العادية اللى بتمشى فى الشارع

الوضع حاليا ان التحرير اصبح جزيرة معزولة عن البلد كلها بالناس اللى فى البلد ... و مع كده الناس اللى فى التحرير اخدت بالها من النقطة دى و رفعوا مطالب مينعفش اى حد يختلف عليها سواء من سرعة محاكمات و انها تكون عادلة و علنية ، او قضية حقوق الشهداء و المصابين فى احداث الثورة ، و مسألة البعد الاجتماعى من ناحية الحد الادنى و الحد الاقصى للأجور ، و مشاكل زى التعليم و الصحة و الاسكان ، و عدم الدخول فى صدام سواء مع المجلس العسكرى او الحكومة او الناس و تصعيد فكرة الاعتصام لفكرة العصيان المدنى الاجبارى ( مع ان الاصل فى العصيان المدنى انه يكون اختيارى ) ، و برضه بعدوا عن الصدام حوالين الدستور اولا و الانتخابات اولا و خلوها مصر اولا و الثورة اولا

بس الغريب انه برغم كل التغييرات اللى حصلت فى فكر المعتصمين و المتظاهرين فى التحرير الا ان التحرير لسه فى وضعية الجزيرة المعزولة و محدش قابل كل التغييرات و التنازلات ان جاز نسميها تنازلات و لسه مستنين اكتر من " بتوع التحرير " ، و الاكتر ده اللى مستنينه انهم يروحوا بيوتهم و يعرفوا ان الثورة اتعملت و يسيبوا " الكبار " بأه يشوفوا شغلهم عشان البلد " متخربش " اكتر مهى خربانة و متغرقش بينا كلنا

انا كنت ضد التصعيدات الغير محسوبة من المتظاهرين و المعتصمين ( و انا بقول كده مع انى بنزل التحرير على طول ، بس بحاول اكون محايد ) و كنت مبسوط بالتغييرات اللى حصلت و ابتدت تتنفذ على ارض التحرير ..... بس مع كده انا شايف انه مفيش تنازلات تانية او كروت تانية فى ايد " بتوع التحرير " ممكن يلعبوها .... لأنه ساعتها لازم نسمى اللى حصل من 25 يناير لغاية دلوقتى اى حاجة غير ثورة

انا نفسى كل الاطراف اللى انا قلتها متحطش الناس اللى فى التحرير فى كورنر و يبقى ضهرهم للحيطة و معندهمش حاجة يخسروها ، لأنه ساعتها فعلا النتايج هتبقى مؤسفة و كلنا هنخسر ... الحياة بتكون ماشية فى اتجاهين مش فى اتجاه واحد ، و مفيش طرف دايما بيتنازل و يدى و الطرف التانى دايما بياخد و بيستنى اكتر

لو اى حد فى ايده اى حل او اقتراح يا ريت يقوله ، بس يكون حل قابل للتنفيذ و يكون محدد مش حل هلامى او مستحيل ، صدقونى محدش ساعتها هيقول لأ لأن اغلب اللى بيعمل حاجة بيعملها عشان خاطر البلد مش عشان خاطر مصلحة شخصية

آخر حاجة انا فعلا خايف على الثورة منها هى مقولة قديمة اتقالت على ثورة عرابى ( اللى اتسمت بعد كده هوجة ) ، المقولة دى بتقول : الولس غلب عرابى ، و الولس يعنى الخيانة

متخلوش الولس يغلب التحرير

عشرة ايام مثالية و آفة العرب

2011-07-04T18:22:00.000-07:00

برغم انى مش من هواة ان اعيش فى الماضى بس هفكركوا بحاجة حصلت فى الماضى القريب جدا ، حصلت بداية من يوم 1 فبراير اللى فات لغاية يوم 11 فبراير اللى قريبا هنعتبره عيد قومى لمصر
الحاجة اللى حصلت دى هى كانت حالة التوحد لكل اطياف و الوان الشعب المصرى ، و انا هنا استخدمت كلمة الشعب ككلمة عامة و مش قلت اطياف سياسية او اجتماعية او دينية لأن فعلا مصر فى العشر ايام دول كانت مقسومة جزئين بغض النظر عن حجم كل جزء ، جزء اسمه ميدان التحرير و هنا اعنى رمزية ميدان التحرير مش مكانيته و جزء اسمه ميدان مصطفى محمود و برضه اعنى رمزيته مش مكانيته .... برغم انى عارف انه فى الحياة الابيض و الاسود موجودين ، بس اللون الاساسى هو الرمادى بأختلاف درجاته و يفضل الابيض و الاسود للتمييز .. بس مصر فى الايام دى كانت ابيض او اسود .. ثوار او فلول .. ثورة او ثورة مضادة

اغلب اللى يعرفنى يعرف عنى انى ليبرالى النزعة و فى حالة عداء دائم مع كل استخدامات الدين فى الحياة السياسية و الاجتماعية لأنى مقتنع ان الدين مكانه القلب و ربنا هو بس اللى مطلع على اللى جوه قلوبنا ......... بس فى الايام دى مكانش فى حاجة اسمها اخوان ولا كنيسة ، لا سلفيين ولا علمانين ، لا مسلمين ولا مسيحيين .. كان فيها مصريين و بس ... و اظن الفيديوهات و الشهادات المصورة و المكتوبة عن الفترة دى تغنى عن اى كلام

افتكر اغلبنا ان الثورة خلصت يوم 11 فبراير الساعة 6 المغرب لما خلعنا حسنى ... و فضل الميدان و فضلت مصر فى حالة فرحة يمكن لمدة اسبوع او اكتر شوية بعد التخلى او التنحى او ايا كان الاسم اللى تفضله

اعترفنا كلنا اللى بيحب الاخوان و اللى مش بيحبهم انه لولا ثبات الاخوان فى الميدان يوم 2 فبراير يوم موقعة الجمل كانت الثورة دى خلصت ، و كلنا ابتدينا صفحة جديدة مع بعض او ده اللى انا كنت فاكره و اكتشفت بعد كده انى كنت عبيط

هاخدكوا مرة تانية للماضى بس المرة دى ابعد شوية و لمقولة شهيرة قالها ابن خلدون يمكن تفسر اللى احنا فيه دلوقتى ، ابن خلدون قال آفة العرب حب الرئاسة ... يعنى عندنا احنا بس اللى لما تلاقى اتنين ماشيين مع بعض لازم واحد فيهم يبقى تابع و التانى متبوع .... المقولة دى كانت السبب فى حالة الانقسام اللى البلد عايشة فيها دلوقتى و بكل اطيافها السياسية و الاجتماعية و الدينية

انقسام انه فى الاول بنقول انه فيه جماعات دينية و جماعات علمانية و ليبرالية و شيوعية و غيره ، مع الاخذ فى الاعتبار ان التقسيم ده غلط لأن العلمانية و الليبرالية و الشيوعية مجرد اتجاهات سياسية و اجتماعية مش تيارات دينية عشان تكون بالضرورة معارضة للدين

برضه انقسام موجود مع ان اغلب الاطراف بيحاولوا انكاره على اساس ان الحاجة اللى بيتم انكارها بتبقى مش موجودة ، حاجة زى منطق النعامة كده فى دفن راسها فى الرمل .. الانقسام ده انقسام دينى بصحيح بين المسلمين و المسيحيين ... بس مع كده محدش بيتكلم فيه و مستنين انه يتحل من نفسه

حتى جوة الجماعة الواحدة فيه انقسامات ... مثلا الاخوان كان فيها حالة انقسام مكبوت و غير معلن بين شباب الجماعة و قادتها ، و بعد كده الانقسام ده خرج للعلن و دلوقتى فيه حالات فصل و تجميد و شطب عضوية موجودة فى اوساط الاخوان

السلفيين فيه بينهم و بين بعض انقسامات و للى عارف منهجية التفكير السلفى هيعرف ان السلفيين مش كلهم بينتموا لنفس مدرسة التفكير و انهم بينهم تباين و اختلاف فظيع يمكن يماثل تباينهم و اختلافهم عن كل من هو غير سلفى

الكنيسة فيها انقسامات برضه مع انها مكتومة بس ده ظهر بشكل واضح فى موقفين اولهم من ناحية توقيت الحدوث كان اعتصام المسيحيين عند ماسبيرو و الدعوات اللى اتقال انها طلعت من البابا شنودة لفض الاعتصام و بعد كده النفى ، و انا هنا مش بناقش لا الدعوات بالفض ولا النفى انما بتكلم عن الموقف
و تانى موقف كان من اقباط المهجر اللى قالوا انهم هيتقدموا بطلب لفرض الحماية الدولية على مصر لحماية الاقلية المسيحية ، و الطلب ده نفسه مش جديد و اتقال قبل و كل مرة كنت بسمع رد البابا و موقف الكنيسة الرسمى من الطلب ده و ردود افعال المسيحيين العاديين حوالين الطلب ده بالرفض المطلق ، بس اللى اقدر اقوله و من غير اى مزايدات ان اللى اتغير حاليا نسبة المسيحيين العاديين اللى كانوا رافضين للطلب ده قلت و لو شوية و فى ناس فى مصر ابتدوا على الاقل يفكروا فى الموضوع ده ... و هنا برضه انا مش بتهم حد بالخيانة ولا اى حاجة انما مجرد بنقل حاجة موجودة فعلا

الاتجاهات الاجتماعية بكل اطيافها برضه فيها انقسامات ... يعنى مثلا حركة 6 ابريل فيها انقسام مروع و كان طالع فيها موضوع ان لما اتنين من حركة 6 ابريل يتقابلوا واحد فيهم يسأل التانى انت حركة ولا منظمة
حركة دعم البرادعى و استقالات بالجملة و تلاسن و مقالات فى الجرايد من رموز بينتموا للحركة دى ، و انا هنا مش بهاجم اشخاص ولا اسماء انما كل اللى بعمله مجرد رصد و توثيق لحقائق موجودة على الارض
الحزب الشيوعى بعد ما طلع على الارض و خلص مرحلة السرية زى كل القوى السياسية اللى كانت بتشتغل تحت الارض برضه فيه حالة انقسام و شوية منهم عملوا انقلاب و انسحبوا من الحزب و حاليا بيؤسسوا حزب جديد

هدى مثال واحد عشان اختصر كل الكلام اللى فوق ده ... يوم 6 يونيو اللى كان الذكرى السنوية لوفاة خالد سعيد ... اول حاجة كل التيارات الدينية قاطعت اليوم و مش نزلت ... التيارات المدنية و الاجتماعية بعضها نزل و البعض الآخر لا قال هينزل ولا مش هينزل فى ظل حالة الميوعة فى المواقف اللى كلنا بنعيشها و مبدأ خليك مع الرايجة عشان تكسب
التيارات اللى نزلت منها تيار مش هكتب اسمه لأنى تانى مش بشهر بأشخاص انما بسجل مواقف ، التيار ده و انا كنت على كوبرى قصر النيل الساعة 5 العصر و ناس مننا بتجهز عشان تروح تكمل الوقفة قدام الداخلية فى لاظوغلى و كان واحد من اعضاء التيار ماشى على الكوبرى بيقول يا جماعة احنا هنتحرك كمان نص ساعة و نروح الداخلية و وراه ماشى واحد من قيادات التيار ماشى وراه ب 5 خطوات و بيقول يا جماعة احنا مش هنروح و هنفضل واقفين على الكوبرى و هنفض الوقفة الساعة 6 ... و قامت اكتر من خناقة بين الناس بسبب المؤيد لموضوع الوقفة قدام الداخلية و اللى رافض الوقفة دى و انتهوا الى ان اللى عايز يروح يروح على مسئوليته الشخصية مع معرفة انه مش بيمثل غير نفسه و فقط لا غير

انا بكتب الكلام ده قبل 3 ايام من جمعة 8 يوليو .. انا مش هقول اى اسامى على الجمعة دى .. بس يا جماعة اللى بيقول اسلامية ينزل ، و اللى بيقول مدنية برضه ينزل .... اللى بيقول الانتخابات اولا ينزل ، و اللى بيقول الدستور اولا برضه ينزل ... احنا محتاجين فى اليوم ده ننسى آفة العرب اللى قال عليها ابن خلدون و نثبت لنفسنا قبل ما نثبت لأى حد تانى اننا احسن من اى تصورات ممكن تتحط عننا و عن طريقة تصرفنا و عن ردود افعالنا
كلنا لازم ننزل عشان لو منزلناش ببساطة لا هتبقى اسلامية ولا مدنية و لا انتخابات ولا دستور ولا اى حاجة ... هنبقى احنا اللى ضيعنا كل حاجة من ايدينا
برغم اننا مش عايزين نبقى فى حالة كل شئ او لا شئ انما لازم نعترف اننا ابتدينا نوصل لمشارف الحالة دى ، و الحالة دى فى اغلب الاوقات الخسارة بتبقى هى الاحتمال الاكبر فيها

مش لازم تتفق معايا ، و مش لازم تختلف معايا ..... بس لازم تنزل معايا

العسكر ... و ليه لازم تنزل يوم 27

2011-05-22T20:21:00.000-07:00

يوم 24 يناير 2011 :
كانت الدعوات للثورة شغالة على الفيس و مع كده مظنش انه حد كان مصدق ان الثورة هتنجح

يوم 25 يناير 2011 :
لغاية الساعة 2 الضهر كنت قاعد فى البيت و كنت فاكر انه مفيش حاجة هتحصل ، بس شوية و لقيت تليفونات من اصحابى اللى نزلوا
شوية كمان و ابتديت اشوف الفيديوهات و اللايف ستريمنج من موبيلات ناس كتير و ابتديت احس ان المرة دى غير كل مرة و جايز تبقى اول و آخر مرة نقدر نعمل فيها حاجة و نزلت

يوم 11 فبراير 2011 .. الساعة 6 المغرب :
قاعد فى البيت بستريح و بدور على حاجة اكلها و بجهز نفسى انى اخد شاور عشان انزل الميدان تانى ، و ساعتها عشت احلى 30 ثانية فى حياتى لما طلع عمر سليمان علينا و عرفت اننا قدرنا لأول مرة نغير الامر الواقع و نرسم مستقبلنا بأيدنا مش حد يرسمهولنا

يوم 27 مايو 2011 :
ممكن اقولك اسباب كتير ملهاش اول من اخر يخليك لازم تنزل
منها مثلا ان المجلس العسكرى بأفعاله ضحك علينا و ممشى الامور زى ما هو عايز مش زى ما احنا اصحاب البلد و اصحاب الثورة عايزين

منها مثلا ان المجلس العسكرى بيتعامل معانا على انه الداخلية بس بشكل مطور و جديد و بيقبض على ناس و بيضرب ناس و بيسجن ناس .. يعنى طبق الاصل من الداخلية القديمة

منها مثلا ان المجلس العسكرى بيقول علينا نفس اللى مبارك و نظامه كان بيقولوه علينا اننا قلة و مغرضين و مندسين و هنتحرش بعناصر الشرطة و عناصر الجيش ... انا لما قريت الخطاب ده حسيت انى فى ايام ما قبل 11 فبراير مش كملنا اكتر من 100 يوم على تنحى المجحوم

منها مثلا ان مبارك و كل عيلته و كل وزارته و كل مجلس شعبه و كل رجال اعماله محدش فيهم اخد اى حكم و فى الغالب لو مدينا خط الاحداث الموجودة دلوقتى هنلاقى محدش فيهم هياخد احكام فى حين ان حته امين شرطة لبس البدلة الحمرا و اخد اعدام فى مفيش كام يوم عشان يا دوب قتل 18 متظاهر زى ما المحكمة قالت .... يعنى اهو فيه احكام اعدام و فيه قضاء سريع مش زى ما بيتقال لينا ان القضايا دى لازم تتظبط

منها ان مفيش ولا مطلب و بكرر ولا مطلب اتحقق لغاية دلوقتى من مطالب الثورة ... دى حتى اول مطلب فيها اللى هو الشعب يريد اسقاط النظام ماتحققش و النظام لسه موجود و صاحى و بيلعب

و طبعا فيه اسباب كتير جدا جدا جدا ...... بس انا هقول ايه اللى هيخلينى انزل يوم 27 مايو

انا هنزل عشان انا اتربيت على انى ماخدش عزا حد غير لما اخد حقه ، و لغاية دلوقتى كل الشهدا اللى ماتوا محدش اخد حقهم
يعنى انا ممكن اسامح فى حقى عشان ملكى .. انما مقدرش اسامح فى حقهم عشان مش ملكى و عشان اقدر ابص لنفسى فى المراية و مش احتقر نفسى

انا هنزل عشان الاحساس اللى عشته فى التلاتين ثانية بتوع خطاب التنحى كان احلى احساس عشته فى حياتى زى ما قلت و عايز اعيشه مرة تانية

و اهم سبب انا هنزل عشان لأول مرة بقول بقلب و يقين و اقتناع كامل ان دى بلدى و دلوقتى بلدى عيزانى و مينفعش انفض و اقعد فى البيت و ابقى من رواد حزب الكنبة
مش عارف اذا كانت الاسباب اللى انا قلتها كفاية بالنسبة ليك ولا مش كفاية ..... و جايز يبقى ليك اسباب تانية غير اسبابى
بس بغض النظر عن اى اسباب و عن اى اختلاف فى اى حاجة سواء فى عقيدة او وجهات نظر ... يوم الجمعة 27 مايو لازم الاقيك جنبى فى الميدان عشان فى الآخر الحاجة الوحيدة اللى انا متأكد منها ان دى بلدى زى ما هى بلدك

مقدرش اقول ايه اللى هيحصل يوم 27 مايو .. يمكن نتضرب .. يمكن نتسجن .. يمكن نموت ..... الله اعلم
بس اللى اقدر عليه و عارف انه هيحصل هو ان فيه تضحيات لازم تتم عشان البلد دى تبقى احسن و انضف و عشان الثورة ماتتسرقش مننا لأننا دفعنا تمنها غالى أوى و بأغلى حاجة ممكن تدفعها و هو دم الناس اللى ماتت عشان انا النهاردة اكون بكتب البوست ده و تكون انت النهاردة بتقرا البوست ده
لو انت نزلت يوم الجمعة 27 مش هنبقى لا قلة و لا مندسين ، بس لو منزلتش هنبقى قلة و مندسين ..... الفرق الوحيد انى هبقى قلة و مندسين و انا فى الميدان و انت هتبقى قلة و مندسين و انت فى بيتك .... الاختيار ليك

سلام دلوقتى و اشوفكوا يوم 27 لو لينا نصيب و لينا عمر

مقتطفات

2011-04-23T05:10:00.000-07:00

النور من عينك بيجري
على قلبي وباستيكته بيمحي الضلمة
وفي روحي بيسري

كم وداع لازم اذاعة القلب تذيع
وكم رحيل هيعدي والقلب وياه هيضيع
كم مرة لازم تتوجع علشان تكبر وتتعلم
ان الخماسيين الخانقة بتجي من قلب ربيع

يارعشة برد لمست روحي... قلبي انتبه
معرفش قلبي ببرد حس ولا بدفا
قلبي اللي نام سنين في الأسى
صحي فجأة على همسة
بتقوله قوم الدنيا بالحب احلى
الدنيا بالحب ونسة ومتونسة

الفيل ابو زلومة

2011-03-28T16:28:00.000-07:00

ايام الكلية كان عندى واحد صاحبى لما كان يسمع عن موقف بيتم استغلاله او الكلام عنه بشكل مبالغ فيه مايناسبش حقيقته يقولك ام الفيل ابو زلومة ، لأن كان معتبر الفيل اكبر حاجة عايشة و بالتالى ام الفيل هتكون اكبر منه
طبعا ماكنش ينفع نقنعه ان الحوت اكبر من الفيل و نقعد نقوله الحوت الابيض و الحوت الازرق و ندخل فى التاكسونمى ، مع ان التاكسونمى كان مادة اساسية عندنا فى الكلية ... التاكسونمى بالمناسبة هو علم التسمية اللاتينى لكل الكائنات الحية
المهم افتكرت صاحبى ده لما سمعت الخطبة الشهيرة اللوذعية بتاعت حبيب قلب السلفيين محمد حسين يعقوب بتاعت غزوة الصناديق ... و للناس اللى مش سلفيين و مش عارفينه ده صاحب اشهر شريط دينى كان بيتباع على الارصفة و كان شغال فى كل ميكروباصات مصر و اسمه انت مبتصليش لييييييييييه ( و لازم تزعق عند كلمة ليه و تمدها عشان عم يعقوب كان بيعمل كده ) ، و لما سمعت الفيديو نسيت موضوع الحوت الابيض و الحوت الازرق و قلت ام الفيل ابو زلومة ايه اللى الراجل ده بيقوله
مش هتكلم على الفيديو نفسه لأن الفيديو ده خد اكبر من حقه سواء بالنسبة للفيديو نفسه او بالنسبة لشخصية المتحدث ، انا هتكلم على التبرير اللى قاله بعد ما لقى الموجة عالية عليه و لقى انتقادات من كل الناس تقريبا ، سلفيين و اخوان و مثقفين و حتى ناس عادية ، و يمكن ده يوضح طريقة تفكير السلفيين و تعاملهم مع الأزمات خصوصا انه تكرر فى اكثر من موقف مع اكثر من شخص و على سبيل المثال لا الحصر محمد حسان و موضوع الآثار ، بس دى نقطة هنيجى ليها بعدين
يعقوب قالك انه كان رد فعل طبيعى للفرحة لأن نتيجة الاستفتاء كانت مفاجأة ليه و هو قاعد فى الدرس ، و انا استغربت من التبرير ده لأنه كل الناس كانت عارفة قبل الاستفتاء ان النتيجة النهائية هتكون نعم ، و انا كواحد من الناس اللى قالوا لا كان اقصى طموحاتى انه تيجى نسبة اللى قالوا لا مرتفعة نوعا ما و توصل تبقى ثلث يقول لا و ثلثين يقولوا اه عشان احس انه حصل تغيير حقيقى فى تفكير الناس مش مجرد تغيير فى اشكال اللى هيقعدوا على الكراسى
و لو صدقنا تبرير عم يعقوب يبقى معنى كده انه معندوش ثقافة سياسية من اى نوع ، و كمان مش مهتم حتى انه يتفرج على اى برامج فى التليفزيون كانت بتتكلم على الموضوع ده ، يبقى يا عم يعقوب لو مش بتفهم فى السياسة يبقى مش تتكلم عليها و سيبها لناسها و خليك فى مبتصليش ليييييه
برضه قال انه كان واخد الموضوع كله كنوع من انواع الهزار و مريدينه قالوا نفس الكلام و انه لو احنا عارفين يعقوب كويس كنا فهمنا ده ، و انا هنا استغربت لكذا سبب منهم انه لو كان ده هزار يعقوب يبقى انا اقدر بضمير مطمئن اقول انه كان بيهزر فى كل برامجه لأنه بيتكلم بنفس الطريقة و انا مش بتبلى عليه و اليوتيوب موجود و تقدروا تشوفوا برامجه و تحكموا بنفسكوا منهم
كمان انى حتى لو افترضت انه فعلا كان بيهزر ، يبقى كان المفروض اى حد يقوله لو هو مش عارف انه مينفعش يهزر فى الموضوع ده ، لأن الهزل فى مواضع الجد مش من سيم العلماء ، ده بأفتراض انه من العلماء فعلا مش مجرد ظاهرة صوتية زى اغلب شيوخ الفضائيات اللى كانوا زمان شيوخ الرصيف و ربنا فتح عليهم و اصبحوا شيوخ الفضائيات
برضه قال فى تبريره لكلمة اللى مش عاجبه البلد يمشى و شوح بدراعه كله و هو ما شاء الله دراعه طويل انه مقصدش اللى اتفهم ... اصلا فى الفيديو نفسه بتاع غزوة الصناديق قال الناس اللى مش عجباهم البلد عندهم تأشيرات امريكا و كندا ، و انا هنا هكون اكثر شجاعة من يعقوب نفسه و اقول هو قصده على المسيحيين لأنه معروف ان المسيحيين هما اللى معدل الهجرة للبلدين دول تحديدا عالى عندهم ، بس هو الظاهر خائف من تهمة الطائفية او سابها لذكائنا
المهم فى التبرير جه و قال احنا عارفين ان البلد مش بتاعتنا ( قصده على السلفيين او على الشيوخ ، الله اعلم قصده بالظبط ) ، طيب بأفتراض انه فعلا يقصد الكلام ده ، انا لو مقتنع ان البلد دى مش بتاعتى مش هتعب نفسى فيها او عليها و حتى لو ذهبت الى حيث القت
و بعدين قال تعبير غاية فى التطرف و قال احنا طلاب آخرة ، و هنا فى اتهام صريح و ضمنى لكل الناس ما عدا عم يعقوب و الناس المقتنعة بيه انهم طلاب دنيا و اننا بنتقاتل على جيفة و هو مش عايز غير الجنة و سايبلنا الدنيا نشبع بيها
و بعدين قال ان الناس متربصة بيهم ( و هو هنا اكيد يقصد التيار السلفى كله ) ، و انا هنا استغربت من اللى قاله ، لأنى طبيعى لما انتقد شخص هنتقده على كلامه مش على نيته لأنه لا يعلم النوايا غير ربنا و انا مش شققت عن صدره و شفت جواه ايه و نيته ايه ، انا اكيد هتكلم على كلامه بنصه و حرفيته ، مش على قصده ايه من ورا الكلام ده
الغريب انه مش برر موضوع تكبيرة العيد اللى اداها و خلى الناس تؤديها معاه ، و برضه برغم كل اللى قاله فى شرح الفيديو بتاع الغزوة قال انه مش متراجع عنه ... يعنى بالبلدى ايوة انا كنت اقصد اللى انتوا فهمتوه و اخبطوا دماغكوا فى الحيطة
بعض الناس قالولى انهم استغربوا من محاولة يعقوب لتجميل و تخفيف وقع اللى قاله ، قلتلهم انى مكنتش مستغرب ، بالعكس كنت مستنى اشوف هيعمل ايه لما موجة النقد تيجى عليه ، لأنه ملوش غير طريق من اتنين ، يا يتراجع عن تصريحاته و يقول انه اتفهم غلط و ده اللى انا كنت متوقعه ، او يشهر سيف التحدى و يعتمد على تأثيره و على كتلة السلفيين فى الشارع و يقول اه انا كان قصدى كده
و الحق يقال ان عم يعقوب مش خيب املى و كسكس لورا ، و ده مش عيب فأن يكسكس فقد كسكس اخ له من قبل و انا هنا بتكلم على محمد حسان فى موضوع اباحة بيع الآثار و طمس معالمها ، يعنى ليهم سابقة و السكة بتاعت التبرير و التراجع و اتفهمنا غلط مش غريبة عليهم
اخيرا انا لازم اعترف انى ضد منهج تفكير الاخوان و ضد منهج تفكير السلفيين ، بس انا شفت شيخ اسمه اسامة القوصى على اون تى فى مع يسرى فودة و لقيته فى غالية الاعتدال و الله اعلم هو فعلا كده ولا ده نوع من انواع التقية او نوع من استعارة الافكار قدام الكاميرا ، و قلت طيب مهو فيه منهم ناس ممكن نلاقى معاهم نقط كتيرة مشتركة
و بعد الحلقة فوجئت ان السلفيين بيقولوا ان اسامة القوصى مش سلفى و انهم بيتبروا منه و انه لا يمثل الا نفسه .... يعنى يا ربى حتى الوحيد اللى يعجبنى يطلعوه من ملة السلفيين كلها
آخر حاجة احنا كلنا مستنين مرحلة المواجهة مع التيار السلفى اللى واضح انها بالمعدل ده مش هتيجى متأخرة و هتكون اقرب مما نتصور ..... سلام

اه و لا

2011-03-16T17:53:00.000-07:00

مش هتكلم كتير على نص التعديلات الدستورية لأنه تقريبا احنا لينا اسبوع مش بنتكلم غير على التعديلات دى ، انا عايز اتكلم على شوية حاجات تانية النهاردة

اول نقطة :الاستفتاء ده هيكون على التعديلات الدستورية لدستور 1971 .. صح كده .... اظن صح
معنى كده انك ضمنيا رايح تستفى على انك عايز دستور 1971 يفضل موجود و لو لفترة مؤقتة ولا لأ

تانى نقطة : فيه ناس رايحة تقول اه لمجرد انها تستريح و خلاص و ده بيفكرنى بالمقولة الشهيرة اللى كانت موجودة ايام الثورة ما تخلصوا الثورة بأه عشان ورانا اشغال و متعطلين .... و كان الرد الاشهر على المقولة الجامدة دى هو اننا شفنا ثورات بتنجح و ثورات بتفشل بس مشفناش ثورات الناس عايزاها تخلص عشان وراها شغل الصبح و العيال عندهم مدرسة و مش بيروحوا النادى و مؤخرا على رأى الحاجة عفاف شعيب عشان محلات البيتزا قافلة و مش عارفة تجيب لبنت اختها بيتزا و فى نفس الوقت ( و شوف حكمة ربنا يا مؤمن ) الكبابجية قافلين و ابن اخوها اللى عنده سنتين بيقول ريشة ريشة عايز ياكل ريش
ناس تانية بتقول عشان الجيش يمشى ، مع انه لو بصينا لكلام اللواء مختار شاهين النهاردة فى المصرى اليوم قالك انه بعد الاستفتاء لو قلنا اه الانتخابات البرلمانية هتتم فى شهر سبتمبر ، و مجلس الشعب و مجلس الشورى فى اول اجتماع هينتخبوا اعضاء الهيئة التأسيسية اللى هتحط الدستور فى خلال 6 شهور ، و الاعضاء دول هياخدوا 6 شهور لغاية ما يحطوا الدستور ... يعنى بالبلدى الجيش قاعد معانا سنة كمان على الاقل بفرض ان رئيس الجمهورية تم انتخابه على طول ، لأنه اكيد الجيش مش هيسلم البلد لرئيس مجلس الشعب ، و لا لرئيس المحكمة الدستورية اللى موجود بالمناسبة من اول الثورة لغاية دلوقتى ، يعنى لو كان الجيش عايز يسلمه السلطة كان سلمهاله من بدرى
ناس تالتة عايزة تقول اه عشان الكلام الفاضى بتاع الفراغ الدستورى ، و الحجة دى بتفكرنى بنفس الحجة اللى اتقالت بالنص لما قالوا لو مبارك استقال هيحصل فراغ دستورى و اديه استقال و مفيش فراغ ولا اى حاجة و احنا ماشين 100 فل و 14 و بريفكس
بالمناسبة اللواء مختار شاهين قال انه فى حالة الموافقة او الرفض على الاستفتاء هيتم عمل اعلان دستورى مؤقت البلاد تمشى بيه ، الفرق الوحيد انه فى حالة الموافقة هتكون المواد المعدلة هى اساس الاعلان الدستورى

تالت نقطة : الناس اللى بتقول اه 3 فئات فى المجتمع .... الحزب الوطنى ( و يحز فى نفسى انى بقول الحزب الوطنى مش بقول فلول ولا بقايا ) .. و الفئة التانية الاخوان .. و الفئة التالتة السلفيين و معاهم كمان حمدين صباحى ( اللى طلع بعد كده و قال انه بيقول لا و مش فاهم ايه سر ان عصام العريان و الاخوان بيسيحوا و يقولوا انه قال اه مع انه بيقول لا ) و هو الوحيد من المرشحين للرئاسة اللى موافق على التعديلات المشبوهة دى
باقى البلد بتقول لا ... يعنى كل القضاة ( بأستثناء القضاة اللى حطوا التعديلات ) .. كل مرشحين الرئاسة ( بأستثناء حمدين صباحى زى ما قلنا قبل كده اللى طلع بيقول لا ) .. كل الكتاب السياسين اللى بيعتد برأيهم ( بأستثناء فهمى هويدى ) .. و انا و كل صحابى .... و برضه فيه استثناء بس مش هقول مين :)

رابع نقطة : الناس اللى هتقول اه عشان عجلة الانتاج تمشى .. انا هسأل سؤال واحد بس ، هو الموظف اللى رئيسه حرامى ، او رئيسه مش عاجبه و عامل اضراب ....... الموظف ده ايه علاقته بالدستور انه يكون فيه دستور ولا مفيش من اساسه
انا اللى اعرفه ان العجلة هتمشى لما كلنا نبدل عليها و يكون الجنزير مظبوط

خامس نقطة : انت لو قلت اه ، عد معايا هتنزل كام مرة
مرة بتاعت الاستفتاء على التعديلات ، مجلس الشعب ، مجلس الشورى ، الاستفتاء على الدستور الجديد ، مجلس الشعب تانى ، مجلس الشورى تانى ( عشان الدستور القديم هيكون اتحل و جه دستور جديد و لازم الانتخابات التشريعية تتم على الدستور الجديد ) ، انتخابات الرئاسة
يعنى المفروض اننا فى خلال سنة و نص على الاكتر هننزل من بيوتنا 7 مرات
سؤال و عايز اجابة واقعية عليه ... كام واحد من ال 42 مليون اللى يحقلهم الانتخاب و التصويت هينزلوا السبع مرات دول

انا كتبت خمس نقط بس عشان انا شايف ان دول اهم خمس نقط انما انا اقدر ازود عليهم 10 نقط كمان بس الخمس نقط دول كفاية عشان يهدموا حجج اللى هيقولوا اه فى استفتاء يوم السبت
انا عن نفسى هقول لا .... مش عايز كل الناس تقول لا .... بس عايز كل الناس تنزل و تقول رأيها سواء اه او لا ، و فى النهاية رأى الاغلبية هو اللى هيحكم و هيمشى و كلنا هنحترمه
من الناس اللى قالوا لا عباس الضو ، و من الناس اللى قالوا اه نادية الجندى فى مهمة فى تل ابيب ... يا ترى هتمشوا ورا عباس الضو ولا ورا نادية الجندى
حاجة أخيرة و يا رب اكون غلطان فيها ، انا من دلوقتى عارف ان النتيجة النهائية هتكون اه بغض النظر عن نسبة اللى هيقولوا لا ....... سلام
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
الجزء ده خاص بأتنين دايما بيشرفونى بمتابعتهم و ردودهم و هما تيرز و كارولين فاروق
انا مش عارف ايه ظروف الفيس و التويتر معاكوا ، بس اتمنى انكوا تكونوا من مستخدميهم لأن التواصل عليها اسرع و مستمر اكتر من البلوج و اتمنى الاضافة منكوا لو ده فى الامكان لمزيد من النقاشات معايا و مع غيرى

حملة التبييض 1 ... مبارك

2011-02-23T01:25:00.000-08:00

طول عمرى مؤمن بالحرية الشخصية و حق اى انسان انه يقول اللى هو عايزه ، و كنت بقول ان البلد دى عمرها ما هتتقدم مدام مش عارفين مجرد اننا نسمع بعض و مش شرط كلنا نتفق على حاجة واحدة بس نسمع بعض مش اكتر
بس لازم اعترف ان المبدأ ده اتهز عندى جدا و يكاد يكون انتهى فى فترة الثورة ، يعنى انا مسحت من عندى فوق التلاتين واحد عشان بيحبوا مبارك و بيجاهروا بكده و اعرف ناس كتير عملت كده و الموضوع تحول لحاجة تشبه فترة مكارثى فى الستينات فى امريكا
طبعا فيه ناس منهم قالت امال فين حرية الرأى اللى انت بتقول عليها و انت نفسك مش قادر تطبقها على نفسك و عند اول اختبار حقيقى بان انك دكتاتور حقيقى و متسلط و مش سامع غير صوت نفسك
الرد كان بسيط جدا ،كان صعب عليا نفسيا اتقبل الكلام ده و انا شفت بعينى ناس بتموت و ناس بتتضرب و ناس عربيات بتدوسها ، و كمان بعض الاراء ترقى لمرتبة الخيانة ، يعنى قبل حرب 73 كان ممكن اى حد فى مصر يقول انه بيحب اسرائيل ؟؟ الرد طبعا لا و كان هيتضرب بالنار علنى فى الشارع ... مش مهم انه بعد كده شفنا ناس كتير طبلت و قالت انها بتحبها و خدتهم بالاحضان
و بعض الاراء الاخرى ترقى لمرتبة الحمورية مع الاعتذار للحمير لأنهم اثبتوا انهم بيفهموا اكتر من الانسان و دى على فكرة مش اهانة للاشخاص على اد ما هى اهانة لطريقة التفكير اللى وصلتهم للرأى ده
و اتفضل شوية مش مسحتهم عشان ببساطة هما مش فاهمين او كانوا مش فاهمين و كان بيتعمل للشعب كله عملية غسيل مخ ممنهجة و شوية شوية ابتدوا يشوفوا الحقيقة

طيب كل ده كان فى الماضى ، انا اللى يهمنى دلوقتى .... يعنى مثلا عملية غسيل المخ دى لسه موجودة و ان تغيرت بعض الوجوه القائمة عليها
عندك مثلا حملة تبييض ماء وجه مبارك ، و هنا انت هتسمع العجب العجاب

الريس مكانش عارف اللى فى الشارع و كان العادلى بيخبى عليه ..... يا جماعة فيه وزارات اسمها الوزارات السيادية و دى اللى بيختارها الرئيس بنفسه و هى الداخلية و الخارجية و الدفاع و الاعلام
يعنى العادلى جه بناء على رغبة مبارك مش بناء على رغبة اى حد تانى ، و بعدين ده قعد وزير داخلية من 97 يعنى 14 سنة ، فى ال14 سنة دول مبارك مخدش باله خالص من اللى العادلى بيعمله
ده غير انه فيه جهاز تابع للريس مباشرة بيجيب معلومات و بيعرضها عليه ، ده غير تقارير المخابرات ، يعنى كل الناس عملت مؤامرة على مبارك عشان ميعرفش ، و بأفتراض كده يبقى هو برضه المسئول الاول لأنه هو اللى جاب الناس و خلاهم فى مواقعهم دى

الريس طول عمره مع الناس و كانت الناس عايشة زى الفل و دلوقتى الناس مش لاقية شغل ...... انا والله من ساعة ما ابتديت افهم كده و يبقى ليا رأى و انا شايف الناس عايشه زى البغال اللى مربوطة فى الساقية و بتلف طول الشهر عشان فى آخره تاخد شوية فلوس تاكل و تأكل عيالها و تربيهم و كان الله بالسر عليم
انا كتبت قبل كده انه فى مصر بس مش مهم دخلك كام ، لأنه مهما كان دخلك مش هتعرف تحوش منه جنيه و كله هيتصرف ، و الناس تقولك مهو ده المطلوب " لقمة العيش " ... يا سادة انا المكان الوحيد اللى اعرفه مش مطلوب فيه غير لقمة العيش هى الزريبة اللى بربى فيها المواشى بتاعتى
و بعدين ناس ايه اللى مش لاقية شغل دلوقتى ؟؟ يعنى هو قبل كده كان الشغل مقطع بعضه ، ده المشروع الوحيد المضمون نجاحه فى البلد هو انك تفتح قهوة او كوفى شوب لأن الناس اللى مش بتشتغل اكتر من فلوس مبارك اللى فى البنوك اللى بنسمع عنها

الريس مخلناش ندخل فى حرب و كنا عايشين فى امان و مكانش فيه بلطجية فى الشوارع زى دلوقتى ..... بالنسبة لموضوع الحرب الخارجية فده عشان مفيش سبب يخلينا نحارب مش جدعنة منه مثلا ، مع العلم ان اسرائيل كتير كانت بتموت عساكر لينا على الحدود و كنا بنسكت او يا دوب الخارجية بتحتج و شكرا على كده و هنا بدل ما يقولك كرامة يقولك حكمة ... بالنسبة للامان و البلطجية اللى موجودين دلوقتى فى الشوارع ، هو مين اصلا نزلهم الشارع و مش هتكلم على الداخلية دلوقتى لأنهم موضوع كبير

الريس عمل كتير للبلد ..... طيب نعد سوا انجازاته .. المترو ، البنية التحتية اللى هى الصرف و الكهربا و المية و الغاز ( و دى على فكرة مش فى كل المحافظات و لا حتى فى كل الاماكن فى محافظة القاهرة بأعتبارها العاصمة ) ، الطرق و الكبارى و اخيرا مشروع القراءة للجميع بتاع ماما سوزان
اول حاجة هو عملهم من فلوسنا من الضرايب اللى بتتاخد منى و منك و من كل واحد فى البلد ، ده غير فلوس المعونات الاجنبية ، يعنى مش عملهم من التركة اللى ورثها عن ابوه مثلا ولا من مرتبه و لا من مكافأة نهاية الخدمة بعد ما طلع على رتبة قائد الضربة الجوية
تانى حاجة : ده واحد قعد 30 سنة ، يعنى عايزينه يقعد 30 سنة و ميعملش حاجة ، ده القذافى ابن المجنونة اللى بيضرب ليبيا و الشعب الليبى بالدبابات و الطيارات عمل اكتر من كده

قصاد كده انا هسأل نفس السؤال من الناحية التانية ، مبارك عمل ايه
الفساد الاقتصادى: و اظن مع كمية البلاغات ، و الناس اللى مقبوض عليها ، و الناس المتحفظ على فلوسها و ممنوعة من السفر ، و الناس اللى هربت و مش هترجع تانى خلاص ، و مساحات الاراضى اللى بنسمع عنها ( زى 100 الف فدان و الفدان على فكرة للى ميعرفش 175 متر ، و معرفش مين واخد 50 مليون متر فى معرفش فين ) ، و كمية المليارات اللى بنقرا مستندات عنها اظن ده يوضح حجم الفساد و ان كان ما خفى اعظم
تفتكروا كل ده حصل من غير ما مبارك يعرف ، لو كان ميعرفش تبقى مصيبة و يبقى مينفعش يمسك البلد و لازم يتحاكم لمسئوليته التضامنية ، و لو كان يعرف تبقى المصيبة اكبر و يبقى حرامى و لازم يتحاكم عشان هو حرامى زيهم ، و فى الاغلب هو حرامى و ربنا يسهل و يخلينى اعيش و اشوف اليوم اللى هيتحاكم فيه
الفساد السياسى فى البلد لدرجة انه كل الناس كانت عارفة ان جمال اللى هيمسك و كانت الناس بتحضر لرد فعلها لما جمال يرشح نفسه ، و محدش يقولى مبارك مكانش موافق و ان سوزان هى اللى كانت عايزة كده او ان جمال كان بيعمل كده من ورا ضهر ابوه ، لأنى هرد نفس الرد ... اللى ميعرفش يحكم بيته يبقى مينفعش يحكم البلد كلها ...... الفساد انك تبقى عارف ان مرشح الوطنى هو اللى هيكسب من قبل ما الانتخابات تتعمل .... الفساد انك تبقى عارف ان اى قانون جاى من ناحية مبارك اللى هو الدولة و الدولة اللى هى مبارك تبقى عارف ان مجلس الشعب هيقره و يوافق عليه من قبل ما فتحى موافقة يقول الموافق يرفع ايده
الفساد الاجتماعى و على كل المستويات ..... يعنى البلد كانت متقسمة ناس فوق و ناس تحت و ناس تحت التحت ، و اهم حاجة ان كل الطبقات بتكره بعضها و حتى افراد الطبقة الواحدة بيكرهوا بعض و محدش يقولى انه ده عشان احنا شعب وحش ، يعنى هو فجأه الشعب ده بأه وحش و فجأه برضه الناس اللى فى ميدان التحرير بأو حلوين و البلد كلها فيها روح جديدة دلوقتى حتى لو قلنا انها فوران مشاعر ... شوية عقلانية فى الكلام يا ناس

