الاثنين، 26 يناير، 2009

تحلم بأيه

يا ترى فى كام واحد منكو بامانه لما قرى العنوان قال كامننا ... نتكلم جد شويه
طبعا فى ناس كتيرة منكم متابعه برنامج الحلم بتاع عمرو دياب ... الحقيقه انه عمرو دياب ممكن تتفق معاه و ممكن برضه تختلف معاه بس ماتقدرش ماتحترمهوش ( اللهم الا اذا كنت من الناس اللى بيحرموا الاغانى و بتوع " و لا ابالى حين اقتل مسلما على اى جنب كان فى الله مصرعى " بس ده مش موضوعنا ) .. واحد بقاله تقريبا 28 سنه بيحفر فى الصخر لغايه ما بقى عمرو دياب و احد من اهم اتنين فى حياتنا الغنائيه و الاولانى هو الكينج محمد منير ... المهم و انا باتفرج على البرنامج ده سألت نفسى هو انا عندى حلم ، عندى حاجه مستعد اضيع عمرى كله مقابل انى اشوفها ..... بأمانه لما بصيت لحياتى لقيت احلامى كلها احلام وقتيه ..... يعنى مثلا حلم انى اتخرج من الكليه و اتخرجت ، حلم انى اتجوز و ده لسه ربنا ما اذنش بيه .. احلام زى كده ... بس مالقتش عندى حلم يستاهل يبقى حلم العمر كله
مش عارف ... طبعا فى ناس بتحلم انها تكون اغنيا و ناس بتحلم انها تكون مشهورة و ناس بتحلم تربى عيالها كويس و تطلعهم محترمين فى وقت اصبحت فيه الدعاره و القواده هى اساس مجتمعنا ... طبعا كل دى احلام تستاهل الاحترام ... مشكلتها من وجهه نظرى انها احلام عامه ، كل الناس بمختلف افكارها و توجهاتها بتحلم بيها ... مفيش فيها خصوصيه و تفرد حلم العمر
دلوقتى بأه اسئل كل واحد فيكو .... بتحلم بأيه ؟ .. و عشان خاطرى ما تقولش كامننا
سايبلكوا اغنيه بحبها جدا لعمرو دياب يا رب تعجبكوا و مستنى اقرا عن احلامكم ..... سلام

الأحد، 25 يناير، 2009

Mr.Nice Guy Is Leaving The Building

يعد شويه نوم .. و بعد شويه تفكير ... و بعد فنجان قهوة .... استعدت ذاكرتى و افتكرت انى ليا عقل و عشان كده رجعت
عمرى ما اتعودت اخاف من حاجه و لا من حد و لا من كلمه انا قلتها لانه ما يقبضش الروح الا اللى خالقها .. و ما تعودتش اكون امعه اذا احسن الناس احسنت و اذا اساءوا مليت الدنيا سيئات زيهم و الحمدلله مش مستنى مصلحه ولا رضا سامى من حد ..... ماتعودتش اذا حد قالى كلمه ماردهاش عليه بعشرة و يمكن بأكتر اذا ربنا قدرنى ... ماتعودتش اقول كلمه و استخبى او اقول كلمه و ارجع اقول ماقولتهاش
من كام يوم و انا مع نادر صاحبى قالى انا حاسس انك على المدونه بتاعتك شخص مختلف شويه عن اللى انا اعرفه ، سألته يعنى انا منافق يا عم نادر .. رد و قالى مش الفكرة ، الفكرة انى باحس انك على المدونات طيب أوى و مؤدب أوى ... اعترف انى بعد شويه نوم و شويه تفكير و فنجان القهوه فهمت اللى هو قاله
انا طول عمرى شخص هجومى و انا عاجبنى انى اكون شخص هجومى لانه فى بلدنا دى المحترم الناس ممكن الناس ماتعملوش حساب انما البلطجى كل الناس بتعمله حساب عشان احنا بلد وسخه و شعب فرعون يخاف مايختشيش
اخر حاجه فى الحاجات اللى انا ماتعودتهاش انى ماتعودتش اكون غير عمرو و لحسن حظى عمرو صحى خلاص

السبت، 24 يناير، 2009

ممتنع

معلش يا جماعه انا هاتابعكم بس من غير تعليقات على بوستاتكم
و هامتنع عن نشر بوستاتى
اعتبروها هدنه .... او فتره عشان استرد عقلى اذا كان لى عقل او ينبت لى عقل فوق رقبتى و تحت شعرى
و اسف لكل اللى كانت تعليقاتى حاده عليهم و مش عايز حد يزعل منى
الى لقاء لا يعلم موعده الا الله
سلام

الخميس، 22 يناير، 2009

الأربعاء، 21 يناير، 2009

سيبك منه و ركزى معايا

امبارح قابلت نادر و امير ... كنت فى عزا و على صلاه العشا قابلت امير فى اول فيصل و نزلنا على طلعت حرب عشان نقابل نادر ... المهم انا اول ما باكون فى وسط البلد فى حاجتين لازم اعملهم .... اعمل حمام فى طلعت حرب مول و اكل كبده و سجق من بندق اللى ادام سينما اوديون .. ماعرفش ايه الزنقه و الجوع اللى بيجوا عليا ساعة مابنزل وسط البلد
المهم ... هنقعد فين يا عم نادر قالك تعالى نقعد على زهرة البستان يمكن نشوف ميكى هناك .. و ميكى ده اسم الدلع اللى نادر مطلعه على مكاوى سعيد من ساعه ما اتصاحبوا على بعض ... ماشى يا عم نادر .. بينا على الزهرة
و زهرة البستان عباره عن ترابيزات كتير فى الشارع و قدماها جراج و موصله بالشارع اللى بيطلع على ريش .. كان زمان بيقعد اليساريين عليها .. مش عارف انى زمان بس اهو زمان و خلاص
انا كان عمرى ما قعدت عليها .. لا هى ولا التكعيبه .. اكتر مكانين المدونين و البلوجاتيه و الفيس بوكاويه بيقعدوا عليهم .. ده بالاضافه طبعا لدار ميريت اللى فى اول القصر العينى
قعدنا على ترابيزة .. جه بندق شغال فى الزهرة و سأل تشيشوا يا جماعه .. طبعا نادر و امير مالهمش فى الشيشه و انا كنت تعبان فقلنا لا مش هنشيش النهارده .. جه بندق تانى و قال تشربوا ايه يا جماعه .. طلبنا انا و نادر شاى بلبن ( كل واحد كبايه مش هنخمس فى كبايه واحده طبعا ) و امير طلب قهوة عشان كان مصدع ... هب هب جت المشاريب و ابتدينا نشرب .. المشاريب دى كان طعمها طين .. فكرتنى بغرزة مره قعدت عليها مرة فى الزاويه الحمرا و عشان اديكوا فكره عن مستوى الغرزة دى كان اغلى طلب فيها هو السحلب و كان ب 35 قرش ايام ماكانت اعفن كبايه سحلب بره ب 2 جنيه ... فل كده ... المشاريب بتاعت الزهرة دى اعفن من غرزة الدرب الاحمر دى
طبعا ابتدينا نتكلم ... انا اكمنى جوزاء و اكمن مواليد البرج ده مايعرفوش يقعدوا هاديين طول ما انا قاعد عمال الف حوالين نفسى و ابص حواليا و شويه ربنا كرمنى بقطه صغيرة جت و قعدت تتمسح فى رجلى و قعدت العب معاها .. المهم خدت بالى انه كان فى ترابيزة كان قاعد عليها 3 بنات عمالين يبصوا علينا ... الترابيزة دى كل شويه يجى واحد يقعد مع التلات بنات عليها و شويه يقوم و معاه واحده من التلاته و يمشوا و بعدين البنت ترجع لوحدها من غير الشاب الحليوة اللى كان معاها ... المشهد ده اتكرر مع التلات بنات ... ده طبعا غير الاشكال الضاله من الشباب و البنات اللى انا متاكد انهم شبهه و انك لو مشيت معاهم اكيد هتتاخد تحرى و يمكن يتعملك محضر اداب كمان ... ما علينا .... شويه و جت بنت مع شابين و قعدوا على ترابيزة تانيه جنبنا ... الحق البنت كانت محافظه على شعور الشباب اللى معاها .. كانوا الشابين مدين ضهرهم لينا و البنت هى اللى فى وشنا و كانت بتغمز لينا من غير ما الكباتن اللى معاها يبصوا علينا عشان