الريس ده ابونا و كبيرنا و احترام الرموز و قائد الحرب ..... اول حاجة انا ابويا مات و يوم ما اختار حد يبقى ابويا ده لو اخترت يعنى يبقى هختار راجل محترم
كبيرنا دى مش بتبقى بالكلام بتبقى بالفعل ، و الا على كده هقول على القذافى انه اب و كبير و بيربى عياله اللى غلطوا
و احترام الرموز دى اجدع حاجة اتقالت .... يا جدعان ده الرسل و الانبياء بيتشتموا ، ده ربنا اللى هو ربنا فيه ناس بتشتمه استغفر الله العظيم ، يبقى هتيجى تقولى رموز
و بعدين عمل ايه عشان يبقى رمز و يتعملوا مظاهرات تأييد فى ميدان مصطفى محمود اللى انا بقترح يتغير اسمه لميدان حبايب مبارك
و بعدين الناس اللى بتتكلم على انه بطل فى الحرب ، هو يعنى كان حارب لوحده ولا خلاص كل اللى حاربوا فى اكتوبر جت فرة زى بتاعت الكتاكيت و موتتهم كلهم و مفضلش غيره عشان كل شوية نقول بطل الحرب بطل الحرب

انا ممكن اتكلم على مبارك اكتر من كده بكتير و لسه مع الوقت هيبان حاجات اكتر من اللى احنا عارفينها دلوقتى ، بس مش وقته
المرة الجاية هتكلم على الداخلية ...... آخر حاجة عايز اقولها هى مبروك علينا مصر و طز فى اللى مش عاجبه

مش هتكلم

2011-02-05T16:06:00.000-08:00

مش هتكلم عن اللى حصل من يوم 25 يناير لغايه النهاردة و لسه هيحصل لأنه لسه مش خلص و الوقت هيجى و كل واحد هيتكلم و هيقول و هيكتب اللى شافه
مش هتكلم عن الناس اللى فضلت قاعدة فى بيوتها و قالوا احنا معاكوا اول يومين و بعد كده قعدوا يشتموا فينا و يقولولنا هتخربوا البلد
مش هتكلم على الناس اللى بتقول نعم لمبارك ، ولا هتكلم عن اللى بيقولوا احنا مش مع مبارك بس عايزينه يكمل ولايته ( زى ما هو قال فى خطابه ) و احنا معاكوا
مش هتكلم على الناس اللى كل يوم بحال ، امبارح مع الشباب ، النهاردة مع النظام ، و بكرة مع اللى هيكسب
مش هتكلم عن البنت اللى كلمتنى و قالتلى احنا بنكرهكوا و انتوا وقفتوا حال البلد ، و قالتلى ان اللى ضربوكوا فى ميدان التحرير كانوا مش بلطجية و حتى لو كانوا بلطجية احنا شمتانين فيكوا ، و بعد كده قالت اكتر كلمة وجعتنى لما قالت حسبى الله و نعم الوكيل فيكوا
مش هتكلم على الناس اللى بتقول احنا كل اللى عايزينه الاستقرار يرجع تانى و نرجع شغلنا و نرجع نعيش حياتنا فى امان زى ما كنا عايشين فى امان
مش هتكلم على صاحبى محمد اسامه اللى اعتقل فى ميدان التحرير يوم 25 و خرج بعدها بيومين و هو بيقول انه عيط لما سمع الناس اللى هو اتحبس عشانها بتشتمه
مش هتكلم على كل مواد الدستور اللى كل الناس فى مصر فجأة اصبحوا خبراء دستوريين و بيتكلموا عليه زى ما يكونوا قبل يوم 25 كانوا عارفين انه كان فيه حاجه فى مصر اصلا اسمها دستور
مش هتكلم على انك لما بتنزل تمشى فى مظاهرة حتى لو تحت بيتكو يبقى فيه احتمال انك هتموت و مش هترجع بيتكو
مش هتكلم على ان المصريين لأول مرة هما الفعل مش رد الفعل ، و كل التنازلات اللى مبارك بيقدمها بتدل على كده
مش هتكلم على اننا لأول مرة بنقول اللى احنا عايزينه و مش خايفين من اللى هيحصل ، سواء حد قبض علينا او حتى موتنا
مش هتكلم على الفيديو بتاع "الراجل " و حطوا الف خط تحت كلمة راجل اللى وقف يوم الاربع قدام المدرعة اللى كانت بترش ميه على الناس ، و على انى لما شفت الفيديو ده عيطت و افتكرت الفيديو المشهور بتاع الراجل اللى كل العالم سماه " المتظاهر المجهول " اللى وقف قدام صف دبابات فى الصين
مش هتكلم اننا من يوم 25 يناير مفيش حاجه اسمها مسلم و مسيحى ، فيه مصرى و بس
مش هتكلم على المسيحين اللى بيحوطوا المسلمين و هما بيصلوا و المسلمين اللى بكرة هيحوطوا المسيحين و هما بيصلوا فى قداس الاحد فى ميدان التحرير
مش هتكلم على ان اللى حصل من يوم 25 يناير خلانى عرفت ناس كتير على حقيقتها ، و خلانى اعرف انى لو مت بكرة فيه رجالة هتجيبلى حقى زى على سبيل المثال لا الحصر زيكا و عادل و محمد اسامه و جمال و مصطفى و ياسمين و ناس تانيه كتير و محدش يزعل لو مش افتكرت اسمه
مش هتكلم على الناس الاغبيا اللى مشيلين الليلة للشباب اللى فى التحرير
مش هتكلم على واحدة من اهلى قالت انها نفسها يبقى معاها رشاش و تنزل تموت كل اللى فى التحرير عشان البلد تستريح منهم و ترجع تانى مصر اللى تعرفها
مش هتكلم على الناس اللى قالت الشباب اللى فى وسط البلد بياكلوا كنتاكى و بياخدوا خمسين جنيه فى اليوم و كانوا بياخدوا اجندات لغايه ما الاجندات خلصت
مش هتكلم على ميدان التحرير اللى فيه دلوقتى امريكان و يهود و اخوان و حماس و عملا و جواسيس ، فيه كل الناس بس مفيهوش مصريين
مش هتكلم على اللى فاكريين الشباب المصرى بجد اللى فى ميدان التحرير موافق او ممكن يوافق على ان حد غيره هو اللى يحددله هو عايز ايه ، سواء كان الحد ده امريكان او دول اتحاد اوروبى او حتى العفريت الازرق نفسه
مش هتكلم على التليفزيون المصرى العظيم اللى النهاردة رئيسه اسامه الشيخ طلع مستقيل منه من يوم الخميس و نائب قناة النيل استقالت و مذيعين استقالوا عشان مش عايزين يكدبوا
مش هتكلم على المفتى ولا شيخ الازهر ولا البابا شنودة اللى قالوا سواء تصريحا او تلميحا انهم مع مبارك و انهم عايزين الشباب دول يرجعوا بيوتهم
مش هتكلم على كل الناس اللى حاولت تسرق اللى الشباب عمله و تنسبه ليهم و الشباب دول نفسهم اللى قالوا الناس دى مش بتمثلنا
مش هتكلم لا على الخيل ولا الجمال ولا عربيات الاسعاف ولا عربيات الامن المركزى ولا المدرعات اللى داست على الناس و مشيوا فوقهم
مش هتكلم على خراطيم المية اللى اترشت على الناس اللى كانت بتصلى ، يمكن عشان حسوا انهم مش متوضيين فحبوا يخلوهم بيصلوا على وضوء
مش هتكلم على الناس اللى بتاخد الكلام كوبى و باست و تحطه من غير ما تفهمه ولا تحاول تتأكد انه صح ولا غلط
مش هتكلم على الناس اللى بتتكلم على ميدان التحرير و الناس اللى فيه من غير ما ينزلوا زى ما يكون ميدان التحرير ده محتاج تأشيرة عشان يدخلوه
انا بس هتكلم على حاجتين اتنين
الحاجة الاولانية انه بعد ما اللى بيحصل ده نتيجته تبان سواء الثورة دى نجحت او فشلت يفضلوا على مواقفهم مش يغيروها
يعنى اللى قال انه ضدها يفضل ضدها على طول ، و اللى قال انه معاها يفضل معاها على طول
و الحاجة التانية ان الناس اللى بتدعى على الشباب اللى فى ميدان التحرير يدعولهم ان ربنا يثبتهم لو كانوا صح ، او يهديهم للصح لو كانوا غلط
يا ريت ندعى للى ماتوا ، مش هقول نقرا الفاتحة او نصلى عليهم فى قداس عشان زى ما قلت كلنا دلوقتى مصريين مش مسلمين و مسيحين
آخر حاجة قبل ما امشى هقول حاجة واحدة بس
اللهم ارنا الحق حقا و ارزقنا اتباعه ، و ارنا الباطل باطل و ارزقنا اجتنابه

راس السنة الحزين

2011-01-03T03:54:00.000-08:00

الصبح انجى كاتبه على الفيس ازاى هتعيد على عادل بعد الانفجارات اللى حصلت فى ليلة راس السنة
العصر امى بتسألنى ازاى هتعيد على دكتورة سامية بعد الانفجارات اللى حصلت فى ليلة راس السنة
بليل نادر بيقولى هو احنا هنتصل ازاى نعيد على امير بعد الانفجارات اللى حصلت فى ليلة راس السنة
اتسألت نفس السؤال من 3 اشخاص ملهمش علاقة ببعض و فى كل مرة مش بعرف الاقى الاجابة ... يعنى انا لغايه دلوقتى مقلتش لعادل كل سنة و انت طيب و مظنش انى هقولهاله خالص ، السنة باينة من اولها اهو
و لما نادر سألنى قلتله انى اتصلت بأمير يوم الاربع و سلمت عليه ، و غالبا برضه مش هقوله كل سنة و انت طيب لنفس السبب المذكور اعلاه

ركبت مع سواق تاكسى و سألنى على رأيى فى اللى حصل ، و قلتله ان اللى حصل ده غباء و ملوش اى مبرر و اللى عمل كده المفروض يتحاكم ادام محكمة عسكرية و ياخد حكم بالاعدام و يتم اعدامه بأن كل واحد يتف عليه لغايه ما نموته
سواق التاكسى قالى انه مسيحى ، و قالى ان اللى حصل السنة دى حصل السنة اللى فاتت ، و قالى هو اتكتب علينا اننا منفرحش ( قصده كمسيحين ) .... و قالى حاجة غريبة جدا و انا بعترف انى مش عندى فكرة كفاية عن الموضوع ، ان العيال اللى اتمسكوا فى حادثة نجع حمادى لغاية دلوقتى لسه مش اتحكم عليهم بحاجة
آخر حاجة قالهالى قبل ما انزل و المرارة بتنقط من صوته ان المسيحين حاسين ان البلد و الحكومه و الامن ضدهم ..... قلتله ضدنا كلنا يا ابن عمى مش ضدكم انتوا بس ( كنت زعلان من نفسى أوى عشان انا عمرى ما قسمت البلد لأحنا و هما ) و نزلت من التاكسى

طول عمرى بتكلم على الازدواجية الموجودة عندنا ، يمكن عشان كده مش استغربت لما لقيت شخص كان قالى على المسيحين كفار و بعد الانفجارات لقيته بيتعاطف معاهم ... هو انا ممكن اتعاطف مع واحد كافر ؟؟؟؟؟

طول عمرى بحب اسكندرية اكتر من اى حتة فى مصر ، بس مش عارف لما انزلها المرة الجاية هتبقى هى هى نفس الاسكندرية اللى انا عارفها ولا هلاقيها اتغيرت

انا كل مرة آخر حاجة بكتبها بتكون كلمة سلام ، انما انا حاسس انها المرة دى مش هيكون ليها محل من الاعراب ، عشان كده البوست خلص لغاية هنا

تدوينة عن غزة

2010-12-27T23:51:00.000-08:00

جاتلى دعوة من رحاب انى اشترك ببوست على المدونة عن الحرب على غزه و اللى كانت امبارح الذكرى السنوية بتاعتها
اصلا تاريخ فلسطين كله عبارة عن مجموعة كبيرة من الذكريات السنوية ، و المجموعه متنوعة ... منها ذكرى بسبب قصف او بسبب عمليات عسكرية ، او بسبب اى حاجه تانية
انا عندى يقين ان الفلسطينيين يتحملوا جزء كبير من اللى بيحصلهم دلوقتى من اسرائيل بسبب اجدادهم اللى باعوا اراضيهم للوكالة اليهودية ، على فكرة خمس المساحة اللى اسرائيل بتحتلها دلوقتى متباعة بورق و عقود رسمية
طبعا ممكن حد يقولى ان الفلسطينيين الموجودين دلوقتى ملهمش دعوه باللى اجدداهم عملوه من زمان و ده فى رأيى كلام خايب ، لأنه فى كل الاعراف الفرع بيتحمل نتيجة ما اقترفه الاصل و ده اثباته سهل بالنسبه للنقطة دى تحديدا ..... يعنى انا لو ابويا قبل ما يموت باع العربية بتاعته ، ينفع انا اجى بعد ما هو يموت و اروح للراجل اللى اشتراها و اقوله العربية دى بتاعتى و مليش دعوه باللى ابويا عمله ... لو انا قلت كده هبقى عبيط و الناس هتضحك عليا
من جوايا مش لاقى ذرة تعاطف مع الفلسطينيين ، و ارجوكوا محدش يقولى العروبة و القومية و الكلام ده ، لأن الكلام ده مات و اندفن و الدود اكله خلاص
يعنى اول الاسبوع قريت ان حماس خلاص انهت المصالحة اللى كانت عملاها مع فتح و انه كده فى الغالب هيرجعوا يضربوا فى بعض تانى بدل ما اسرائيل هى اللى تضربهم هما الاتنين ، و اول امبارح سمعت فى الراديو واحد بيقول انهم بيقعدوا مع حماس عشان يرجعوا المصالحة تانى و ان حماس بتتهرب من تحديد جدول زمنى للمصالحه دى ، و انهم فى فتح عارفين ان ده بيحصل تغطية على موقف الزهار و تصريحاته اللى قال فيها ان حماس ملتزمه بالهدنة مع اسرائيل داخل حدود غزة اللى هى بتحكمها ، طبعا قال كده عشان غزة مش تتضرب تانى و انا اقطع دراعى ان اسرائيل هتضربها تانى حتى لو حماس طلعت و غنت انا بحب اسرائيل
طيب بعد الكلام اللى انا سمعته ده ، ازاى انا اقدر اقول انى متعاطف مع فلسطين ، اذا كانوا اهلها نفسها مش متعاطفين معاها و بيتخانقوا ما بينهم و ما بين بعض ...... طبعا ممكن حد يقولى ان فلسطين مش حماس و فتح بس ، و ده برضه كلام خايب ، فلسطين عباره عن حته ارض عليها شويه ناس ، الناس دى جزء منهم حماس و جزء فتح و اجزاء تانيه عباره عن اجنحه اخرى و جماعات اخرى ، و كل جناح من دول مش بيدور على مصلحة فلسطين ، انما بيدور على مصلحته من خلال تبنيه لمصلحة فلسطين
و بعدين ما الفلسطينيين اللى فى الخارج مالين الدنيا و ربنا موسعها عليهم ، ليه بيكتفوا بالبكا و الندب على فلسطين و محدش فيهم عمل حاجة ، و محدش يقولى اننا مش فاتحين المعبر عشان يدخلوا ، لأن فلسطين دى مش شقه و بابها الوحيد عندنا ، يعنى لو عايزين يدخلوها عندهم الاردن و لبنان و سوريا ، و التلات دول ليهم حدود مشتركه مع فلسطين و ممكن يدخلوا منها ، طبعا حد تانى هيقولى انهم كده فيه احتمال انهم يتمسكوا ، طيب و ايه يعنى ، هو الوطن ده مش حاجة غالية و تستاهل الواحد يضحى بحياته عشانها ، ولا هو بيضحوا بالكلام و بس انما ساعة الفعل تلاقى فسسسسسسسسس
طبعا فى خلال الازمات المتكررة على غزة تلاقى الدعوة للتبرع و حسابات بتتفتح فى البنوك و اماكن للتبرعات العينية ..... ده طبعا تصرف محمود و جميل ، بس انا عمرى ما هتبرع لغزة ، انا اولى انى اتبرع لولاد بلدى اللى عايشين فى ظروف انيل من غزة ، يعنى هنا برضه عندنا ناس مش لاقيه تاكل ولا تشرب ولا تسكن ولا تتعالج ولا تشتغل ، يبقى فرقهم ايه عن اللى فى غزة ، ولا حاجة ..... يبقى الجار اولى بالشفعة ، و دول مش جيرانى انما دول اهل بلدى و اكيد اقرب ليا من غزة
طبعا انا عارف ان البوست فى اغلبه صادم ، بس انا مش هزوق الكلام ولا هقول كلام انا مش عايز اقوله عشان خاطر غزة
و فى الاخر بقولها .... غزة ... انا مش متعاطف معاكى ..... سلام

مش هطبل يا شحاته

2010-12-06T03:23:00.001-08:00

أيام ماتش مصر و النيجر فى التصفيات بتاعت افريقيا نزلت الملعب قبل الفرقتين معزة مع واحد من السحرة بتوع افريقيا ..... المهم ساعتها المعزة كانت مثار تعليقات كتيرة و تريقة على المنتخب و حسن شحاته عشان " النياجرة " على رأى المعلق اللى كان على قناة النيل غلبونا و كان شكلنا وحش أوى
ساعتها كل واحد ربنا فتح عليه قعد يتريق على حسن شحاته ، و فى الآخر حسن شحاته طلع قال المدربين اللى فرقهم " بتترقع " بالتلاتة و الاربعة يتشطروا على الفرق اللى " بترقعهم " و بعدين يجوا يتكلموا عليه ، و وافقه على كلامه المطبلاتى الكبير مدحت شلبوكة
بعدها بكام يوم طلع فاروق جعفر ( لأنه كان المدرب اللى فرقته " بتترقع " تلاتة و اربعة ) فى جرنان من الجرايد اللى محدش بيقراها و قال مش " هطبل يا شحاته " لأنه شاف كل اللى موافق على اللى شحاته عمله فى الماتش ده يبقى بيطبل

فى بلدنا عايز الناس تمشى وراك و عايز دايما تبقى صح و راجل برفكت و كوركت دايما قول رأيك او الحاجة اللى انت عايزها و بعدها على طول قول قال الله و قال الرسول ، هتلاقى الناس مشيت وراك و شالوك على راسهم من فوق و احتمال يجى حد فيهم يشيل الجزمة بتاعتك و يلبسهالك زى ما الراجل اللى عمل كده فى الصورة اللى اتشهرت جدا بتاعت احمد عز

فى بلدنا كل واحد طول دقنه و خفف شنبه و لبس جلابية بيضا ( مع استثناء خالد الجندى لأنه بيلبس على طول بدل ، ماعدا ايام المناسبات بيلبس الجلابية البيضا ) بأه عمنا الداعية و مولانا و شيخنا و سيدنا ، و اثبتوا كده صحة بيت الشعر المشهور اللى قاله المتنبى من يجى الف سنة كده – اغاية الدين ان تحفوا شواربكم .... يا امة ضحكت من جهلها الأمم - مع ان المتنبى مكانش على ايامه ناس مستشيخة كتير زى ايامنا اللى زى الفل دى

فى بلدنا لما تقول رأيك و رأيك ده ميعجبش الناس ، تلاقى ناس داخلة تهاجمك من غير اى تفكير و بدون اى معرفة للموضوع و بدون ما يفهموا انت قلت ايه و قلته ليه ، حتى لو رأيك اللى انت كتبته ده كان مجرد جمله فى فيلم او مقطع من كتاب عجبك و قلت تكتبها

فى بلدنا مفيش احترام لرأى الآخر ، لأنه اصلا مفيش آخر .... فيه انا و انا ثم انا
و حتى فى النقاشات المحترمة بتفضل محترمة الى حين و بعد كده الاحترام بيضيع و بينقلب الموضوع الى قلة ادب صرف ..... انا هقول على حاجة و هى مش سر على فكرة ، الوحيد اللى اتناقشت معاه على الفيس بأحترام لغاية الاخر كان صديقى زيزو ، مع اننا فى اخر النقاش فضلنا برضه مختلفين زى ما احنا ، بس فضل اختلافنا ده بأحترام
طبعا الاحترام مش بس بيكون بقلة الادب ، ساعات كتير بيكون انك تكون بتتكلم بحجة و دليل و برهان و اللى قدامك فى نص الحوار ياخد بعضه و يمشى و مش يرد لما يلاقى نفسه اتزنق ، او يتكلم فى اى حاجه تانيه غير اللى انت بتكلمه فيها ..... و دول قابلت منهم ناس كتير الحمدلله ، بس بطلت اتضايق منهم ، يعنى حال البلد كلها كده ، يبقى هزعل منهم هما و مش هزعل من باقى البلد

فى بلدنا لسه بنقول مسلم و مسيحى و كل معسكر عامل سياج حوالين نفسه و مقفل على الناس اللى معاه و معتبر المعسكر التانى كفرة ، و الافراد اللى بيخرجوا من المعسكر بتاعهم و بيحاولوا يقابلوا الناس اللى فى المعسكر التانى فى نقطة وسط ملهاش دعوة بأى حسابات متعلقة بالديانة او الهوية بيتقال عليهم خارجين عن الجماعة و فى بعض الاوقات بيتكفروا علنى و ممكن لو رجعنا ورا شوية فى الزمن يستباح دمهم و مش بيبقوا مقبولين من كلا المعسكرين

فى بلدنا تكون بتفكر فى حاجة و تقول عكسها عشان تقاليد المجتمع و عاداته ، عشان لو قلت اللى بتفكر فيه ده بيبقى عيب و غلط و حرام ، و بيتم تهديدك بآية ( و ما يلفظ من قول الا لديه رقيب عتيد ) ... و معرفش فى الديانة المسيحية ايه المقابل للآية دى بس ممكن عادل يبقى يقولى

فى بلدنا الغلط مش انك تعمل الغلط ..... الغلط ان تتمسك و انت بتعمل الغلط
انما لو عملته من غير ما حد يعرف ، او حتى الناس عرفت بس مش عرفت تثبت ده او تمسكك و انت بتعمله يبقى انت كده صاغ سليم و صح و ممكن يجيبوا السجادة و يصلوا وراك

فى بلدنا بنعمل تماثيل للناس جوا نفوسنا و بنحول التماثيل دى لأصنام و نعبدها و مش بنقبل اى كلام عليها بيخالف الصورة اللى احنا راسمينها و ناحتينها للناس دى ..... و الناس اللى بنعملها التماثيل دى بتختلف و بتتباين .... يعنى ممكن التمثال يكون لمحمد حسان او يكون لآمال ماهر على حد السواء
بس لازم اقول ان التماثيل على اد ما بتتشابه بس رد فعل اللى عامل التمثال لما تيجى تتكلم على الصنم بتاعه بيختلف ، يعنى ممكن تتكلم مع واحد على الصنم بتاعه يشتمك ، و ممكن تتكلم معاه و تلاقيه بيقولك انا مش هرد عليك عشان انت اللى فى دماغك هيفضل فى دماغك و مش هيتغير و انا مش عايز اتخانق معاك ، و ممكن ياخد الموضوع بهزار و مش يقفش عليك و يعديها

فى بلدنا كل واحد عايزك تقول ورا رأيه آمين و مش تقول اى حاجة تانية و تتطبل لرأيه

و لكل الناس دى بقول جمله واحدة بس " مش هطبل يا شحاته " ..... سلام

شوية كلام

2010-11-07T05:19:00.001-08:00

لأول مرة من اكتر من شهرين امارس فعل الكتابة
حاسس ان صوابعى تقيلة على الكيبورد مع انى يوميا بكتب عليه سواء عربى او انجليزى ... بس من الواضح ان الكتابة للكتابة غير الكتابة للشات لما تكون بتتكلم مع الناس لو انت حالتك النفسية تسمح ، او انك تكون بترد على اللى بيقولوه لو حالتك النفسية ماتسمحش
مش عارف اتكلم على ايه لأنه حصلت حاجات كتيرة فى الشهرين او التلات شهور دول .... يعنى اتكلم مثلا على فكرة ان الناس فى مصر اغلبها بأه مهووس بفكرة الدين ، و اسهل طريقة انك تتهاجم بيها لما تتكلم على اى حاجه فى الدين و اننا وصلنا فعليا لتطبيق مقولة ماركس المشهورة الدين افيون الشعوب
يعنى افتكر ان عادل لما حط لينك لواحدة عاملة نفسها شيخة و قالت انه حرام نقعد على الكراسى ( ايوة والله ده نص الفتوى بتاعتها ، ان الكراسى كانت موجودة على ايام الرسول و ماكنش بيقعد عليها عشان حرام ) أتهاجم لدرجه ان واحد دخل جابله لينكات لحاجه فى الكنيسة انا مش فاكرها عشان انا مهتمتش ادوس على اللينك لأن اللى عمل كده اخد الموضوع على محمل صراع اديان مش على ان عادل كان بيعرض فتوى قراها لا اكتر ولا اقل .... انما ازاى عادل مسيحى يعمل كده فى فتوى بتاعت مسلمين يبقى الرد اننا نجيب حاجات للكنيسة بتاعته و محدش احسن من حد ، مع ان عادل قال انه فى الكنيسة حاجات هو بيرفضها شخصيا ، و فى الآخر عادل شال اللينك بكل التعليقات اللى عليها عشان وجع الدماغ
ولا انا لما اتكلمت على واحد عامل شيخ قالك انه حلال نبيع الآثار ، بس لو مجسمة او على هيئة تماثيل يبقى لازم نطمسها ( و هنا ارجو من كل واحد يفتح القاموس بتاع ثانوى اللى هو مختار الصحاح تقريبا و يطلع معنى الطمس ) .... و لما اللى عامل شيخ ده اتهاجم و ناس رفعت عليه قضايا عشان لو حد عمل بالفتوى بتاعته بكرة هتلاقى تلاقى فواعلية بيهدوا فى ابو الهول ، راح مكسكس ( الكلمة دى مش كلمه قبيحة ، دى معناها جاب ورا بس بلغه السواقين ) و قال انا مقلتش ..... مع انه لما اتكلم كان بيتكلم على الهوا و فيه تسجيلات مش بيتكلم فى طرقه بيتهم عشان يقول انا مقولتش .. يعنى ببساطه الراجل ده مستحمر كل الناس اللى اتفرجت عليه ، و واحد ربنا فتح عليه و قالى تأدب فى مخاطبة العلماء يا جاهل مع انه الله اعلم مين فينا الجاهل ، انا ولا هو ولا الشيخ بتاعه
ولا على رحاب لما حطت فيديو لواحدة عندها على الاقل 50 سنه و اكتر بتقول ان عباد الشمس كافر و ملعون و بيعبد الشمس مش بيعبد ربنا و بتطالبنا اننا نعدم عباد الشمس تقريبا ... و واحد دخل علق عندها و قال اننا المفروض كمثقفين ندفن راسنا فى الطين و ثقافتنا ملهاش لازمه عشان الست دى ذنبها فى رقبتنا و فى الآخر راح مسح تعليقاته لما اتكلمنا معاه بالمنطق ، بس واضح انه عنده لا منطق فى الدين

اتكلم على التعب اللى انا حسيت بيه لدرجة انى رحت عملت تحاليل شاملة و طلعت كلها زى الزفت الحمدلله ... دهون عالية ، انزيمات كبد عالية ، وظائف كلى مش متظبطة ، تحاليل دم مش منطقية ... الحاجه الوحيدة اللى طلعت مظبوطة هى تحاليل البول
اتكلم على انه بسبب التحاليل انا ممنوع من اكل اللحمة و الفراخ و الفول و المشروم و البيبسى و الشاى و القهوة و الشيكولاتة و اى حاجه مقلية ولا اى اكل من الشارع لمده شهر على الاقل و بعد كده نبقى نشوف ، و انه ليا 3 بيضات بس فى الاسبوع و يكونوا مسلوقين ، و مليش غير انى اكل سمك فى الشهر ده و انى زهقت من السمك بكل انواعه عشان انا مش باكل غير تونه و طواجن سمك و سمك فى الفرن و بكرة هاكل سمك مشوى و حاسس انه هيطلعى خياشيم من كتر ما اكلت سمك ... بس الحق يتقال انا بوظت النظام ده مرتين فى الفترة دى

اتكلم على انى اخيرا فصلت عضويتى فى النادى عن عضوية اهلى و بأه ليا عضوية مستقلة و ان الخطوة دى جت متأخرة تقريبا 5 سنين او اكتر شويه ... و انى بسبب العضويه دى فضلت اروح النادى لمده 3 اسابيع ورا بعض و انا اللى كانت آخر مره دخلته كانت من 7 سنين تقريبا

اتكلم على انى غير مستقر نفسيا و متقلب بدرجه ازيد من اللى انا شخصيا متعود عليها فى شخصيتى الملولة بطبعها ، و انه نتيجه لكده بكون يوم فرحان أوى و اليوم اللى بعده بكون فى قمة الكآبة ... و ساعات بأخد الحالتين دول فى نفس اليوم

اتكلم على انى مليش نفس اكتب اى حاجة مع ان فى دماغى افكار كتير جدا و لو قعدت اكتب فيها محتاج يجى 4 شهور من الكتابة المستمرة يوميا عشان اخلصها .... و مش بعمل اى حاجة غير انى اكتب الافكار دى فى ملف وورد و ارميه عندى عشان لما يبقى ليا نفس اكتب ابقى ابص عليهم و اكتبهم

اتكلم على انى مفتقد جدا كتابات سارة نجاتى و دماغها فى الكتابة اللى بتعجبنى جدا و انا مش عارف هى مش بتكتب ليه ..... بس الأولى انى اسأل نفسى انا شخصيا مش بكتب ليه

اتكلم على الفيديو اللى انا مصوره لنادر و بلال و عبد الفتاح ، و الفيديو التانى اللى انا مصوره لزيكا و دولا و مليش نفس امنتجهم و انزلهم عشان الناس تشوف التهييس بتاعنا .... ماتخفش يا زيكا انت و دولا .. سركوا فى بير

اتكلم على الصديقة اللى انا اعدت اكتشافها و اكشاف شكل علاقتنا من جديد لما بأت الدار امان على حد قولها ... و انا هنا مش هكتب اسمها عشان انا عارف انها فى الغالب يمكن تتضايق لو انا عملت كده بس هى عارفة نفسها

اتكلم على ساندرا اللى كان نفسى اشوفها و اضطريت الغى معادى معاها عشان فى اليوم ده كنت فى اسماعيلية عشان اطلع الشهادة بتاعت الدبلومة ، و انا من هنا بقولها مش تزعلى يا ساندرا و هعوضها قريب جدا

اتكلم على عبدالله و الناس بتوع تشانج و ازاى كانوا واحشنى جدا و بجد انا فرحان انى شفتهم و فرحان اكتر انى شفت نتيجة الشغل اللى عملوه و بيعملوه و اد ايه بحس بشوية امل و تفاؤل و انا المتشائم السوداوى بطبعى

اتكلم على الاحاسيس اللى انا بعيشها و لسه بختبرها لأول مره من مده طويلة أوى ، و اد ايه انا خايف و متردد بس بقول ان الموضوع محتاج قفزة ثقه ... او زى ما الاجانب بيقولوا
Leap of faith

فى الغالب مش هتكلم على اى حاجة من الحاجات دى و هفضل محتفظ بيها لنفسى .... سلام

حكايات

2010-08-01T05:30:00.001-07:00

النهارده هحكى شويه حكايات من باب التجديد بدل ما تبقى كل مواضيعنا جد و دمها تقيل

ستينات القرن الماضى - الحكايه الاولانيه انا مش فاكر حصلت ايام تيتو فى يوغسلافيا ولا ايام تشاويسكو فى رومانيا ... ذاكرتى بتقول يوغسلافيا بس عقلى بيقول رومانيا ... مش مهم حصلت فين ، المهم انها حصلت
كانت الناس بتعمل حمام فى الشارع فى البلد اللى انا مش متأكد منها دى ... عادى ايه يعنى .. احنا اصلا عندنا تحت اى كوبرى و تحت اى شجره و فى اى حته ضلمه و ورا باب اى عربيه مفتوح هتلاقى الناس بتعمل حمام فى الشارع ... يعنى ممكن لو دخلوا لعبه الحمام فى الشوارع فى الاوليمبياد الجايه نكسبها بجداره
المهم عشان حكومه البلد اللى انا مش متأكد منها دى بتحترم الناس ، عملت حمامات عموميه فى الشوارع عشان الناس تعمل حمام فيها بدل ما يبقى علنى كده و على عينك يا تاجر ... المهم برضه الناس نفضت و قعدت تعمل حمام فى الشارع
الحكومه فرضت غرامه على اللى هيعمل حمام فى الشارع .... برضه الناس اعتبرت ان الغرامه دى نوع من انواع الدعابه و فضلوا يعملوا حمام فى الشارع و اللى كان بيتمسك كان بيدفع الغرامه و هو بيتريق و واخد الموضوع هزار
الحكومه صعدت الموضوع شويه و خلت العقوبه تبقى سجن لمده شهر ... الناس هنا ابتدت تاخد الموضوع عند و الحكايه تحولت لحاجه اشبه بلعبه الاستغمايه ... ازاى الناس تعمل حمام فى الشارع مين غير ما تتمسك
الحكومه لجأت للحل الجذرى و قالوا اللى هيعمل حمام فى الشارع هيتعدم ... طبعا الناس مصدقتش الحكومه و قالت الحكومه بتهوشنا و مش معقول هتعدم اللى هيعمل حمام فى الشارع ..... بعد اول 3 حالات اعدام الناس بطلت تعمل حمام فى الشارع من يومها و لغايه دلوقتى

تسعينات القرن الماضى - الحكايه التانيه من الصين .... الصين بلد زحمه جدا ، بس مع كده تستغرب لما تشوف كميه النظام اللى فيها
الناس كانت من كتر الزحمه بيركبوا القطر .. و بيتملى القطر و الناس لسه مخلصتش .. طيب الناس تعمل ايه .. ابتدوا يركبوا فوق سطح القطر ، اللى احنا هنا بنسميه تسطيح ..... و نتيجه للتسطيح ده كان فيه ناس بتقع من فوق سطح القطر و تموت
الحكومه قالت للناس انها متعملش كده .... و مشيت معاهم من اول الطريق برضه ... تحذيرات ثم غرامات و بعد كده سجن و برضه مفيش فايده
فى يوم كانت الناس راكبه فوق سطح القطر زى ما اتعودت ، جت طيارات هليكوبتر تبع الجيش و ضربت الناس اللى فوق سطح القطر بالرشاشات ... الكلام ده كان فى التسعينات ، بس من يومها لغايه دلوقتى الناس بطلت تركب على سطح القطر فى الصين

1881 - الحكايه التالته قريبه مننا فى مصر ، كانت ايام الخديوى توفيق .... ظابط من اللى موجودين فى الجيش المصرى شاف بعينه مدى الظلم و قال كلمته المشهوره " متى استعبدتم الناس و قد ولدتهم امهاتهم احرارا " ... اللى قال الكلمه دى كان احمد عرابى
الخديوى تآمر على عرابى و مدافع الانجليز خلت صوت عرابى اتخنق و اتهزم عرابى و اتنفى هو و كل اللى معاه ، و الفلاحين و الناس اللى فى مصر قعدوا يمصمصوا فى شفايفهم و يقولوا " الولس غلب عرابى " .... بس مع كده محدش وقف مع عرابى من كل الناس اللى مصمصت شفايفها دى

1952 - الحكايه الرابعه برضه من مصر بس من زمن اقرب شويه .... شويه ظباط عملوا حركه انقلاب عسكرى و تحولت بعد كده لثوره على اوضاع كتير كانت غلط و كانت ثوره 1952 برغم كل اللى مش عجباهم الثوره و شايفين انها اسوأ حاجه حصلت لمصر ... يمكن كانوا عايزين لما يكبروا و يقعدوا على الفيس بوك و النت نبقى لسه فى ايام الملك و الانجليز و نروح نضرب شويه كامبات بالطوب ، و نعيش ايام الملكيه بكل الجمال اللى كان فيها

2008- ....؟ - الحكايه الخامسه و الاخيره برضه من مصر .... ناس كتيره بتكافح من ورا الكيبورد ، و بيكتبوا ستايتس جامده و مولعه نار عن رؤيتهم لأصلاح البلد ، و بيكتبوا بوستات مليانه حماسه و وطنيه على البلوج و على المنتديات و على الورد بريس عن الطريق لمصر احلى
الناس دى بتزعل أوى لما حد بيقول انه هيسيب البلد ، و الزعل ده بيوصل ساعات لمرحله التخوين و ان كده اللى عايز يسيب البلد مش وطنى ..... لو فيه حد من الناس اللى بتزعل من كده و بالصدفه بيقرا الكلام ده ، يا ريت يقولى هو كمواطن صالح و وطنى عمل ايه للبلد اللى بيحبها
و انا هنا استعير فقره من كلام المخرج و السيناريست عمرو سلامه فى نوت هو نزله " من الأكتشافات الأخرى ان الشعب المصرى مكبوت سياسيا جدا ، و بقى من الغريب جدا ان لو بق واحد من الابقاق اللى بتتقال على النت اتقال على التليفزيون المصرى ممكن يقال كل جهاز الاعلام المصرى فيها ، بس واضح ان الجهاز الامنى اياه لسه معملش اكونت على الفيس بوك ، و واضح ان ده اختيار منه عشان ميحرقش دمه اولا ، و ثانيا لان عمر ما هتحصل ثورة بكثر الاستيتسات الغاضبة ، و ده اللى مقتنع بيه الشعب المصرى دلوقتى ، كل ما يقفش على النظام ، يبوست ، و يحط استيتس غاضب ، عامل زى الناس اللى بتشوف الماتش على التليفزيون و بيزعقوا للعيبه على غرار " العب ، باصى ، شوط " كأن اللعيبه دى هتسمعهم مثلا ، و هم نفس الناس ، لا نزلوا انتخابات ، ولا عندهم بطاقه انتخابيه ، ولو سألتهم على اسم اربع وزراء مش هيعرفوا ، و تسعه و تسعين فى الميه منهم سجد سجدة شكر لله مع شهادة اعفاء الجيش او مع نهاية خدمته ."