مانجحرش شعورهم برضه ... طبعا احنا نفضنا عشان البنت دى يا دوب ينفع تتف عليها مش اكتر من كده مع انى متاكد انه ليها سوق عشان اللى نفسهم حلوة كتير .... و شويه و جم ناس زى ما يكونوا من تنزانيا ولا الصومال و قعدوا ورانا ..... الحاجه المشتركه بين كل البنات اللى قاعده على اختلاف مستوياتهم و اشكالهم انهم بيشربوا سجاير يا بيشيشوا و فى شويه منهم معاهم لاب توبات و كلهم لابسين لبس محترم ... بس فى حاجه فى شكلهم بتقولك انه ده مجرد لبس بس مش سلوك عام
و طول ماحنا قاعدين عمالين انا و امير نتريق على نادر على المكان الزباله اللى احنا قاعدين فيه .. و انا اقوله تلاقى فى الجراج ده فى سراير بيأجروها بجنيه عشان اللى معاه موكنه و بيته بعيد يدخل بيها على الجراج على طول من غير ما يضيع وقت ... و نتكلم على الناس و نتريق على نفسنا و نحكى على اخبارنا
المهم جت الساعه 11 و قلنا نمشى عشان نادر عنده شغل الصبح ... نادر حاسب و ابتدينا نمشى ناحيه الاسعاف كده ... المهم عدينا على الراجل اللى ادام اوديون عشان اضرب كام سندوتش كبده و سجق قبل ما امشى ... لقيت واحده من التلات بنات اللى كانوا قاعدين جايه الكشك اللى جنبنا عشان تشترى سجاير و الناحيه التانيه على الرصيف بتاع السينما 3 شباب لابسين ترنجات و اقفين مستنينها ... هى اشترت السجاير و ماشيه و معديه علينا ... لقيت البرنجى اللى فى العيال التلاته ماشى معاها و بيقولها سيبك منه ( قصده على شاب رياضى من الاتنين اللى معاه من اللى لابسن ترنجات ) و ركزى معايا انا اللى هاحاسب بس انتى ماتضربيش فى العالى .... طبعا كده لو كان عندى سوء ظن بيهم اكون كده اتاكدت ان المدام شغل ... جايز تكون واخداها كوظيفه و جايز تكون هوايه او بتسلى وقت فراغها او يمكن مثلا عشان احنا فى الشتا و ليل الشتا طويل و ممكن برضه واخدها من باب اشمعنى القطط هى اللى الموسم بتاعها دلوقتى و احنا لا ... الله اعلم
طبعا ابتدينا نمشى وراهم عشان نعرف هيتفقوا ولا البت مش هترضى تعملهم ديسكاونت على اساس انهم 3 سوا يعنى باكدج على بعضه .... البت ماشيه بتتدلل عليهم و هما ماشيين ناقص يبوسوا ..... يبوسوا ايدها ( مشوها ايدها المرة دى ) ... المشكله ان البت لا شكل و لا منظر و لا جسم و لا اى حاجه ... بالكتير تنفع مبوله زى اللى موجوده فى طلعت حرب مول كده يعنى حتى مش مبوله نضيفه تفتح نفسك انك تعمل حمام بس المزنوق مابيختارش و كان واضح ان التلاته الامامير دول مزنوقين على الاخر و المزة اللى ماشيه دى هى اللى هتفك زنقتهم .... بعد 5 دقايق الشاب البرنجى اقنعها و مشيوا كلهم سوا طبعا مش رايحين يجهزوا نفسهم لصلاه الفجر مع انى متاكد انهم هيكونوا صاحيين لما الادان يدن بس مش هيقوموا يصلوا ... و جايز صحتهم ماتساعدهم يستنوا للفجر و البت تقلبهم فى ساعه زمن بالكتير بس دى اعراض ناس و انا ماينفعش اتكلم عليها
انا ساعتها افتكرت جزء من اميات نجيب سرور و عذرا لانى هاكتبه بالنقط بس اللى عارف القصيده هيعرف الجزء اللى انا باتكلم عليه
بلدنا بلد ....... الكل .... فيها
شوف الخريطه تلاقيها فاتحه رجليها
ربك خلقها كده .. راح تعمل ايه فيها
مش لاقى حاجه تانيه اكتبها الا انه لو كانت الحريه هى دى يبقى احسن لينا نعيش عبيد بدل مانتظاهر بحاجه و احنا عكسها ..... ربنا يرحمنا برحمته

الاثنين، 19 يناير، 2009

تراثنا الشعبى




مستنى اسمع رايكم فى الغنوتين الجامدين دول ... و طبعا الناس العتيقه هما اللى هيفتكروهم
و انا كان عندى غنوة تالته اسمها سى احمد بس حفاظا على الاداب العامه ماينفعش انزلها
ادينى مستنى اسمع رايكوا بصراحه

عشان تسمعوا بوضوح اعملوا Pause لعمنا صلاح جاهين فى الركن الشمال من تحت شويه

اخبارى

تم نشر الفصلين الرابع و الخامس من روايتى ... لزم التنويه لمن يهمه الامر
انتهى البيان

الأحد، 18 يناير، 2009

السياسه فى بلدى




كنت من كام قاعد مع صديقى العزيز نادر على القهوه اللى ورا سينما اوديون ... المهم قعدنا نتكلم على الناس اللى نعرفها و اتكلمنا كتير فى حاجات كتير و على ناس اكتر لانى باحب اتكلم مع نادر جدا لانه مثقف بجد مش مدعى ثقافه ... المهم و احنا ماشيين جت سيره صديقنا اللى اصبح القيادى الشاب اللى انا اتكلمت عليه قبل كده فى واحد جامعه ... جت سيرته و احنا معديين من ادام نقابه المحاميين .. لقيت نادر بيقولى مش القيادى الشاب بيشتغل هتيف اليومين دول لصالح واحد من المرشحين لمنصب نقيب المحاميين و بيقود جزء من حملته الانتخابيه فى المحافظات .. انا استغربت عشان صديقنا القيادى ده يعتبر اقرب لليساريين فى فكره و المرشح ده بشكل او باخر محسوب على الاسلاميين فانا استغربت ايه اللى لم الشامى على المغربى و يا ترى مين فيهم بيتبع مبدأ ميكافيللى و بعدين قلت اكيد الاتنين بيتبعوا المبدأ ده ... صديقنا نادر كان بيتكلم على ال Face Book و انه لما عمل اكونت عليه لقى بنت كانت زميلتنا فى الجامعه عامله اكونت و عندها تقريبا 300 صديق .. نادر قالى انه معندوش ولا صديق على ال Face Book و قالى انه البنت دى حاطه الصورة بتاعتها و هى واخده ال Pose بتاع الجواز و انه من الاخر البنت دى بتدور على عريس ... و بعدين افتكر صاحبنا القيادى الشاب و انه على الصفحه بتاعته فى ال Face Book بنات كتير هتموت و تشوفه لدرجه ان نادر قال هى السياسه اتغيرت عن اللى احنا نعرفها ولا ايه ... ناس كتير قالتلى انى اكتب خلفيه عن صديقنا القيادى الشاب ده .. اولا انا ماعرفتوش لدرجه كفايه .. بس انا اعرف عنه انه مثقف و ده شئ مش كتير فى الاوساط اللى هو فيها دلوقتى
خلينى اكلمك شويه عن السياسه ماشيه ازاى فى بلدنا ... صديقنا القيادى ده قيادى فى حركه 6 ابريل .. المهم الحركه دى انشق عنها حركه تانيه اسمها " احنا المعارضه بجد مش المعارضه لمجرد المعارضه " و اى متابع للحركات السياسيه الخايبه فى بلدنا هيعرف كده ..... برضه كان فى اجتماع للناس اللى كانوا فى حركه 6 ابريل عشان يعملوا حركه مستقله .. الاسم بتاع الحركه كان " هنقدر " ابتدت بسبع افراد .. اتقابلوا يوم الجمعه الصبح بدرى فى جنينه الميريلاند عشان القائد بتاعهم يتاكد انه مفيش حد بيراقبهم .. و بعدين قلهم انهم يحطوا الموبيلات بعيد " عشان امن الدوله ممكن يراقب الموبيلات " .. و بعدين قلهم يقفلوها " عشان برضه حكايه المراقبه " .. و شويه و قلهم يشيلوا منها الشرايح " عشان امن الدوله ممكن يراقب الموبيلات حتى و هى مقفوله " و الحق لازم يتقال ان الراجل كان عنده بعد نظر لانى شفت الحركه دى بعد كده فى فيلم Eagle Eye و بعد ماخلصوا الاجتماع قلهم مايخرجوش سوا و كل واحد يمشى من طريق مختلف ... شفتوا بأه الرفيق كان مدى لنفسه اهميه اد ايه ... و طبعا الحركه انتهت من قبل ما تبدأ
و قيس على كده حكايت سياسيه كتير ريحتها تزكم الانوف ... هى دى السياسه فى بلدنا