آخر الكلام ..... عايز تعمل حاجه اعملها ، انما متقعدش تتكلم كتير و تقول هعمل و اسوى .... و من غير ما يكون فى ايدك حاجه تخلى الناس تسمعك يبقى هتفضل تكلم نفسك و تنام بليل و انت مستريح انك عملت اللى عليك و مصر امانه فى ايدك يا رأفت
انا زهقت من كتر الكلام و حاسس انى بنفخ فى قربه مقطوعه ..... سلام

بحب مصر لدرجه انى عايز اموت فيها

2010-07-14T08:16:00.000-07:00

البوست النهارده كئيب ... فاللى عنده اكتئاب او مستعد يدخل فى اكتئاب مايقراش البوست من الاول عشان انا مش عايز اشيل ذنب حد .... كفايه الناس اللى بترمى نفسها من على الكبارى
الموضوع ابتدى لما نادر و بلال كانوا فى يوم بايتين عندى ...... اكلنا كريب و شربنا بيبسى و حلينا ببسبوسه و كنافه و قاعدين مأنتخين بنتفرج على ميلودى هيتس و الجو كان مش حر أوى و ابتدى يبقى جميل و الحياه حلوه و جميله او على رأى سعاد الله يرحمها بمبى
المهم قلتلهم انا هسأل كل واحد فيكوا سؤال و هو نفس السؤال و هشوف الرد عليه .... قلتلهم كل واحد فينا بيكون فى حياته غلطات كتير ، بس بيبقى فيه غلطه محوريه أثرت على مسار حياتك كله .. السؤال ايه هى الغلطه المحوريه دى فى حياه كل واحد فيكوا
من غير الدخول فى تفاصيل كتير الاتنين اتفقوا ان الغلطه المحوريه انهم دخلوا كليه العلوم و انا اتفقت معاهم فى نفس الاجابه ..... الغريب ان الاجابه دى منطقيه منى او من بلال عشان انا قعدت 10 سنين و هو قعد 9 فى الكليه ... طيب نادر قعد 5 سنين فى الكليه يبقى ليه اجابته نفس اجابتنا
قعدت افكر كتير فى النقطه دى و عرفت اسبابها بالنسبه ليا انا و بلال اننا ضيعنا وقت كتير كان ممكن نستفيد بيه فى حاجات كتير أوى ، بس نادر اللى كان عاملى مشكله عشان مش لاقى اجابه مبرره ليه
اكتشفت ان الكليه بتاعتنا ، و مش بتاعتنا بس على فكره .. اى كليه بيكون ليها نفس التأثير على نفسيه اى حد بيحلم ، لأن الكليات عندنا متخصصه فى انها تقتل حلمك .... و ده طبيعى على فكره عشان احنا بندخل الكليات مش عشان بنحبها انما عشان مجموعنا هو اللى أمر بكده ، المجموع و الناس اللى عندك فى البيت و العيله و صحابك و تقريبا كل الناس
يعنى احنا فيه عرف سائد عندنا انك يبقى فى ايدك شهاده ... مش مهم يبقى عندك حلم و تحققه انما يبقى فى ايدك شهاده ، مع ان اللى معاه شهاده زى اللى معهوش دلوقتى و تساوت الرؤوس و القامات بعد ما بقى 70% من الشباب صيع و عاطلين و ال 30% اللى بيشتغلوا منهم 70% مش بيشتغلوا بشهادتهم .. يعنى بحسبه بسيطه تقريبا 1% بس هو اللى بيشتغل بشهادته و الباقى لا .. يعنى الشهاده مهياش اكتر من منظر اجتماعى
انا مش ضد الشهاده على فكره ، بس ضد فكره ان تقييم الانسان يكون بشهادته .. يعنى كده من الاولى ان الانسان يكون تقييمه بالفلوس اللى معاه لأن الفلوس ابقى من الشهاده ، و قبل ما حد يتحمق و يتحزق و يقولى ازااااااى و الشهاده و الكلام بتاع المسلسلات ده ... كام واحد اتخرج و عدى على تخرجه 3 سنين لسه فاكر ايه اللى خده فى الكليه ..... ده احنا كنا بنتكلم على المواد اللى اخدناها فى الكليه اتلخبطنا فيها و اخدناها امتى و مين ادهالنا ده غير انه طبعا فيه مواد وقعت من الذاكره اصلا
المهم انا السؤال بتاع الغلطات ده فضل فى دماغى و قعدت افكر فيه كتير ... لقيت فى حياتى كذا غلطه محوريه غير موضوع الكليه ده ، بس سالت نفسى سؤال مهم يا ترى لما قررت انى ارجع مصر تانى كانت غلطه ولا لا
بكل حسابات العقل و المنطق كانت غلطه و غلطه فظيعه لدرجه انى استحق الاعدام رميا بالقباقيب عليها ، بس انا مش حاسس انها غلطه .......... يعنى انا فى السنه دى عملت 2 دبلومه .. اتعرفت على ناس كتير كنت اكيد هخسر لو معرفتهمش .... عملت حاجه بحبها – و ان كنت اشك انى هعملها تانى فى المستقبل القريب على الاقل ... دخلت قصه عاطفيه بجد ، و كانت اول مره ليا بعد اكتر من 4 سنين كنت مقضيها – بغض النظر عن نهايه القصه دى ..... يعنى فى الاجمال انا عملت فى السنه دى حاجات كنت ممكن اعيش و اموت من غير ما اعملها
المهم انى قررت انى مش ناوى اكمل فى البلد ... و الحقيقه انه مش انا بس اللى مش عايز يكمل فى البلد ، تقريبا كل الناس مش عايزه تكمل فيها الا شويه ناس قليله ...... المهم انه فيه رابط مشترك بين كل الناس اللى رافضه فكره انها تكمل فى البلد – و انا هنا مش عايز حد يزعل منى لأنى والله مقصدش اى حاجه غير انه فعلا ده الرابط المشترك اللى انا لقيته
يعنى الناس اللى رافضه فكره السفر دى مقسومه لشريحتين كبار ... يا اما بنات ، و طبعا نتيجه لحاجات كتير منها التربيه اللى اتربينا عليها و العادات و التقاليد اللى بترفض فكره سفر البنت وحيده ، ده غير طبعا ان البنت مش مطالبه بأى حاجه ... يعنى فى بيت ابوها بتاخد مصروف ، عايزه تنزل تشتغل تنزل ، مش عايزه اديها قاعده فى البيت معززه مكرمه ، و حتى لما تتجوز هى مش مطالبه انها لا تجهز نفسها و لا تصرف على البيت ولا اى حاجه ..... يعنى السبب الرئيسى للسفر اللى هو ان الواحد يحسن من ظروفه و من حياته مش متواجد عندها من الاساس
الشريحه التانيه و هيا شريحه الشباب .... و العامل المشترك بينهم هو صغر السن ، يعنى اكيد انا لو اصغر من سنى ده ب 3 سنين مش ههقول 5 او 10 كنت هفكر فى موضوع السفر ده كذا مره ، و اقول لا البلد بكره مسيرها تروق و تحلى ... بس اللى انا عايز اقوله للشباب دول انى من سنه 2000 و انا بقول البلد بكره مسيرها تروق و تحلى ، يعنى من 10 سنين و البلد زى الزفت اهى و ازفت من الاول كمان ، و لسوء الحظ العمر مفيهوش الف 10 سنين عشان اضيع منه 10 سنين تانى ... اللى انا متأكد منه ان الشباب دى كمان 10 سنين لو فضلوا مستحملين 10 سنين هيفتكروا كلامى ده ، الا لو حصلت معجزه و البلد حالها اتشقلب و بأت بلد بتاعت بنى آدمين بجد
ناس كتيره شايفه سبب انى عايز اسافر انى انا عشان فى حاله صدمه عاطفيه و كده و ده مخلينى مش عارف اخد قرارت صح .... انا كان ممكن اوافق على تفسيرهم ده ، بس المشكله الوحيده ان حتى الموضوع بتاعى كان كمل بجواز برضه كنت هسافر ، و كان الدافع كان هيبقى اكبر ... عشان انا نفسى عيالى يتعلموا فى مدارس نضيفه ، يكونوا زى احسن حد يعرفوه ، يكونوا احسن منى انا شخصيا
و لسوء الحظ برضه كل ده مش ممكن يتحقق فى مصر .... احنا فى مصر نسينا يعنى ايه احلام ، كل همنا اننا نعرف نعيش يومنا ، و بعد كده نكمل لغايه آخر الشهر .... و بعد ما العمر يعدى نكتشف اننا بطلنا نبقى بنى آدمين و بأينا مجرد تيران فى ساقيه بنلف و مش هنبطل نلف الا لما نموت ...... و انا مش عايز ابقى تور ، انا عايز افضل بنى آدم زى ما ربنا خلقنى
انا والله يا جماعه بحب مصر ..... مش لدرجه انى عايز اعيش فيها ، بس بحبها لدرجه انى عايز اموت و ادفن فيها ..... انا مسأله السفر بالنسبه لى بأت مجرد وقت و اختيار و انا عايز افكر كويس عشان اخد قرار السفر المره دى صح خصوصا انى ادامى كذا اختيار مش اختيار واحد بس
معلش اذا كان البوست المره دى كئيب بس هو ده حال البلد مش حالى انا بس ..... و يا ريت يا جماعه اللى شايف غير كده يقولى ... بس يدينى 5 امثله مش مجرد مثال واحد ..... سلام

نظريه الايد الشمال

2010-06-25T07:06:00.000-07:00

Takes One To Know One
الجمله اللى فوق دى يعنى انك لازم عشان تعرف بنى آدم كويس انك تقدر تفكر بنفس طريقته على الاقل ، مش هقول انك تبقى زيه .... كفايه تفهم اسبابه و مبرراته
فيه نظريه خاصه بيا انا اللى مكتشفها و يمكن اسجلها لو انتشرت حفاظا على حقوق الملكيه الفكريه .... نظريه الايد الشمال
طبعا مش الايد الشمال بتاعت الرب اللى مقصود بيها الشيطان زى ماهو موجود فى اغلب كتابات العهد القديم .. انما المقصود هو الناس اللى مش ماشيه مع القطيع .... طبعا مش حاجه جديده ان اغلب الناس نسخ كربونيه من بعض ...... عندهم نفس القناعات و نفس التابوهات و نفس كل الحاجه و اللى مختلف بينهم بس اساميهم و اشكالهم ..... بس فيه ناس بتبقى مختلفه و مش مقتنعه بنفس المفاهيم دى و دول بيبقوا الخرفان السودا فى القطيع
انا لازم اعترف انى احد الخرفان السودا دول .... يعنى اللى يعرفونى كويس منكوا يعرفوا ان ليا افكار اغلب الناس مش بتوافق عليها و بيعتبروها كفر و تجديف .... انا مثلا شايف ان من اهم الحاجات اللى ربنا كرمنا بيها هى العقل و عشان كده فيه حاجه اسمها اعمال العقل و التدبر ، مش اخد كل حاجه كوبى و باست فى مخى ... يمكن عشان كده بتلاقوا الناس اللى بيكونوا مش مسلمين و بيسلموا بيكونوا مسلمين اكتر من المسلمين اللى بالوراثه عشان دول واخدين الاسلام عن اقتناع مش عشان هذا ما الفينا عليه ابائنا
برضه انا مش من انصار قضيه فلسطين و العروبه و الطنطنه الكتير اللى حوالين الموضوع ده ، و مقتنع اننا فى مصر محتاجين انقاذ اكتر من اللى فلسطين محتجاه ..... اللى يعوزه البيت يحرم على الجامع .... بس على كل حال ده مش موضوعنا و انا مش هتكلم على نفسى هنا ، انا هتكلم على حاجه تانيه خالص
فيه ناس ماشيين بنظريه الايد الشمال دى كتير بغرض انهم بس يتقال عليهم بص اللى ماشى هناك ده غير كل الناس ، يااااه دى ماشى بنظريه الايد الشمال ... يعنى مش عن اقتناع
و الامثله اكتر من ان تعد او تحصى .... منهم مثلا الناس اللى كانت بتدافع عن الجزاير ساعه الماتش بتاع السودان ... و دلوقتى بيقولوا شفتوا بأه ... طبعا ده نوع من انواع ادعاء الحكمه بأثر رجعى عشان ايامها محدش فى البلد كان عارف حاجه غير اللى بنسمعه ، و وضع طبيعى ان غيرتى على بلدى تحرقنى ..... يعنى انا مثلا ساعه لما كنت بره مصر كنت ممكن اقعد اشتم فى مصر ... بس بعمل كده مع مصريين زيهم زى عشان دى بلدنا كلنا فى الاخر ... انما لو واحد مش مصرى شتم انا كنت بطلع .............. و حط اى حاجه مكان النقط دى
برضه تلاقى ناس غاويه مظاهرات .... و انا شخصيا عندى واحد صديقى كده ... هو مش مؤمن باللى بيقوله ، و اعترف انه بيعمل كده عشان يوصل مش اكتر ولا اقل .. يعنى مش عشان البلد و عشان الحريه و الديموقراطيه و عاشت مصر مهلبيه .... انما لخدمه مصالحه الخاصه
برضه الناس اللى بتتهجم على الدين ..... اولا انا مش ضد اى حد يقول اى حاجه لأن ربنا اللى هيحاسبه عليها مش احنا ... انما انا ضد مبدأ الشتيمه و التجريح لأجل التجريح .... و كان فيه مدونه مشهوره أوى كانت تقعد بوستات نار على الوهابيه و تهاجمها .. انا كنت متفق معاها لأنى انا شخصيا بشتم فى الوهابيه ... انما الامر تعدى معاها و ظهر انها مش بتحب الاسلام كله ... ماشى ، براحتها ... بس على الاقل تبقى موضوعيه مش مجرد شتيمه و خلاص
و نفس الكلام على الملحدين ... يعنى فيه واحد عايز يعمل نفسه مشهور قام قالك انا ملحد و عمل كتاب ، و نتيجه لظروف خارجه عن المألوف تسببت فى تأخير نزول كتابه قالك كل الناس بتهاجمنى عشان انا ملحد ، مع انه تبعا لرأى انسانه عزيزه عليا و بتفهم أوى قالت عليه مجرد حمار مش اكتر ولا اقل
زى عمرو سلامه مؤلف فيلم زى النهارده كان من كام يوم نزل لينك على الفيس بوك جايب واحد من قناه الناس بيشرح معنى كلمه بيبسى و عمرو كاتب رأيه فى اللى اتقال .... تخيلوا كميه الهجوم اللى اتهاجمه و التلقيح .... و نفس الهجوم ده حصل على مدونه صديقه لما عملت شير لنفس اللينك ... زى ما تكون الناس دى كفرت او غلطت فى الذات الآلهيه و هما مش واخدين بالهم ..... اتهاجموا لمجرد انهم قالوا رأيهم ، و انا عارف الهجوم ده بيبقى شرس اد ايه لانى مجربه قبل كده لما كنت بقول نفس الكلام
مع انى اعرف موقفين لأتنين من نجوم القناه دى و من نجوم الدعوه عموما .... واحد فيهم كان زمان قبل ما ربنا يفتح عليه كان عايش فى المنصوره و كان بينزل مصر كل اسبوع يوم واحد ... قام اتجوز واحده هنا عشان يقضى معاها اليوم اللى بينزله ده ... و لما اتسأل قالك انا راجل ربنا من عليا بالصحه و بخاف الفتنه .... و مع كده كل ما يطلع فى القناه يقولك الشباب لازم يجاهدوا انفسهم و يبعدوا عن الشهوات و الغرايز ، بس هو خايف على نفسه من الفتنه
و التانى برضه كان فى المنصوره فى كتب كتاب ... المهم بعد ما الشيخ اللى اهل العريس جايبينه كتب الكتاب و مشى ، جه الشيخ بتاع القناه ده و كتب كتاب الاتنين للمره التانيه من غير ما يطلقهم ... ليه الله اعلم
طيب انا كده اعرف ان الجوازين مدام وقعوا ورا بعض من غير طلاق ده يبقى غلط ، و واحد فيهم كان حرام ... طيب يا ترى انى اللى كان حرام ، الاول ولا التانى
و بعدين لو لقا الشيخ غلط ماصلحلوش الغلط ليه ... ده حتى من رأى منكم منكرا ..... و لما واحد صاحبنا نبهه للنقطه دى طرده من كتب الكتاب و الناس كان ناقص تموته عشان صحح لفضيله الشيخ ، مع انه بعد رسول الله كل ياخذ منه و يرد
نسيب الدين و نيجى للناس بتاعت المساواه ..... و انا عارف انى هنا بحط وشى فى عش الدبابير ... عشان الناس حاسه ان الستات مظلومه فى البلد دى ... زى ما يكون الرجاله بيصيفوا فى مارينا و سايبين الستات فى حلايب و شلاتين ...... معقوله محدش واخد باله ان البلد كلها طالع تربنتين اللى خلفوها رجاله و ستات .... بس تقول ايه ... ناس فاضيه
و الامثله كتييييييير جدا ...... طبعا انا اعرف ناس كتير واخدين نظريه الايد الشمال دى ، بس انا متأكد ان 4 منهم بس اللى مقتنعين بكده و الباقى نيتهم مش بالصفاء ده .... الغريبه انى اعرف واحده تجمع فيها كل الصفات بتاعت الايد الشمال دى ... يعنى ليبراليه ، و مع المساواه ، و ضد الدين ... بتفكرنى بتوماس مور فى رجل لكل العصور ........ انا زهقت من الكتابه و عارف ان البوست سخيف المره دى بس بكتب عشان مخى مايصديش ....... سلام

اسماء .... حجه علينا لا لنا

2010-06-16T23:21:00.000-07:00

فى سنه 2001 كنت فى الجامعه .... اغلب الناس اللى بتقرا البوست ده كانت فى اعدادى ساعتها و الكبير فيهم هيكون فى ثانوى ...... ساعتها كان آرييل شارون لسه ماسك الوزاره فى اسرائيل و عمل اجتياح شامل لغزه و الضفه الغربيه بالجيش مع استخدام القصف و العساكر و كل حاجه كأنك فى حاله حرب عاجله مش حرب قعدت 60 سنه و لسه هتقعد تانى الله اعلم اد ايه
المهم الجامعه ساعتها حصلت فيها مظاهرات قعدت تقريبا 3 اسابيع مستمره ، مظنش انى شفتها فى الجامعه تانى لدرجه ان بعض الناس خلت عيالها ماتروحش الجامعه ايامها عشان البهدله اللى كانت بتحصل بشكل دورى و مستمر هناك ...... انا هنا هقول اللى انا شفته من غير تحيز لطرف على حساب طرف رغم ان كلامى مش هيعجب بعض الناس
اللى انا شفته ان عساكر الامن المركزى دخلت الجامعه تطارد بعض المتظاهرين برغم ان ده ممنوع بنص قانون الجامعات ان الامن يدخل جوه الجامعه و حتى عشان كده هتلاقوا مكاتب الامن موجوده على الابواب بس ......... برضه شفت عساكر الامن المركزى بتضرب المتظاهرين بجنازير حديد و العصيان بتاعتهم ، و كانت الجنازير و العصيان دى مش بتفرق بين ولد و بنت ، و على فكره .. الضرب ده كان جوه الجامعه مش براها
شفت الامن المركزى و هو بره الجامعه و بيضرب قنابل مسيله للدموع على المتظاهرين جوه الجامعه ..... تقريبا اسلوب الامن المركزى ما اختلفش كتير من ايامها الا انه اصبح اكتر احترافيه انه يعمل كردون حوالين المتظاهرين لغايه مايجوا ناس فى لبس مدنى يظبطوا المتظاهرين دول و يبقى الامن معملش حاجه غير انه حافظ على النظام و محدش يقدر ينتقده نتيجه لكميه الانتقادات الكتير اللى كانت موجوده ايامها
على الناحيه التانيه من المظاهرات شفت حاجات تانيه عجيبه ، و انا اللى هكتبه هنا هكون شفته بعينى مش اتحكالى و سمعت و الكلام المايع بتاع المصريين بتاع بيقولك معرفش ايه ..... شفت ناس من اللى كانوا المفروض بيتظاهروا بيضربوا كنتاكى اللى كان ايامها ادام باب تجاره مكان كشرى التحرير و مؤمن على اعتبار انه امريكانى و ان امريكا هى الراعى الرسمى لاسرائيل ... انا ممكن اقبل التصرف ده على مضض .... بس اللى مش ممكن اقبله انى لقيت ناس من نفس اللى بيتظاهروا عشان غزه طلعوا كنتاكى بعد ما اللى شغالين فيه هربوا بحياتهم و سرقوا الشاشات الكومباكت ، مكن الكاشير بالفلوس اللى جواها طبعا ، اجهزه الكومبيوتر ، التلاجات و الافران بالاكل اللى فيها ..... و جرى تبرير ده على انه دى نسبه قليله لا تمثل اللى بيتظاهروا ( و ده صحيح لان الناس دى كانت مجرد حراميه مش متظاهرين ) .... يعنى دول ممكن تسميهم الكولاترل داميدج او السايد ايفكت بتاعت المظاهره
طبعا كان كنتاكى قفل من اول يوم و بعد كده نقل مكانه اصلا من ادام الجامعه .... اللى حصل فى الايام اللى بعد كده كان اغرب ...... المحلات بتاعت المصريين اللى ادام باب تجاره و اشهرها صبرى و كل المحلات اللى جنبه اتكسر ازازها بالطوب برضه و جرت محاوله لسرقتها ، بس اللى بيشتغلوا فى صبرى مش زى اللى بيشتغلوا فى كنتاكى ..... فضلوا جوه و اللى كان بيهوب ناحيه المحل كان ممكن يموت
شفت برضه فى المظاهرات دى ناس بتحاول تكسب نقط على قفا الكفاح ..... و اشهر الناس دى كانوا الاخوان ...... و انا هنا بتكلم على الناس الكبيره فى الجماعه ، مع اقتناعى التام ان الشبيبه بتاعتهم دلوقتى بكره هيبقوا كده برضه و عشان كده عمرى مامشيت فى مظاهره فيها الاخوان تانى لأنى عندى كرامه ماتسمحليش انى ابقى لعبه فى ايد حد
المهم الرغى اللى فوق ده كان مجرد تبرير و مقدمه للى هقوله دلوقتى ....... طبعا كلنا قرينا عن خالد محمد سعيد الله يرحمه و شفنا صوره ...... الموضوع تطور بسرعه عندنا فى مصر لأننا بنتبع نظريه اللبن ... نطلع بسرعه بسرعه و ننزل على مفيش .... صفحات بتتعمل بأسمه ، و ناس بتتكلم بلسانه ، و كل اسكندريه اصبحوا فى يوم و ليله اهله و اصحابه و جيرانه .... يعنى اللى كان بيحصل كان فيه جزء من من استغلال خالد ميتا اكتر ما استغلوه حيا
انا عن نفسى بجد حزين على اللى حصله ، و عارف ان ده ممكن يحصلى انا شخصيا او يحصل لأى حد اعرفه فى البلد دى فى الوقت الطين اللى احنا عايشينه ده .... بس زعلان على الاستغلال ده ..... و طبعا فيه ناس هتقول ان اللى حصل كان تعريف مصر و العالم باللى حصل لخالد .... انا موافق على نقطه اننا نعرف الناس ، بس اللى حصل كان اكتر من تعريف .... و دى وجهه نظرى الشخصيه
يوم الاحد اللى فات تم تنظيم مظاهره ادام وزاره الداخليه فى لاظوغلى عشان خالد ، بعد مظاهرات فى اسكندريه ايام الجمعه و السبت .... انا عرفت كده يوم الجمعه عشان انا بعدها قفلت النت و الفيس بوك عشان كان عندى امتحان يوم الاحد فى الدبلومه اللى انا فيها دى
لما رجعت للنت و الفيس بوك يوم الاتنين العصر تقريبا بعد ما كنت خلصت امتحانى و نمت ، لقيت ان فيه حد جميل اعرفه اسمه اسماء بوكى و هى صديقه مشتركه عند اغلب المدونين كانت فى المظاهره يوم الاحد ..... طبعا انا ابتديت اقرا التعليقات بأثر رجعى
واحده صاحبتها اخدت الباسورد بتاع الاكونت بتاعها من اخوها عشان تتواصل مع الناس القلقانه على اسماء على الاكونت بتاعها ..... بعد كده هما مش عارفين عنها حاجه خالص و انها مرجعتش البيت لغايه الساعه 10 بليل يوم الاحد .... بعد كده لغايه الضهر يوم الاتنين كل اللى يعرف حد ممكن يسأله على اسماء بيسأل عليها بس هى اسمها مش فى اسامى الناس اللى اتاخدوا ، مع حاله قلق لأن اسماء عندها قرحه و واضح انها حاده عشان بيجلها نزيف من القرحه دى .... بعد كده عصر يوم الاتنين الناس عرفت انها كانت فى مستشفى و ان اهلها راحوا يجيبوها و راحت بيت اخوها و ان حالتها النفسيه وحشه عشان الضرب اللى حصل للمتظاهرين و لغايه هنا الاخبار وقفت بس بعد ما الناس اتطمنت
انا معرفش اذا كانت اسماء قالت انها رايحه الوقفه الاحتجاجيه دى ولا لا لحد من صحابها ... و معرفش لو قالت صحابها نصحوها بأيه ..... بس اللى اعرفه ان اسماء مش حاولت بأى صوره من الصور انها تستغل ده فى انها تبان بطله قوميه ، بعكس ناس اعرفها بتطلع مظاهرات و فيه اغراض تانيه غير خدمه البلد و التغيير و الكلام اللى بيقولوه بيكون فى ضمايرهم و الله اعلم باللى فى القلوب ..... اسماء عملت اللى حست انه صح لمجرد احساسها انه صح و من غير ما يكون فيه اى تبرير او مكاسب مستقبليه ليها من ورا الموضوع ده
انا عايز اقول ان اسماء باللى عملته ده فضحتنا كلنا و حطت مرايه كبيره ادام كل واحد فينا .... المرايه دى خلتنى لازم اعترف انى سلبى جدا و مش معترف بأى فايده للمظاهرات دى .... انا عارف ان البلد دى مش هتتغير بالمقاومه السلبيه بتاعت غاندى .... معندكش سلاح تقدر تبقى مركز قوه بواسطته يبقى مش هتغير حاجه و الحكومه هتتعامل معاك بنظريه سيبه يهوهو شويه عشان يهدا و لو طولت الهوهوه شويه الحكومه هتعاملك زى الكلاب السعرانه و ملكش غير الرصاص .... احنا مفيش اى ثورات ولا تغييرات فى بلدنا حصلت عشان الشعب عايز كده من ايام الفراعنه ... مش احنا بتوع الثورات الشعبيه ..... و برضه دى رأيى الشخصى
برضه المرايه دى اتحطت ادام الناس اللى بتكافح من ورا الكى بورد و بتغير صورها بصور خالد و بتشترك فى الجروبز اللى معموله بأسمه و بتكتب كومنتات ناااار ...... عايز تكافح بجد و تغير حاجه عندك الشارع زى ما اسماء عملت ... و اسماء بنت يعنى لو بنت قالت هتبهدل ، مهى اسماء بنت و اتبهدلت قبلها .... لو ولد قال هتبهدل يبقى يخليه فى حضن مامته احسن
آخر حاجه عايز اقولها .... اسماء مليون حمدلله على سلامتك و بجد شكرا انك عرفتينا حقيقتنا فى وقت كل واحد بيهرب فيه من الحقيقه و بيعيش فى حلمه ...... و مفيش سلام المره دى

انا و اسكندريه و عم عنتر

2010-06-07T02:48:00.000-07:00

بمناسبه موسم الامتحانات و ان كل الناس عندها اكتئاب عايز اتكلم على حاجه متكونش جد و على رأى المثل ... ادينى فى الهايف و انا احبك يا فننس
من كام يوم كنت فى البنك بخلص شويه حاجات .... المهم دخلت و بقول لموظفه خدمه العملا اللى جوه ان كارت الفيزا بتاعى مش راضى يطلع من ماكينه الاه تى ام ..... افاجئ بيها بتقولى مفيش حمام هنا فى البنك و الحمام فى القهوه اللى ادام البنك
طبعا لقيت الناس بتبصلى لأن الموظفه قالتهالى بصوت عالى زى ما تكون بتفضحنى مثلا ... المشكله انى مسألتش على الحمام من اصله ، و لما عدت السؤال ردت عليا و نفضت خالص لسيره الحمام ولا كأنها قالتلى اى حاجه ولا اعتذرت ولا اى حاجه .... تقريبا هيا اللى كانت عايزه تروح الحمام و كانت بتعمل اسقاط على سؤالى
انا بعدها افتكرت موقفين شبه الموقف المنيل ده .... اول موقف كنت من زماااااان سافرت اسكندريه عشان اقابل بنت ، وكانت اول مره اروح اشوفها ، ايام ما كان الواحد شباب انه يسافر عشان يتعرف على بنت ، مش دلوقتى بيبقى عندى مشاكل انى اروح الحمام التانى عشان بعيد شويه عنى ..... المهم اتقابلنا و كان لسه الجو بدرى .... فطرنا فى محمد احمد و كانت الدنيا حر ، قالتلى تيجى ندخل سينما ، قلتلها فل ، انا بحب السينما اصلا
و رحنا سينما فى جرين بلازا تقريبا لو انا لسه فاكر و قطعت تذكرتين و دخلنا .... المهم الواد البلاسير و هو بيوصلنا لقيته بيقولى انتوا عايزين تدخلوا فيلم تانى ... انا استغربت ، يعنى احنا ما اننا قاطعين تذاكر الفيلم ده يبقى عايزين ندخل الفيلم ده ، و لو كنا عايزين ندخل فيلم تانى كنا قطعنا تذاكره من الاول
المهم انا قلتله لا ، قالى طيب و دخلنا القاعه .. كان لسه ناقص على عرض الفيلم ربع ساعه تقريبا ... دخلنا القاعه و لقيتها فاضيــــــــــــــــه و مفيش فيها حد غيرنا ... المهم قعدنا و بعد 5 دقايق جه الواد البلاسير تانى و انا سألته واحد من اغبى الاسئله فى التاريخ .... قلتله ممكن اغير مكانى ... قالى يا استاذ مفيش غيركوا فى القاعه ، اقعد مكان ما انت عايز ... انا سمعت كلامه و قعدت مكان ما انا عايز ، و كنت مبسوط لدرجه انى كل شويه كنت بغير مكانى
وصلنا للبريك اللى فى نص الفيلم و سمعت واحد بيقول يا استاذ ... انا نفضت ... لقيته بينادى تانى على الاستاذ ، رحت قلت للبنت اللى انا معاها ان الاستاذ ده بايخ أوى عشان ميردش على الراجل اللى عمال ينده عليه
دقيقه و لقيت الراجل بيقول يا استاذ ياللى بتتفرج على الفيلم .... عرفت انه انا الاستاذ اللى بيتنده عليه .... وقفت ادور على مصدر الصوت مش لاقيه ، لقيته بيقولى انا هنا فوق ... فوق فين يا عم ملاك ... قالى انا هنا عند المكان اللى بيتعرض منه الفيلم ... بصيت لقيت راجل كبير و محترم كده ... سألنى اغرب سؤال ممكن تتسأله و انت فى السينما او فى اى مكان تانى عموما ... قالى انت عايز تعمل حمام !!!! .... نعم يا عم ... قالى عايز تعمل حمام ، قلتله لا مش عايز .. طبعا افتكرت احساس الطفوله المشرده لما كنت تبقى نازل مع بابا او ماما و يقعدوا يقولوا اعمل حمام هنا عشان مفيش حمام فى الشارع ..... الراجل قالى طيب و الناس اللى معاك حد فيهم عايز يعمل حمام .... سألت البنت عايزه تعملى حمام ... البنت اتاخدت كده و قالتلى انت بتقول ايه ... قلتلها مش انا اللى بقول ، ده عمو هو اللى بسأل ... قالتلى لا مش عايزه .... رحت باصص لعمو و انا كلى كسوف منه و قلتله لا محدش عايز يعمل حمام .... قالى طيب روح اقعد مكانك ... و بعد ما خلص الجمله على طول طفى نور الصاله و شغل الفيلم و انا لسه واقف مكان .... ده كان اول موقف
تانى موقف كنت فى يوم لازم اسافر المنيا عشان كان فيه مشاكل هناك .... المهم انا غالبا بسافر المنيا بالقطر عشان انا مش من هواه السواقه فى بلدنا ... رحت على المحطه احجز لقيت مفيش حجز لمده 4 ايام زى ما نكون كنا فى موسم الهجره الى المنيا
المهم كلمت عمتى عشان اقولها و انفض و مش اسافر .... عمتى قالتلى طيب ، و شويه و اتصلت بيا و قالتلى ان عم عنتر مستنينى فى موقف الصعيد عشان اسافر معاه ....... و عم عنتر ده سواق عنده يجى 70 سنه بيشتغل فى الموقف زى مهو باين من سياق الكلام ، و فى الغالب اى حد من العيله مسافر من هنا للمنيا او العكس و يكون هيسافر بالبيجو بيركب معاه
رحت لعم عنتر لقيته حاجزلى الكرسيين اللى جنبه ..... قعدت جنبه و اتكلنا على الله و هو اخد الطريق الغربى الجديد ، طريق الجيش هو اللى عامله و نضيف و مسفلت و زى الفل ... صحيح اطول ب 50 كيلو بس مش بتحس بيهم من كتر نضافه الطريق ، مشكلته ان الخدمات بتاعته قليله و ان الطريق عشان حلو بيغرى الناس انها تجرى و بالتالى نسبه الحوادث كبيره عليه
المهم اول ما وصلنا عند كافتيريا كده عند بنى سويف عم عنتر وقف و قال يا جماعه احنا هنقف ربع ساعه اللى عايز يعمل حاجه يعملها .... الناس نزلت عشان تشرب شاى او تاكل و كده ... بعد ربع ساعه الناس رجعت العربيه و عم عنتر تمم علينا و اتأكد ان كلنا موجودين ... و لقيته بيلف و يقولى ما تنزل تعمل حمام يا عمرو ..... الله الله الله ... هو الحمام ده مكتوب على وشى ولا ايه ... لا يا عم عنتر انا كويس ...... يا بنى لسه فاضل كتير على ما نوصل المنيا ... عارف يا عم عنتر مش اول مره اسافر
و هنا انتقل عم عنتر من لهجه النصح الى لهجه التهديد ..... يا بنى مفيش كافتريات تانى فى الطريق .... مش مشكله يا عم عنتر ...... مش هقف فى السكه على جنب لو قلتلى عايز اعمل حمام ... هنا حسيت ان عم عنتر بيكلم ابن اخته الصغير ... قلتله اتكل على الله يا عم و انا لو حبيت اعمل حمام اوعدك مش هقول و همسك نفسى
هنا عم عنتر لقى ان دى فرصه كويسه يكسب فيا ثواب و فى نفس الوقت يوعينى لمخاطر الكلام اللى انا بقوله ده .... قالى يا بنى حبسه الميه دى اوحش حاجه على البروسطاطا ( انا مش كاتبها غلط انما دى اخره معرفه عم عنتر بيها ) .... و هنا انا قلت لازم اخد موقف حازم ... قلتله يا عم عنتر انا فاهم و عارف و يالا اتكل على الله عشان انا متأخر .... و هنا طلعت واحده ست من ورا بتقولى يا بنى اسمع كلام الاسطى ، ده الاسطى خايف على مصلحتك .... قلتلها انا ادرى بمصلحتى يا ست .... و الاقى اتنين قاعدين فى الكنبه اللى ورا بيقولوا لبعض .. على فكره عم عنتر عنده حق فى مسأله البروسطاطا دى ... بكره ميعرفش يخلف و يفتكر عم عنتر و هو بيتحايل عليه يعمل حمام ... انا بصيت ليهم و سكت
و كل شويه و احنا ماشيين الاقى عم عنتر يبصلى و يقولى مش عايز تعمل حمام ... فضل يسأل لغايه ما اضطريت اعمل نفسى نايم عشان يسبنى فى حالى ... المشكله انى كنت خايف انه يصحينى من النوم على اساس انى معملهاش على نفسى .... ما صدقت وصلت المنيا و نزلت من العربيه ... رحت لعمتى و قلتلها انا مش هركب تانى مع عم عنتر ، قالتلى ليه ... قلتلها هقولك بعد ما اعمل حمام ... و دى كانت حكايتى مع عم عنتر و الحمام
هسيبكوا عشان اقوم .... اذاكر مش عشان اعمل حمام .... سلام

tshanj

2010-05-27T19:13:00.000-07:00

شهر و نص من ساعه آخر مره كتبت فيها بوست .... و لسوء الحظ كان بوست عن السرقه و الناس افتكرت انى تعبان من الموضوع ده و عايز اشكر كل الناس اللى سألت عليا فى الفتره دى و خصوصا العمه ستيته
فى الشهر و نص دول حصلت حاجات كتير أوى .... منهم انى و انا بعمل محضر للحاجه اللى اتسرقت منى اتعلمت انه اوحش حاجه ممكن تحصلك مش انك تتسرق .......... لاااا ، الاوحش انك تروح تعمل محضر عشان الحاجه اللى اتسرقت منك
و فى خلال الفتره دى الصدفه قادتنى لحاجه انا مكنتش عارف انى ممكن اتعلق بيها للدرجه دى .... الحكايه انى كنت فى يوم على الفيس بوك عادى و بقلب فيه .... لقيت زيكا كاتب لعادل بيقوله انا مش معاك فى المشوار ده يا ريس عشان المذاكره ...... عادى جدا اتنين صحاب بيتكلمو سوا ... و انا برضه عادى جدا اتحشرت و قلتلهم مشوار ايه ياااض منك ليه
المهم عادل بعتلى لينك لأيفنت حوالين ورشه سينما ، فيها تعليم سيناريو و اخراج و تصوير و مونتاج .... و قالى خد الابليكشن املاه و ابعته .... انا الصراحه دخلت على السايت اللى عليه الابليكشن عشان احمله و املاه لقيت السايت واقع ... المهم انه كان تبع جروب اسمه تشانج ، و على فكره الاسم مكتوب صح مش انا اللى غلطان فى السبيلنج بتاعه ... الاسم بيتكتب زى ما بيتنطق
المهم قلت لعادل قام بعتلى نسخه من الابليكشن بتاعه ... انا غيرت الاسم و العنوان و رقم الموبايل و زودت شويه افلام و شلت شويه افلام و كده و بعته على الايميل
تانى يوم عادل قالى هننزل بكره نحجز ... قلتله ماشى ... المهم هناك قابلنا واحد بأه من اعز الناس عليا ... عبدالله حسن ... اللى كان المانجر بتاع الورشه ... عادل كان يعرفه و سلم عليه ... المهم و انا جاى مع عادل لقيته بيقولى انت ايميلك كذا كذا ... انا الصراحه استغربت ، اصل كده عبدالله يا مكشوف عنه الحجاب يا اما انا اللى الايميل مكتوب على وشى .... عبدالله قالى اصلى انا امبارح جالى ايميل فيه نسخه من ابليكشن عادل فقلت ده اكيد صاحبه ، و انت النهارده جاى معاه ، يبقى انت هو
و اشتركت فى الورشه .... عايز اقولكوا انى استمتعت جدا جدا جدا بكل حاجه فيها ، و اتعلمت حاجات كتير جدا جدا جدا .... و اكتر اتنين عايز اشكرهم هما عمرو سلامه مؤلف و مخرج فيلم زى النهارده بتاع بسمه و احمد الفيشاوى و هو اللى ادانا سيناريو ، و تانى حد هو شريف البندارى و هو اللى كان بيدينا اخراج و عمل فيلمين قصيرين و تعب أوى معانا و ادانا حاجات كتير فى وقت قصير جدا
طبعا بعد ما الورشه خلصت قسمونا مجموعات عشان كل مجموعه تعمل فيلم قصير و نشترك فيهم فى المسابقه اللى كانت بعد الورشه .... عبدالله هنا اخدنى بعيد عن عادل و خلانى فى جروب معرفش فيه اى حد خاااااالص ..... و دى كانت احلى حاجه فى الورشه دى ...... لأنها خلتنى اتعرف على شخصيه اتمنى انى اشتغل معاها تانى و تالت و عاشر و هيا ساندرا اللى كانت المخرجه بتاعت الفيلم .... و هيا اسمها ساندرا شريف مش ساندرا نشأت زى ما كل واحد بيعرف انها المخرجه و اسمها ساندرا يقوم قالش القلشه دى
و طبعا ما ينفعش انسى صاحبه فكره الفيلم مى ابراهيم ... اتخانقت معانا كتير جدا ساعه التحضير و ساعه التصوير ... بس انا متفهم وجهه نظرها انها تعبانه فى الفيلم عشان كده صعبان عليها انه يتشال منه اى حاجه .... بس الشهاده لله لما كانت بتفهم احنا عملنا كده ليه و بتقتنع كانت بتوافق
طبعا احنا كنا 7 فى بدايه الفيلم .... بس بعد كده نزلنا لتلاته عشان 3 اعتذروا و الرابعه اللى هيا المونتيره بتاعتنا شروق كانت مشغوله ، بس بعد كده حضرت معانا اخر يوم تصوير و اليوم بتاع المونتاج
بالنسبه للفيلم طبعا الفيلم مليان غلطات ... التصوير مش حلو ، و ده عشان كنا بنصور بكاميرا سايبر شوت مش السيمى برو او حتى هاندى كام ، و ملهاش لازمه اقول الظروف اللى تسببت فى كده
برضه تسجيل الصوت مش واضح لنفس السبب .... و برضه الاضاءه وحشه و ده عشان احنا مكنش معانا سبوتات اضاءه و لسوء الحظ كان عندنا الماستر سين ليل ... دول الاسباب اللى خارجه عن ارادتنا
الاسباب اللى كانت بسبب اننا بنتعلم فدى كانت موجوده فى الشوتات و فى المونتاج ... بس بفضل ربنا و بفضل عبدالله حاجات كتير اتدارت ساعه المونتاج .... و برضه لازم اقول ان عبدالله صاحب فكره اننا نحط ساوند تراك للفيلم
برضه مش هنسى اشكر كل الناس صحابنا اللى ساعدونا و اشتركو فى تمثيل الفيلم اميره و عماد و ايناس و طبعا على اللى هو برضه واحد من تيم تشانج و تيفا اللى هو برضه واحد من تيم تشانج و ساهر و شريف و انور
طبعا انا عارف ان الفيلم وحش ... بس الحقيقه انه بالنسبه لأول مره يعتبر كويس و انا بجد حابه جدا ...... اتعلمت منه كتير و يا رب نفس الغلطات مغلطهاش تانى
الناس لما شافت الفيلم عجبها الحمدلله فى المجمل .... فيه ناس بأه و كلهم للأسف من معارفى ... واحد فيهم قالى ايه الزباله اللى انت عاملها دى .... انا رديت عليه انه فعلا زباله ، بس زباله انا بحبها ، و قلتله انى اول مره فى حياتى اعمل حاجه من غير ما اكون مغصوب عليها .... انما هو كل انجازاته فى الحياه انه مربى شنبه و فرحان بيه مع ان شنب الصرصار يعتبر اكبر بالنسبه لحجمه ..... انه خلص كليه ، و كلنا خلصنا كليات – ناهيك عن انى مخلص نفس الكليه زيه – يعنى الفكره مش انجاز أوى ..... انه اتجوز و خلف ، طيب ما هى الكلاب فى الشارع برضه بتتجوز و تخلف ... انه شغال فى شغلانه متعبه و مقرفه ، طيب ما هو الحمار بيشتغل و بيتعب اكتر منه .... ده كان واحد
اتنين تانين قعدو يتريقوا على الفيلم ... الواحد اللى فوق ده كان ليه انجازات على الاقل من وجهه نظره ... الاتنين دول بأه ملهمش اى انجازات
انا ليه بتكلم على الناس دى .... مش عشان انا مضايق ... انا كنت ساعتها مضايق ، لأن التريقه دى اسهل حاجه فى الدنيا و انا لو حبيت اتريق عليهم هتريق عليهم فى الف حاجه و كلهم هيكونوا فيهم .... انا بتكلم عليهم عشان اقول للى بيقرا انه مايهتمش بكلام الناس .... مدام مقتنع باللى انت عملته يبقى طظ و الف طظ فى الناس ، لأنه فعلا صدق المثل ناس لا يعجبها العجب و لا الصيام فى رجب
طبعا مش هقدر انسى اقول على الافلام اللى كانت معانا فى المسابقه ... فيلم لعب عيال اللى كسب المركز الاول و ده اللى عاملينه عمر و منه و انديرا و هاله ..... فيلم بيانو و ده بتاع عادل حبيبى و سعيد و بيتر و عمر ( بس ده غير عمر بتاع لعب عيال ) و ماهى و دينا ..... فيلم بنى آدم و ده بتاع يمنى و ماهى و رنا و نسمه و برضه عادل حبيبى تانى .... و فيلم فسحه و ده بتاع اسلام و يحيى و هاديه و مصطفى و محمد
على فكره انا مبسوط جدا بتجربه الورشه دى و بمعرفه كل الناس دى و بتمنى انى اشوفهم تانى و اشتغل معاهم تانى
آخر حاجه لازم اقولها انى لازم اشكر فريق تشانج كله على المجهود اللى عمله فى الورشه دى ... بس بجد بخص منهم عبدالله اللى بشكره تانى ، و كمان على طه اللى ساعدنا فى التمثيل و بجد كان تمثيله جامد جدا
اللينك ده بتاع الفيلم ... يا ريت تشوفوه و تعرفونى رأيكوا

معلش انى طولت المره دى بس دى جايه بعد شهر و نص من التوقف عن الرغى .... اشوفكم قريبا .... سلام

سرقه مسلحه

2010-04-16T17:45:00.000-07:00

من حوالى 3 او 4 سنين كنت فى يوم نازل الصبح بدرى على الساعه 7 تقريبا ، مش فاكر انا كنت رايح فين .... المهم اللى انا فاكره انى كنت ماشى و لقيت ادامى تجمهر من الناس ملمومين و انا مش عارف اللمه دى على ايه ..... قربت شويه من مركز اللمه ، لقيت واحد وارم من الضرب و الناس لسه بتضرب فيه و رابطينه من رقبته بحبل و شابكين الحبل فى عمود نور ..... المهم انا بقولهم هو عمل ايه ، واحد قالى ده معرفش مين نزل يصلى الفجر و خد باله من الواد ده نازل من بيت و عرف انه حرامى قام ماسكه و نده الناس و من ساعتها نازلين ضرب فيه .... قلتله يعنى الواد ده بيتضرب من الفجر .... قالى دى عيال مبرشمه و مش بتحس بالضرب
المهم انا مشيت شويه بعيد عنهم و كان جاى فى سكتى واحد محترم لابس بدله و شايل شنطه حلوه كده ... سألنى هو اللمه دى على ايه ، قلتله على اللى فيها .... لقيته بيدينى الشنطه و راح داخل وسط اللمه و ضرب الواد قلمين و رجع خد منى الشنطه و مشى فى طريقه
انا فاكر انى استغربت يومها جدا من اللى الراجل ده و اللى عمله و اللى الناس الكتير الملمومه بيعملوه و ليه هما كلهم نازلين ضرب فى الواد الحرامى ده ، و قلت دى تقريبا سياسه القطيع و نوع من انواع تفريغ الكبت و الظلم اللى الناس حاسه بيه فى شخص الحرامى و كلام كتير من الحلو المجعلص بتاع الكتب ده .... بس لازم اعترف انى اكتشفت السبب الحقيقى من يومين
يوم الاربع اللى فات كنت نازل مشوار .... المهم قلت اعدى على البنك اسحب فلوس عشان مكنش معايا اللى يكفى .... الحوار ده كان على الساعه 7 و نص العشا .... المهم قبل البنك بدقيقه بطلع المحفظه عشان اجهز الفيزا عشان اخلص على طول لأنى كان عندى معاد و كنت متأخر عليه جدا .... فجأه حسيت بحد بيخطف المحفظه من ايدى و كان الحد ده ورايا .. ببص لقيت عيلين يمكن 16 او 17 سنه و دخلو فى حته ارض تبع الاوقاف ..... انا طلعت اجرى وراهم
طبعا انا رجليا بايظين نتيجه لحادثه قديمه و ده كان السبب اللى خلانى ابطل لعب فولى ... المهم وقعت مره على رجلى اليمين البايظه و قمت جريت شويه .... طبعا بجرى وسط ارض زراعيه ، طين و قنايات و ضلمه و حاجه هباب يعنى ... و هوب وقعت تانى ، و مع كده حصلت واحد فيهم عشان كان اتكعبل ... المهم الواد لف و ضربنى بمطواه فى رجلى اليمين لسوء الحظ ، يعنى مش كفايه هيا بايظه لوحدها ، لا و اتضربت فيها بمطواه كمان ..... طبعا طول ما انا بجرى عمال اقول حرامى و الناس عماله توسع ليهم الطريق ... مش لازم اقول انى ساعه لما اتضربت بالمطواه كنت فقدت اى امل انى احصلهم خلاص لانى كنت بعرج ساعتها
الناس اللى فى الطريق بيسألونى اسئله المعيه بأه ... يقولولى هو فيه ايه ، على اساس انى لما بقول حرامى انا كده بلعب معاهم الكاميرا الخفيه ، و واحد يقولى كنت زعق بصوت عالى شويه عشان الناس تسمع اكتر ، قلتله ما انت سمعت ، عملت ايه يعنى ... قالى انا خفت يضربونى بحاجه ... المهم الناس قالولى انهم شافو العيلين بيدخلو شارع ، دخلت وراهم و لقيت توك توك ، رحت راكبه و قعدت الف فى المنطقه لمده ساعه ... الواد سواق التوك توك قالى ان العيال دى هتتدارى لمده اسبوع على الاقل بس قالى هنفضل نلف عليهم و انت و حظك
و الناس تقولى المحفظه كان فيها فلوس كتير ، طيب كان فيها ورق مهم ، و اسئله من دى كتير ... انا بالنسبه ليا المحفظه بالفلوس فى داهيه ... البطاقه و الرخصه و كارنيه النادى هطلعهم بموجب المحضر ، و كروت الفيزا اتصلت بالبنك فى نفس اليوم و وقفتها ..... الفكره فى الاحساس نفسه ... يعنى انا مش هقول حاسس انى اخدت على قفايا لان ده اللى حصل فعلا .... اتسرقت و اتضربت بمطواه و معرفتش اجيب حقى ، يعنى اخدت على قفايا رسمى
و الناس تقولى مكنش لازم تدخل وراهم الزراعه دى عشان دول ممكن يقتلوك فيها ، و فيه عيال شمامين و حراميه بيبقو فيها و كلام من ده كتير .... يعنى المفروض اتسرق و اقعد اتفرج على اللى سرقنى و انا ساكت ..... و طبعا معرفتش مدى الجبن و مش لاقى وصف تانى اقل من الجبن اللى بأه موجود جوا الناس غير ساعه السرقه .... يعنى اكتشفت انه ناس كتير لو اتحطت فى الموقف ده مش هيجرو ورا العيال ، ده غير انى شفت بعينى ان الناس بتوسع الطريق للعيال دى
طيب انا اللى غلط عشان ابويا ربانى انى مبقاش جبان و انه مبيقبضش الروح غير اللى خالقها ، ولا الناس دى اللى غلط عشان الجبن اللى جواهم ، و اللى هما شايفين انه حكمه مش جبن و بيقولو اديك جريت وراهم نابك ايه غير ان رجلك ورمت و اتعورت و خدت غرزتين فيها
المهم الناس قالتلى ان العيال دى فى الغالب هتاخد كل حاجه من المحفظه و بعد كده هترمى المحفظه فى الشارع و انى ابقى اسأل على المحفظه ...... طبعا انا اتصرفت كل التصرفات القانونيه ... وقفت الكروت ، عملت محضر ، سألت الناس على المحفظه و سبت رقم موبايلى عشان لو لقوها يتصلو بيا
الاهم من كده انى لجأت لحاجه حلوه جدا .... كل منطقه بيبقى فيها ناس عارفه العيال الحراميه ... انا رحت للكبار دول و قلتلهم على اللى حصل و قلتلهم انه ليهم الف جنيه على كل عيل لو جابوهم ... اللى انا بفكر فيه هعمل ايه لو جابوالعيال دى و قالولى تعالى استلمهم
و والنبى محدش يقولى اوديهم القسم لأنه مش هيحصلهم حاجه هناك كبيرهم قلمين و خلصنا على كده ، ده اذا العيال ماتهمونيش انى خاطفهم ... و برضه محدش يقولى ولى الامر و السلطه و تنفيذ العقاب لانى متأكد انه لا ولى الامر ولا السلطه هيعملو حاجه ... انا عايز اقتراحات عمليه مش مجرد كلام نظرى ..... و اللى يرد عليا قبل ما يرد يعرف انه اكتر حاجه وجعانى هيا كرامتى ، يعنى الموضوع مجرد انتقام بحت و ملوش دعوه لا بالحق ولا بالقانون ولا اى حاجه تانى
المهم بالعوده للسؤال الاولانى ... انا عرفت ان الناس لما كانت بتضرب الواد الحرامى فى الغالب كل واحد فيهم اتسرق قبل كده او يعرف حد اتسرق و بيرد فى الحرامى ده اللى معرفش يرده فى الحرامى اللى سرقه ... انا عارف كده لأنى عارف انى لو شفت حرامى فى الشارع و انا شايل شنطه ، هدى الشنطه دى لاى حد و اضرب الواد قلمين و بعدين ارجع اخد الشنطه و امشى فى طريقى
حاجه اخيره عايز اقولها مع ان ملهاش علاقه بالموضوع .... يا جماعه اللى معاه رقم موبايلى يبقى يتصل او يبعت رساله ... و اللى معاه المسنجر يبقى يسبلى اوف لاين عليه او يبعتلى رساله على الايميل .... و اللى معاه الاكونت بتاع الفيس يبقى يبعت رساله او يسبلى كومنت على الوول .... و اللى معوش حاجه يبقى يسبلى تعليق هنا كرساله شخصيه و انا مش هنشرها
ادينى قلت عشان محدش يبقى ليه حجه و يقولى مش عارفين نوصلك ..... سلام

سياسه لا اكثر ولا اقل

2010-04-09T10:05:00.000-07:00

رغم انى مليش نفس اتكلم فى السياسه الا انه من الواضح ان كل حاجه فى بلدنا بتؤدى للسياسه بشكل او بآخر ........ شئ مؤسف اننا منلاقيش حاجه نقدر نتكلم فيها من غير ما يكون داخل فيها سياسه ، مفيش حاجه نستمتع بيها ، او تعذبنا و برضه ميكونش ليها دخل بالسياسه .... كل حاجه فى بلدنا فى الوقت الحالى ، و فى كل الاوقات بالمناسبه متعلقه بالسياسه
من 3 اسابيع تقريبا انتشر على الفيس بوك و فى المنتديات و حتى فى قعدات الاصحاب الفيديو المشهور حاليا بتاع وزير التعليم ( و حقيقه انا مش عارف الوزاره لسه اسمها التربيه و التعليم و لا اكتفو بالتعليم على اساس اننا شعب مش هينفع فيه التربيه ) ساعه لما مر على مدرسه و لقى التلاميذ فى الحوش و المدرسين مش فى الفصول و الناظر مش موجود ..... طبعا كلنا سمعنا عن الفيديو ده اذا مكناش اتفرجنا عليه كمان
استغربت جدا لما الناس شافت ان الوزير حاد جدا فى تعامله مع المدرسين و الناظر و سخريته منهم ..... سبب استغرابى ده ان الراجل اتريق عليهم بس مش اكتر ، طبعا مش معنى كده انى موافق على التريقه ، بس الظاهر الناس ناسيه مين ابو الوزير ده ... ابو الوزير ده يا افاضل هو زكى بدر وزير الداخليه الاسبق .... و اللى ميعرفش زكى بدر يروح يسأل الناس الكبيره عليه ... زكى بدر على ما اتذكر كان من اوائل الناس اللى دخلت الشتيمه و الضرب ( سواء بالايد او بالجزمه ) لمجلس الشعب ...... و ده اختزلته منى الشاذلى فى حوارها مع الوزير فى جمله تحمل من الخبث اكتر مما تحمل من البراءه او انها تكون مجرد تعليق عادى لما قالتله " اللى خلف ما متش " .... طبعا الراجل خد الجمله ببساطه ، و الله اعلم لو كان خدها على انها حقيقه او انها مدح
اللى انا مستغربله ان الوزير زعلان جدا من حال المدرسه و اللى شافه .... طيب المدرسه دى على الاقل لقى التلامذه جوه المدرسه .... فيه مدارس تانيه مفيهاش لا تلامذه و مدرسين ولا ناظر ولا اى حاجه ...... الراجل استغرب من التسيب اللى وصلناله ، زى ما يكون مش عايش معانا فى مصر ، و ميعرفش انه كوزير مسئول عن كل المدارس و منهم مدرسه عندنا فى الهرم مش مهم اسمها بس اللى عايز يعرفه هقوله عليها .... المدرسه دى مدرسه بنات ثانوى عام و كانت مشهوره بأن نسبه لا بأس بيها من الطالبات اللى فيها حوامل ، و انا عارف الموضوع ده من ايام ما انا كنت فى ثانوى يعنى تقريبا من 16 او 17 سنه ، الله اعلم تطورو دلوقتى و اصبحو بيروحو المدرسه بعيالهم ولا لسه بيكتفو بالحمل
ناهيك طبعا عن مدارس الاولاد ، و عن التعليم التجارى و الفنى ، و الكارثه اللى عندنا فى التعليم اللى اسمها سياحه و فنادق و فى الغالب بتخرج رقاصات و طبالين و بلطجيه ..... و انا مش بقول كده من باب انى اخلى سمعه المدارس وحشه انما اللى بقوله ده اقل من الحقيقه بكتير ..... و اللى مش مصدق ينزل يشوف بنفسه ..... طبعا انا هنا بتكلم عن مدارس الناس اللى على اد حالها .... المدارس الهاى كلاس و الاميركان دبلومه طبعا شئ تانى ، لأن البوظان فيها مدعم بالفلوس ... يعنى مش مجرد صياعه بلا امل زى مدارس الغلابه ، انما بوظان و فساد رسمى
حقيقه انا مش عارف الوزير ده هيطلع اكبر امل لمصر فى تحسين التعليم ولا هيطلع مجرد افعال لتلميعه شخصيا ، خصوصا ان مسيره الراجل ده كانت سريعه أوى فى بلد اشتهرت بالروتين و كاتب القرفصاء .... من دكتور فى الجامعه لعميد كليه ، لنائب رئيس جامعه ثم رئيس جامعه و بعد كده وزير ، و احتمال تكون الخطوه الجايه رئيس وزرا
نسيبنا من موضوع الوزير و نتكلم على حاجه تانيه برضه اساسها سياسه .... البرادعى ..... الراجل ده من ساعه لما طلع و عمل حراك سياسى فى البلد و كل الناس بتتكلم عليه .... و الحقيقه برضه ان الراجل لغايه دلوقتى مش قال اى تصريح انه هيرشح نفسه للانتخابات الرئاسيه ، انما الناس هيا اللى رشحته ... جايز عشان مش عايزه جمال ، و جايز عشان مش عايزه الاخوان و جايز لمجرد فكره التغيير و التجديد
انا قريت ما اصطلح على برنامج الاصلاح السياسى بتاع البرادعى ، و لقيت كل المطالب اللى فيه هيا المطالب اللى كل القوى السياسيه ( سواء اتفقنا انهم فعلا قوى ولا مجرد ناس بتؤدى ادوار ) بتطالب بيها .... بس اللى يفرق البرادعى عن غيره انه ليه خبره سياسيه دوليه مش مجرد خبرات محليه و شويه شجب على شويه استنكار و معاهم رشه مظاهرات ......... بس برضه دى نفس نقطه ضعف البرادعى انه مش عايش فى مصر و جايز ميعرفش كتير عن احوالها الحقيقيه .... بس برضه من الملاحظ ان البرادعى ابتدا يتدارك النقطه بتواجده اكتر فى الشارع المصرى مع الناس و فى وسطهم
بس الملاحظ انه حاليا لا صوت يعلو على صوت البرادعى ..... يعنى الاخوان رغم ضجيجهم العالى ( اللى انا شايف انه ضجيج بلا طحن ) ملهمش صوت و منشغلين حاليا فى مشاكل مكتب الارشاد و الاعضاء بتوعهم اللى فى المعتقل ..... و برضه اليسار على اختلاف الوانه و تنظيماته ملوش صوت حاليا ..... و برضه مفيش صوت لا ايمن نور ولا جميله اسماعيل ( لأن الحقيقه ان السجن انتقص كتير من بريق ايمن نور مش لمعه اكتر ) .... يعنى الراجل ده محدش لا عارضه ولا آيده ، مع استثناء الشباب اللى فى حركه كفايه و اللى بعضهم نقل نفسه من خانه اليسار الى خانه يسار الوسط
مشكله البرادعى انه محدش هيقف معاه فى البلد عشان دى اصول اللعبه السياسيه فى بلدنا ، و اللى الله اعلم هو فاهمها ولا لسه محتاج فيها دروس ... الاخوان ممكن يقفوا معاه على الحياد و جايز يساندوه ،مع ان ده احتمال مستبعد لأن الراجل ده من اساس افكاره الدوله المدنيه اللى بيعتبروها الاخوان رجس من عمل الشيطان ، بس لو لقو ملهمش مصلحه مع البرادعى هيكونو اول ناس تبيعه زى ما عملو ساعه انتخابات مجلس الشعب اللى فاتت و اتفقو مع التجمع على تقسيم الدوائر الانتخابيه بينهم على رأى المثل انا و اخويا على ابن عمى و انا و ابن عمى على الحكومه ، و بعد كده كانو اول ناس باعت التجمع و كل الاحزاب التانيه ، و ده مش غريب على الاخوان على فكره لأن دى حقيقتهم من زمان ، يعنى طبعهم مش هيشتروه
يمكن اليسار يقف مع البرادعى بضمير شويه عن الاخوان ، بس مشكله اليسار فى مصر انه من زمان مفهوم غلط و ان اليساريين دول ناس كافره و هيروحو النار و اللى ساهم فى كده كانت الحكومه و الاخوان على التوازى كل طبعا لمصالحه الخاصه ، و طبعا بما اننا كلنا ما شاء الله علينا داخلين الجنه و على راس كل واحد فينا قنديل و على راس البعض قنديلين فأحنا عشان كده ضد اليسار من غير حتى ما نسمع اى حاجه من افكار الناس دى ..... بس احقاقا للحق جزء من الازمه دى كان اليسار نفسه سبب فيها من غير الدخول فى تفاصيل مش هتفيد اى حد دلوقتى
يفضل للبرادعى الناس اللى عايشه فى مصر بجد و طالع عين اللى خلفوها .... بس مشكلتنا ان لقمت العيش بتذل .... و انا هنا بتكلم بصراحه و بواقعيه و من غير اى شعارات ..... و المسأله نسبه و تناسب ..... يعنى لو فيه 5% مستعدين يضحو عشان افكارهم و مبادئهم هتلاقى قصادهم 95% عايزين يعيشو و يربو العيال ، و لو مفيش عيال يبقى عايزين يعيشو و يجيبو عيال عشان يربوهم
بس يفضل السؤال الحقيقى .... البرادعى فعلا عايز يغير من البلد حتى لو مكنش هو جزء من النظام اللى هيغير ، ولا هو مستنى اللحظه المناسبه عشان يعلن انه نفسه يبقى رئيس جمهوريه او رئيس وزرا او اى حاجه من النظام ده ..... السؤال ده هنستنى عليه شويه عشان نعرف اجابته

امى

2010-03-22T05:27:00.000-07:00

عدى عيد الام و خلص عيد الام و انا مكتبتش حاجه امبارح عشان كنت بتكلم مع امى و امى ... اه ، عندى 2 امى مش امى واحده
الاولانيه هيا امى اللى بجد اللى كانت حامل فيا و كنت تاعبها و قارفها .... تاعبها و قارفها و هيا حامل ... و تاعبها و قارفها و هيا بتولدنى .... و تاعبها و قارفها و هيا بتربينى و انا صغير ... و تاعبها و قارفها لغايه دلوقتى
و التانيه هيا عمتى ... عمتى اللى عملت فيا جميل مينفعش انساه بس مينفعش اتكلم عليها هنا عشان عايزلها بوست لوحدها ..... و عشان كده لما بقول للعمه ستيته يا عمه ده معناه انى بعزها فوق الوصف والله على ما اقول شهيد
لما بفتكر امى ( اللى هيا امى بجد ) بفتكر القرف اللى هيا شافته معايا و لسه بتشوفه .... انا مكنتش عيل شقى ، بس كنت عيل مقرف بجد .... يعنى لما كنت صغير كنت افضل اعيط لغايه ما تشيلنى ... بس مش تشيلنى و تقعد او تشيلنى و تقف ساكته .... لاااااا .... انا كانت لازم تشيلنى و تقعد تتمشى بيا فى الشقه ، يعنى هد حيل من كل ناحيه
برضه بفتكر ايام زمان لما كبرت شويه و كان عندى يجى سنتين او تلاته كده .... عارفين المرحله المقرفه اللى العيال بتبقى فيها زاحفه و متسلقه فيها كده زى الحشرات ، اهو انا قصدى على المرحله دى ..... كان زمان للى عاشو زمان التليفزيون بتاعنا محترم و ابن ناس ... مفيش دش ... يا دوب الاولى و التانيه و حلو أوى كده .... و فوق كده التليفزيون كان بيشطب و بيعمل وششششش اللى بطلنا نسمعها دلوقتى الساعه 12 بليل عشان الناس تتخمد و تشوف مصالحها .... الاستثناء الوحيد كان يوم الخميس ، البلد كلها اجازه تانى يوم ، فبيسمحو للناس بسهره مع مسرحيه بتخلص على الساعه 2 بليل .... طبعا امى و ابويا الله يرحمه كانو بيسهرو يتفرجو و ينامو متأخر ... اجازه بأه .... انا كنت بصحى على الساعه 7 الصبح الوقت اللى انا متعود عليه و انزل من على السرير و اروح على المطبخ ..... ايامها كنا لسه فى شقه دار السلام ... شقه 62 متر ... يعنى لو 3 افراد ماشيين سوا فى نفس الوقت يبقى لازم عسكرى مرور ينظمهم جوه الشقه .... المهم كنت بروح على المطبخ و افتح الدولاب التحتانى
امى كانت بتخزن الرز و المكرونه و الحاجات دى فيه .... انا زى الشاطر اطلع الحاجات دى كلها و افضل افضيها حواليا فى شكل دايره ..... و لما اخلص و ملاقيش حاجه افضيها اجيب ايد الهون و اقعد ادق بيها على الارض ..... طبعا عايز اقولكو انه بعد كام اسبوع امى بأه عندها انعكاس شرطى ناحيه صوت ايد الهون ، هيا تسمعه من هنا و تصحى ابويا و تقعد تتخانق معاه و تقوله شوف ابنك نيل ايه ، و شوفلك صرفه معاه ، قوم اضربه و الكلام ده ..... المهم امى اتعلمت تشيل الحاجات دى فى الدولاب من فوق عشان انا ملاقيش حاجه افضيها ، فأكتفيت بعد كده بدق ايد الهون على الارض
برضه افتكر لما كنت فى مرحله 4 سنين او 5 كنت لما بنيجى اجازه من السعوديه ما اصدق انطلق عشان السعوديه مفيهاش فسح ، فيها كل حاجه ما عدا الفسح ... اقابل بنت الجيران و افضل العب فى الشارع لغايه ما الدنيا تضلم عليا ، و بعدين اطلع البيت ... طبعا امى تستلمنى بزعيق و ضرب و شد على الحمام .... و بعد الحمام تقعد تفلينى ( طبعا طول النهار صايع فى الشارع و بلعب مع عيال معفنه ، هاخد منهم ايه غير القمل يعنى ، و ده اللى خلانى كل ما افتكر كده افتكر اللمبى و هو بيقول واحد مصاحب على علوكه و اشرف كخه عايزه يطلع طيار ) و طبعا لأن الموضوع ده كان بيتكرر كل يوم هيا كانت تتغاظ و تقعد تفلينى جامد لدرجه انى كنت بحس ان شعرى هيتقطع و اقعد اعيط و تقولى احسن ، تستاهل عشان تبطل ... بس لا انا بطلت صياعه ولا هيا بطلت تفلينى جامد
بمناسبه الحموم و كده افتكر لما كبرت شويه و كان عندى يجى 7 سنين بطلت اخلى حد يحمينى ... اصل انا على غير الشايع عنى بتكسف جدا .... المهم امى فى يوم قالتلى ادخل استحمى بعد جوله مكوكيه فى الشارع كعادتى ... مش فاكر بأه عشان الصابونه كانت جديده و كبيره على ايدى ، ولا انا اللى مكنش ليا مزاج استحمى .... المهم الصابونه وقعت منى فى الكابنيه ... مش اطلعها ولا انادى على حد يطلعها ... لااااا .... شديت عليها السيفون و دلقت عليها ميه لغايه ما اختفت ... المهم امى دخلت بعد كده تدور على الصابونه مش لقياها ... تسألنى اقولها انا استحميت و سبتها ... مافهمتش غير لما شافت الميه بتبقلل .... يومها اضربت ضرب ... اضربت على انى كدبت و على انى رميت الصابونه و كانت جديده .... و من يومها اصبحت اكثر حرصا فى الكذب لغايه ما ربنا تاب عليا و بطلت العاده الهباب دى
افتكر برضه و انا عيل لما كنا فى السعوديه .... امى بتخلص شغل على الساعه 2 الضهر ... نتغدى و ننام و تذاكرلى شويه و بعد كده فاضيين .... انا فى الفتره دى اتعلمت كل آداب الاتيكيت .... كانت امى تجيبلى طبق مسطح و تحط فيه رز مش مستوى و ناشف ، و انا المفروض اطلع الرز بالمعلقه من الطبق للكيس من غير ما اوقع منه رزايه واحده ... طبعا ياما اضربت على الرز اللى كان بيقع ..... برضه كنت بضرب لو عملت صوت و انا بشرب الشوربه ، يمكن ده اللى خلانى اتعودت على انى اشربها بارده شويه و نفس الكلام بالنسبه للشاى و الاكل عموما .... اضرب لو كان على شفايفى اكل من اللى انا باكله .... اضرب لو اكلت و بؤى مفتوح.... اضرب لو غلطت و مسكت الشوكه باليمين لدرجه انى قعدت مده طويله من حياتى اعلم الشوكه و اقول انها اولها حرف الشين اللى هو اول حرف من كلمه الايد الشمال عشان منساش و اضرب عليها .... و حاجات كتير جدا .... انا على اد ما كنت بكره الايام دى عشان كانت عباره عن حفلات مستمره من الضرب بس كل يوم باكل فيه سواء مع حد او لوحدى بفتكر امى و بدعيلها على انها علمتنى الحاجات دى
اخر حاجه هقولها و مش كلام انشا ولا حاجه ... انا طول عمرى اقول لو امى معملتش حاجه اكتر من انها كانت حامل فيا و ولدتنى يبقى ده كفايه و انا مش هقدر ارد الحاجه دى مهما عملت ... يعنى لا تربيه ولا سهر جنبى و انا عيان ، و لا مذاكره ، ولا قلق ايام نتايج الثانويه ، و لا زعل عليا ايام السقوط فى الكليه ، ولا اى حاجه تانيه ... يبقى برضه انا هفضل مديون ليها طول العمر و 10 اعمار على عمرى كمان
عشان كده انا بقولها هنا زى ما قلتلها امبارح .... كل سنه و انتى طيبه يا حبيبتى و تفضلى معايا على طول ......... عمرو

عايز ايه

2010-03-13T18:16:00.001-08:00

موضوع النهارده جد شويه عشان احلل اسم المدونه .... موضوع النهارده بيتكلم عن الاحلام و الغايات اللى الواحد بيبقى عايزها فى حياته
انا مش هتكلم فى المطلق لأن التعميم و الكلام فى المطلق اكبر حاجه غلط ممكن اى حد يعملها ، و برضه مش هتكلم على البرج بتاعى عشان الناس ابتدت تزهق من موضوع الابراج دى و فاكره انى فاتح المدونه دى عشان ادلل على البرج بتاعى او اعاير الناس اللى مش جوزاء .... انا هتكلم على نفسى
من زمان و انا عارف انا عايز ايه و محدد هدفى ..... طبعا دى حاجه ناس كتير مش بتعرف تعلمها لأنى عارف ان المشكله الرئيسيه عند ناس كتير انهم مش قادرين يلاقو هدف لحياتهم و عايشين اللحظه او على رأى المثل زى ما ترسى دقلها
طيب هل معنى انى عارف انا عايز ايه و محدد هدفى ابقى كده معنديش مشاكل .... بالعكس انا عندى مشكله كبيره جدا و ممكن حتى ابقى اوحش من اللى مش عارف هدفه ايه بالظبط ...... مشكلتى ببساطه انى رغم انى عارف انا عايز ايه بس مش عارف اوصل للى انا عايزه
طول عمرى شخصيه ملوله لدرجه صعب ان اى حد يتخيلها غير اذا جرب الملل ده بنفسه .... انا من كتر الملل ساعات بزهق من نفسى ، بس لسوء الحظ دى الحاجه الوحيده اللى مش بعرف اغيرها او بعرف اسيبها .... يعنى لما بتخنق من صحابى بقفل موبايلى او لو سبته مفتوح مش برد عليهم .... لما بزهق من اهلى ببطل ازورهم او اكلمهم .... بس لما بزهق من نفسى و نتيجه لأنى معنديش الترف انى اسيب نفسى و فى نفس الوقت انا مش حمار عشان اموت نفسى و اخلص منها خالص فبدخل فى حاله من حالات الاكتئاب ..... المشكله انى لاحظت انه كل حاله اكتئاب بتبقى اشد من اللى قبلها
نرجع لكلامنا على انى مش عارف اوصل للى انا عايزه ازاى و علاقتها بنقطه الملل .... ناس كتير بتقول ان برج الجوزاء هوائى جدا و ملوش امان .... انا متفق معاهم فى اللى بيقوله .... بس الفكره انى ( و انا هنا بتكلم على نفسى مره تانيه عشان محدش يقولى ملكش دعوه بالناس و خليك فى نفسك ) نتيجه لأنى مش عارف انا عارف اوصل للى انا عايزه ازاى فبجرب كل شويه طريق ... بس انا مش غبى و لازم اكل البيضه لغايه اخرها عشان اعرف انها ممششه ( و ده تعبير عبقرى مسروق من العبقرى احمد خالد توفيق ) فلما بلاقى السكه اللى انا ماشيها مش هتوصلنى بغيرها و بدور على سكه غيرها
طبعا فيه ناس هتكلمنى على الصبر و الجلد و الكفاح و الكلام الجميل ده ... بس كل ما بسمع الكلام ده بفتكر حاجه اتعلمتها فى اول شركه اشتغلت فيها .... انا اشتغلت و انا فى الكليه فى شركه ادويه مندوب دعايه و تسويق .... المهم بعد كام شهر لما فهمت الشغل عامل ازاى كان ليا واحد زميلى بيبيع اكتر ما انا ببيع مع انه بيبذل يمكن نص المجهود اللى انا ببذله .... و مشكلتى انى مبقدرش ابلع ببساطه فكره ان حد اذكى منى او اشطر منى ....... ممكن تسموها حسد او حقد او اللى عايزينه ، بس الحقيقه انى عارف امتى اعترف ان اللى ادامى يستاهل اقول انه احسن منى و امتى اقول عليه كفتجى و صاحبى ده اللى يمسيه بالخير لو لسه عايش او يرحمه لو مات كان كفتجى كبير... المهم سألت المدير بتاعى على سر الواد ده و قلت مش عيب الواحد يتعلم العيب انه يفتكر انه عارف حاجه و يبطل يتعلم .... قالى انا هقولك كلمتين ... قلتله قول ... قالى Smarter & Harder
قالى فيه ناس بتشغل مخها و بتوصل للى هيا عيزاه بأقل مجهود و فيه ناس حمير شغل ، تحرت الارض و تاكل النجيله ... بس فى الاخر الناس اللى بتشغل مخها بتوصل اسرع من الناس اللى بتشتغل زى حمير الشغل ... قالى هو بيشغل مخه و انت بتشغل نفسك .... الحق يتقال ان الراجل طلع ذوق و مرضيش يقولى انت حمار شغل
انا من يومها اتعلمت الدرس ده و عمرى ما نسيته ..... عشان كده كل حاجه بحسبها بمخى الاول ... بلعب شطرنج مع الدنيا و اشوف اخر الدور ايه ، عشان لو كسبان اكمل و لو خسران يبقى اسيب الدور ده و ابتدى غيره
طبعا مشكله انى مش عارف اوصل للى انا عايزه دى مشكله كبيره ..... بس على اد كده تعتبر مشكله صغيره بالنسبه لمشكلتى الرئيسيه اللى انا بعانى منها .... مشكلتى الرئيسيه انى على اد ما انا عارف انا عايز ايه ، بس فيه حاجات اساسيه انا مش عارف انا عايز فيها ايه ... يعنى النهارده اقول انا عايز ده ..... انام و اصحى و اقول لا انا مش عايز ده و عايز ده .... شويه و اقول عايز الاتنين ..... شويه و اقول لا انا مش عايز حاجه خالص و ابتدى ادخل الدايره الجديده من الاكتئاب
طبعا انا شخصيا مش عارف انا عايز ايه من البوست ده بس بعتبره فضفضه مش اكتر .... اسيبكو بأه عشان انام يمكن اعرف انا عايز ايه من البوست ده و هبقى اقولكو المره الجايه .... سلام

ثرثره مسائيه

2010-03-01T15:04:00.000-08:00

اول حاجه يا جماعه عايز اعتذر لكل الناس اللى علقت على البوستات اللى فاتت و انا مردتش عليهم لسه ، بس بجد انا عايش حاله فظيعه من الزهق و ده مخلينى مش قادر اعمل اى حاجه ، بس الحمدلله ابتديت اطلع منها
تانى حاجه البوست ده عباره عن شويه فضضه ... يعنى تقدروا تقولوا انى قررت ليه تكتئب لوحدك لما ممكن تكئب الناس معاك ..... طبعا انا بكتب البوست ده و انا بسمع رباعيات الخيام و الست بتغنيها عشان اخرج شويه من حاله الكآبه
انا رحت معرض الكتاب السنه دى ... بصراحه مش فاكر انا ليا اد ايه مرحتش معرض الكتاب ، بس كان دايما السبب اللى بيمنعنى انى بحب الكتب جدا و دايما بحس انى لو معايا مليون جنيه برضه مش هيكفونى كتب .... عشان كده كنت امتنعت عن انى اروح معرض الكتاب عشان بقعد مفلس بعديه مده طويله جدا .... و اللى كنت بعمله انى بوزع الكتب على السنه كلها عشان محسش بتعب مادى بعد ما اشترى الكتب
طبعا ممكن ناس تضحك و تقول الكلام اللى بقوله ده مش منطقى بس يا جماعه انا واحد بشترى فى السنه تقريبا ما متوسطه 400 كتاب .... يعنى صباح الافلاس لو افترضنا ان كل كتاب ب20 جنيه بس
المهم عوده لموضوع المعرض انا كنت ناوى انزل اشترى كتاب مايكل و الصباغ و احضر حفلات التوقيع بتاعتهم و كفى الله المؤمنين شر القتال .... المهم انتيمى التدوينى و بره التدوين برضه زيكا قالى يا عم مش بتنزل ليه المعرض ، قلتله السبب ... قالى يا عم ده كان زمان ، السنه دى بالكتير هتشترى ب 300 جنيه كتب مش اكتر .... المهم انا فعلا نزلت المعرض و الحق طلع زيكا مش بيكدب ... المعرض السنه دى وحش جدا .... يعنى فعلا اخرك 500 جنيه للاصدارات الجديده .. طبعا المبلغ بيتضاعف لو انت هتكمل مجموعاتك الادبيه القديمه زى ما انا بعمل حاليا بمناسبه انه مفيش حاجات كتير حلوه
المهم انا فى المعرض ده قابلت الصباغ و كانت اول مره اقابله .... الحق يقال انه خالف الصوره اللى انا كنت راسمها و ده تأكيد لمثل تعرف فلان ، اه اعرفه ..... شخص ودود ، عشرى ، ابن بلد و دمه خفيف ..... طبعا انا مش بعمله اعلان ولا بنافقه لأنه مش بيدخل عندى اصلا المدونه
و برضه قابلت مايكل .... مايكل انا اعرفه لمده سنه عن طريق المدونه و كانت اول مره اقابله و طبعا مكانتش الاخيره ولا هتكون الاخيره ...... الجميل ان الاتنين منزلين كتب السنه دى فى المعرض .... طبعا مع اعتراض مايكل على اى حد يقوله انت كاتب ، بس بجد كتابه جامد جدا
و برضه قابلت سوووو ..... سوووو ده بأه مشكله .... عارف الانسان اللى سخريته ممروره من كتر ما شاف فى الدنيا .... دى كانت نظرتى الاوليه و عادل اكدها .... قالى ان سووو ممكن يكون بيتكلم فى موضوع جد جدا و بطريقه جاده أوى و انت مش قادر تمسك نفسك من كتر الضحك ...اكيد هيكون ليا مقابلات تانى معاه لأنه بجد انسان تخسر كتير لو معرفتوش
المهم و احنا فى المعرض بقول لزيكا انت كنت متصور صوره عار يا زيكا .... و نسيت ان اللى بيتريق على حاجه بتقعدله .... نتيجه لحضور حفلات التوقيع اتصورت مع الصباغ و زيكا ... و يا لهوى على الصور لما شفتها .... اليوم ده كان حر جدا .... و انا مش بحب اتصور بطبعى .... النتيجه ايه ..... صوره ليا و انا بلمع من العرق ... و شعرى بايظ برضه من الحر و عشان انا مش بسرحه ... افتكر اخر مره سرحته فيها كانت من حوالى 12 سنه كده .... و عشان انا مش بحب اتصور فتلاقينى مش بعرف اخد البووز الحلو ولا بضحك ولا اى نيله .... تخيل بأه الصوره .... واحد بليمع و شعره بايظ و مش بيضحك و شكله قرفان من نفسه و من الدنيا و من الناس اللى بيتصور معاها .... لا و فوق ده كله بكرش حلو كده طالع و واخد موقع حلو فى الصوره .... انا نفسى الصباغ يشيل الصور الوحشه دى و يخليه مع الناس اللذيذه ..... و صدق زيكا لما قالى بتتريق على صورتى و انت صورتك احداث ..... و انا من هذا البوست بقوله حقك عليا يا عم زيكا يا كبير
نتيجه لظروف بايخه بمر بيها اضطريت انى ادور فى الالبومات و الصور القديمه .... انا كنت من زمان لميت كل صورى و حرقتها و حرقت النيجاتيف بتاعها ايام ما كانت الصور ليها نيجاتيف مش ديجتال زى دلوقتى ، عشان انا بطلع وحش فى الصور ... المهم مع كده لقيت شويه صور ليا و ده اثبت مبدأ ان الصور لا تتلاشى و لا تتولد من عدم ..... المهم مع الصور دى و الصور بتاعت المعرض و الصور القليله اللى موجوده ليا من ايام الكليه ، قدرت اشوف التطور الطبيعى لعمرو
حاجه غريبه جدا ..... يعنى ايام الكليه لما كنت بتكلم على ان الواحد يبقى عنده 25 سنه كنت اقول يااااااه ... كانت حاجه بعيده أوى بالنسبه ليا انى اوصلها ... و لما اتخرجت من الكليه بعد عقد من الزمان كنت عديت ال25 دول اصلا ..... و حاليا انا على اعتاب ال30 و بحاول اتمسك فى العشرينات على اد ما اقدر ..... عندى احساس انى مسافه ما دخلت ال30 يبقى كده انا عديت مرحله نص العمر زى العناصر المشعه و جاهز للانفجار ( الله يخرب بيت الكيميا اللى لحست دماغنا ) .... و غصب عنى تداعت لراسى الاحلام اللى كنت بحلم انى احققها
الاحلام دى تبتدى تقسمها .... احلام مراهقه و دى مصيرها انك تضحك عليها و تقول انا كنت بفكر فى الحاجات دى ازاى و انا صغير ... و احلام مأجله انت لسه محققتهاش .... و احلام ملغيه لأنك دلوقتى اكبر و اعقل من ايام ما حلمتها و لقيت انه مستحيل انك تحققها ..... و تبتدى تعمل كشف حساب لنفسك و تشوف ايه من الاحلام اللى ممكن تحققها انت فعلا حققته و ايه اللى انت فشلت فى تحقيقه .... حاجه صعبه جدا و خصوصا لما تتكلم مع نفسك بجد مش تشتغل نفسك و تقول الظروف و الجوابات
حاليا انا فى دماغى 3 حاجات مش هقول 3 احلام ولا 3 مشاريع .... هديهم وصف 3 حاجات و بس ، بحاول اعملهم ..... بس المشكله انهم عايزين مجهود انا مكنتش فاكر انه هيبقى كتير كده بس طلع كتير جدا جدا جدا ....... بس ادينى بحاول و طبعا انا بستعين و هستعين بمساعده اصدقاء و حبايب و كل الناس بس ربنا يسهلها من عنده
طبعا مش هيفوتنى انى اشكر الناس اللى سألت عليا ... بس عذرى ان فى فتره احتجابى عملت حاجات كتير كنت مفتقدها .... رجعت اقرى تانى ... يعنى مثلا انا حاليا بقرى الف ليله و ليله الطبعه الاصليه اللى نازله تبع سلسله الذخائر اللى تبع هيئه قصور الثقافه و دى كنز والله يا جماعه ، بس يا ريت الاخوه و الاخوات المتشددين ميقروهاش .... برضه بقرا مدونات كتير مع انى بسيب تعليقات قليله جدا .... مدونات قديمه و مدونات جديده ..... و برضه بتفرج على افلام من كتر ما الافلام اللى بنزلها قربت تخلل على الهارد قلت احاول اى حاجه فيهم ... و بنام كتير زى ما اكون مش هنام تانى فى حياتى
احلى حاجه انى عملت فى البوست ده حاجه انا مكنتش بعملها قبل كده .... يا ترى مين اللى هيقولى انا عملت ايه و انا اديله الجايزه اللى يطلبها
كفايه ثرثره لغايه كده و اشوفكو المره الجايه ...... سلام

خبرات مصريه ... الاول

2010-02-05T16:20:00.000-08:00

كنت باتكلم مع صديقه على المسنجر ، فعادى باقولها ازيك عامله ايه ... قالتى متهمه ... ايه متهمه ازاى يا بنتى .. فقعدت تحكيلى و انا قعدت اضحك من غير اى تقدير لمشاعرها خالص بس بجد الموقف كان سوداوى لدرجه الكوميديا
قالتلى انها و هى بتجدد الرخصه راحت تجيب شهاده المخالفات لقت عليها 3000 جنيه مخالفات سير عكس الاتجاه ، تقريبا هى يا بتمشى بالعربيه بضهرها يا اما مقضياها عكس على طول ، الكلام ده على فكره قبل قانون المرور الجديد اللى فيه غرامه و حبس و الكلام ده .. طبعا كلنا عارفين مخالفات المرور بتيجى ازاى .... يعنى مثلا و انا بجدد الرخصه قالولى عليك مخالفه رادار فى السلوم مع انى عمرى مارحت السلوم اصلا عشان اخد مخالفه رادار هناك ، بس على رأى عادل امام انا دفعت الفاتورة عشان خفت يشيلوا العده ما ان معنديش اصلا تليفون ... المهم نرجع للبنت .. البنت لقت كده راحت اتظلمت و قالولها طيب متعيطيش و ادفعى 1500 جنيه قامت قالت لا و اتظلمت تانى قالولها خلاص ماتدفعيش حاجه و امشى .. بس رئيس النيابه ماعجبوش قام قدم استئناف و هنا بأت قضيه و لازم تروح المحكمه و فيها قاضى و نيابه و اوبااااااه ليله كبيره ..... المهم هى قضيتها كانت فى اول الرول بس هى راحت متأخرة شويه تقريبا فاكره عمو القاضى لما تيجى هيطلع قضيتها و يقولها يالا عشان تروحى ... فنتيجه للتأخير ده بأه لازم تستنى لاخر الرول ... المهم حاجب المحكمه ندا عليها الساعه 6 المغرب و هى ملطوعه هناك من الساعه 10 الصبح بس كله يهون عشان خاطر مصر .... هى وقفت قام الحاجب ( الحيوان على حد قولها ) قال العساكر خدوها على القفص انتوا هتسيبوها تتكلم من برة القفص ، زى مثلا ما يكون هياخدها على قفص الاعدام او ان القاضى هيعيط و يسيب المحكمه لو هى مدخلتش القفص ، مع انها محكمه مرور مش محكمه بجد و ده مش حاجب بجد .. بس ماعلينا و زى ماقلنا كله يهون عشان خاطر مصر ... القاضى طلع محترم ( هى اللى بتقول لانى ماشفتش حاجه ) و اداها براءه و خلاها ماتدفعش حاجه ( بس انا مش عارف اذا كانت هى دورت على رئيس النيابه عشان تطلعله لسانها و تقوله انا براءه و كده ولا لا ) .... المهم هى فرحت بس لسه البطاقه مع الحاجب عشان كانت مع القاضى عشان كانت قضيه بأه و كده ..... طيب انا عايزه البطاقه ، الحاجب ( الحيوان برضه و ده كلامها برضه ) مرضاش يديها البطاقه و غتت عليها و هى قامت مزعقه قام قالها انا ممكن اخدت احطك فى القفص لغايه ما اديكى البطاقه ( بس هو كان بينخع أوى و فاكر نفسه ضابط بروح امه ، و بروح امه دى من عندى مش من البنيه المرة دى ... دى من عندى انا ) المهم انا قلتلها انه كان عايز قرشين و هى مافتحتش مخها معاه قالتلى ما انا معرفش .. المهم اخوها جابلها البطاقه بعد ما ادى الحاجب العيديه و على طول الحاجب راح زى ( الجزمه و دى من عندها المره دى ) عشان يجيب البطاقه ..... و مشيت و خرجت
بس عرفت انها لازم تجيب صورة الحكم عشان تاخد المخالصه من المخالفات .... قامت رجعت تانى .. بس ما شاء الله عليها ناصحه ... قامت طلعت فلوس و رشت على طول و خدت صورة الحكم و مشيت فى 5 دقايق .... البنت كانت بتعيط و هى بتفتكر اللحظات السوده دى و انا كنت عمال اضحك ( منتهى عدم التقدير لمشاعر الناس ) بس بجد انا قلتلها انه ده عادى فى بلدنا و قلتلها انى دى خبرة لازم تاخدها مدام عايشه فى مصر و وعدتها انى احكيلها لما اتعملتلى قضيه مصنفات فنيه ( بس مش افلام سيكو سيكو عشان متفهموش غلط ) و خدت براءة مع انى مرحتش خالص المحكمه بس ابويا الله يرحمه جاب واسطه للقاضى اللى تفهم الموقف و نفحنى براءه ..... ولا المره التانيه اللى اتاخدت فيها فى قسم فى المندره فى اسكندريه بعد ما اتخانقت مع 3 شباب عاكسو بت كنت ماشى معاها ( و والله كانت اول مره اشوفها اصلا ) ... يومها انا اضربت ضرب ... بس فيه واحد منهم انا بهدلته ... اه والله .... بس دى حكايه تتحكى المره الجايه
يا ترى انتوا بأه ايه الخبرات اللى شايفين ان الواحد لازم يكتسبها عشان يعرف يعيش فى مصر
مستنى ردودكم ...... سلام

حقيقه

2010-01-29T22:49:00.001-08:00

تتغير الازمنه و تتبدل ..... و مايفضلكش غير الاسم .... و مايفضلكش غير الدم

عن ليلى اتحدث ... الاول

2010-01-09T16:51:00.000-08:00

قبل اى حاجه لازم ابارك لصاحبى مايكل على كتابه الجديد اللى هينزل خلاص ... مايكل للى ميعرفش هو العميد ... اكتر واحد عمل انترفيوهات فيكى يا مصر ... الكتاب بتاع مايكل اسمه وظيفه ما تمت .... لما ينزل الكتاب مستنى كل الناس تشتريه ... مبروك يا مايكل و عقبال الكتاب الجديد ... مدونه مايكل هنا
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
ليا زمان واخد اجازه و بصراحه نفسى مش جايبانى انى اكتب ... الحاجه الغريبه ان اللى هكتبه موجود فى دماغى ، بس معنديش اى طاقه انى اكتبه فى شكل كلمات بدل ما يفضل افكار
النهارده هتكلم على موضوع ليلى مع انى عارف ان الموضوع خلص من زمان و ناس كتير اتكلمت عليه ، بس معلش .. استحملونى شويه
اى حاجه الانسان بيبقى نفسه يعملها بيبقى اسمها هدف ... هدف الانسان نفسه يحققه .. بغض النظر عن الانسان نفسه او الهدف او قيمته او اى حاجه تانيه .... نيجى لنقطه مهمه ... الهدف ده بيبقى ليه دافع و بيبقى ليه حافز ... الدافع يعنى الحاجه اللى بتزقك انك تعمل الهدف ده .... الحافز بيبقى الشئ اللى منتظره من تحقيق الهدف نفسه .... اهم نقطه فى الموضوع كله ، ان الهدف اللى انا عايز اوصله يبقى عندى الامكانيات انى احققه ... والا كده هيبقى اسمه حلم مش هدف
سيبنا بأه من المقدمه النظريه دى و اللى كل اللى درس مبادئ علم اداره هيبقى عارفها و نيجى للموضوع نفسه .... انا لازم اعترف انى مش مطلع أوى على فكره حمله ليلى ، بس عموما فاهم الفكره الاساسيه بتدور حوالين ايه .... هنا لازم اسأل سؤال مهم من واقع المقدمه اللى انا قلتها ، لأنها على اد ما هيا كلام نظرى بس موجوده بشكل عملى فى اى حاجه فى الدنيا .... الهدف اللى المشاركين فى الحمله عايزين يوصلوله هو تغيير نظره المجتمع ككل للأنثى و احترامها و التعامل معاها بنوع من انواع المساوة ... و مره تانيه بعترف انى مش متأكد من اهداف الحمله بس فى الغالب هتطلع من الاهداف اللى انا قلتها ، لأن كل المنظمات ، او الحملات للى مش بيحب تسميه كلمه المنظمات بيكون هو ده هدفها ..... السؤال هو ، ايه الدافع الموجود لدى المشاركين ، و ايه الحافز او ايه اللى مستنينه لما الحمله تنجح و تحقق هدفها
انا شخصيا معرفش دوافع المشاركين ، بس ربنا عرفوه بالعقل و محدش شافه ... اكيد الدافع هو نوع من انواع القهر اللى واقع على المرأه فى مجتمعنا .... بغض النظر عن ان المشاركين فى الحمله تعرضوا للقهر ده ولا شافوه ... لأنه مثلا احنا كشعب مش هنبقى مش عاجبنا الحكومه الا لو شفنا بلاوى من الحكومه دى ، سيبكو من كميه القهر اللى بنتعرضه بشكل منظم و مدروس .. يعنى انا لو مش حاسس انى عايش فى مجتمع ديكتاتورى مكنتش هقول انا نفسى فى ديموقراطيه ... لو مش شايف حريتى الشخصيه بيتم الاعتداء عليها ، مكنتش هقول انا مع الحريه الشخصيه حتى لو كانت هتبقى غلط فى التطبيق .... لان الغلط فى تطبيق الحريه احسن من عدم تطبيقها خالص و اننا نعيش فى قهر و ناس تانيه تحدد لينا طريقنا و هنعمل ايه
ننقل على نقطه تانيه ..... المفروض فى اى هدف ان يكون ليه نظره مستقبليه ، مش يكون مجرد هدف لمرحله وقتيه ، اللهم الا لو انك بتتكلم على الاهداف قصيره المدى ... بس اظن هدف زى نظره المجتمع للمرأه ده لازم يبقى هدف ليه نظره و نظره بعيده كمان .... يعنى مينفعش احط الهدف ده و ابص تحت رجليا بس ..... و هجيب من الاخر عشان اريح الناس و اريح نفسى معاهم ... فى فكره نظره المجتمع للمرأه مش عيب اننا نبص للمجتمعات الاوربيه لأنها متطوره عننا ... و محدش يقولى اننا مجتمع شرقى و الكلام ده .... لأن مبدأ الحريه مش بيتجزأ على حسب المكان .... انا موافق اننا ندى المرأه حقوقها لأن ده الصح ... و موافق ان البنت تمشى متطمنه فى الشارع لأن ده حقها علينا ... مينفعش زى ما صديقى العزيز مايكل قال ان المجتمع يبقى عايز يحتك بيا لمجرد انى احمل جسد انثى .... بس طريق الحريه دى مينفعش نمشى خطوه فيه و بعدين نقف ... لازم نمشيه للأخر .... يعنى لو مشيناه للأخر مينفعش نرجع نقول عادات و تقاليد لأن اساس الفكره اننا نغير العادات و التقاليد دى
انا افتكر انى مره حضرت ندوه كانت واحده من منظمات حقوق المرأه هيا اللى عملاها ، و الكلام كان على ان الراجل كائن همجى و انه بيتحرش بالانثى دايما و ان الانثى من حقها انها تلبس اللى عايزه و تمشى فى الشارع فى امان .... المهم انى قمت و قلت تعليق بسيط بس هما زعلو منى و مش عارف زعلو ليه لغايه دلوقتى .... اولا يا جماعه للناس اللى مخدتش احياء فى ثانوى او فكرتهم عن علم الاحياء بسيطه ... فيه حاجه اسمها هورمونات ، الهورمونات دى بتتفرز بطريقه لا اراديه ... يعنى انا لو شفت واحده ماشيه عريانه فى الشارع او بلاش عريانه و نقول لابسه لبس مثير ليا ( و طبعا مفهوم الاثاره بيختلف من شخص للتانى و من ثقافه للتانيه ) ... وضع طبيعى انه يتفرز عندى هورمونات تحفزنى جنسيا .... الفكره هنا هو انا هتعامل ازاى مع الهورمونات دى ... يعنى مثلا هبص فى الارض و امشى بعيد عن الواحده دى ... ولا هقولها كلمه معاكسه او حتى تحرش لفظى ... ولا هيتطور الموضوع معايا للتحرش الجسدى .... طبعا الموضوع ده بيفرق من شخص للتانى و بيعتمد على العوامل اللى فوق .... لغايه هنا و الناس كان معندهاش اعتراض و كلام زى الفل ... جيت قلت النص التانى ... قلت انه من حق البنات و الستات يلبسو اللى هما عايزنه و يمشو فى الشارع ... بس سألت سؤال .. قلت انه كان من مده فيه فيديو نزل عن الموضوع ده تحديدا و كان فى شكل اعلان ساخر ... شويه شباب اخترعو بنطلونات تبقى المناطق الحساسه للرجاله فيها باينه ، يعنى البنطلون مقطوع من عند المناطق دى ... يا ترى قياسا على حق البنت انها تلبس اللى هيا عايزاه و تمشى فى الشارع ، انا من حقى انى البس البنطلون ده و امشى بيه برضه فى الشارع ... و هنا كانت الثوره ... قالو لا اللى انت بتتكلم فيه ده عوره انما احنا بنتكلم على لبس ميبينش عورات ... قلتلهم لو هنتكلم بالدين يبقى جسد المرأه كله عوره .. بالنسبه للى مش عايزين نتكلم بالدين و عايزين الموضوع يبقى علمانى يبقى فيه اعتراضين ... الاول اننا اتفقنا ان مبدأ الحريه مينفعش يتجزأ ... التانى لو انهم بيقولو انهم مش بيتكلمو على عورات يبقى كده تفكيرهم هما اللى جنسى مش انا ... لانهم هما اللى قالو على موضوع العورات ده مش انا ... و اقتبس هنا من دكتور احمد خالد توفيق انه مينفعش تيجى تكلمنى على الاحترام و انى لازم مابصش عليها و انتى لابسه بادى مبين نص صدرك و بنطلون لو مش متبقع مكنتش هاخد بالى منه ، يعنى اللى مارستيه عليها ده نوع من انواع التحرش البصرى ...... و لو جيتى قلتيلى اللبس حريه شخصيه يبقى انتى كده رديتى على النقطه بتاعت انه حريتى الشخصيه انى البس اللى انا عايزه
نكمل الطريق شويه .... بعد مرحله الحريه هتيجى نقطه المساواه ... انا موافق تماما على المساواه دى ... بس تلاقى فيه نقطه لازم تطلع و فعلا فيه ناس اتكلمت فيها على استحياء ... مدام قلنا مساواه يبقى فى توزيع المواريث لازم ندى للراجل زى الست ... يعنى نبتدى نفصل فى الدين على مزاجنا و بما يناسب اهوائنا ... و على فكره فيه فعلا جمعيات و منظمات نسائيه قالت على النقطه دى
نيجى لنقطه المساواه برضه انه يتم منع ان الراجل يتجوز اكتر من ست لان الست متقدرش تتجوز اكتر من راجل ... و يستمر مسلسل تفصيل الدين .... و فى النقطه دى انا عايز بس اوضح حاجه ... فيه اعتقاد منتشر عند الستات ان الراجل يحق ليه ان يتجوز على مراته لو مراته فيها عيب ... المفهوم ده مغلوط ... لأنه لو صح يبقى انا لو اتجوزت على مراتى و هيا مفيهاش عيب يبقى انا كده زنيت و عملت ذنب و ده مش صح ... و هدى مثال عشان محدش يقول انى بقول كده عشان انا راجل ... كلنا طبعا عارفين سيدنا على ابن ابى طالب و مش هتكلم عنه لأنه اكبر من انى اتكلم عنه و مفيش كلام يوفيه حقه .... سيدنا على كان متجوز السيده فاطمه بنت الرسول ... الرسول كان حماه ... كان مخلف الحسن و الحسين سيدا شباب اهل الجنه ... يعنى بمنطق الستات اللى منتشر اليومين دول معندوش حجه ... مراته من نساء العالمين و واحده من اربع نساء كاملات ... نسبه هو الرسول نفسه ... مخلف ولدين يعنى معندوش مشكله ان مراته مابتخلفش ... و مع كده اتجوز على السيده فاطمه .... يبقى لو كلامهم صح مكنش سيدنا على عمل كده .... و على فكره المعلومه دى موجوده فى كتب التاريخ و السير و سهل ان الواحد يتأكد منها
نيجى لنقطه ان الست بتقول من حقها تتطلق لو جوزها اتجوز عليها .... و ده صحيح من حقها تطلب الطلاق للضرر النفسى اللى وقع عليها .... بس مع القرار ده فيه عواقب الستات مش بتقبلها .... شرعا و قانونا ( و انا قلت شرعا الاول ) فى الحاله دى الست ميحقلهاش انها تطلب اى حاجه من زوجها ... لا نفقه و لا مؤخر صداق و لا اى حاجه .... لأنها طالبه الطلاق مع عدم وجود عله فى الزوج ... و ده برضه موجود فى الشرع و اللى مش مصدق يتعب نفسه شويه و يتأكد
اللى حاصل فى نقطه الجواز دى انه فى بلد عربيه مسلمه اسمها تونس جرمت الجواز التانى ... مع العلم ان ده غير جائز شرعا ... على فكره انا بقول اللى هيحصل لما نكمل مشى فى طريق المساواه
اهم من ده كله انه فيه نقطه مهمه جدا .... الانثى و نظره المجتمع ليها دى حلقه من حلقات المجتمع مش حاله منفصله ... يعنى مينفعش اصلح نظره المجتمع للأنثى و طريقه معاملته ليها من غير ما اصلح المجتمع نفسه ... و على فكره دى مش فلسفه ولا انى بقول اصلح الكون ، بس دى حقيقه
البوست الجاى هكمل كلام و هناقش ردودكو عليا .... سلام

التأميم ..... التالت

2009-12-27T20:01:00.000-08:00

ده تالت بوست من التلاته اللى انا كنت قايلكم عليهم ... البوست ده كان ليه اسم قديم هو ارقام و احصائيات ... بس كنت بتكلم و جت سيره البوست و لقيت اللى بتكلم معاه انت هتأمم البلوج ولا ايه ، بصراحه عجبنى الاسم و غيرته .... مدونتى و انا حر فيها و اغير فيها اللى انا عايزه و اللى انا عايزه مش هغيره
..................
واحد جامعه .. كانت اول مدونه ليا
ابتديت يوم 2 / 12 / 2008
عليها 21 بوست
مجموع التعليقات عليها 124
اول تعليق كان البت anonymous
اخر تعليق كان Hager Za3bal
اكتر بوست كان عليه تعليقات كان ابو الفوراس
...................
خمسه جد ... تانى مدونه ليا
ابتدت يوم 27 / 12 / 2008
عليها 89 بوست
مجموع التعليقات عليها 714
اول تعليق كان Desert cat
اخر تعليق كان سمكه واحده
اكتر بوست عليه تعليقات هو اوعى البوست يفرقع فى وشك
......................
روايتى .... تالت مدونه ليا
ابتدت يوم 27 / 12 / 2008 ... اصل كان عندى غزاره فى الانتاج فى الفتره دى عشان كده ابتديت مدونتين فى يوم واحد
عليها 8 بوستات
مجموع التعليقات عليها 28 تعليق
اول تعليق كان norahaty
اخر تعليق كان أحلام حقيقية
اكتر بوست عليه تعليقات هو الفصل الخامس
.........................
على جناح التبريزى ... رابع مدونه ليا
ابتدت يوم 12 / 1 / 2009
عليها بوست واحد يتيم سايبه بيعيط عشان قاعد فى الضلمه لوحده فى المدونه
تعليقات البوست ده 10 تعليقات
اول تعليق كان حرووف
اخر تعليق كان Desert cat
.....
حاجه اخيره .... بالنسبه للروايه انا بطلت اكتبها عشان بعيد كتابتها بأسلوب تانى عشان الاسلوب الاولانى مش عاجبنى .... و بالنسبه لمدونه على جناح التبريزى انا كاتب عليها بوست واحد لانه حاجه صعبه انى اكتب عليها كتير .... بقرا مراجع كتير ... و بعرف كل وجهات النظر حوالين الموضوع ، و بحاول على اد ما اقدر اكون حيادى فى عرض المحتوى
........................
كده انا خلصت التلات بوستات .... اجازه صغيره و راجع تانى ..... سلام

حيطه نص طوبه و شويه طوب

2009-12-23T04:15:00.000-08:00

انا عارف انى قايل انى مش هكتب غير 3 بوستات و بالفعل كتبت منهم 2 بس البوست ده مش التالت بتاعهم .... شكله بجد يموت الزمار و صباعه لامؤاخذه بيلعب ..... البوست ده شويه شخابيط على حيطه نص طوبه انا لسه ببنيها فى عقلى
اول طوبه .....امبارح بليل على الساعه 4 كنت جعان جدا ... مشكلتى مع الوقت ده انى لما بجوع فى الوقت ده كل محلات الدليفرى بتكون عملت اللاست اوردر خلاص و مش فاضل غير ماك و كنتاكى و الاتنين اوحش من بعض ... المهم نزلت قلت اشترى اى حاجه اجيبها ... و فعلا واقف قدام مطعم كبده و مخ لقيت عربيه فيها 4 ستات ، 3 منهم فى سن الانحراف بتاع من 20 لغايه 30 كده ، و الرابعه بتلعب فى الخمسين .... عادى جدا ... اللى انا استغربته انى لقيت بت صغيره معاهم عندها يمكن 13 سنه ... هو الانحراف للاشبال بأه من سن كام
المهم قلت سيبنى منهم و دع الخلق للخالق ... شويه و عدى تاكسى فيه 2 بنات تانى برضه فى العشرينات ... و شويه تاكسى كمان فيه 2 بنات تانى برضه فى نفس السن .... شكله شارع الهرم بركه بجد ( واخد بالك ياللى فى بالى .... ههههههه ) .... يعنى انا فى نص ساعه شفت 7
تانى طوبه .... كان نفسى اروح مع عادل امبارح السينما بس قاتل الله الظروف ... بس تتعوض ان شاء الله
تالت طوبه .... انا ليا 3 مرات انزل وسط البلد و معملش حمام فى طلعت حرب ... ايه الحكايه ... انا اتحسدت ولا ايه
رابع طوبه .... برضه على وسط البلد .... قهاوى وسط البلد دى غريبه ... تلاقى عليها حاجات عجب .... يعنى مثلا تلاقى واحد ماشى بمعزه و كلب و قرد و عاملك حاوى ... تلاقى اللى بيلعبوا بالنار ... تلاقى اللى يقولك موسى نبى و عيسى نبى و محمد نبى و كل من له نبى يصلى عليه ، انا عايز 5 يكتفونى ... المهم كنت قاعد مع نادر و صديقنا عبد الفتاح من ايام الكليه على التكعيبه ... انا و عبد الفتاح بنلعب 31 و نادر قاعد بيتفرج و بينعس عشان ملوش فيها ... المهم واحده من اللى بيلعبوا بالنار عدت على التكعيبه و قعدت تلعب .... كان نادر قاعد بضهره و فجأه الوليه حوشت سبرتو كتير فى بؤها و بخته عملت حريقه مش لعبه و هييييه و ادونى قرشين عشان اغور من وشكم ... المهم نادر قام و كان هيجرى عشان افتكر القهوه بتولع .... مش عايز اقول على كميه الضحك ... بس بجد ابقى فكرونى احكيلكو المواقف البايخه اللى انا حطيت نفسى فيها و الناس ضحكت عليا ... صباح الجوافه يا نادر و اوعى تزعل منى يا صاحبى
خامس طوبه ..... اكتر حاجه صعبه ممكن اى حد يعملها انه يعمل نفسه منظر و مصلح اجتماعى طول الوقت ... يعنى انا مش بعرف اعمل كده عشان انا فاشل فى العلاقات الانسانيه .... بس بكون مستغرب من الناس اللى عاجبها الدور و متفصل ليها و تلبسه و تنام بيه و تقوم على رأى عمنا نجيب سرور
سادس طوبه ..... اجيب 30 قناه جديده و ملاقيش حاجه اتفرج عليها ... طيب ازاى يا كفره
سابع طوبه .... تفضل جينفر انيستون حبى الاجنبى الاول .... و بسمه ..... ولا بلاش ... بسمه اعجابى المصرى الاول
تامن طوبه .... يا ترى فيه كام شاب مصر بيتفرج على راجل و ست ستات عشان يتفرج على لقاء ... الله يسامحك يا عبد المنصف
البوست خلص بس الطوب لسه مخلصش ..... سلام

البدايه ... التانى

2009-12-12T00:09:00.000-08:00

البدايه كانت من سنه تقريبا .... كنت بتكلم فى الموبايل مع صديقه من اكتر الناس القريبه ليا برغم ان اللى يعرفنا كويس يقول اننا مينفعش يبقى اصدقاء لاسباب كتير بس فى النهايه الموضوع بيختلف من شخص للتانى .... المهم الصديقه دى قالتلى تسمع عن البلوجز .. قلتلها اه ، اشمعنى ... قالتلى طيب انا هبعتلك عنوان بلوج و خش اقراه كده و قولى رأيك فيه ... قلتلها ماشى و خدت منها البلوج و دخلت قريته ... انا كنت قبل كده بأكتر من 3 سنين بقرا بلوجز ، بس كانت كلها بلوجز انجليزى لأصدقاء أجانب انما عمرى ما قريت بلوج عربى ... دخلت و قريت و عجبنى الجو مع انى كنت عارفه قبل كده .... و بعد كده قلتلها انا قريت البلوج و علقت عليه كمان ، قالتلى طيب ما تعمل بلوج و تكتب فيه و اديك بتتسلى و جرب و مش هتخسر حاجه و الكلام ده .. قلتلها ان شاء الله والموضوع خلص لغايه كده .... طبعا عرفت بعد كده بزمن ان البلوج ده كان بتاعها .....الغريب انها هيا نفسها بطلت تكتب على المدونه بتاعتها ... يعنى هى اللى شجعتنى و خلتنى احط الفكره فى دماغى فى الوقت اللى هيا شالتها فيها من دماغها مع انه ده كان المفروض اللى انا اعمله لأنى جوزاء و كل الجوزاء عندهم ميل غريب انهم يبتدوا مشاريع و يزهقوا منها و يسيبوها فى النص ... يمكن دى اكتر حاجه مخوفانى من الجواز ... بس انا بقول ان الجواز ده مشروع العمر مش مجرد مشروع ينفع اخلع منه فى النص .... ما علينا
بعد كده قعدت أخد و أدى مع نفسى ... انا اللى يعرفنى يعرف انى كنت بكتب قصص من ايام ما كنت فى ابتدائى ... قصص عبيطه صحيح بس كانت محاوله منى ان المعلومات اللى عمال احشيها فى دماغى احاول استفيد بيها بشكل او بآخر .... و كنت و انا فى خمسه ابتدائى عامل كشكول بكتب فيه ... الحقيقه انه جمهورى اللى كان بيقرا كان يتعد على صوابع الايد الواحده ... ابويا و امى و عمو ثروت و مراته طنط عزة ( حاسس احساس بايخ و انا شحط و كبير كده و لسه بقول عمو و طنط ... بس هقول ايه عليهم ... الحاج و الحاجه مثلا ) و دى ناس كانوا صحاب ابويا و امى .... و كان دايما عمو ثروت لغايه ما كبرت يقولى مفيش حاجه كتبتها جديده و انا اعمل فيها انى كبرت و بطلت لعب العيال ده
السبب اللى خلانى ابطل كتابه كان حاجه غريبه ... جوز خالتى و انا فى اعدادى او فى بدايات
ثانوى تقريبا كتب 3 قصص و طبعهم و ادانى نسخه هديه من التلات قصص ... مش عايز اقولكم ... اكتشفت انى كنت عبقرى فى اللى انا كنت بكتبه و انا عندى 10 سنين ... اللى انا قريته كان حاجه مش قادر اوصفها ... حاجه هم و سواد و تشيب الكتكوت اللى ريشه منتوف ... و من ساعه لما قريت القصص السوده دى قررت انى ابطل اكتب عشان ميجيش يوم و الناس تتريق على اللى بكتبه ( سيبكوا انه اصلا الناس كده بتتريق و انا نفسى بتريق على اللى بكتبه ، بس اهى بتعدى و الكلام مش بيلزق ) ... تسميه جبن .. ماشى .. عدم ثقه فى النفس .. برضه ماشى .. استسهال و هروب .. ميضرش
المهم بعد ما كنت قريت البلوج بتاع الصديقه اللى انا كنت قلت عليها بكام يوم كان نادر صاحبى عندى هو و امير و بلال مكنش جه .. بفتح معاهم الموضوع لقيت الواد نادر عمال يشجع فيا أوى انى اعمل مدونه ، لدرجه انى حسيت ان الواد ده هيتربح من المدونه بتاعتى بشكل ما او انه هيقعد يتريق عليا بعد كده مع اصحابه على اللى انا كتبته ... انا ساعتها ريحت نفسى و نفضت للموضوع .. بس انتوا عارفين الدوده .. مش بتسيب حد فى حاله .. قعدت تنخور فى لامؤاخذه دماغى ( دماغى ياللى نيتك وحشه مش حاجه تانيه ) و تنخور لغايه ما عملت المدونه و ابتديت اكتب فيها و ليا سنه مصدعكوا معايا و جايب وجع القلب لنفسى ... و هنا تكرر نفس الموقف بس بصوره اخرى ... الواد نادر قعدت اقنع انا فيه انه يعمل مدونه و يكتب .... و فعلا عمل المدونه و ابتدى كتابه و كتب تلات بوستات يتامى قاعدين جوه المدونه بيعطوا عشان لوحديهم .... بس انا عرفت منه انه بيكتب بس فى الخباثه بس هو قال ان اللى بيكتبه محاولات خاصه بيه عشان محدش يتريق عليه ، و الكلام ده كان اتقال لما كنا اتكلمنا على مدونه بتكتب بأسلوب ركيك جدا ... فكرنى بأسلوب جوز خالتى .... و هو قعد يدافع عنها ، و يقولى انا مقدرش اصدم حد هاوى و مش محترف كتابه ... قال يعن احنا اللى محترفين كتابه ... و اسلوبها مش وحش أوى ... شوف الكذاب ... المهم انه هو نفسه مش مقتنع باللى بيقوله .... طبعا لأنه من كتر ما قرا بأه يعرف يفرق بين الغث و السمين ( حلوه الغث و السمين دى يا زيكا ) ... ما علينا .... طبعا نادر قعد قرا البوست اللى فات و انا قلتله انى مكتبتش اسمه فيه عشان انا كتبت على الناس اللى معرفهاش معرفه شخصيه و اتعرفت بيهم عن طريق المدونه و قلتله انه هيجى اسمه فى بوست لوحده عشان هو حبيبى من ايام الجيزه و انا كده عملت الصح و زياده شويه .... عد الجمايل بأه يا نادر
على فكره ... انا المدونات دى اكتر حاجه فى حياتى واظبت على انى اعملها ... انا عمرى ما أفتكر انه فيه اى حاجه قعدت اعمل فيها لمده سنه متواصله حتى لو كان فيه غيابات فى النص ... تقريبا عشان موضوع الجوزاء و اننا بنحس بالملل بسرعه و بنزهق بسرعه ... بس لازم اعترف ان الوقت عدى بسرعه و انا محستش بيه عشان الصحبه الحلوه و الناس الجدعان و اللى يحبنا ميضربش نار عشان العروسه حامل
و على فكره برضه ... ده تانى بوست من التلاته اللى انا قلت عليهم انى هكتبهم .. ليكوا فى ذمتى بوست كمان و ابقى كده خلصت ضميرى .... سلام

مدونات .... الاول .... محدث

2009-12-03T01:25:00.000-08:00

تحديث ..... نزولا على رغبه الجماهير حطينا اللينكات للمدونات و كل عام و انتم بخير
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
انا عارف انى كنت كتبت و اتريقت على الناس اللى لما تدخل عندهم تحس انك بتقرا صفحه الاجتماعيات فى الجرنان ... بس الحقيقه انه مينفعش بعد سنه مكتبش عن الناس اللى انا بجد حبيتها و اتعلقت بيها من مجرد شويه حروف على سكرين مش اكتر ، مع انى مشفتش اى حد فيهم شخصيا ... يمكن فيه ناس اتكلمت معاهم على المسنجر او الفيس بوك .. بس الاغلبيه كانت كل علاقتنا البوستات اللى بنقراها لبعض .... فمعلش لو حسيت انك بتقرا صفحه الاجتماعيات فى الجرنان عندى المره دى ابقى عديها و التمس ليا العذر انها اول مره بعملها ... بس لازم عشان دى كلمه حق و لازم اقولها لأنى مش عارف اذا كنت هكتب تانى ولا لا مع انها يمكن متفرقش مع اللى هقولها فى حقهم كتير ... انا هكتب من غير ترتيب و من الذاكره ... فمعلش لو سقط اى حد سهوا يبقى يسامحنى و انا هحاول افتكر على اد ما اقدر ... بس الحقيقه انه ناس قليله بس اللى انا قريتلها و محستش انى استفدت منها حاجه ، انما الاغلبيه استفدت منهم كتير ... و كفايه الوقت الحلو اللى كنت بقضيه فى قرايه بوستاتهم
نبتدى بأحسن ناس بتكتب قصص قصيره انا قريتلهم ... سوبيا صاحبه مدونه على ماتفرج و بعد كده غيرت اسمها لجبل انحسر عنه الماء و اخر اسم هو مساحه خضراء للركض ... اسلوب سلس و جميل و بينساب جواك و انت بتقراه من غير ما تحس و لما القصه تخلص تزعل ان القصه قصيره
و تانى واحده و انا هنا مش قصدى ترتيب اولويه انما ترتيب قرايتى ليهم لانى قريت لسوبيا الاول ... فرويده صاحبه مدونه حكاوى الست فرويد .... اسلوب مختلف فى القصص القصيره .... عندها جرأه فى التعبير ، بس مش الجرأه اللى تنفرك منها انما اللى خليك تعرف انها بتكتب اللى بتحس بيه ... فى بعض كتابتها ممكن تمسك اسلوب نجيب محفوظ و ساعات يوسف ادريس ... مش عن قصد منها .. و انا معرفش اذا كانت قرت ليهم ولا لا ، بس رأيى الشخصى انك لو عايز تكتب يبقى لازم تكون قريت للاتنين دول بالذات و بعد كده القائمه تطول من الناس اللى المفروض تكون قريتلهم
كمان فيه مدونه من بلد عربى بس انا بجد اسف مش قادر افتكر اسمها ولا اسم مدونتها بس لما افتكره اكيد هعمل تحديث للبوست
نيجى بعد كده للناس الصادقه أوى فى بوستاتها ... بتكتب من غير ما تعمل اى حسابات او توازنات ، انما بتكتب اللى هى بتحسه و بكل صدق و من غير تزويق للكلام .. ساعات ممكن الفاظ تصدمك ( طبعا تصدمك انت لو كنت من الناس اللى بتبقى قافشه شويه ) انما انا بحب اللى يتكلم على سجيته لانه احساس الصدق عنده بيكون عالى .... منهم زيكا اللى يشرفنى انى بعتبره صاحبى و صاحب مدونه المخرج .... شخص بيكتب اللى بيحس بيه على طول ... و ساعات بينتقد نفسه و بيقول كلام يمكن ناس غيره متقدرش تقول الكلام ده عن نفسها ... بس هو صادق مع نفسه اولا و مع اللى بيقروله ثانيا
برضه فيه آبى صاحبه مدونه كوكب آبى .... مدونه تصادميه لاقصى درجه .... دايما الناس بتختلف معاها فى صفحه التعليقات و تحس و انت بتقرا التعليقات ان الناس داخله فى حرب ... مش بس معاها ... انما حتى اللى بيعلقوا بيقعوا ساعات فى بعض و بيقعدوا يتخانقوا فى صفحه تعليقاتها ... سيبتلها تعليق قبل كده انى معرفش ازاى هى بتستفز الملكات الجداليه عند كل الناس دى فى نفس الوقت و هى ردت عليا انى مشفتش كميه التعليقات اللى هى مش بتنشرها ... ههههه
و طبعا مش ممكن انسى بطوطه صاحبه مدونه بطابيط .... واحده من المدونات القلائل اللى بيكتبوا بالانجليزى و هما فاهمين هما بيكتبوا ايه مش نظام هات القاموس و ترجملى يا عبده .... صادقه جدا و انا شايف انه بسبب موضوع انها بتكتب بالانجليزى هو السبب انها ملهاش ناس كتير بتقرا لانها تستاهل ناس اكتر من اللى بيعلقوا عندها ... انما العبره اولا و اخيرا بالكيف مش بالكم
و اخيرا و ليس بأخر مدونه ليها معزه خاصه عندى ... مع انى معرفهاش شخصيا و هى معلقتش عندى ولا مره و انا علقت عندها مرتين او تلاته بالكتير .... مدونه حساسه جدا ... و بتكتب بصدق جدا ... و اللى عاملها المشكله هو صدقها ده لانه فيه ناس بتلوم عليها انها تكتب بكميه الصدق دى ... و السبب من وجهة نظرهم انها كأنثى لازم تكتب بأسلوب لايق عن كده ... و الحقيقه ان الكلام ده بيكون طالع من بنات و سيدات قبل ما يكون طالع من الرجاله و ده يؤكد ان مجتمعنا لسه ذكورى فى تفكيره حتى لو كلنا قعدنا ننفى فى النقطه دى .... المدونه اللى انا بتكلم عليها هى خيخه صاحبه مدونه بت خيخه و اى كلام ... اسمها اللى انا متأكد انها بتحبه جدا هو مامت شريف
نيجى للناس الحلوه اللى بتكتب كلام فى الجون و بحب اقرالها ... اولهم و مش هقدر انساها العمه ستيته .... بختلف كتير انا و هى فى طريقه رؤيتنا للامور .... بس اختلاف من النوع اللى الشخصين بيكونوا فيه على نفس الخط بس مديين ضهرهم لبعض و ده مايمنعش انه لو كل واحد فيهم لف حوالين نص الكره الارضيه هيتقابلوا ( و التعبير ده مقتبس من احمد خالد توفيق على ما أذكر ) .... العمه ستيته اثبتتلى انه كل خريجين علوم بيفكروا بطريقه واحده ، و يمكن ده اللى خلى واحد صاحبى قالى انه عايز يتجوز واحده خريجه علوم عشان يبقى تفكيرهم واحد ، لاننا اتربينا فى الكليه على نفس طريقه التفكير ... بس شتان ما بين العمه ستيته و بينى .... هى أستاذ دكتور فى الكليه و انا واحد من افشل الطلبه فى تاريخ الكليه ... مدونه العمه ستيته هى مش عارفه .. بس نفسى اعرف
طبعا مينفعش انسى المدونه الصغيره فى السن صحيح بس الحق انه موهبتها فى الكتابه تطورت على نحو مريب على رأى صديقى زيكا .... سارة نجاتى صاحبه مدونه بنى آدميين .... بجد بجد بجد ليا زمن مقرتش حد بيكتب بالتمكن ده من غير ما يكون محترف فعلا .... لا كبير ولا صغير ... و بقولها بالمناسبه دى way to go
برضه مش ممكن انسى المدونه المتميزه صبرنى يا رب صاحبه مدونات رغى امراه غير مطحونه و المدونه اللى انا بحبها جدا رؤيه اسلاميه متواضعه اللى بجد فيها معلومات قيمه و مش معروفه لناس كتير
و كمان المدونه الطبيبه نورهاتى صاحبه مدونه صعبان عليا حالنا .... بجد واحده من الناس اللى بكون مبسوط لما بتسيب تعليق عندى ... بس هى مش بتدينى الشعور بالانبساط ده كتير بس معلش .... المسامح كريم
نيجى للناس اللى انا بكلمهم بأه و اصحابى و ناس عشره بلوجز قديمه .... عندنا اول واحد صديقى عادل صاحب مدونات البلد دى فيها حكومه و المدونه التانيه بحب السيما واحد من اكتر الناس الذوق اللى قابلتها و برضه من اكتر الناس اللى بتفهم فى السينما
و كمان فيه شوشو صاحبه مدونه البت المشمشيه و انا من هذا المنبر بقولها معلش يا شوشو على انى مش بسأل كتير ... بس انتى اختى الكبيره بأه و من حقى ادلع عليكى
و فيه كمان موكا ... مايكل صاحب مدونه مايكلتو و صاحب اكبر رقم قياسى فى الانترفيوهات عرفته مصر و السودان
و وسع وسع وسع للكابتن الكبير ... كابتن سيمو ... أسماء عونى على سن و رمح .... اللى مشرفانا و رافعه راسنا بره القطر المصرى و جواه برضه ... صاحبه مدونه مكعب سكر و هى فعلا مكعب سكر
و من خارج الجمهوريه كلها فيه من الاردن الشقيق المدونه مياسى .... مدونه جميله بجد و دايما اسلوبها فيه سخريه مغلفه بالادب و الاحترام ... مياسى مدونتها هى مياسى ( يا سبحان الله ) ... كل سنه و انتى طيبه يا ميسو
و أخيرا و ليس باخر ( عارف انها متعاده و مكتوبه فوق بس معنديش غيرها ) ... الدكتوره الكبيره جدا الدوك المتميزه ... عاشقه و غلبانه صاحبه مدونه عاشقه و غلبانه ( برضه زى مياسى .... يا سبحان الله ) .... انتى فين يا دوك
و طبعا اخر حاجه قائمه الاصدقاء الجدد اللى انا سعيد انى ضمتهم للريدر عندى و بكون سعيد بتعليقاتهم لما بشوفها .... سمكه صاحبه مدونه تررم و سمعنى اجدع سلام لمدونى اسكندريه
زهور الامل صاحبه مدونه اوراق الورد .... و واحده من الناس الرقيقه القليله اللى انا صادفتهم على البلوج
شيما او شيمو زى ما انا بقولها ... صاحبه مدونه الشعب لابد له من حكومه تشكمه ... و كله يوسع للمنصوره و اهل المنصوره
و طبعا مش ممكن انسى مى صاحبه مدونه رحيق الورد ... اللى انا فاكر فى مره قالتلى بتحب الورد ... انا بكل صراحه ( و ساعات الصراحه بتبقى وقاحه ) و قلتلها لا مش بحبه .. قالتلى اخص عليك ده انا المدونه بتاعتى اسمها رحيق الورد ... المهم انا ماعلقتش و هى عدتها و الحمدلله ... صحيح ... لسانك حصانك
ارجو انه اى حد انا نسيته يسامحنى و يعتبرنى مجرد انسان مش اكتر ولا اقل و الانسان بطبعه جبل على النسيان ... و معلش البوست طويل بس انا اختصرت الكلام اللى كنت ممكن اقوله على الناس الحلوه دى كلها على اد ما اقدر .... سلام

اسبوع

2009-11-29T16:46:00.000-08:00

فاضل اسبوع بالتمام و الكمال و المدونات تكون كملت سنه .... مدونتى البكريه هى واحد جامعه و هى احبهم لقلبى ... يمكن عشان البكرى بتكون ليه معزة خاصه .... بس ده ميمنعش ان خمسه جد اكتر مدونه بكتب عليها ... هى التانيه فى الترتيب
انا فى خلال الاسبوع ده هنشر 3 بوستات ان ربنا احيانى و كان ليا عمر و نصيب .... بعد التلات بوستات دول الله اعلم انا هعمل ايه
جايز ابطل تدوين ... جايز اخد اجازه طويله ... جايز معملش حاجه من ده كله و افضل اكتب .... ربنا وحده اللى عارف هو كاتبلنا ايه
كلمه اخيره .... انا بجد عرفت ناس كتير هنا ... مقابلتش ولا حد فيهم مقابله شخصيه بس بجد كأنهم اهلى و يمكن اكتر شويه ... اى حد زعلان منى انا غلطت فى حقه انا بعتذرله و بقوله حقه عليا ..... انا هخص شخصيه واحده بس بالاعتذار لانها طلعت اكبر منى بجد .... العمه ستيته حسب الله الحمش ..... اتكلمت عنى مرتين .... مره تلميحا و التانيه تصريحا .... و انا مهما كنت وحش بس اتعلمت ان اللى يزعل حد فى شارع لازم يصالحه فى شارع برضه مش فى حاره .... و العمه ستيته صالحتنى فى الجمهوريه كلها مع انى انا اللى كنت غلطان و كبرت الموضوع زياده عن اللزوم .... انما هقول ايه .... طيش شباب بأه يا عمه و انتى بجد الكبيره ... كبيره مقاما مش سنا عشان بس متقفشيش عليا تانى .... بس كبيره سنا عنى برضه .... ههههههه
شخصيه تانيه مش هقدر اقول اسمها لانى مخدتش الاذن منها انى اقول الكلام ده ... قالتلى فى يوم جرب تسامح الناس ، ده حلو علشانك مش علشانهم على فكره ...... انا على فكره رديت عليها بكل صراحه .... قلتلها انا غير قادر على مصالحه الناس لأنى مش قادر اصالح نفسى
كلامى خلص و ليكو عندى 3 بوستات فى خلال الاسبوع ..... سلام

مااااااااااااااااااء ,,,,,, كل سنه و انتو طيبين

2009-11-26T04:20:00.000-08:00

مصر

2009-11-22T13:35:00.000-08:00

2009-11-18T11:30:00.000-08:00

دوريان جراى و صورته اللى جوه كل واحد فينا

2009-10-22T11:54:00.001-07:00

العنوان بتاع البوست احتمال ناس كتير تكون عارفاه ... عنوان لقصه من اشهر القصص العالميه ... صوره دوريان جراى ... القصه بأختصار بتتكلم عن دوريان جراى ... شاب وسيم امور صديق لصديقه رسمله صورة عشان شاف فيه الملامح اللى عايز يرسمها لما يحب يوصف الجمال و الوسامه ... المهم ان دوريان جراى لاحظ انه لما العمر بيعدى بيه ... لما بيعمل حاجات غلط و مبيحبش حد يعرف عنها حاجه .... وشه بيفضل زى ما هو ... اللى بيتغير و بيبان عليه هو الوش اللى فى الصوره ... و نهايته فى القصه كانت لما بص فى الصوره بعد زمن طويل و شاف الوحش اللى باصصله من الصوره و عرف انه هو ده نفس الوحش حتى لو وشه مش باين عليه و ساعتها مات .... معلش انا بعتذر عن اى اخطاء فى سرد القصه لانى اخر مره قريتها كان من 14 سنه تقريبا
المهم .... القصه ليها مغزى فلسفى مهم ... انه كل واحد مننا عنده صوره زى صوره دوريان جراى دى و مخبيها عن الناس ... صوره ليه بكل اخطائه و غلطاته اللى محدش يعرف عنها حاجه .. صوره ليه بكل القبح الموجود جواه و برضه محدش يعرف عنه حاجه .... على فكره ده مش شئ وحش ... ده شئ طبيعى ... لاننا بشر .. بنغلط و بنكرر غلطتانا و بنعمل حاجات مش متخيلين اننا ممكن نعملها
المقدمه الطويله دى ليها لازمه .... طبعا عالم المدونات و المدونين عالم ثرى و كل حاجه موجوده فيه .... فى الغالب الواحد بيتشد للناس اللى بتفكر زيه و ليها نفسه نظرته فى الحياه ... انا مثلا عندى 4 بلوجات انا بحب اقراهم جدا ... و طبعا مش هكتب اساميهم ... مش عشان حاجه ... بس عشان انا مش بدور على شخصنه الموضوع انما بتكلم على المبدأ نفسه ، و برضه عشان انا مخدتش اذن المدونات و المدونين دول انى اتكلم عليهم بالاسم .... المهم اتنين من المدونات دول بيتهاجموا و منهم واحده على الاخص بتتهاجم على طول ...... اول مدونه اللى بتتهاجم على طول الناس بتهاجمها على اى حاجه ... حتى انا فى مره قلتلها انى بستعجب ازاى تقدر تطلع الملكات الجداليه عند الناس اللى بتعلق عندها .... انا شخصيا حاسس انها لو كتبت حتى آيات من القرأن برضه الناس هتلاقى حاجه تهاجمها فيها ... اغلب الهجوم مش بيكون على الموضوع نفسه ... بطريقه ما الموضوع بيتحور و بيلف و بيوصل لنقطه واحده ... يا شيخه اتحجبى ... ده باللفظ واحد من التعليقات اللى اتنشرت عندها ..... كل التعليقات اللى بتهاجمها بتدخلها من المدخل ده ... انها مش متدينه كفايه ... و دليلهم على كده انها مش محجبه .... انا هنا لا بدافع عن الحجاب و لا بهاجمه ... بس يا جماعه هى حره ... و كل واحد فينا حر ... يعمل اللى هو عايزه و يقول اللى هو عايزه مدام اللى بيقوله او بيعمله مش بيضرنى فى حاجه ... يعنى لو هى محجبه لنفسها .. مش محجبه برضه لنفسها ... فى الاخر انا يهمنى طريق تفكيرها و انا لو مش متفق مع طريقه تفكيرها ممكن ماروحش عندها تانى .... سيبكم انها هى نفسها مش بتنكر ان الحجاب فرض .... بسيطه اهى .... انما الناس بتهاجم و بتسيب تعليقات من مجهول ( و ده مش لاقيله تفسير تانى غير انهم اجبن من انهم يواجهوا بشجاعه او انهم مش مؤمنين بجد باللى بيقولوه ) و حاجات زى دى كتير ..... طبعا اكيد المدونه دى لو بتقرى هتكون عرفت نفسها دلوقتى ... ههههه ..... المدونه التانيه الهجوم عليها بيكون متقطع و على فترات ... بس برضه من ناحيه الدين ... بس المره دى مش من ناحيه الحجاب انما من ناحيه تانيه .... المدونه التانيه بتكتب بطريقه عفويه جدا ... تقريبا مقتنعه ان اقصر طريق بين نقطتين بيكون الخط المستقيم ، عشان كده مش بتقعد تزوق الكلام ، انما بتكتبه زى ما بتفكر فيه .... الهجوم بيكون من ناحيه انها المفروض تختار و تنقى الالفاظ اللى بتكتب بيها .... عشان حرام ... و عشان متخدش حياء الناس اللى بيقروا ، مع انه تقريبا على رأى انسان عزيز عليا الحياء ده اتشلفط و اتشرشر خالص و مبقاش فيه حته مش مخدوشه ، مع ان اللى بتكتبه كلنا عارفينه و فاهمينه و بنستخدم المفرادات دى فى حياتنا اليوميه .... طبعا المدونه الاولانيه تقريبا عرفت مين هى المدونه التانيه ... ههههه برضه ... انما ازاى الناس دى تفوت الفرصه و ميقلبوش الموضوع وعظ و ارشاد ... يعنى المدونات دول كل غلطتهم انهم بيكتبوا بصراحه و من غير ضحك على الدقون ( و افهموا الدقون دى على مزاجكوا ) ... يعنى دلوقتى احنا وصلنا لمرحله انه اللى بيتكلم بصراحه هو اللى بيتهاجم و اللى بيكون حلو و مخبى كده هو اللى بيطبله و الحلوين اللى زيه ناقص يقولوا عليه رضى الله عنه لما تيجى سيرته ..... التالته مفيش هجوم عليها عشان هى بتكتب بالانجليزى و اللى انا لاحظته انه مفيش حد من الناس اللى بتهاجم و بتحاول تهدى الناس لجاده الصواب بيقرا بالانجليزى ، تقريبا عشان دى لغه الكفار و الله اعلى و اعلم
مدون تالت و من اعز اصدقائى على البلوجز مع انى لسه متشرفتش بمقابلته شخصيا بس ده الحقيقه عشان كسل منى .... برضه الناس بتنتقده كتير و مش هقدر اقول بينتقدوه ازاى بس برضه من ناحيه الدين .... انما هو قال كلمه حلوه أوى و اكيد هيعرف انى بتكلم عليه لما يقرا الكلمه دى ... قال اللى شايف ان فلوسى حرام ميخدش منها .... و عنده حق فى كلمته دى
طبعا من باب الرد على الانتقادات دى ان ناس بتقولك الدين النصيحه .... انا معترف بكده ... بس برضه من الدين ان النصيحه متكونش بطريقه منفره .... و بعدين لو لقيت الشخص اللى ادامك مش عايز يتنصح يبقى سيبه ، و يوم القيامه لما ربنا يسألك ابقى قول انا نصحته او نصحتها و كده انا اخدت اخلاء طرف خلاص ..... ناس تانيه بتقولك من باب تغيير المنكر ... ماشى .. بس من الاولى انك تغير المنكر اللى انت بتعمله الاول و اكيد انت بتعمل منكر لانه برضه اكيد انك مش ملاك ربنا منزلك لينا ..... و فى الاخر برضه انت حر لو المضمون معجبكش متجيش تانى .... بس الغريبه ان نفس الناس اللى بتنتقد بلاقيها المره التانيه برضه بينتقدوا و المره التالته و المره العاشره ... تحس انهم فاضيين ملهمش شغلانه غير الانتقاد ... او الواحد فيهم بيصحى بيقول انا ههدى شويه ناس النهارده و ارجعها عن ضلالها ... و قبل ما ينسى يقوم يقول ان شاء الله عشان تبقى النيه صحيحه و يكون قدم المشيئه الاول
طبعا مينفعش اجيب امثله على المدونين و انسى نفسى .... انا بلا فخر تمت مهاجمتى من جميع النواحى ..... انى لازم انتقى الفاظى ..... انى لازم اتدين شويه ( طبعا مقلوش انى البس حجاب ) ... و انى حياتى كلها حرام فى حرام و غلط فى غلط ... يعنى انا جمعت المجد من جميع اطرافه
اخيرا انا ابويا الله يرحمه علمنى حاجه ساعه لما كنت ببقى محروق أوى من الناس اللى مورهاش غير الانتقاد .... قالى لما حد يكلمك قله اللى بيصرف عليا قرش يجى يحاسبنى بيه ... و الله يرحمه معرفتش مدى صدق مقولته غير لما فكرت فيها .... يا جماعه اللى بيحاسب العباد هو ربنا ... قلتها و بقولها و هقولها لغايه ما اموت
مش قادر ازود فى الكلام لانى بتخنق من الموضوع ده ..... و فى الاخر يا ريت كل واحد يبص لصوره دوريان جراى بتاعته الاول قبل ما يبص للناس .... سلام

افلام ... افلام .... افلام

2009-10-15T13:37:00.001-07:00

البوست النهارده عن السينما و الافلام .... ناس كتير بتحب الافلام الاجنبى ، بس حبهم بيتوقف عند مرحله المشاهده ... ناس تانيه حبهم مش بيقف عند المرحله المشاهده بس انما بيحاولوا يتعلموا حاجه من الفيلم اللى بيشوفه عشان ما يكونش مجرد وقت هما ضيعوه على الفاضى ... ميزه الافلام الاجنبى انها بيبقى وراها فكره ... مش مجرد فرجه و بس .... ده مايمنعش انه فيه افلام ماتستاهلش الوقت اللى هتضيعه من عمرك و انت بتتفرج عليها ..... انا النهارده هتكلم على شويه افلام من خلال نقطتين بس ..... Flash Back و كلمه الفلاش باك كلنا عارفين معناها .. بالاضافه لانه تكنيك معروف جدا مش بس فى السينما انما فى الروايات كمان .. بس مشكلته انه فيه ناس قليله تقدر تستخدمه بحنكه .... النقطه التانيه هى نقطه التضليل Misleading يعنى ان المخرج يضحك عليك .... الفيلم يكون كله ماشى فى اتجاه و فى أخر الفيلم تلاقى نهايه غير اللى انت متوقعها و تلاقى المخرج بيبرر الاسباب بتاعت النهايه دى .... ده تكنيك اصعب .... لانه بيرسم نهايتين للفيلم و كل واحده فيهم منطقيه .... يعنى كأنك ماشى بالاحداث فى خطين مش متوازين و لا متقاطعين ... انما التشبيح الادق ان الخطين فوق بعض و متطابقين فى اغلب النقط الا النقط اللى بتؤدى للنهايه

اول فيلم هتكلم عنه هو فيلم مشهور جدا فى تاريخ السينما .... و نادرا ما تلاقى حد مهتم بالافلام متفرجش على الفيلم ده .... الفيلم هو The Usual Suspect طبعا الفيلم فيه ناس كتير بس الشخصيه المحوريه اللى فى الفيلم هى كيفين سباسى .... ممثل موهوب جدا .... خد جايزه اوسكار فى فيلم مثير للجدل The American Beauty فيلم جميل جدا .... بيبتدى بمشهد النهايه و بعد كده بتلاقى كيفين سباسى بيحكى حكايه الفيلم اللى ادت للمشهد ده .... طول الفيلم بندور على مجرم ... كل الناس تعرف اسمه بس محدش شاف وشه و عاش عشان يحكى اللى شافه ..... طبعا الفيلم فيه مفاجأه ..... طبعا جايزه الاوسكار اللى اخدها عن فيلم الجمال الامريكى كانت التانيه ... لانه خد جايزه اوسكار عن دوره فى الفيلم ده .... فيلم تخسر كتير لو مشفتوش

الفيلم التانى هو فيلم مشهور جدا و من ثيمات الافلام العالميه برضه ... الفيلم فيه استخدام للفلاش باك .... بس فيه استخدام اساسى للتضليل .... من بطوله اتنين من اكتر الممثلين المحترفين و الموهوبين ... براد بيت و ادوارد نورتن .... بطوله مشتركه بكل ما فى الكلمه من معانى .... الفيلم فيه برضه استخدام للسايكودراما .... يعنى الدراما المبنيه على اساس نفسى ..... فيلم من الافلام اللى متزهقش منها .... تفضل ماشى مع الفيلم لغايه ما فى اخره تقابلك مفاجأه كبيره جدا ... السؤال اللى الفيلم بيطرحه من وجهه نظرى هو انه جوا كل واحد فينا الخير و الشر ... الملاك و الشيطان ... بنحاول دايما نعمل الصح .... بس عمرك سألت نفسك لو عملت الغلط ممكن تندفع لغايه فين و ايه اللى ممكن تعمله .... سؤال فلسفى ... بس ناس كتير بترد اجابته للدين .. الاخلاق .. التقاليد ... عادات المجتمع ... و حاجات كتير تانيه .... بس تخيل لو انك تحررت من كل الحاجات دى ... ايه اللى ممكن تعمله .... و ايه اللى هيفضلك .... طبعا انا بتكلم على الفيلم العبقرى Fight Club ... بجد فيلم مش هتندم على الوقت اللى هتقضيه فى الفرجه عليه

فيلمنا التالت هو فيلم من اوله لغايه اخره مرتكز على الفلاش باك .... و فى رأيى الشخصى انه احسن فيلم اتعمل بيستخدم التكنيك ده .... انا لغايه دلوقتى كل ما اشوف الفيلم ده ما الاقيش حل للابداع اللى انا شفته غير ان المخرج يكون مسك السيناريو و ابتدى تمثيل الفيلم من اخر مشهد لغايه ما وصل لاول مشهد .... الفيلم محبوك بطريقه جميله جدا ... من احسن الافلام اللى ممكن تتفرج عليها فى حياتك كلها ..... لو عملت لسته لاحسن 10 افلام هيبقى فيها ... احسن خمسه ، برضه هيبقى فيها ... احسن تلاته ، اكيد فيها .... و فيه احتمال لو قلت ايه احسن فيلم اتفرجت عليه يطلع هو الفيلم ده ..... اجمل حاجه فى الفيلم انه عامل زى الدايره ... الشكل الهندسى الوحيد المتكامل و اللى اى نقطه فيه بتؤدى لاى نقطه تانيه ... و هتفهم معنى كلامى مع اخر مشهد فى الفيلم ... لان اخر مشهد هيوديك لاول مشهد ..... طبعا انا هنا بتكلم على الفيلم العبقرى Memento .... بجد لو مكنتش شفت الفيلم ده حاول انك تشوفه .... السؤال اللى انا لقيته فى الفيلم ده سؤال غريب شويه .... يا ترى انت بيبقى ليك هدف عشان عايز الهدف ده يتحقق ... ولا بيبقى ليك هدف عشان لازم يبقالك هدف ... يعنى الهدف فى حد ذاته ، غايه ولا وسيله

الفيلم الرابع واحد من احب الافلام لقلبى ... انا شخصيا دخلته فى السينما ..... و عايز
اقولكوا انه فى نص الفيلم بالظبط حصل دروب عند ناس كتير جدا .... و ناس تاهت فى الفيلم .... لانه لغايه نصه بيفضل ماشى فى خط مستقيم و بعدين عند نصه بتلاقى ان كل اللى انت شفته اضحك عليك فيه ... كل ده عند مشهد واحد ... انا بعتبر المشهد ده من اكتر المشاهد عبقريه فى تاريخ السينما ... مش هنكر انى احتجت اتفرج على الفيلم لمره تانيه عشان اتأكد انى فهمته صح ... و عشان كمان اتفرج على الفيلم بزاويه تانيه بعد ما فهمت التريك اللى فيه ... و مع كده استمتاعى ماقلش لحظه واحده عن اول مره شفته .... الفيلم ده برضه من الافلام اللى مرتكزه على السايكودراما ... و بتستخدمها استخدام ممتاز ... السيناريو فيه صدف كتير ... بس لما تشوف الفيلم هتلاقى انها مش صدف بس هى مقصوده و ليها دور و ليها دلاله ... و الصدف اللى مش صدف اللى انا بتكلم عليها هى اسماء الكاركتارز اللى فى الفيلم .... نهايته مش متوقعه بأى مقياس من المقاييس ... خصوصا ان نهايته فيها مفاجأه لحاجه انت هتكون افتكرت انها خلصت اصلا ...... طبعا انا هنا بتكلم على الفيلم الجميل Identity ... طبعا مش عايز اعيد نفسى و اقول اللى ماشفش الفيلم ده مش هيندم لما يشوفه .... مش عارف اذا كنت ممكن اتكلم على السؤال او الفكره اللى بيطرحها الفيلم ولا لا ... بس هى من وجهه نظرى انه محدش فينا ليه شخصيه واحده ... كل واحد فينا ليه اكتر من شخصيه ... و ده مش نفاق لان النفاق انك تتعامل فى نفس الموقف بأكتر من رأى ... مش عارف اوصل وجهة نظرى ... و مش هحاول ... استمتعوا بالفيلم و قولولى رأيكوا

الفيلم الخامس و عوده مع الفلاش باك ..... فيلم Vintage Point .... الفيلم من بطوله جماعيه ... زى ماهو مكتوب على التاج بتاع الفيلم .... 8 اشخاص ... 8 وجهات نظر .... حقيقه واحده .... الفيلم فيه استخدام كتير للفلاش باك ..... حدث واحد حصل ... بس المخرج بيوريك الحدث ده من زوايا مختلفه ... حسب مكانك من الحدث .... المشكله انه برغم ان الحدث واحد بس كل واحد بيشوفه بطريقته .... و فى الاخر فى حقيقه واحده بس للحدث برغم الزوايا المختلفه للموضوع .... الفيلم بيطرح فكره فلسفيه بس حقيقيه فى نفس الوقت .... انه مش شرط اللى انت تشوفه انا اشوفه بالضروره حتى لو كنا بنتناول نفس الموضوع .... بيفرق فى كده مكانك من الموضوع نفسه ... انت معارض ليه ولا مؤيد ... قريب منه ولا بعيد ..... بس فى الاخر
كل واحد ليه وجهه نظره

الفيلم السادس لسه شايفه من اسبوع تقريبا الفيلم ليه اسمين ..... الاسم المشهور بيه و هو Fragments ... و الاسم الرسمى للفيلم و هو Winged Creatures .... بس التسميه اللى هو مشهور بيها من وجهه نظرى احسن ... الفيلم هنا فيه استخدام لاسلوب الفلاش باك .... برضه بيتعرض لحدث واحد ... بس بيحكى تأثير الحدث ده على كل الناس اللى كانت موجوده ساعه وقوعه ..... و ازاى ان حدث صغير ممكنيغير حياتك كلها و يخليك تاخد قرارات مكنتش هتاخدها ..... فيلم انا استمتعت بيه .... فيلم مش هقدر اقول ممتاز ... انما هستخدم كلمه جيد

اخر حاجه عشان انا طولت عليكوا أوى فى البوست ده و هى مش فيلم ... انما مسلسل ... المسلسل لسه جديد .... اتعرض منه 3 حلقات بس و الحلقه الرابعه هتتعرض الاسبوع ده ... الفيلم ده بيتناول فكره الفلاش باك بس بمنطق معكوس .... انا مش هحرقه لحد لانه اصلا انا شخصيا معرفش احداثه كلها لسه ... بس الفكره بتاعت المسلسل متاخده من اسمه ... Flash Forward ... قصه المسلسل ببساطه ان كل الناس هتشوف لمحه من مستقبلها .... و السؤال اللى المسلسل بيطرحه هو ... يا ترى انت ممكن تاخد قرارات مش عشان هى صح انما عشان انت شفت انها هتحصل فى مستقبلك ... يعنى بصوره تانيه ... لو انت شفت مستقبلك ... يا ترى هتمشى فى الطريق اللى مؤدى للمستقبل اللى انت شفته ده و ده هيأثر على قراراتك و اختياراتك .... فكرته فلسفيه اوى المسلسل .... المستقبل فى ايدك لسه و ممكن تشكله بأختياراتك ولا المستقبل اتكتب خلاص و انت مش ممكن تغيره ..... فكرته هى السؤال اللى ناس كتير بتتجادل حواليها و هتفضل تتجادل ليوم القيامه .... انت مسير ولا مخير
آخر حاجه عايز اقولها ان البوست ده اهداء خاص لعادل لانى عارف هو اد ايه مهتم بالفن و السينما ... و برضه لزيكا مع ان زيكا مش باين اليومين دول .... و معاهم مياسى ... لانها فى بوست سابق كانت هى اول واحده قفشتنى و انا بعمل معالجه لفيلم شفته فى بوست من بوستاتى ... و مش هقدر انسى بطوطه ... الوحيده اللى علقت عندى فى بوست المسلسلات الاجنبى و كان عندها فكره انا بتكلم على ايه .... طبعا مش معنى كده ان دول بس اللى يقروا .... انما كل الناس انا برحب بيها مقدما و مستنى تواصلكوا على الافلام اللى انا كتبتها دى كلها و يا رب ماتكونوش زهقتوا منى .... سلام

الغايه و الوسيله

2009-10-12T00:32:00.000-07:00

طبعا كلنا عارفين مقوله ميكافيللى الشهيرة اللى الراجل ده اتظلم و اتسب و اتلعن بسببها " الغايه تبرر الوسيله " ...... طبعا كل الناس سواء اللى فاهمين نقطه الاخلاق غلط او بيحبوا يمثلوا انهم عندهم اخلاق او حتى عندهم دوافع تانيه غير الاخلاق اصلا بيهاجموا المقوله دى .... و يقولك دى استغلاليه و انتهازيه ..... المقوله دى لو طبقناها مش هيبقى فيه اى نوع من العلاقات الانسانيه غير النوع اللى بتحكمه المصالح ..... المقوله دى لو صح يبقى مينفعش نحكم على اى حد لانه ببساطه هيكون ليه غايه عايز يوصلها و هيوصلها بطريق غير شرعى او طريق ملتوى
بعيد عن التشنج و العصبيه و النعرات الدينيه و الاخلاقيه نتكلم شويه بالعقل ....... اولا احنا دايما بنمسك فى الكلام بلفظيته مش بمعناه او جوهره .... يعنى انا عايز اى حد يقولى الفرق بين مقوله ميكافيللى و مقوله الضرورات تبيح المحظورات .... اهو الاتنين كلام زى بعض ..... او حد يقولى الفرق بين اللى يتصرف بمبدأ ميكافيللى و بين تصرف رجال القانون فى كل مكان بأنهم مثلا يسيبوا تاجر المخدرات الصغير فى سبيل انهم يوصلوا لتاجر المخدرات الكبير او المستورد للمخدرات اصلا .... او حتى الحاجه المعروفه فى القانون بأسم شاهد ملك ... و هو شخص بيكون مجرم بالظبط زيه زى الناس اللى معاه فى القضيه ، بس هو ابدى استعداد انه يتعاون مع البوليس فى انهم يمسكوا كل الناس قصاد كده انه يبقى شاهد ملك و يتم اعتباره مجرد شاهد و لا يتم محاكمته على الجرايم اللى عملها
الفرق الوحيد بين الحاجات دى و مقوله ميكافيللى انه اننا دايما بنكيل بمكيالين .... يعنى بنقول دى حاجه تستاهل و دى ماتستاهلش .... دى صح و دى غلط
يعنى مثلا تاجر المخدرات الصغير غلط بتوزيعه المخدرات دى ولا مغلطش .... طيب لو غلط يبقى ياخد جزائه و لو مغلطش يبقى خلاص .... انما انك تعمله استثناء فى سبيل انك بتدور على غايه اسمى و اكبر .... يبقى ايه الفرق بين الفعل ده و الفعل اللى انت بتهاجمه .... ولا حاجه .... اللهم انك صاحب سلطه و بالتالى بتفرض سلطتك عليا انى اقبل حاجه و ارفض حاجه و الاتنين واحد ... يعنى ببساطه بنعمل زى علاقه امريكا بأسرائيل و علاقتها بينا و الكيل بمكيالين و الكلام الحمضان اللى مش جايب همه ده
ايه الفرق بين انى اقول مقوله ميكافيللى و اقول الضرورات تبيح المحظورات .... الفرق ان الاولانيه ميكافيللى اللى قايلها و التانيه من التراث الدينى بتاعنا .... مع انى اتعلمت ان المبدأ مش بيتجزأ ..... يعنى يا ابيض على طول ... يا اسود على طول .... مش شويه ابيض و شويه اسود و شويه رمادى ..... بس الحقيقه اننا بنستخدم المبادئ و بنحافظ عليها طول ما هى بتخدمنا .... انما لما تبقى ضدنا ..... لا يكلف الله نفسا الا وسعها .... لا ده فى فرق ( مع ان الفرق يا فى الشعر يا فى ...... ) ..... كل قاعده و ليها استثناء ...... و كلام زى كده كتير
انا عن نفسى شايف ان الفرق الوحيد موجود فى حاجه واحده بس ..... الغايه اللى انت عايز تحققها غايه مشروعه فى حد ذاتها ولا غايه غلط ..... و الحاجه التانيه .... انك لو استخدمت وسيله ما بغض النظر عن ان الوسيله دى صح ولا غلط .... انما ماتلومش حد بعدك لو استخدم نفس الوسيله ...... يعنى هديكوا مثال ...... المثال ده من القرآن عندنا .... فى قصه سيدنا موسى و سيدنا الخضر .... لما الخضر قتل الغلام و سيدنا موسى سأله ليه قتلته ... رد عليه ان ابويه مؤمنان و انه كان هيرهقهم طغيانا و كفرا .... الغايه هنا غايه نبيله .... ربنا بيكافئ عبدين من عباده و مش عايزهم يتبهدلوا بسبب ابنهم و ان ربنا هيعوضهم خيرا منه ... الوسيله فى المكافأه دى هى القتل اللى كل الاديان و الشرايع و التطبيقات البشريه اتفقت انه غلط .... بس عشان الغايه نبيله محدش اتكلم على الوسيله
مش عارف هتفهموا انا قصدى ايه بالبوست ده ولا لا ..... على كل حال مستنى ردودكوا ...... سلام

انا من تانى

2009-10-06T06:11:00.000-07:00

اتكلمت فى البوست اللى فات عن انى وصلت لمرحله الاكتئاب بعد وفاه والدى و معرفتش اخرج من المرحله دى لغايه دلوقتى ..... الحقيقه مش انا بس اللى دخلت المرحله دى و معرفتش اخرج منها .... امى كمان نفس الوضع ..... كل صحابى اللى يعرفونى عارفين ان امى مش قاعده فى البيت ..... الحقيقه انى الوحيد اللى فاهم سبب ده ايه .... هى مش قادره تقعد فى البيت بعد وفاه ابويا ..... البيت ده الاتنين بنوه سوا حرفيا و فعليا .... الاتنين كانوا بيشتغلوا فى السعوديه و بنوه سوا .... انا عندى نفس الحاله .... بس انا الموضوع قلب معايا انى مابقتش اقدر استقر فى مكان واحد ولا استقر على وضع واحد ...... كنت قريت تعبير استخدمه تقريبا دكتور احمد خالد توفيق فى واحده من قصصه " روح قلقه " الحقيقه انى نموذج للروح القلقه دى ..... طبعا بعتذر مقدما لو ماكنش دكتور احمد اللى قال التعبير ده
طبعا فى مرحله الاكتئاب اللى انا فيها زى اى انسان طبيعى بحاول انى اشيل الناس اسباب غلطاتى ... مش بحاول حتى افكر اذا انا غلطان فعلا .... ولا انا حمل برئ على طول الخط .... يعنى مثلا صحابى اللى طلعوا اندال و مش صحابى زى ما انا فاكر .... الغلط كله غلطهم عشان هما لما لعبوا Pick A Side و اختاروا الناحيه التانيه .... ولا ده برضه كان غلطى عشان انا بعد العمر ده كله طلعت مش عارفهم .... و جايز يبقى غلطى عشان انا اخترت غلط من الاول .... موضوع جوازى اللى اتفركش قبل المعاد ب 4 شهور .... كان غلطتها هى بس .... ولا كان غلطتى انا كمان انى مقدرتش اقرى اى علامه من العلامات اللى كنت شايفها .... ماسمعتش كلام كل الناس .... صحيح انا صحابى دول مش فارقين معايا فى حاجه دلوقتى و اصلا بطلت اقول عليهم صحابى و رمتهم من حياتى .... صحيح انى بقول لو ان سفرى السعوديه ماجاش من وراه غير ان موضوع جوازى يتفشكل ده لوحده كفايه و يخلينى احب السفريه دى ..... مش عارف انا انسان طبيعى لما اقول ان ناس اعرفها بقالى 13 سنه مش فارقين معايا .... مش عارف انا انسان طبيعى لما اقول على الجوازه اللى باظت انها هم و انزاح و ربنا بيحبنى لانى دلوقتى متأكد انها لو كانت تمت كانت هتخلص بحاجه من اتنين .... يا الطلاق .... يا انا اقضيها بأه و ابقى دون جوان و اجيبلى غواصه لنزواتى .... هههههه ... حتى فى عز القرف اللى انا بحكيه ده مش قادر ابطل تريقه
يا ترى قعدتى الوقت ده كله فى الكليه مجرد سوء حظ .... او زى ما زيكا قال فيه ناس بيكون مقدر ليها انها متخلصش الكليه على طول .... ولا يا ترى انا اللى كنت مستهتر .... انا لازم اعترف ان الغلط الاكبر عليا عشان انا كنت مدى الكليه دى بالجزمه ... بس هى انتقمت منى انها خلتنى اطول فيها لغايه ما خللت .... بس برضه فيه شويه سوء حظ
حاجه من الحاجات اللى محدش يعرفها عنى ...... انا لما بتفرج على افلام رومانسيه او دراميه لازم عينى تدمع فى اخرها .... عشان كده اغلب الافلام دى بشوفها لوحدى .... لما اقرى كتابات فيها دراما انسانيه او تجربه حياتيه صادقه برضه عينى بتدمع ..... هديكوا مثال .... انا كنت النهارده بقرى كتاب جر ناعم بتاع عمر طاهر للمره العشرين تقريبا .... و مع كده كل الفصول اللى كاتبها بيوصف بيها علاقته بعيلته انا عينى دمعت فيها ، بالظبط زى ما حصل 19 مره قبل كده و انا بقرا نفس الفصول ..... انا وصلت لمرحله ان عقلى الباطن بيلعب معايا لعبه قاسيه أوى ..... مش قادر افتكر اى ذكرى حلوة عن عيلتى او حياتى اللى فاتت .... و مع كده لما بشوف او بقرى حاجه زى كده عينى بتدمع ... مع ان المفروض انى معنديش ذكريات يبقى اتعامل مع الموضوع عادى ..... او من الناحيه التانيه ... لو عينى دمعت ده معناه ان اللى شفته او قريته ده لمس عندى ذكرى ... او صحى ذكرى انا كنت ناسيها .... بس الحقيقه انى مش قادر افتكر اى حاجه ..... يمكن ده سبب من الاسباب اللى خلتنى اكتب مدونتى البكريه و اكبر مدوناتى سنا و احبهم الى قلبى مدونه واحد جامعه ..... عشان خفت الذكريات بتاعت الكليه تتوه منى و تتمسح هيا كمان .... قلت الحق اسجلها و انا لسه فاكرها
فى حاجه اسمها To Do List انك تكتب لسته بالحاجات اللى انت عايز تعملها .... فيه ناس بتكبها فى اول السنه و فيه ناس بتكتبها كل عيد ميلاد ليها .... و ناس بدل ما بتخليها الحاجات اللى عايزه تعملها بتخليها الحاجات اللى نفسها تغيرها ..... فكرت اعمل واحده ..... بس الحقيقه مالقتش ولا حاجه انا عايز اعملها بجد ...... كل الناس بتبقى ليها ولو انجاز واحد كل ما الدنيا تضيق عليهم يبصوا للانجاز ده و يقولوا احنا عملنا حاجه .... ناس بيبقى انجازها نجاح شخصى ... او انها اتجوزت .... او انها انتقمت من حد بتكرهه .... انا لما ببص للانجازات بتاعتى بلاقى ان الانجاز الوحيد اللى انا عملته انى خلصت الكليه .... و من وجهة نظرى انه ماكنش انجاز للدرجه دى لانى كنت هاخلصها هاخلصها ..... سيبكوا انى مجبتش الديب من ديله اصلا
انا عارف ان خير الامور الوسط ..... بس مش فى كل حاجه ..... كل قاعده و ليها استثناء ..... يعنى انا حاليا لا مبسوط ولا زعلان ..... فى الوسط ..... لا متضايق ولا فرحان ... برضه فى الوسط ..... مش عارف اعيش حياتى و استمتع بيها ... و مش عارف ماعيشهاش من اصله ..... برضه فى الوسط ....... على رأى دكتور احمد خالد توفيق ( و انا متأكد المره دى ) انى على الحياد زى سويسرا .... او على رأى عمنا محمود السعدنى مثل طنجه على الحياد فى مذكرات الولد الشقى
مش قادر اتكلم تانى لانى مش لاقى حاجه تانيه اقولها ..... و بعتذر لكل الناس اللى سابت تعليقات ... بس انا تعبان اليومين دول و كسلان كمان ..... بس اكيد هرد على كل التعليقات ..... سلام

تطبيق الموديل

2009-10-04T21:35:00.000-07:00

اتكلمت فى البوست اللى فات على موديل كابلر-روس و اللى بيوصف خطوات الحزن و شرحت كل خطوة بالتفصيل ... يمكن مش تفصيل أوى ... بس تفصيل كفايه انه يدى فكره شامله عن الموضوع
انا هتكلم النهارده عن نفسى شويه .... ايام الكليه كنت واحد من افشل الناس فيها ... قعدت 10 سنين لغايه ما اتخرجت .... و كنت و ما زلت حالف ان الشهادة الكرتون لما اخدها هاعلقها فى الحمام عشان ده مقامها عندى ، بس انا لغايه دلوقتى لسه ماخدتهاش ... الظاهر ربنا مش رايدلها انها تتعلق هناك ..... بدايه التغيير اللى حصلى كان و انا فى سنه تالته أول سنه .... ذاكرت كتير و فى الاخر سقطت السنه على ماده ... طبعا الناس بتوع تجاره و حقوق و آداب هيبقى عندهم الكلام ده عادى لان السنه عندهم 10 او 11 ماده بالكتير .... احنا بأه الترم عندنا 12 او 13 ماده .... يعنى من مجموع 25 ماده انا عدت السنه كلها عشان ماده زياده .... ساعتها ابتديت اطبق موديل كابلر-روس من قبل حتى ما اعرفه ..... دخلت فى حاله الانكار طول السنه و عمال اذاكر على اساس انى ناجح و انى بمعجزة هينجحونى السنه و اطلع رابعه لما اخلص الترم التانى ... شويه و لما السنه خلصت دخلت فى مرحله الغضب و مبقتش طايق نفسى و لا طايق الكليه ... و دى كانت الفتره اللى حلفت فيها انى هعلق الشهاده فى الحمام لما اخدها .... بعديها دخلت فى مرحله المساومه و الترجى ... انى مستعد اعمل اى حاجه عشان اطلع لسنه رابعه .... ويا لهوى على الايام اللى ندرت انى هصومها و الصلاه اللى ندرت انى هصليها .... و مع كده مطلعتش رابعه برضه ..... بعد كده دخلت فى الخطوة الرابعه ..... خطوة الاكتئاب ..... مابقاش فى حاجه فارقه معايا فى الدنيا .... و لا اى حاجه بتهمنى ..... الخطوة دى انا طولت فيها أوى زى ما طولت فى سنه تالته كده .... سبت الكليه اصلا و مبقتش بنزلها .... و شويه و سبت البلد كلها و سافرت و مكنتش ناوى ارجع تانى ... الغريبه انى لما سبت البلد مقلتش لحد من صحابى انى ماشى .... و لا سلمت على حد .... كنت بعتبر صفحه الكليه بالناس اللى عرفتها فيها فصل و اتقفل فى حياتى خلاص ..... لغايه دلوقتى مش عارف ايه اللى رجعنى فى الغالب انى رجعت عشان امى ..... المفروض بعد كده انى ادخل فى الخطوة الخامسه و هى خطوة قبول انى سقطت و ابتدى اشوف اعمل ايه .... بس والدى تعب فى الفتره دى .... و بعديها بشويه ربنا رحمه من تعبه و توفاه .... دخلت الدايره دى تانى من الاول
بعد كده خلصت الكليه ..... عايز اقولكوا انى ماحستش بفرحه غير فى اول يوم عرفت فيه انى خلصت بجد ..... بعد كده الموضوع كأنه عادى ..... الغريب انه فيه ناس كتير اعرفها و كانت ظروفها زى ظروفى حست بنفس الاحساس ..... مجرد الفرحه مش عشان خلصنا .... انما عشان خلاص اترحمنا من القرف و القلق بتاع الكليه .... مش عشان الشهاده اللى احنا خدناها فى حد ذاتها ... مش عارف اوصفلكوا الاحساس ده ازاى ..... انا لغايه دلوقتى فاكر كلمه بلال صاحبى قالهالى لما خلصنا الكليه ..... قالى يا عم عمرو احنا هنفرح على ايه .... يا عم شوف سننا بأه كام .... ايام الكآبه دى انا كان عندى 26 سنه ...... و فعلا كان كلامه صح .... يمكن مش صح مطلق بس فعلا صح
مرحله الاكتئاب دى دخلتنى فى حاجه جديده ..... انا قلت انه معدش فيه حاجه فارقه معايا ولا حاجه تهمنى .... الكلام ده انا مكتشفتش مدى صحته غير لما بصيت لحياتى تانى .... الناس اللى كانوا اصحابى مابقوش فارقين معايا يعرفونى ولا لا ..... ده بغض النظر عن الحاجات اللى انا عرفتها بعد كده عن الناس دى و خلتنى اعرف انهم ماكنوش صحاب مخلصين بالدرجه دى او ماكنوش صحاب اصلا ، بس ده مش موضوعنا ..... اهلى تقريبا مابقتش بشوفهم ولا حتى فى المناسبات الاجتماعيه و مبقاش فارق معايا يكلمونى ولا لا ، ده طبعا كان ليه تبعات تانيه بس برضه مش موضوعنا ...... عملت لنفسى سور كبير أوى و انا جواه .... مش بخلى حد يعدى السور .... عشان كده مش بستغرب لما حد يقولى انه مش فاهم انا بفكر ازاى .... لانى بطبيعتى الجديده مش بدى حد الفرصه دى اصلا ..... كل الناس اللى بتقرب منى انا ببعدها و بزقها بعيد عنى .... بعمل كده من غير ما باخد بالى ..... انا مش فاكر امتى آخر مره انا ضحكت من قلبى .... بضحك كتير ، دى حقيقه ..... بس مش من قلبى .... بتبقى مجرد حاله من السعاده الوقتيه مش اكتر ولا اقل .... الطبيعى بتاعى انى اكتئب و تجيلى حالات اكتئاب مكلمش حد فيها ..... بس الحالات دى مش بتطول ولا بتيجى كتير ، عشان كده الناس القريبين منى اتعودوا على انى ممكن اغطس و مردش على تليفونات ولا اقابل حد بس بعد كده برجع تانى ....... مش فاكر امتى عملت حاجه انا بحبها و بستمتع بيها ..... حتى القرايه اللى بعتبرها مش هوايه انما عاده ..... العاده دى اتقطعت ..... فى الفتره الحاليه من حياتى انا فى قمه التوهان .... خدت قرارات مصيريه و مش عارف اذا كنت هندم عليها بعد كده ولا لا ..... الزمن بس هو اللى هيعرفنى اذا كنت هندم ولا لا ..... مفيش حاجه فى مكانها بالنسبه ليا
اتكلمت كتير و مع كده مخرجتش كل اللى جوايا .... معلش استحملونى عشان طولت و يمكن اكون نكدت على اى حد بيقرا البوست ده ..... و للناس اللى انا نكدت عليها انا آسف بجد ...... سلام

موديل كابلر-روس

2009-10-03T05:36:00.000-07:00

من حوالى اسبوعين اتفرجت على الحلقه الاولى من جرايز اناتومى الموسم السادس ..... الحلقه كلها كانت متحورة على حاجه رئيسيه ...... الحزن ..... اتكلموا فى الحلقه على دى على الخطوات الخمسه للحزن .... يمكن النقطه دى عدت على ناس كتير ، بس لسوء الحظ انا على درايه بالنقطه دى جمله و تفصيلا لظروف كتير مش أوانها انى احكى عليها
باختصار شديد .... الخطوات الخمسه للحزن كانت عباره عن موديل مشهور جدا فى الطب النفسى ، اللى صاغت الموديل ده الدكتور اليزابيث كابلر روس و الموديل اتعرف بأسمها بعد كده بموديل كابلر روس ، الموديل ده ممكن يتطبق تقريبا ( و خدوا بالكوا من كلمه تقريبا ) على كل مصيبه ممكن تحصلك .... يعنى لما تتعامل مع حدث يكون اكبر من انك تستوعبه مره واحده ... الموديل ده اتوصف فى الاول للمرضى اللى بيفقدوا اطراف ... المرضى اللى بتجيلهم امراض مزمنه ذات طبيعه تؤدى للموت زى السرطانات .... الناس اللى بتبتلى لوفاه احد الاقارب او الاصحاب القريبين .... و بعد كده الموديل ده تم توسيعه عشان يستوعب حالات الطلاق ... فقدان الوظيفه ... او زى ما قلنا قبل كده اى مصيبه اكبر من الانسان يتعامل معاها وقتيا
الموديل ده بيقول انه فيه خمس خطوات للحزن .... اولهم الانكار ... انك لما تحصلك المصيبه دى تقعد تقول لا المصيبه دى محصلتش .... اكيد المقصود بيها حد تانى .... لا يا عم مش انا ، انت بتهرج ... عشان كده ممكن تلاقى ناس ساعه وفاه واحد من الاقارب متماسكه بشكل غير طبيعى و مش حاسس بالمصيبه اللى هو فيها ... اللى هو بالبلدى بنقول عليه السكينه سارقاه
الخطوه التانيه هى الغضب .... بعد ما تخلص خطوة الانكار و الانسان يستوعب ان المصيبه ده حصلتله مش حصلت لحد تانى يبتدى مرحله الغضب .... مرحله اشمعنى انا اللى يحصله كده ... ما فيه ناس كتير تستاهل تموت اشمعنى فلان مثلا .... او مثلا ليه يارب الناس دى كلها تنجح و انا اللى اسقط مع انه فيه ناس كتير حالها اوحش من حالى ... اشمعنى انا اللى جوزى يطلقنى و فلانه مع ان جوزها مش بيطيقها لسه على ذمته ..... و الكلام اللى زى كده
الخطوه التالته هى خطوة المساومه ..... الانسان خلاص خلص مرحله الانكار ... عدى مرحله الغضب ... ابتدى يحن للوضع القديم اللى كان فيه .... سواء عشان كان بيحبه زى فى حالات وفاه الاقارب ، او انه خايف يجرب وضع جديد زى حالات ان الانسان مثلا يتفصل من وظيفته و يلاقى نفسه مطالب انه يدور على وظيفه تانيه ، اللى هو بالبلدى برضه بنقول عليه اللى نعرفه احسن من اللى مانعرفوش ..... مرحله المساومه دى الانسان يقول انا مستعد ادفع نص عمرى لو ارجع زى الاول ..... انا مستعد اعمل اى حاجه بس فلان يرجع من الموت ..... نفسى اقدر اعيش كام سنه مع عيالى و اخد بالى منهم و العب معاهم قبل ما السرطان يقضى عليا ... المساومه هنا مش مع شخص .... انما بتكون بين الانسان و ربه .... و مش مساومه بالمعنى المفهوم ... انما اقرب للترجى و التذلل
الخطوة الرابعه و هى خطوة الاكتئاب ..... الانسان لقى الترجى و المساومه مش هتغير حاجه .... و لقى نفسه فى الوضع اللى هو فيه و شاء ام ابى عليه انه يتعايش معاه .... بس هو من جواه مش قابل الوضع ده ..... و فى نفس الوقت مش قادر يغيره .... يدخل فى موود الاكتئاب ... يا عم انا كده كده هموت انت عمرك سمعت عن جاله سرطان و خف منه ..... يعنى لو انا عملت قرد ابويا هيرجعلى تانى .... مهو كده كده طلقنى و اتجوز و مش هنرجع لبعض تانى ..... المرحله دى بتبقى مرحله العزله .... الانسان بيرفض انه يستقبل اى زوار .... بيتقوقع على نفسه .... بيفصل نفسه عن الواقع ..... بتبقى مرحله صعبه جدا و مش كل الناس بتقدر تعديها .... و بتحتاج وقت طويل لغايه ما الانسان يقدر يعديها .... و بعدها ... حياته بتكون بعدها مختلفه عن حياته قبلها
الخطوة الخامسه و الاخيره هى خطوة القبول ...... خلاص الانسان جرب كل حاجه .... جرب انه ينكر المصيبه اللى حصلتله على امل انها هتتمسح و تختفى و مع كده لقاها زى ما هى .... جرب انه يغضب و يثور على الوضع اللى هو فيه ، و برضه لقى انه مفيش حاجه بتتغير و انه بيحرق فى دمه و اعصابه على الفاضى .... جرب انه يترجى و يتذلل و يساوم و مع كده المصيبه فضلت زى ما هى و ماتغيرتش ...... جرب انه يدخل فى موود الاكتئاب و يعيش مع نفسه ، بس حتى ده مانفعوش ..... بيلاقى انه مفيش اى حاجه ممكن يعملها غير انه يقبل الوضع اللى هو فيه .... قبول اقرب للاستسلام ... لانه جرب كل حاجه و مفيش حاجه نفعت .... مرحله القبول دى بيجى معاها السكينه و الراحه النفسيه ..... بيكون الانسان مهيأ انه يستقبل مصيره ايا كان .... لو حد عزيز عليه مات بيهيأ نفسه انه غصب عنه لازم يكمل حياته .... لو عنده مرض بيهيأ نفسه ان العلاج هيطول و ممكن مايجبش نتيجه ..... و قيس على كده اى حاجه ...... تقريبا الانسان بيفقد كل احاسيسه ناحيه المصيبه اللى حصلتله .... و كل امله ان مفيش حد يفكره بيها
طبعا الخطوات اللى فوق مش لازم تحصل بالترتيب المذكور لان المسأله بتختلف من شخص للتانى ... برضه كل خطوه ملهاش زمن محدد .... انما برضه متوقفه على الفروق الشخصيه بين كل انسان و التانى
نقطه اخيره ..... انا كتبت البوست ده عشان البوست الجاى انا هكون محتاج فيه شرح الموديل ده بالتحديد .... البوست الجاى هيكون شخصى جدا رغم انى مش بحب اتكلم على اى حاجه شخصيه زياده عن اللزوم لانى شخص مؤمن بالخصوصيه جدا .... بس بجد انا وصلت لمرحله حاسس فيها انى ممكن انفجر لو ماتكلمتش .... حتى لو اتكلمت و محدش سمع .... مش مهم ، المهم انى اكون اتكلمت ..... سلام

المدونات و سنينها

2009-09-25T19:43:00.000-07:00

البوست بتاع النهارده عن المدونات و البلوجز و شويه حاجات موجوده فيها ... هديكوا مثال عشان مانتهوش من بعض من اولها و تكون سكتنا رايقه و على بياض بأذن الواحد القهار ..... طبعا كلنا بنقرى ساعات بوستات و مش بنسيب تعليق عليها ... لاسباب عديده ... منها مثلا ان البوست مش عاجبك ، او انك مكونتش فى حاله مزاجيه تسمحلك بأنك تكتب تعليق ... او جايز مش لاقى كلام تعلق بيه على البوست .... طبعا كلنا عملنا كده و اكتر من مره كمان و اللى يقول ان كل بوست بيقراه بيعلق عليه يبقى بيكدب و الكدب حاجه وحشه و بتضيع الصيام بمناسبه صيام السته البيض .... انا شخصيا فيه مدونات كتير جدا بدخلها و بقرا البوستات اللى فيها و بقفلها تانى .... جميل كده ..... حاجه من اكتر الحاجات اللى بتضايقنى انى الاقى صاحب المدونه حاطط الكاونتر اللى بيبين مين دخل عنده و امتى .... طبعا انت كده اتقفشت يا حلو .... دى مش هتبقى مشكله لو انك و صاحب او صاحبه المدونه ماتعرفوش بعض .... انما بأه لو تعرفوا بعض تلاقى صاحب المدونه بيسأل انت ليه عملت كده و ساعات ياخد موقف منك و ساعات تانيه يزعل منك و ممكن يمسحك اصلا من قايمه معارفه لمجرد انك دخلت عنده و ماسبتش تعليق ..... فبالتالى انا تلافيا للمشاكل دى ببطل ادخل المدونه تانى او لو خلاص هموت و ادخل اروح اعمل سيجن اوت من الجوجل و ادخل عنده عشان ميعرفش انى دخلت .... بس فى الغالب بكسل و بستسهل انى مدخلش اصلا و بكون خسرت مدونه انا بحبها ........ انا مش عارف رأيكوا ايه فى النقطه دى بس دى بتضايقنى جدا
نيجى لنقطه تانيه بتضايقنى بس مش أوى ..... انك تلاقى حد معلق عندك و تدوس على اسمه و تشوف البروفايل بتاعه و تدخل على مدونته تلاقيها للقراء المسموح بيهم بس اللى هو حاططهم عنده ..... انا مش مختلف معاه ... بس انا لغايه دلوقتى مش لاقى مبرر للحركه دى .... يعنى مثلا انت اكيد مش بتكتب اسرار الامن القومى فى مدونتك عشان تقفلها ... ساعات ناس تقولك انها عامله المدونه دى للفضفضه .... ماشى ... بس لو للفضفضه يبقى حاطهها فى البروفايل بتاعك ليه ... عشان تحنسنا مثلا لما نيجى ندخل و نلاقيها مقفوله فى وشنا .... ناس تانيه تقلك اصل انا بتشتم فى التعليقات فعملتها للناس اللى عارف انها مش بتشتم .. طيب يا جماعه الخير فيه حاجه اسمها موديريشن ... يعنى تنشر التعليق اللى يعجبك و اللى مايعجبكش تمسحه ..... سيبك انه مفيش مدون ولا مدونه ماتشتمش قبل كده .. و مع كده مش كلنا قافلين مودناتنا ..... بس برضه عادى
انما اللى بيضايقنى جدا انك تلاقى مدونه كانت مفتوحه عادى و فجأه بأت قاصره على القراء اللى صاحب المدونه حاططهم فى الليست بتاعته .... تبتدى تسأل نفسك ايه اللى حصل ... هو ليه عمل كده ... و شويه تتضايق من صاحب المدونه لو انت تعرفه انه ماضافكش للقراء بتوع المدونه .... و تبتدى تكتيكات مضاده .... انك تضطهده مثلا ... ماتنشرش تعليقاته ... تمسح تعليقاته ... مع ان الموضوع ابسط من كده و فى الاخر مع اننا فى عالم افتراضى الا اننا بنمارس حريتنا على اكمل نطاق فى العالم ده ..... يمكن عشان اغلبنا اجبن من انه يعمل كده فى العالم الحقيقى ... او مثلا احنا على النت بنكون منفصلين عن واقعنا ... يعنى ممكن تلاقى رقاصه عامله عالمه فتوى و ارشاد و العكس صحيح ..... او تلاقى حد مؤدب جدا بس بيمارس دور الصايع على النت و العكس صحيح برضه ..... بس ده نتيجه الازدواجيه اللى احنا عايشين فيها و حاله النفاق العامه اللى موجوده جوانا
حاجه تالته .... تلاقى حد فاتح مدونته عشان يعيش على قفا غيره .... يعنى ملوش اراء خاصه بنفسه خالص .... انما فاتح المدونه عشان يشوف المدونات التانيه فيها ايه و ينتقدها و يكتب بوستات طويله مفيهاش و لا كلمه من دماغه انما بتكون البوست اللى هو قرر يهاجمه المره دى و التعليقات اللى عليه و الهجوم على التعليقات و تحاول تدور على اى حاجه من دماغ صاحب المدونه ماتلاقيش .... و فعلا فيه " مدود " عامل كده و يمكن ناس كتيره تعرفه ..... المدونات دى بتفكرنى بيوسف البدرى .... الراجل ده عامل نفسه شيخ مع انى ماقرتش ليه اى رأى .... كل شغلته فى الحياه انه يرفع قضايا على الناس و ياخد احكام عليهم .... و يقولك انا بدافع عن الاسلام زى ما يكون الاسلام اللى عاش اكتر من 1400 سنه و هيعيش ليوم القيامه مستنى سى يوسف يدافع عنه .... انا طبعا ليا رأى تانى فيه بس مش هقدر اقوله عشان انا بكتب البوست و انا صايم و عايز اكمل صيامى من غير ما افطر
نيجى بأه للنوع التانى من المدونات .... و انا بسميها مدونات المطبطباتيه .... صاحب المدونه فاتح المدونه عشان يعلق عند الناس و يقولهم الله يا ست لو بيعلق عند واحده او غنى يا وحيد لو بيعلق عند واحد و الناس تعلق عنده و نظام نجاملكم فى الافراح و مردودالك يابو ساميه .... و يطبطب على كل واحد شويه و تخرج من مدونته و انت حاسس انك كنت قاعد على حجره و هو بيهشكك كمان ... و برضه تدور على حاجه فى مدونته من دماغه ماتلاقيش ... تحس ان مدونته صفحه الاجتماعيات فى الجرنان ... النهارده فرح فلان .... النهارده ميتم علانه ... النهارده طهور ترتان ابن بلانه .... و على هذا المنوال و المدونه ماشيه و كله عند البقر صابون
مش عارف رأيكوا ايه بس اتمنى انى اعرفه ..... سلام

عبد الحميد الديب

2009-09-23T12:45:00.000-07:00

دع الشكوى و هات الكأس نسكر
و دعك من الزمان اذا تنكر
قد هام بى الاسى و الحزن حتى
كأنى عبله والحزن عنتر
كأنى حائط كتبوا عليه
هنا يا أيها المزنوق طرطر

Show Time

2009-09-20T14:19:00.000-07:00

High School Girl Torn Between Two Brothers ..... Love Sucks

Thou Shall Not Crave Thy Neighbour

Save The Cheerleader , Save The World

Fear Is Luxury

Ask . Imagine . Investigate

حكمه اليوم

2009-09-18T17:29:00.000-07:00

مش مهم تكون فاهم انت بتقول ايه ..... المهم تقوله بصوت عالى و واضح
لو عايز كيلو لحمه ..... ليه تشترى البقره كلها

آخر الااخبار + مقدمه

2009-09-13T16:11:00.000-07:00

البوست الجديد نزل على روايتى و على واحد جامعه .... مستنى ردودكوا
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
كنا خمسه ..... لكن الشيطان لم يكن سادسنا .....لم يكن يحتاج ان يكون سادس لانه زرع بداخل كل منا قبس من روحه اذا كان له روح كأرواحنا
كنا خمسه ......... كان غرضنا التسليه لا أكثر .... لم نكن نعرف ان هذه التسليه ستقلب حياه كل منا اذا بقى لنا حياه بعدها
كنا خمسه .... لكننا لم نعد خمسه .... لم يتبقى غيرى و أعرف اننى سوف اصبح ماضيا بعد قليل ... كل الذى اتمناه ان يتبقى لى بعض من الوقت لاخط ما حدث
كنا خمسه ..... لكن فى البدء لم نكن خمسه .... البدايه كانت ..... يتبع

اعرف شخصيتك من ايميلك

2009-09-08T10:13:00.000-07:00

الفراغ حاجه وحشه جدا ... دى حقيقه معروفه عند كل الناس ..... المهم انى كنت قبل ما اعمل العمرة كان عندى حاله من حالات الفراغ دى .... مش لاقى حاجه اعملها ... الهارد بتاع اللاب اتملى افلام و مسلسلات بس مكسل اتفرج على اى حاجه منها مع انى لازم اتفرج عشان ارمى اللى اتفرجت عليه عشان انزل الجديد ، و مع كده مش بتفرج عشان نفسى مش جايبانى .... العمرة لسه كمان يومين و اليومين هنا بيعدوا بسنتين ... انزل اخرج ... مليش نفس برضه
المهم فتحت الايميل بوكس بتاع الياهوو و قلت انظمه .... انا فى حياتى الشخصيه شخص ابعد ما يكون عن التنظيم انما فى الكمبيوتر و النت و المكتبه بتاعتى تلاقينى مرتب كل حاجه ... حتى لو اتهايئلك انى مش مرتبها بس الحقيقه انى بكون مرتبها بترتيب انا بس اللى عارف نظامه ..... نرجع لموضوعنا .... انا عندى ايميلات على الياهوو و الهوت و الجوجل ... بس اكتر حاجه بحبهم فيها و بستخدمها كتير جدا هى الياهوو و حتى كل معارفى اللى بكلمهم بكلمهم على الياهوو .. مش بلجئ للهوت او الجوجل الا للشديد القوى .... قلت اشوف فيه كام رساله فى البوكس نفسه مش فى الفولدرات اللى انا عاملها و حاطط جواها شويه ايميلات ... لقيتهم تقريبا 7 الاف ... يا حوسه ... هقعد ارتب فيهم دول اد ايه ... انا كده عايز شهر او على الاقل اسبوعين عشان بس اكون قريت عناوينهم و عرفت هادخلها فى انى فولدر من الفولدرات اللى انا عاملها ده غير انى اكيد هحتاج اعمل فولدرات جديده ..... المهم لقيت رسايل كتير من الفيس بوك ، سواء ريكويستات او رسايل خاصه ده طبعا غير التاجات اللى انا بكرهها عشان بتملى الايميل على قله فايده و الانفيتز سواء ايفينتز او جروبات جديده .. ابتديت الم كل الرسايل دى فى فولدر .... شويه و قلت انا لازم الم التعليقات اللى بتيجى على المدونات بتاعتى فى فولدر لوحده و فعلا لميتها و هكتب عنها فى بوست مخصوص حوالين التعليقات دى و هيكون بوست ضرب نار و اراء صريحه و ناس كتير هتقاطعنى لما تقرى البوست بتاع التعليقات ده ... شويه و لقيت شويه ايميلات من الشغل ابتديت المها بس دول كانوا حبه صغيرين مش مستاهلين ... و شويه و لقيت ايميلات بعتها لنفسى من ايميلات تانيه عشان افكر نفسى بحاجات بدل ما انساها ، طيب ما الاسهل اعملها ريمندر على الموبايل و كده كده هفتكرها بس تقول ايه
المهم انا قعدت يوم تقريبا فى فرز الرسايل و تصنيفها و ترتيبها و قلت كده فل و عملت حاجه شغلتنى و ضيعت يوم ........ صحيت تانى يوم و لسه فاضى و عندى نفس حاله الفراغ .. طيب اعمل ايه .... قلت ابتدى ابص على الرسايل بأه و اعمل فلاج للمهم فيها عشان لما احتاجه ماقعدش ادور عليه و يطلع عينى ..... تخيلوا بأه بتفرز 7 الاف رساله عشان تشوف المهم منها ايه و اللى مش مهم ايه و تعمل فلاج للمهم و اللى مش مهم تنفضله .... طبعا خدت يوم كمان فى الموضوع الشائق ده بس خلصته .... فاضى بأه مش ورايا حاجه
المهم انا لما عملت الموضوع ده طلعت بفكرتين .... الاولانيه البوست بتاع التعليقات اللى ربنا يسهل و انشره بس بجد ده محتاج مجهود كبير و لما تقروه هتعرفوا ليه ... و الفكره التانيه عامله زى الاختبارات بتاعت الفيس بوك .... اختبار اعرف نفسك من ايميلك ....... و الاختبار ده فكرته سهله جدا .... احنا اغلب حياتنا على السايبر مرتبطه ارتباط وثيق بالنت ... انا مثلا لقيت انه اخر شهرين ليا كنت مدمن فيس بوك اكتر من الاربع سنين اللى فاتوا كلهم ... و الفتره اللى قبل كده كنت مدمن المدونات و التعليقات ..... و الفتره اللى قبليها كانت المواقع الاخباريه و الجروبات و المنتديات ..... و اول فتره كنت عامل الايميل منظر عشان اقول للناس انه عندى ايميل و كان فااااااااااضى و ابيض من قلب الخسايه
السؤال بتاع الاختبار هو سؤال واحد بس .... من ايميلك انت شخصيتك ايه ..... معلش يمكن يكون بوست سخيف بس السبب فى كده انه اتكتب فى حاله الفراغ ..... مستنى ردكم ..... سلام

يوم المطعم الايطالى

2009-09-02T04:12:00.000-07:00

زى ما ناس منكم عارفه انا وصلت مصر يوم الاربع اللى فات اللى كان 5 رمضان ..... طبعا البلد لما رجعت لقيتها زى ما سبتها ، حاجتين بس اتغيروا .... التاكسى الابيض الجديد اللى انا عرفت انه تاكسى تبع وزاره الماليه و ده طبعا يخلينى اشك فى نوايا التاكسى ده لانه كفايه انه جاى من ريحه الغالى ابن الغالى .... و الحاجه التانيه العربيات الاسبيرانزا ال1600 سى سى ملت البلد لدرجه انى سمعت انها بأت بالحجز عشان انتاج المصنع مش مكفى المطلوب منها مع انها عربيات خبؤه أوى و فيها مشاكل كتير ..... المهم .... بعد ما وصلت بيومين هل علينا يوم الجمعه و صديقه عزيزه قالتلى تعالى افطر معانا ..... انا وافقت بحسن نيه .... طيب يا بنتى هنفطر فين ... قالتلى انا هتصرف .... انا عايز اقولكوا انى فضلت لغايه يوم الجمعه الساعه 5 العصر مش عارف انا نازل افطر ولا لا .... و اقولها يا بنتى حجزتى فين تقولى فى مطعم ايطالى فى المعادى ... طيب يا بنتى المطعم ده انا معرفوش و لو على الاكل الايطالى فيه مطعم سبارو و فيه مطعم كارينوس و الاتنين كويسين مع انى انا شخصيا بحب سبارو اكتر .... قالتلى لا المطعم ده كويس .... المهم قالتلى انه فيه ناس صحابها جايين ولد و بنت ... انا قلت عادى و رمضان يحب اللمه ... انزل ادور العربيه ، مابتنطقش ... احاول معاها يمين شمال مفيش ... مع انى قبل ما اسافر كنت رافعها عشان ارجع الاقيها شغاله .... قلت مش مشكله و خدت تاكسى من فيصل للمعادى .... و بلاد تشيلنى و بلاد تحطنى لغايه ما وصلت عند المطعم ..... اتصل اسألها انتى فين تقولى فى الطريق ... المكالمه دى كانت اصلا الساعه 6 و ربع قبل 10 دقايق من المغرب ... و تقولى ادخل اقعد جوه مع محمد اللى هو الولد اللى معانا ... اقولها هعرفه ازاى ... تقولى الوحيد اللى هيكون قاعد على ترابيزه لوحده فى المطعم و هتعرفه لان المطعم مليان و هو لوحده .... اضرب بعينى جوه المطعم الاقيه فاضى خالص من جوه زى قلب المؤمن المطمئن كده و مفيش حد .... المهم قلت مش داخل و هستناها لغايه ما تيجى ... دقيقه و لقيت واحد بيقولى عمرو مش كده ، قلتله محمد ؟ قالى اه ... قلتله انت فين يا راجل و دخلنا سوا ... المهم قلنا للوايتر على اسم الحجز و بنسأله نقعد فين قالنا فى اى مكان يعجبكوا ... طبعا ... ما اصل المطعم فاضى و مفيش غيرنا ... المهم المغرب اذن علينا قمنا صلينا و رجعنا ... محمد مسك المنيو و لسه هيختار الوايتر قاله ان الانسه اللى عامله الحجز اختارت الوجبه بالفعل .... يعنى هناكل غصب عننا و مش هنختار ... ماشى مش مشكله .... اختارت ايه يا بنى ... لقيت الولد بيقول اختارت بسله و كباب حله و رز و جلاش .... انا ساعتها و على رأى محمد حسيت انى رايح افطر عند خالتى .... سيبكوا انى اصلا معرفش ان المطاعم الايطالى بأت بتقدم بسله و كباب حله و جلاش فى اكلها .... ساعتها افتكرت اعلان كوكاكولا زيرو بتاع انك تاخد مراتك مطعم سوشى و تلاقى الشيف بيعمل ملوخيه .... المهم سكتنا و شويه و محمد قال للشيف انا مش بحب البسله عايز باميه مكانها .... و شويه و جت الانسه اللى اختارت و قعدنا نتريق عليها لغايه مازهقنا اصلا .... المهم شويه و لقيت واحد صاحبنا بيتصل بيها و هى راحت قالتله يجى على المطعم يفطر معانا ... انا كنت عايز اقوله مايجيش عشان مايكلش باميه و جلاش معانا ... المهم هو جه .. طبعا احنا قاعدين مستنين مرضناش ناكل او بالاصح الوايتر مارضيش ينزلنا الاكل لغايه ماصاحبنا يجى عشان نبقى لمه و عيله و احده و ناكل سوا و لما جه صاحبنا قعدنا شويه كمان لغايه ما الوايتر نزلنا الاكل .... اه نسيت اقولكوا .... الوايتر اللى كان هناك كان لسه مستلم الشغل فى اليوم اللى رحنا فيه و مكنش فيه غيره ... لدرجه ان صاحبه المطعم و جوزها كانوا هما اللى بيعملوا الاكل ..... مطعم ايطالى ايطالى يعنى .... المهم كلنا و خلصنا اكل و حمدنا الله الذى لا يحمد على مكروه سواه ... و قعدنا ... شويه و لقيتها بتقولى ان البنت اللى معانا عيد ميلادها النهارده و انها عايزه تروح تجيبلها تورته .... ماشى يا ستى ... طبعا كان فى خلال الفتره دى لقيت بشر كتير جت ماكنتش اعرف منهم غير 3 بس ، بنتين و ولد ... و سبحان الله كنت بسترخم التلاته ... يمكن بنت فيهم كنت مش بسترخمها أوى ، بس هى بأت مرتبطه فامش هينفع اقعد اهزر و كده .... المهم قال يعنى البنت اللى عيد ميلادها النهارده مش واخده بالها ان عيد ميلادها النهارده ... لقيت البنت اللى عازمانا على المطعم " الايطالى " بتقولى انا هقول انك عايز تشترى حاجه و نروح نجيب التورته و نرجع ... انا قلتلها شغال ... المهم و احنا فى الطريق بسألها سؤال عابر .. فين المحل اللى انتى حاجزه التورته منه ... تقولى انا مش حاجزه تورته .. امال يا بنتى هنجيبها منين .. قالتلى من اى حته ... يابنتى انتى مش بتصومى زينا و عارفه اننا رمضان .. قالتى أه ... قلتلها كل المحلات بتعمل حلويات شرقيه و نادر اللى بيعمل جاتوه و تورت ... قالتلى لا هنلاقى ... قلتلها طيب ... المهم طلعنا على شارع 9 و دخلنا لابوار و سألنا على تورته ، طبعا الناس بصولنا كأننا عبط و قالوا مفيش .. و شويه واحد منهم تطوع و قال فيه تورته ايس كريم ... قلنا لا ... دخلنا محل تانى برضه مفيش ... المهم رجعنا على المطعم " الايطالى " و لما دخلنا لقينا الناس قلت ... انا بسأل قالولى فيه ناس راحت تصلى التروايح .... قعدنا و شويه و جت الناس دى و جت ناس تانيه ... و بعدين صديقنا مختار اقترح علينا مكان نجيب منه تورته و فعلا رحنا لقينا هناك تورت مش تورته واحده ... طبعا صاحبتنا اللى كانت مش لاقيه و لا تورته فى المعادى لما لقيت تلاجه مليانه تورت قعدت تتأمر عليهم و هتختار انى تورته ... يا بنتى ماتمثليش ، احنا كنا مش لاقين اصلا ، هاتى اى واحده و خلصى ... و نعزم عليها بفلوس تقول لا .. طيب يا بنتى نشارك معاكى ... برضه واخده الدنيا بصدرها و تقول لا ... انتى حره ... المهم رجعنا على المطعم .... نسيت اقولكوا اننا كنا دفعنا شيك الفطار اللى كان بمبلغ 400 جنيه ل 5 افراد ... تخيلوا انى اكلت باميه و كباب حله و جلاش ب 400 جنيه .... طبعا دفعنا و احنا ساكتين ( بس ساكتين ادام الوايتر بس ) لما مشى قعدنا نتريق على البت طبعا .... و صاحبه عيد الميلاد البنت قايلالها انها عازمها ... تقريبا فاكره اننا هندفع 20 جنيه زى رحلات القناطر كده ... لما لقت اشيك ب 400 راحت بايعه البت و قالتلها ادفعى تمن اكلك ... الحاجه اللى تضحك ان البنت دى اصلا ماكلتش حاجه ... يمكن شربت كبايه كركديه و كلت معلقتين سلاطه بس و سابت الباقى ، و مع كده دفعت زيها زينا .. سبحان الله و له فى خلقه حكم ... طبعا التورته اتقطعت و غنينا و كلنا و هزرنا و قمنا روحنا و انا لغايه دلوقتى بذل البنت بحكايه المطعم الايطالى دى و تقريبا هفضل اذلها لغايه ما اموت .... نسيت برضه اقولكوا ، انا جالى زهايمر ولا ايه ... الشيك التانى بتاع البيبسى و الشاى و القهوه و الحاجات بتاعت التورته لما جه جه برضه ب 350 جنيه ... تحس اننا قاعدين فى الشيراتون مثلا ... بس مختار اتصرف و راح و خلى الشيك ب 155 جنيه بدل 350 و جنيه و برضه دفعنا و احنا ساكتين .... انا فى اليوم الجميل ده نسيت اقولكوا على احلى حاجه كانت موجوده فيه .... قرد صغير كان معانا و كان قالب حياتنا جحيم و احنا قاعدين .... بس هخلى حكايه القرد الصغير ده للمره الجايه ...... سلام

اخر الاخبار

2009-08-06T07:53:00.000-07:00

البوست الجديد نزل فى واحد جامعه يا جماعه

ازاى نسامح بعض

2009-07-29T09:28:00.001-07:00

شوشو من يومين كانت بتقولى انها عايزه نعمل بوست مشترك ، حاجه كلنا نتكلم عليها فى وقت واحد و ننزل ليها بوست واحد بس كل واحد يكتب من وجهه نظره ... انا طبعا وافقت لان دى فكره جميله ..... المهم امبارح قالتلى انها اتفقت على البوست ده و انه هيكون النهارده و ان موضوعه هيكون حوالين التسامح و ازاى نسامح بعض .... يا ريت كل الناس بتحط افكارها النظريه مطرح التطبيق العملى بسرعه كده زى شوشو كان حالنا هيبقى غير كده
المهم بالنسبه للبوست فده صعب عليا انى اكتب فيه ...... انا من مده قريبه لسه خارج من موضوع منيل ..... الموضوع نفسه ماوجعنيش اد ما ردود افعال ناس وجعتنى .... انا فى الغالب بيكون تنبئى بردود افعال الناس صح و نادرا ما بغلط ... مش عشان انا مكشوف عنى الحجاب ، انما عشان انا دايما بتوقع الاسوأ من الناس و الناس مابتخيبش ظنىى ...... المهم انا قلت لشوشو انى آخر واحد اقدر اكتب فى موضوع التسامح ده ...... لانى بطبيعتى انسان مش متسامح .... بيقى صعب عليا انى انسى ..... انا طبعا عارف ان المسامح كريم ، بس انا لست بهذا الكرم فى الموضوع ده ..... حتى فى القرآن كل آيات العفو جت بعد آيات القصاص ... يعنى انت ربنا بيقولك انه الاحسن انك تسيب ربنا ياخدلك حقك ، بس فى نفس الوقت لو انت عايز انك تاخد حقك بأيدك فده مش غلط ..... بس مش معنى كده بأه انى فى خلال الفتره دى بقعد على نار ....... و نظام هعمل ايه فيهم الخونه دول ..... و اه بس لو اتلايم عليهم ..... و بكره يشوفوا ..... انا المسأله عندى ابسط من كده ...... انا اتعلمت من زمان ان الدنيا دوارة ....... يعنى اللى بيعمل فيك حاجه النهارده بيجى بكره و انت بتقدر تردها ، سواء الحاجه دى كانت خير او شر ..... الفكره ان اغلب الناس مابتقدرش تصبر ، بتبقى مستعجله و عايزه تاخد حقها وقتى ....... ناس كتير بيقولوا عليا قلبى اسود و منفسن عشان مبقدرش اسامح .... بس الفكره انك تسامح و انت تقدر تاخد حقك غير انك تسامح عشان مفيش حاجه تعملها ..... و انا اكتر حاجه الاحساس بالعجز ...... يعنى انا ممكن اصبر اصبر لغايه ما يجى الوقت اللى اقدر آخد فيه حقى ... بس ساعتها كل اللى بعمله ان الشخص اللى ظلمنى ده مش بعمل فيه زى ما عمل فيا .... انا ساعتها بقوله انا دلوقتى اقدر اخد حقى منك بس انا هسايبك لانك مش من مستوايا و انا لو عايز انتقم انتقم من حد من مستوايا مش اقل منى .... الاحساس اللى بيحسه بالدونيه ده و انه ميسواش حاجه و قهرته هو ده بيكون انتقامى منه ..... انا صريح جدا فى البوست و مش بحاول ازوق نفسى ولا اكدب ولا اتجمل
و اخيرا بمناسبه الصوره انا عايز اقول حاجه تعليق عليها ....... انا اسف بس مش هقدر اسامحكوا ........ سلام

المرساه

2009-07-21T16:41:00.000-07:00

كل واحد فينا اكيد حس فى لحظه من اللحظات انه ضايع و تايه و مش عارف يرسى على ارض ... الاحساس ده بايخ جدا .... و معاه ممكن تجيلك احاسيس تانيه ..... زى مثلا انك تسأل نفسك انت عايش ليه .... لو مت بكره مين اللى هيفرق معاه الموضوع ده .... و ممكن الاحساس ده ياخدك فى سكه تانيه خالص و اخر السكه دى الكفر و العياذ بالله ...... و ممكن ياخدك فى سكه اللى يروح ميرجعش .... اصل اللى ملوش بر يرسى عليه ممكن يدور على بر بمعرفته .... يمشى فى سكه بنات ( او تمشى فى سكه ولاد لو انتى بنت ) ... سكه حشيش و ميه و مخدرات لانك فى الاخر هتحس ان مفيش حاجه فارقه معاك و اديك بتجرب يمكن تلاقى البر بتاعك .... و ممكن تخليك تنتحر

طبعا احساس الضياع ده ليه كذا وجه .... يعنى مثلا ممكن تحس انك فجأه مهم و ان الدنيا بتتمحور حواليك .... او تحس انك ولا اى حاجه ....... تتخيل نفسك مثلا اخبارك مهمه تنزل فى الصفحه الاولى من الجرايد القوميه .... او تتخيل ان حياتك ممله و رتيبه ...... تتخيل نفسك دايما مشغول .... او برضه تتخيل نفسك فاضى لدرجه الفراغ ..... تبقى سعيد جدا بأنجازات متهمش حد غيرك ... و ساعات برضه مايبقاش عندك ولا انجاز ..... بس كله ضياع فى الاخر
الاجانب عندهم حاجه فى ثقافتهم اسمها المرساه ... يعنى بالبلدى يكون ليكى نقطه ثابته ترجع ليها لما الدنيا تضيق بيك .......... حاجه كل ماتضيق الدنيا فى وشك تفتكرها عشان تحس انك ليك حاجه فى الدنيا تستاهل انك تعيش عشانها و تفكر الف مرة قبل ما تعمل اى حاجه غلط
احنا برضه عندنا موضوع المرساه ده بش مش بنفلسفه كده زى الاجانب ..... احنا ناس بتجيب من الشكمان عدل ......... فى ناس المرساه بتاعتهم هى الوازع الدينى و الدين .... و ناس تانيه المرساه بتاعتهم بتكون متمثله فى شخص او عده اشخاص ..... و ناس المرساه بتاعتهم بتكون حاجه معنويه زى فكرة محدده او ذكرى معينه

يا ترى انت المرساه بتاعتك ايه .... مستنى ردودكوا على البوست ....... سلام

وجدى و مشروع اللانجيرى

2009-07-17T05:59:00.000-07:00

البوست ده نازل هنا كأسثناء عشان مش عارف انشره على واحد جامعه

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

قلت قبل كده ان اكتر شخصيتين جالى كومنات عليهم هما فناجيلى و وجدى المعروف وسطينا بوجدى مشاريع عشان مشاريعه الكتير اللى مش بتخلص و حكيت على مشروعين قبل كده من مشاريعه هنا و هنا ..... المهم انا النهارده جاى اوفى بالوعد لما وعدتكوا انى هاحكى على مشروع جديد من مشاريع وجدى
المشروع ده وجدى ابتداه و هو فى اخر سنه كليه .. سنه رابعه دابلر و استمر فيه سنه بعد كده تقريبا او اقل شويه .... فى يوم لقيت وجدى جاى بيكلمنى على النظم الاداريه للمشاريع و ازاى ممكن يبقى فيه شكل هرمى و شكل شجرى و اشكال تانيه كتير كنت شويه منهم اعرفهم و الباقى عرفته بعد كده منه و ساعه لما اشتغلت فى مجال الدعايه لاننا بنعتمد على النظم دى فى شغلنا بشكل او بأخر .... المهم بعد ما وجدى لقانى استكيفت من كلامه تمام التمام ... سألته هو المشروع ايه يا برنس و الكلام على ايه .... قام قالى انا قررت اعمل مشروع لانجيرى .... طبعا انا مكنتش هادخل مع وجدى لانى اتعلمت من مشروع الارانب و من مشروع لبس المدارس اللى كان مع ايمن انما كنت بسمع من قبيل العلم باشئ و بعدين يعنى صاحبى جاى يفضفضلى اقوم انفضله ... ده حتى تبقى عيب
المهم انا قلته ربنا معاك يا ريس و شد حيلك .... وجدى ابتدى يعمل الخلايا الشبكيه بتاعته عشان المشروع و جدير بالذكر ان كل اللى دخلوا كانوا بنات لاننا كولاد يا اما مش هندخل مع وجدى مشاريع للاسباب السابق ذكرها او حتى لو فكرنا ندخل ، هنبيع لانجيرى ازاى كولاد لبنات ... صحيح احنا بجحين و وشنا مكشوف بس مش للدرجه دى ( و محدش يفتكر انى بلقح على وجدى ... فى النهايه هو المدير و المؤسس و صاجب حقوق الملكيه الفكريه ) .... المهم المشروع مشى حلاوة مع وجدى ( مكنتش اعرف اد ايه البنات بتهتم بالحاجات دى مع ان الحاجات ساعه الجد والله مابتفرق معانا ) و وجدى ابتدا يجيب كتالوجات و يروح لمصانع و محلات يتعاقد معاها ... بس كان بيشترط ان الكتالوجات تبقى على موديلات بلاستيك او متصورة مش على بنات ( عشان احنا مش عايزين ذنوب ... اللهم ما قوى ايمانك يا اخ وجدى ) .. و البليه لعبت معاه و ابتدا يحسرنا على الفرصه اللى ضيعناها لما مدخلناش معاه .... المهم هو خلص الكليه و اشتغل شويه فى المشروع من بره و كان بيفكر يفتح محل .... و فى يوم لقيته جاى الجامعه و معاه شنطه بس مليانه على الاخر ... بقوله ايه يا وجدى انت مسافر ولا ايه و ايه اللى معاك فى الشنطه دى ..... و يا ريتنى ما سألت .... لقيته قالى انه جايب اوردرات يسلمها للبنات اللى طلبوها فى الجامعه .... و كأثبات لكلامه فتح الشنطه و ابتدى يطلع و يفرجنى .... احنا ساعتها كنا قاعدين قدام شباك شئون الطلبه بتاعنا ، اللى هو فى المبى الرئيسى بتاع كليتنا ، اللى هو عند السلم اللى بيودى لتجارة و نص الجامعه التانى .... يعنى تقريبا نص الجامعه بتعدى من عندنا .... و وجدى عمال يطلع قمصان النوم و يفرد و يفرجنى ... و الناس تعدى علينا و تبص و انا هموت و اقوله خلاص يا وجدى ... يقولى لسه .... و شويه يقولى انا هاوريك حاجه جديده و يقوم مطلعلى اندر وير بينور و واحد بيطلع مزيكا و واحد ليه قفل لما تصقف يقوم القفل مفتوح ( و ساعه الجد هيروح واقع على طول ) ويقولى زى اللى منه شلبى كانت لابسه فى الفيلم بتاع احمد ادم ... و انا اقوله خلاص يا عم شيل الحاجه و يقولى لا لسه هافرجك .... يا عم انا اكتفيت هخلاص ... شويه و الناس تكون ماشيه و تيجى تهدى عندنا ... الولاد يضحكوا و البنات يا يبصوا بقرف يا اما يقعدوا يتودودا ( مش عارف بيقولوا ايه ) ... وانا اقوله كفايه يا عم هيتعملنا قضيه آداب و انا هاضيع عشان انا لسه فى الجامعه انما انت خلصت ... يقولى متخافش هاشغلك عندى .... يابنى طيب عشان الحاجه تفضل بكيسها و انت بتديها لاصحابها ... يقولى هأطبقها لما اخلص .... المهم فى الاخر انا قمت و سيبته ..... بعد كده وجدى توقف عن المشروع ... بسأله ليه ... قالى البنات لما خلصوا جامعه كل واحده سابت المشروع و انا مش عارف اشغله .... يعنى هابيع لمين .... قلتله على رأيك ... و كانت فرصتنا عشان نثبتله اننا كنا صح لما مدخلناش المشروع ... بس تفتكروا وجدى سكت على كده .... ابدا .... عمل مشروع تانى .... بس ده للمرة الجايه ..... سلام

الخط الاحمر

2009-07-10T06:10:00.000-07:00

للى مش عارفين او مش مهتمين انا بكتب روايه و بنشرها .... طبعا انت مهما حاولت لا يمكن ترضى كل الناس او تخلى كل الناس تجمع عليك لانه ربنا عز و جل نفسه مش كل الناس مجمعه يبقى ازاى انا البنى ادم هاخلى الناس تجمع عليا ..... و جايز انا اسلوبى زفت و روايتى دى مش عاجبه حد غيرى
المهم انا نسبه كبيره من التعليقات اللى جاتلى بتطالبنى انى اقلل شويه من الالفاظ اللى انا بستخدمها و كنت مستغرب جدا من الموضوع ده لان انا شايف ان اللى انا بكتبه مش حاجه اوفر للدرجه الكبيره دى و كنت بأرد عليهم و كنت مختلف معاهم جدا و ساعات كنت بأتريق على ناس منهم ... يعنى مثلا لما واحده تقولى ان جو الروايه بتاعتى المقزز بيفكرها بجو روايات نجيب محفوظ اللى عمرها ما فكرت تقراها ، طيب لما واحد زى خلص روايات نجيب محفوظ كلها قبل ما يكمل 17 سنه المفروض يرد يقول ايه .... بس زى ما ساره قالت ان الكارما مش بتسيبنا فى حالنا ( هى مش قالت كده بالظبط انما انا باتبلى عليها ) ..... الكارما دى ساقتنى انى ادخل على مدونه و منها على مدونه تانيه و منها على مدونه تالته ...... المدونه التالته دى مدخل البوست النهارده .... اولا انا زى ما قلت قبل كده و بقول دايما و هافضل اقول على طول انى مقتنع بمبدأ الحريه الشخصيه و انك حقك تقول اللى انت عايزه و انا حقى انى اتفق معاك او اختلف ، انى اقتنع بيه او ارفضه
المهم المدونه دى عباره عن روايه بس ... ابتديت اقراها عادى ... شويه و لقيت فيها الفاظ واضحه و صريحه بغض النظر عن تحفظى على استخدامها بشكل عام بس فى الاخر مدونته و هو حر فيها و انا لو مش عاجبنى ممكن امشى و خلاص .... شويه و لقيت تلميح للسخريه على الاديان و التلميح واضح بدرجه انك مينفعش تقول انك فهمت غلط او انك انت اللى بتلكك لصاحب المدونه .... شويه و التلميح بأه تصريح .... الشخص ده اتريق على الاسلام و المسيحيه ... على سيدنا محمد و على سيدنا عيسى ... يعنى مينفعش تتهمه انه منحاز لطرف على حساب طرف .... هنا لازم اعترف انى مش مستريح خلاص بس مكمل عشان اعرف نهايه الروايه الخرا دى ايه ( اعتذر عن استخدامى لهذا اللفظ بس ده اكتر لفظ محترم ممكن استخدمه هنا ) ... شويه و الهجوم انتقل من الهجوم على الاديان و الانبياء للتهجم على الذات الالهيه نفسها .... هنا اتفاجأت و الحقيقه انى كان بقالى زمن مفيش حاجه فاجأتنى من زمن
بعد ما خلصت الروايه قعدت افكر شويه .... سبب المفاجأه الاساسى اللى حصلتلى ان الروايه تعدت خط احمر عندى عمرى ما اتعداه حتى لو حصل ايه ... انا ممكن اختلف مع اشخاص .. ممكن اختلف مع سياسات ، ممكن ادخل فى صراعات ..... بس لما يوصل الموضوع للاديان و الانبياء و ربنا يبقى كده خلاص مفيش كلام .... انا شخص عقلانى جدا .. بأستخدم عقلى فى كل حاجه .... بس فى حاجات لازم تؤمن بيها من غير ماتشوفها ... غيبيات ... مسلمات .... سميها زى ما تسميها ، بس لازم عشان ايمانك يكتمل تؤمن بيها ... انا هنا مش باتكلم على حاجات بالنسبه لينا احنا بس كمسلمين ، او حتى مسيحين ... انما اى دين او ديانه او حتى فكر معين فى نسبه من الغيبيات لازم تؤمن بيها
هنا ابتديت افكر فى الناس اللى كانت بتعلق عندى و انا كنت مش معجب برأيهم ..... لقيت نفسى بأقول اكيد الروايه و الكلام اللى فيها داست و عدت خط احمر بالنسبه ليهم عشان كده كانت تعليقاتهم بالشكل ده ... و انى لازم اقبل الرأى الاخر ... ارد عليه .... و مش لازم صاحبه يقتنع باللى انا باقوله
يعنى المسأله من اولها نسبيه .... متوقفه على مكان الخط الاحمر بتاعك مش على اى حاجه تانيه .... يا ترى انتوا بأه الخط الاحمر بتاعكوا ايه ؟؟ ...... مستنى ردودكوا .... سلام

التطرف و قضيه مروة

2009-07-07T07:50:00.000-07:00

بقالنا اسبوع تقريبا او اقل شويه بنتكلم على السيده مروة الشربينى الله يرحمها .... قريت كلام كتير فى المدونات و بره المدونات حواليها .... الاسم اللى اشتهرت بيه هذه السيده هو شهيده الحجاب .... ناس كتير مع الاسم و ناس كتير بتعارض الاسم ده و شايفه انه حصر للحقيقه فى نقطه واحده خاصه بالاسلام و بس ...... عموما انا فى المواضيع اللى بتحصل برة مصر بحاول اتابع الموضوع من وجهه نظر خارجيه ، مش عشان انا مش وطنى ولا حاجه ... انما فكرة ان وكالات الانباء العالميه بيكون ليها Code Of Honor و بيتعاملوا مع اى موضوع بطريقه محترفه لا عواطف فيها ، بعكسنا احنا الشرقيين عموما اللى مش بنقدر نفصل بين عواطفنا و بين شغلنا فى اغلب الاوقات
مبدئيا اسم شهيده الحجاب ده موجود فى الصحافه الغربيه مش احنا اللى اخترعناه ، لانهم معترفين ان سبب الجريمه اللى حصلت هو التطرف العنصرى الدينى مش اكتر ولا اقل ... يعنى الراجل الالمانى اللى من اصل روسى ده شتم مروة عشان حجابها اللى هو دلاله اسلامها و هو شاف انه دلاله على ارهابها ..... و بعد كده الموضوع تطور فى المحكمه لغايه ما مروة توفت من الطعنات اللى بلغ عددها 18 و ده عدد كبير و محتاج وقت و مستغرب ان الراجل جوه مبنى المحكمه لقى الوقت الكفايه انه يضرب مروة 18 مرة من غير مايتدخل اى حد من امن المحكمه زى ما يكونوا بيتخانقوا فى الشارع مش فى قاعه محكمه
انا مش هاتكلم فى الموضوع لانه اتغطى من كل الجوانب و الكلام فيه مش هيعمل اكتر من انه يزود الوجع اللى احنا كلنا حاسيين بيه كمسلمين و كمصريين كمان .... انا هاتكلم على نقطه واحده بس هى نقطه التطرف مش اكتر .... و انا قصدى على التطرف اللى موجود فى البلوجز
طبعا الاغلب الاعم كان هى نقطه محورة الموضوع حوالين الاسلام ، و سواء شئنا ام ابينا ده صح لان سبب الجريمه الاساسى هو حجاب مروة ... بس تصوير الموضوع انه هجوم على الاسلام ككل مش حاله فرديه انا شايف هنا انه تهويل مش فى حجمه ... لانى عشان اعتبر الموضوع حاله عامه بيتطلب ان الموضوع يكون متكرر بشكل كبير مش مجرد حالات فرديه و ده مش اللى حاصل هنا ، لانه برضه شئنا ام ابينا اغلب الاجانب ( و انا بقول اغلب مش كل ) عندهم احترام للاخر بغض النظر عن الاخر ده ، و ده كان واضح فى ان اللى بلغوا الشرطه كانوا الاجانب الالمان مش مروة نفسها ...... طبعا استغلال وفاه اى انسان لاثبات وجهة نظر ما ده غلط ، بس انا يمكن اكون فاهم الموضوع لان اولا مروة مسلمه و ده رابطه بينى و بينها من غير حتى ما اكون اعرفها ، ثانيا انها مصريه زينا كلنا و ده رابطه تانيه ... ممكن افهم ان الناس كتبت تحت تأثير الصدمه و الغضب و انا باحترم النقطه دى لان فى الاخر مينفعش الواحد يكون محايد بنسبه 100 % و لازم يكون فيه بعض التحيز لاننا فى الاخر بشر مش مجرد مكن ممكن يتطفى و يشتغل بزرار
الحاجه اللى انا مش قادر افهمها و اتعشم انكم تسامحونى لو كان فى الفاظ خارجه او هتجرح شعور حد بس بجد حاولت انى اشيلها اكتر من مرة من البوست و مقدرتش.... الحاجه اللى انا مش قادر افهمها ان فى ناس حاولت تقلل من الموضوع و خدوا الموضوع بأستخفاف شديد و اتخذوا الموضوع ذريعه للهجوم على الاسلام نفسه ... يعنى بالبلدى استغلوا الموضوع للترويج عن وجهة نظرهم ... ده حقهم انهم يقولوا اللى هما عايزينه .... بس انا شايف ان اللى حصل ده اقل لفظ يتوصف بيه هو وساخه و ملهاش حدود كمان و الناس اللى عملت كده ناس وسخه و كمان بنت وسخه عشان اهاليهم معرفوش يربوهم او على تقدير ممكن انى اقول عليهم كده لان الولد الوسخ يجيب لاهله النعيله على رأى المثل .... يعنى انى استغل حادثه وفاه انسان و انا هنا مش باتكلم على انها ست او راجل .. مسلمه او مسيحيه .. انما هى فى الاخر انسان .. و اخد الموضوع ده و احرفه و مش كفايه كده انما كمان اسخر سخريه واضحه من الموضوع ده فده وساخه ....... يعنى واحده بتعلق و بتقول انها مش شهيده عشان الشهيد هو اللى بيدافع عن قضيه ، ماشى صح جدا ... بس يا ترى مروة كانت بتعمل ايه جوة المحكمه لو ماكنتش بتدافع عن قضيه و عن حقها ، هى المحكمه مثلا راحتها كرحله فى الويك اند ..... واحد ابن مره وسخه بيقول بكره هنسمع عن شهيده المنديل ابو اويه ، ده لو مش تريقه صريحه يبقى اسمها ايه .... واحده بنت مره اوسخ بترد و بتقول ناقص اللى يموت من جرعه هيروين يقولوا عليه شهيد ... و تلاقى واحد طلع زى الجيصه و يقولك يا جماعه دى مش تريقه ولا سخريه انما مجرد رأى .... اشخر انا بأه ولا امضيلهم على احا زى اخوانا الاسكندرانيه بيقولوا ...... انا اعرف انى لما اتريق على واحد اتريق على حد يقدر يرد عليا ....... انما الشخص ده بين ايدين ربنا دلوقتى ... يعنى ادعيله بالرحمه و ان ربنا يثبته ساعه السؤال .... هاحكى على حكايه صغيرة .... ايام الرئيس السادات كان الكتاب يا اما مش بيكتبوا و فى بيوتهم يا اما بره مصر و بيكتبوا من بره مصر ، و فى اواخر ايام السادات كان الكتاب يا اما فى السجن يا اما بره مصر .... لما مات السادات الناس قالت لمحمود السعدنى السادات مات اكتب بأه .... الراجل المحترم قال لا شماته فى الموت و لا خلاف مع ميت ، و قال لما كان السادات عايش كان يقدر يرد ، انما دلوقتى ربنا اللى بيحاسبه و يرحمه بأه
للمرة التانيه بعتذر عن انفعالى و عن اى لفظ جرح اى حد من غير ما اقصد ، بس بجد لو كان الخلاف فى رأى كنت هابقى اهدى من كده ... انما لما الموضوع يبقى شخصى أوى كده فسورى ... مروة و ماتت و مش هتقدر ترد انما انا الحمدلله و ربنا يديمها عليا نعمه عندى لسان و لسان زفر كمان و اعرف ارد بيه ... مش قادر امسك نفسى .... سلام

و منين يا بلدينا ، و بلدكوا ايه ..... احسن ناس

2009-07-01T09:18:00.001-07:00

بعد النكد بتاع البوست اللى فات قلت اغير الموود شويه و اتكلم على حاجه لذيذه .... طبعا كلنا عارفين ان كل بلد او محافظه عندنا ليها حاجه مشهورة بيها .... يعنى مثلا المنيا ( و انا قلت ابتدى بيها عشان بلدى و محدش يقول انى هاتريق على الخلق و انسى نفسى ) مشهوره بأنها بدل زينب ..... و حكايه زينب دى حكايه ، بيقولك فى بدايه ما عملوا السكه الحديد واحد راح هو و بنته عشان يقطعوا تذكرتين ، المهم الكمسارى بتاع التذاكر قاله التذاكر خلصت يا حاج .. الراجل مصمم يسافر و الكمسارى عمال يقوله مفيش تذاكر , و الراجل فاكر ان الكمسارى بيلاوعه و مش عايز يديله ... قام تفتق ( حلوة تفتق دى ) ذهنه عن فكره عبقريه .... قال لبنته حبى عمك يا بت يا زينب ، و الترجمه يعنى بوسى عمك يا بت ... الراجل قال يغرى الكمسارى بأى حاجه .... الله يجحمه بوظ سمعه المحافظه كلها و من يومها المحافظه معروفه ببلد زينب
نسيب المنيا و ننقل على حته تانيه .... طبعا ناس كتير عايشه فى القاهرة و الجيزة و ميعرفوش ليهم بلد .... بتوع القاهره بنقول عليهم طرد بلاد و بتوع الجيزة بأه هما الجيزاويه .... يعنى جاره رابعه ... يعنى السوبر جيت و عمر افندى القديم و الميدان و فول المانش ..... يعنى شارع البحر الاعظم و كازينو الحمام ( الحمام اللى بيطير مش الحمام اللى هو بيت الراحه ) .... يعنى المنيب و موقف الصعيد و عايزين نفر عشان نطلع .... يعنى طموه و الحوامديه و البدرشين و ابو النمرس و كمل لاخر الخط يا استاذ .... يعنى ارض اللوا و ابيض و ناهيا .... يعنى بولاق و ادب بولاق و احلى تحيه لشباب بولاق .... يعنى امبابه و البصراوى و احترس نفسك ... و عموما دول فى الجيش من اسوأ الناس اللى تعرفهم
محافظه المنوفيه ... طبعا مش هقول مشهورة بأيه لانكوا عارفين ( مشهورة انها بلد 2 روساء مش انها بلد البخل ... ده حتى قمه الكرم انها ادتنا اخر رئيسين و يمكن تدينا التالت ) ... و سمعنى السلام الجمهورى
الشرقيه .... البلد اللى عزموا القطر ... و دى على فكره حادثه حقيقيه ... فى يوم من ايام رمضان ايام العز بتاع الزمانات ( مش العز بتاع الدخيله ) الناس طلعوا ساعه ادان المغرب و وقفوا ادام القطر و خلوا الناس تنزل و تفطر معاهم غصب و اقتدار ..... حاجه كمان كانوا مشهورين بيها و اسمها تحويد العروسه و العتبى على يوسف ادريس ... ان زمان لما كانت العروسه من بلد و العريس من بلد كان اهل العروسه و كل بلدها يطلعوا معاها عشان يوصلوها بلد العريس ( نوع من الفشخره الكدابه المتأصله فينا من زمان ) ... طبعا فى طريقهم هيعدوا على بلاد تانيه لو بلد العريس مش لازقه فيهم ... قوم ايه ... اهل البلد التانيه دول يقطعوا عليهم السكه ( مش عشان السرقه و الاغتصاب زى ايامنا السودة ) ... لا ... انما عشان برضه يعزمهوهم عندهم كنايه عن الكرم ( مش بقولكوا فشخره كدابه ) .... و عنها يا سيدى اهل البلدين يقعدوا يتخانقوا ... لو بلد العروسه فازت يكملوا الطريق و لو اتغلبوا امرهم لله يقعدوا و ياخدوا واجبهم و خلاص ... اطيب ناس عندنا فى مصر الشراقوه دول مش عشان بلد امى انما عشان دى الحقيقه
نيجى بأه للقليوبيه ... و سمعنى اجدع سلام لشبرا الخيمه و كريستال عصفور و يا نجفك يا قليوبيه ... بلد حلوه .... فيها القناطر و المراجيح و خد حبيبتك ادامك على العجله بس ماتلزقش أوى يا عسل و فيها كمان بلد هى اصل كل بتوع الفطير و الفطاطريه فى مصر بس انا مش فاكر اسم البلد .... و كمان ماينفعش ننسى بنها العسل .... اكتر حاجه بتضايقهم لما الناس بتقول عليهم القلابوة ... عشان احنا ببنطق القاف همزة و صباح قله الادب
خش على المنصورة .... بلد الزحاليق ... اولها مصنع صابون و اخرها ( مش هاقول ) ..... بس سيبكوا احلى بنات فى مصر هما بتوع المنصوره .... لدرجه انه كان فيه واحده زميلتنا كانت بتقول انها من المنصورة و احنا مش مصدقين عشان هى مش حلوه أوى ( و الحلاوه حلاوه الروح .... روح على رأى ميلودى ) ... المهم الموضوع كبر فى دماغ البنت و جابتلنا بطاقه ابوها و فعلا مكتوب فيها انهم من المنصورة .... طيب نحلها ازاى .... بسيطه ..... قلنالها ان العسكر الفرانسويه وقفوا عند البلد اللى قبل بلدهم و مدخلوش بلدهم عشان كده هما مش حلوين
نيجى لخط القناه السويس و الاسماعيليه و بورسعيد .... بورسعيد بلد السوق الحره و الشيكولاته المستورده و سمعنى سلام احلى طقم فيكى يا جمهوريه و فى ناس بيقولوا انهم غدارين و واخدين طبع التجار ( غصب عنهم طبعا ) و سلملى على ابو العربى ياولا يا حمو ... السويس بلد الجمبرى السويسى و تاكل احلى سمك بربون منها ... الاسماعيليه بلد المانجه ..... و عموما خط القناه كله بيقولوا عليهم .... ميه مالحه ... و كملوا انتوا الباقى
اسيوط .... دى المقابل فى الصعيد للمنوفيه ... ابخل ناس فى الصعيد .... بلد الويكه ... و صباح النداله و البيعه .... الاسايطه بيقولوا علينا احنا المنياويه مش صعايده اصلا و احنا نقولهم لا دى بنى سويف اللى مش صعايده ( معلش بأه جت فى بنى سويف ، بس يعنى اكدب ) و نقول عليهم انهم بخله و معندهمش عزيز
سوهاج .... البلد اللى بتقلب الجيم دال ( مش هى البلد دى انما البلد اللى دنبهم ) .... ناس فى حالها و ملهمش حس .... بس بجد اللى نفسه يشوف الدماغ الصعيدى على حق عنده اسيوط و سوهاج
بنى سويف ( البلد اللى قلنا عليها من شويه مش صعايده ) و فى ناس بتسميها اسم تانى بس مش هقدر اقوله ، بس ليه علاقه انهم معاهم معاهم ، عليهم عليهم ... و بأه ليهم منطقه مستقله فى التجنيد ( ابسطوا يا عم مش هتيجوا الجيزه تانى ) ... و صباح الحمام الاوليمبى و سمعنى سلام الرياضه و العقل السليم فى الجسم السليم

الفيوم .... يعنى محافظه الكتاكيت .... يعنى بلد المانجه اللى اسمها بيض العجل ...... يعنى بحيرة قارون ... و كفايه كده عشان امير صاحبى منها
دمياط ... بلد المشبك و العفش و صباح الناس اللى عايزة تتجوز .... و اطلع على راس البر و شوف الشواطئ عامله ازاى ( انا مش عارف نضفوها ولا لسه زى ما هى ) .... بس خلى بالك من تسوس الاسنان و انت بتاكل المشبك اللى غرقان عسل و خدها نصيحه من واحد لسه حاشى نص دسته ضروس
قنا ... مدد يا سيدى عبد الرحيم يا قناوى ..... و سمعنى احلى سلام للقلل و سلامى لكل الاخوه اللى شغالين فى الغردقه و من قنا و على فكره دول تقريبا اكتر من تلات اربع الناس الشغاله هناك ، يعنى عاملين جاليه ابناء قنا فى الغردقه
اسوان ... بلد السمان الاسوانى و البلطى اللى على ابوه اللى خارج من بحيره ناصر و الحنه السوده مش الحمره ( و الحمره دى تبقى .... ايد القرد و محدش دماغه تروح لبعيد ) و سمعنى سلام الفول السودانى و معاها سلام حتشبسوت و كل الفراعين
مرسى مطروح .... و شط الغرام و صخره ليلى مراد و سمعنى سلام اللب الابيض عشان سمعنا سلام الفول السودانى فوق
السلوم و خلى بالك من التهريب و السجاير المضروبه بتاعت ليبيا ... و سمعنى سلام قناديل البحر
اسكندريه ... و مهما قلت مش هاوفيها حقها .... اسكندريه ماريا ... يعنى الرمل و بير مسعود ... يعنى القلعه و لو ليك فى العلم متحف الاحياء البحريه ... يعنى سيدى بشر قبلى و هريسه احمد حسنين .... يعنى ابو قير و كل المشوى اللى لسه طالع من البحر يا استاذ ... يعنى ميامى و العجمى و المنتزه .... يعنى ابو خروف و غيط العنب و عايزين واحد عشان الكارو تطلع يا جدعان ..... يعنى زنقه الستات و خناقات الستات هناك ( و على فكره لما بيتخانقوا بيقلعوا ملط و لو راجل خش فض بينهم ) ... يعنى امشى على الشط و يا رب تقابل حد هيدبح ترسه و تاخدلك كبايه ( بيقولوا بتشفى من الروماتيزم و فياجرا طبيعى و ادعى لعمك فى ساعه رضا ) ... يعنى بنات اسكندريه اصل الدلع و اللى يودوك البحر و يرجعوك عطشان ( ده لو رجعت اصلا ) .... على فكرة و دى بجد الامام الشافعى قال من لم يتزوج مصريه فقد مات اعزب ، بس دى حوارها طويل .... اسكندريه يعنى تشرب عصير خروب قدام الجامعه بدينك و انتى مستنى المزة بتاعتك .... اسكندريه و كلامى يطول عليها و مش هيخلص .... و نظره يا مرسى يا ابو العباس مددددددددددددددد
سينا .... يعنى صباح البانجو و العرانيس الاصلى .. يعنى البدو و الرحلات اللى فى الصحرا ( بس خلى بالك من بوليس الاداب ... و بوليس المخدرات بالمره ) ... يعنى سانت كاترين .. بس ابقى خد بطانيه و انت طالع عشان الجو تلج فوق ، و خد فلاتر للكاميرا عشان الصور بتاعتك ماتتطلعش محروقه و انت بتصور شروق الشمس ... و ماتنساش تدعيلنا من فوق
اللى دخل الجيش ... او المدينه الجامعيه .... او من بلد انا نسيت اقولها او قولتها ... يبعت يشاركنا ... بس اللى هيشتم يقول بلده ايه عشان اعرف انا قلت ايه عليها .... و فى الاخر احلى بلاد الدنيا بلادى .... انا مصرى و ابن مصرى و ابن مصر الله عليه ( الله يا ست نانسى ) .... سلام

آخر الاخبار

2009-06-28T14:35:00.000-07:00

تم نشر البوستات الجديده فى واحد جامعه و فى روايتى ... دوس عليهم عشان تقرا
خبر كمان ... صديقى نادر اخيرا انضم لعالم المدونين و ده عنوان مدونته دون كيشوت دوس على المدونه و شجعوه يا زملا يا مدونين

رشه جريئه و ما لها من تبعات عميقه

2009-06-21T10:48:00.000-07:00

كنت من اسبوعين تقريبا قاعد فاضى مش لاقى حاجه اعملها .. المهم قلت اتفرج على اى حاجه فى الدش لقيت فيلم رشه جريئه بتاع اشرف عبد الباقى و ياسمين عبد العزيز ، مش عارف اذا كنتوا فاكرين الفيلم ولا لا .. بس ده الفيلم اللى اشرف عبد الباقى جه من بلده عشان حلمه يبقى ممثل و ساعتها قابل ياسمين ، و ان ان ان تششش .. جمع بين الحسنيين بأه ممثل و ياسمين حبته .. المهم مش موضوعنا ...... الفيلم كان فيه مشهد لما اشرف كان بيمثل على المسرح و واحد من الجمهور قعد يقوله حرام عليك .. اتقى الله .. يا كفرة .. و كلام زى ده .... هو اضايق جدا بس ساعتها ياسمين قالتله انه مش هو المقصود بالكلام ده شخصيا ، و ان الراجل كان بيحاول يورى الناس اللى فى المسرح انه احسن منهم ... نوع من انواع التطهير الذاتى بس التطهير الذاتى او الخلاص الكاذب مش الحقيقى ... و نزلوا ساعتها بأغنيه جامده جدا .. " عيل صغير عمل صوابعه كدهه مسدس و قال لصاحبه طريخ طراخ ... قام صاحبه طاوعه و ساقله فيها و اهله قالوا ده طخه طخ " ... و ياسمين بعد كده قلتله متبوظش المسرحيه .. الراجل عمل متدين و انت عملت متضايق تبقوا خالصين
مقدمه طويله شويه بس ضروريه مش من قبيل اللت و العجن او ارغى مثلا ... انا لما شفت المشهد ده و سمعت الاغنيه دى ساعتها قعدت افكر شويه .... انا كنت بابقى متضايق جدا من الناس اللى بيستنكروا حاجات و بعد كده الاقيهم هما نفسهم بيعملوها ... من ضمن الناس دول شويه مدونين و مدونات ... انا هنا مش باتكلم على اشخاص عشان محدش يفهمنى غلط انما بأتكلم على موقف و مبدأ .. و انا مش من هواه انى اتكلم عن نفسى كتير ، بس برضه مينفعش احكى حاجه حصلت لحد تانى مع ان الموضوع ده حصل مع ناس كتير و انتوا يمكن تكونوا منهم ... هاديكوا مثل ... فى شخصيه على البلوجز قعدت شويه تنصحنى انى استخدم الفاظ احسن من اللى انا بأستخدمها ، و انى اقرب من ربنا و انى ابقى متدين ، و الشخصيه دى عملت بوست لمناقشه حالتى انا شخصيا دون ذكر اسمى ، و ناس قعدت ترد عليها و تقول ربنا يهديه ، و يا رب يبقى كويس و كلام كتير زى كده ظاهره التقوى و الله اعلم بباطنه ... المهم نفس الشخصيه دى مشهورة انها اى حد بيختلف مع رأيها او توجهها الفكرى او العقائدى بتقول عليه كلمه " بروح امه " و هى دى الكلمه اللى بتستخدمها بالنص ... الشخصيه دى المفروض انها شغاله فى مجال التعليم و انها كمان فى اعلى السلم فى المجال ده ... قياسا على طبائع الاشياء ، و على فكرة فكره القياس مش غلط لانها الاساس فى اى حاجه و اشهر مثال على كده بيت الشعر العربى القديم اللى بيقول " و اذا كان رب البيت بالدف ضارب ... " .. يبقى المفروض انى انا اللى مش دكتور جامعه ولا حاجه بالعكس انا كنت فاشل جدا فى الدراسه لما الاقى الشخصيه دى بتستخدم كلمه " بروح امه " يبقى انا استخدم كلمه ايه فى وصفى لحد انا مختلف معاه ... و يبقى الناس اللى فى الشارع تستخدم ايه فى كلامها ( هما الحقيقه بيستخدموا كلمه تانيه برضه من كلمتين و برضه اخرها كلمه امه بس الكلمه الاولانيه انا مش هاقولها عشان عيب ) ... عادى .. هى حرة و مدام متصالحه مع نفسها يبقى انا مالى .. بس الغريب ان نفس الناس اللى كانت بتهاجمنى هى هى نفس الناس اللى بيقعدوا يقولها ربنا يجزيكى خير ... الحمد لله انه عندنا واحده زيك ... ربنا يكتر من امثالك ... زى ما تكون هى مثلا رابعه العدويه و ربنا بعتهالنا تانى ..... ده مثال
مثال تانى .... شخصيه جامعيه ذات دراسه علميه افتت ان مفيش حاجه اسمها تحور الفيروسات و ان انفلونزا الخنازير دى اتطورت فى المعامل البيولوجيه الامريكيه .. و ادت مثال بفيروس الايدز ... الشخصيه دى فى لحظه تجلى ( لانها فى الغالب كانت متقله الصنف شويه ) لغت علم كامل اسمه علم الفيروسات او Virology و ان الكلام اللى قعدنا ندرسه حوالين التحور و شريط الدى ان ايه و الاشكال المختلفه من الفيروسات ده كلام فاضى و عباره عن معلومات حشاشين و احنا درسناها .... انا مش هاجادل فى ده لانه غلط و انا ابقى غبى زى الشخصيه دى لو جادلت فى حاجه واضحه و مثبته علميا ... بس فى نقطه محيرانى ... الشخصيه دى بتبان على انها قمه التدين .. لو انا افترضت ان مفيش حاجه اسمها تحور الفيروسات ... وان الفيروس ده اتعمل فى معامل امريكا البيولوجيه كسلاح .. هيكون اتعمل منين ... اخترعوه مثلا .. لو اخترعوه يبقى التسميه الاصح انهم خلقوه و ان معنى كده انهم لو خلقوا فيروس يبقى بكره يخلقوا بنى ادم و ساعتها يبقى مفيش ربنا ( استغفر الله العظيم ) مدام احنا بنعرف نخلق .. و طبعا الكلام ده غلط لان ربنا هو اللى بيخلق كل حاجه ... يبقى عندنا الاحتمال التانى .. انهم طوروه من فيروس موجود فعلا بس غيروا فيه شويه صفات وراثيه ... و التطوير ده هو اللى اسمه التحور يا ساده ... لان مش شرط التحور يتم بطريقه طبيعيه و ممكن يتم بطريقه صناعيه ... الغريب ان الناس اللى علقت على الموضوع ده قعدوا يشكروها على الفتح العلمى ده و الحقائق المذهله اللى هى قالتلهم عليها و على نور العلم اللى هى ولعته عشان تنتشلهم من ظلمات الجهل و التخلف و طالبوها بزياده المعلومات العلميه و كان ناقص الاقى حد منهم يقولها الله يا ست ولا اعد ... انا مش معترض لان فى ناس من دول دراستهم كانت ادبيه و يمكن ميعرفوش الكلام ده .. بس لما الاقى خريجين طب و صيدله و علوم موافقين على الكلام ده يبقى لازم اسأل امال الناس دى اتعلمت ايه فى كلياتها ... مع العلم انى سألت ناس لسه بتدرس و قالولى انهم لسه بيدرسوا التحور و الطفرات .. يعن العلم اللى انا درسته ماتغيرش مثلا و انا مش عارف ... ولا يمكن عشان الشخصيه دى فى سلك التدريس يبقى كلامها قرآن منزل و انا معرفش ... ده كان مثال كمان
اخر مثال عشان انا مرارتى ابتدت توجعنى و انا مش حمل عمليات .... انا ما اتكلمتش على خطاب اوباما خالص .. قريت كتير حواليه تعليقات سياسيه محترفه و اراء ناس بسيطه و كلام ناس من اللى هما بيعملوا حاله اشبه بالزراط الفكرى ( الاول كان فيه قئ فكرى و دلوقتى زراط ، تحس اننا قاعدين فى حمام مش فى مدونه و انا من موقعى هذا هاسميه حمام الفكر ) و سمعت الخطاب و عندى فيديو ليه و قريت نص الخطاب عشان ميبقاش فيه تأثر بحاله الكاريزما العاليه اللى عند اوباما و اتكلمت مع ناس كتير حوالين الخطاب ده ... اغرب حاجه ان فى ناس زعلانه جدا من اوباما منهم الشخصيه بتاعت " بروح امه " و شخصيه تانيه تابعه ليها فكريا و الشخصيه التانيه دى اييييه .... تلميذه رابعه لان رابعه هى اللى بتقول " بروح امه " ... انا عن نفسى شايف ان الراجل كان صريح معانا .. قال ان علاقه امريكا باسرائيل غير قابله للكسر و ده كلام صح و لو اى حد افتكر اى حاجه تانيه يبقى حمار ... و قال انه هيحاول يفعل حل الدولتين على ارض الواقع .. و اتكلم على المحرقه ( مع اعتراضى على ارقام المحرقه و على المبالغه فى وصفها بس انا مش بأنفيها .. هى حصلت بس مش بالاعداد دى ولا بالبشاعه دى .. و على كل دى كانت ايام حرب و كل شئ مباح فى الحروب ) .... المهم و انا باتكلم مع تلميذه رابعه ماكنش عاجبها كلام اوباما .. حقها هى حره .. بس يا ترى احنا كنا مستنين منه ايه .. يقولنا يالا نرمى اسرئيل فى البحر سوا .. و لما اتكلمت على حل الدولتين و قلت ان الفلسطينين نفسهم عايزين الحل ده قالتلى مش مهم الحكام .. المهم المسلمين ( و خدوا بالكوا من كلمه المسلمين دى لانها كده حرمت اى واحد فلسطينى مسيحى من حق انه يدافع عن بلده لانه مش مسلم ) .. و قالتلى ماينفعش نقول ان فيه فلسطينين باعوا ارضهم لليهود ( مع ان ده حصل و منهم ناس عايشين ولا اغاخان نفسه ) ... و اننا المفروض نحارب .. و اننا .. و اننا .. و كلام كتير ... انا سألتها سؤال واحد بس مخدتش رد عليه لغايه دلوقتى والله اعلم هاخد رد عليه ولا لا ... يا ترى اشمعنا احنا المصريين عرفنا نطلع اليهود من سينا بعد 6 سنين و الفلسطينين مش عارفين يطلعوهم من فلسطين بعد اكتر من 60 سنه .. مش كده يبقى فى حاجه غلط .... على فكره كل امال العرب مجتمعين بالنسبه لفلسطين و اسرائيل العوده لحدود يوم 4 يونيه 1967 و محدش خد باله ان اوباما خطب عندنا يوم 4 يونيو 2009 .. اختيار اليوم مش صدفه ، بس مين اللى يفهم
و اخيرا انا هانهى كلامى بكلام نجيب سرور .. العبقرى اللى احنا قتلناه و قلنا عليه زنديق و كافر و ابن كلب مع ان كلامه حكم مع انه قاله من اكتر من 50 سنه برضه و الكلام اللى انا هاكتبه هيكون ناقص لانه انا مش باكتب الالفاظ دى فى المدونه و الكلام هيكون على اننا نكون واقعيين شويه مش عايشين فى عالم الاحلام

يا عم سيبك بقى و قولى كلام ينفع
و .... ام الشرف نفعنى و استنفع
الفن يا عم بورصه يعنى خد و ادفع
و وطى .... و صلى على اللى فيك يشفع
و قلنا ننضف بقى قالوا بلا وكسه
والله لتحصل بدال النكسه ميت نكسه

سلالالالالالالالالام

احنا اتفضحنا يا رجاله + تحديث للروايه و واحد جامعه

2009-06-07T13:31:00.000-07:00

تم نشر الفصل السادس فى الروايه بعد طول غياب دوسوا على روايتى عشان تقروه و مستنى رأيكو

تم نشر البوست الجديد فى واحد جامعه دوسوا على اللينك عشان تقروه و مستنى رأيكو فيه

_________________________________________________________________

كنت باتكلم مع حنون و بعدين قالتلى انا هابعتلك صورة و بعتتلى الصورة اللى انتوا شايفنها دى .... انا اتخضيت لما شفتها و رجعت 3 سنين لورا للحظه اللى الصورة دى اتلقطت فيها ... الصورة دى بتجمعنا كلنا بلال و نادر و امير و فناجيلى و انا و القيادى الشاب و معانا بيتر و ده واحد صاحبنا بس انا علاقتى بيه ماكنتش قويه اوى و معانا كمان يوسف و ده بأه معيد بعد ماخلصنا ( بس معيد بجد مش معيد زينا عشان محدش يفهم غلط ) و اتنين كمان انا معرفهمش .. طبعا انا مش هاقول احنا مين عشان الفضايح و الحسد و كده .... والله و اتفضحنا على الفيس بوك يا رجاله و بأينا انترناشيونال .... و بعد كده قعدت اتكلم مع حنون على الصور و ان الصورة دى تانى صورة ليا فى الجامعه لانى مخدتش غير صورتين و صورنا فيديو واحد ( بس والله كان مؤدب عشان محدش دماغه تروح لبعيد ) .. انا مش من هواه الصور عموما عشان باطلع فيها وحش عشان كده صورى قليله جدا عموما ، لدرجه انى عندى صورة بالبدله و كل مابتخلص باطلع عليها و صوره تانيه من غير بدله و برضه باطلع عليها لما باحتاجها .. بعكس حنون اللى قالت انها كل مابتخرج بتتصور و كل مابتروح الجامعه بتتصور و هيصه بأه عشان هى لما كنا فى الكليه ماكنتش بتتصور خالص و بالتالى بتعوض النقص بأنها تتصور على اد ماتقدر دلوقتى ... ساعتها قعدنا نتكلم عن ان الصور هى اللى بتفضل فى الذاكرة .. يمكن انا مش حاسس الموضوع ده دلوقتى عشان اغلب الاحداث اللى مرت عليا موجوده فى ذاكرتى بس اكيد كل ما الوقت يعدى التفاصيل الصغيرة بتاعت الاحداث دى بتقل و بتقع من دماغى و فى احداث كتير بتقع من دماغى اصلا .. ده غير ان الصور اصلا كمان بتحتفظ بلحظه معينه من الزمن و فى الغالب بتكون اللحظه سعيده لاننا نادرا ما بنتصور و احنا متضايقين الا الصور بتاعت المقالب و الرحلات ... يعنى مثلا تتصور و حد عاملك قرنين كنايه عن ودان اسمه ايه ده ... الصبور ده ... يااااه مش فاكر اسمه بس انتوا اكيد فاهمين انا قصدى ... فى برضه صور الحبيبه و العشاق و نظام علمنى العوم و النبى يا احمد بس بلاش تاخدنى فى الغويط .... الصورة دى بجد لما انا شفتها رجعت لايام الكليه ، و على اد ما كانت ايام ايام سوده و كلها هم و غم بس برضه كان فيها لحظات حلوة و ناس حلوة برضه ، و ده طبيعى مفيش حاجه بتكون كلها سوده ولا حاجه كلها بيضه بس الفكرة انك تتقبل الفكرة نفسها ان الدنيا مش بتمشى زى ما انت عايز و بجد دى فكرة صعب جدا تقبلها ... المهم نرجع لمرجعونا تانى ... الصورة دى كانت و احنا فى رابعه اول .. تقريبا فى الترم التانى ، الاوقات اللى الناس بتستعد تفارق فيها الكليه فبيبتدوا يتصورا مع بعض من باب اننا صحاب لغايه ما الموت يفرقنا و النظام ده مع ان ساعات لما واحد بيشوف الناس اللى معاه و تيجى تسأله دول مين يقولك اهى مصايب بتتحدف علينا ( فكرتنى بالحكايه المشهورة لما الملك فاروق اتنكر فى يوم و نزل ركب حنطور ، و بعدين بيسأل العربجى فى رأيه فى الملك فاروق قاله ابن كلب .. قام فاروق قاله طيب و رأيك فى ابوه الملك فؤاد قال الله يرحمه كان ابن كلب زيه ) .... الصورة دى كانت تانى صورة اتصورتها فى الكليه .. اول صورة كانت فى اول سنه .. لسوء الحظ انا معيش نسخه منها عشان تشوفوا الاختلاف من باب Before & After بس برضه الصوره الاولانيه دى عزيزة جدا ( عزيزة جلال ... ههههه ، معلش القافيه تحكم ) عليا عشان كانت و الواحد لسه برئ و ابيض من جوة ، بس مش معنى كده انى مش برئ و ابيض من جوة دلوقتى انما تقدروا تقولوا ان الواحد فى اوله غير اخره عشان بيتعلم حاجات و الا لو مابيتعلمش يبقى يستاهل القرنين اللى يتحطوا ورا دماغه فى الصور .... برضه انا اتذكر انى ليا كام صورة فى كام رحله كده بس بعيد عن رحلات الكليه ، لانى من كتر عشقى و حبى للكليه مكنتش عايز اى حاجه تربطنى بيها ..... بس اللى اشد من الصور دى كلها كان الفيديو اللى اتصور ساعه ما كان ايمن و وجدى و مراتتهم فى رابعه و انا كنت فى تالته اياميها و كانوا فاكرين انهم خلاص سايبين الكليه بس الحقيقه ان ايمن بس اللى سابها و باقى الناس فضلت فى رابعه و انا فضلت فى تالته .... ايام سوده مش بقولكوا ... بس دى حكايه تانيه و صورة تانيه .... سلام

الله اعلم

2009-06-03T05:42:00.000-07:00

منير و فيروز
فى حاجه غريبه انا خدت بالى منها ..... اغلب اللى بيحبوا منير بيكونوا فى نفس الوقت بيحبوا فيروز و بيسهروا معاها بليل .... يعنى انا مثلا باسمع فيروز لما باكون عصبى او قرفان و سبحان الله دايما بتخلينى اهدى و اروق و ابقى فريش مش عارف ليه .... و طبعا منير .. الكينج و الكبير كبير ... مهما اتكلمت على منير ماينفعش تديله حقه .... كمان تلاقى الناس دى ( اللى انا منها ) اننا بنحب عموما الاغانى القديمه و الناس القديمه و بنتكيف منها ليه .... الله اعلم

تموره
مدام اتكلمنا على منير و فيروز انا فى حاجه عايز اعرفها ... هو تمورة شعر الصدر حسين المشهو بتامر حسنى كان تعبان و هو بيمثل عمر و سلمى 2 ولا ايه ... اصلى خدت بالى انه مش مبين شعر صدره غير فى 3 مشاهد بس و باقى الفيلم لابس تشيرتات و ساتر نفسه .... كنت دايما باستغرب لما تامر يبين شعر صدره ، تقريبا فاكر ان ده بيزود فى السيكس ابيل بتاعه او مثلا انه هو الراجل اللى عنده شعر فى صدره و احنا كلنا ناس اجروديه مثلا .... كنت باقول هو محدش قاله ليه ان السبعينات ايام ما كانوا بيفتحوا القميص لغايه نص صدرهم فى مصر و لغايه سرتهم فى لبنان خلصت خلاص و اننا دلوقتى بنمشى بهدوم مفتوحه ..... و جايز يكون تامر عايز ينافس المطربات اللى بيبينوا صدرهم مثلا فهو كمان بيبين صدره و محدش احسن من حد ... الله اعلم

الزمالك
يا ترى بعد ما مرتضى خسر الانتخابات هيطلع الملفات ( اللى شكله عامل لكل واحد فى مصر ملف و شايله عنده ) هيطلع ملفات ممدوح عباس امتى .... بس عموما انا متفائل ... الزمالك السنه الجايه هيلعب على المركز الرابع مش المركز السادس زى السنه دى عشان السنه دى كانت كبوة .... و الى كل عشاق الزمالك ... الزمالك راجع تانى ... بس هيتأخر شويه عشان راجه فى تك تك ..... تفتكروا هيوصل امتى ..... الله اعلم

العلاج بالتدوين
مكنتش اعرف انه فى حاجه اسمها العلاج بالتدوين ... يعنى مثلا الايام اللى كنت باكتب فيها كتير كنت باعتبر نفسى عندى اسهال فكرى و بخلص منه على البلوج و كنت لما تجيلى الحاله دى ابطل اخد لاكتيلوز و اكل حمص عشان راسى تمسك شويه و ابطل كتابه
بس قريت عند Isolde و عند Enjy كمان انه فى حاجه اسمها العلاج بالتدوين و طبعا انجى دكتورة نفسيه فاكيد فاهمه هى بتقول ايه ... بس لو كده يا ريت كانت كل مشاكلنا ينفع تتحل بالتدوين ... انما انا بحس اننا بنكتب عشان مانطقش و تجيلنا نقطه مثلا ... الكلام ده صح ولا غلط ..... الله اعلم

تليفزيون الحياه
اللى بيتفرج على الحياه يحس ان رمضان خلاص الاسبوع الجاى .... عمالين يجيبوا اعلانات على مسلسلات رمضان قبل رمضان ما يجى بشهرين تقريبا ، يمكن على اساس اننا تفضى نفسنا بأه فى رمضان عشان المسلسلات ... جايز .. الله اعلم
تانى حاجه على تليفزيون الحياه هى برنامج بنى ادم شو بتاع احمد ادم .. انا عندى سؤال واحد بس ... المزز اللى بتبقى قاعده فى الاستديو دول بيبقوا جايين مع البرنامج ولا متأجرين ولا ايه ..... حد سمع الضحكه اللى كل واحده فيهم بتفقعها ... بحس انى قاعد فى كباريه او ديسكوتيك على احسن تقدير ... ولا يمكن عشان انا فى بلد مفيهاش ستات فى الشارع فبحس الضحك ده اوفر شويه و هو ده بأه العادى بتاعنا فى مصر .... الله اعلم
تالت حاجه و اخر حاجه على الحياه برضه ....... هما ليه لما بيجيبوا اعلان عن مسلسل بيقولوا اسامى كل ابطاله و مابيقولوش اسماء فنين الاضاءه و مساعدين المخرج و كده .. يعنى هى جت على دول .... الله اعلم

انا حاسس انى كنت باهيس و دلوقتى لازم ابطل تهييس .... سلام