I Miss You Dad

Listen, baby
Ain't no mountain high
Ain't no vally low
Ain't no river wide enough, baby
If you need me, call me
No matter where you are
No matter how far
Just call my name
I'll be there in a hurry
You don't have to worry
'Cause baby,
There ain't no mountain high enough
Ain't no valley low enough
Ain't no river wide enough
To keep me from getting to you
Remember the dayI set you free
I told youYou could always count on me
From that day on I made a vow
I'll be there when you want me
Some way,some how
'Cause baby,
There ain't no mountain high enough
Ain't no valley low enough
Ain't no river wide enough
To keep me from getting to you
No wind, no rain
My love is alive
Way down in my heart
Although we are miles apart
If you ever need a helping hand
I'll be there on the double
As fast as I canDon't you know that
There ain't no mountain high enough
Ain't no valley low enough
Ain't no river wide enough
To keep me from getting to you
Don't you know that
There ain't no mountain high enough
Ain't no valley low enough
Ain't no river wide enough

السبت، 17 يناير، 2009

سبحان مبدل الاحوال من حال الى حال

اسجد و اقترب
افضل الدعاء و انت ساجد ..... اللهم الى اين المفر منك الا اليك
ضاقت فلما استحكمت حلقاتها ....... فرجت و كنت اظنها لا تفرج
مش مشيخه منى بس فعلا كل الكلام صح و انا بقول كده بعد التجربه العمليه .. لانه كراجل علومجى فانا مؤمن ان التجربه خير برهان ... و بقول كده بصفتى راجل مسلم و عنده يقين و ايمان بالله و اخيرا احب اقول كلمه دايما تلاقى الناس الغلابه على طول بتقولها و انا باتمنى انى اعيش غلبان و اموت غلبان و احشر فى زمرة الغلابه يوم القيامه ..... لا تتعجب .. انها اراده الله
اخر حاجه بجد احب اشكر تلاته سالوا عنى باختلاف وسيله السؤال .. ساندى و عمتى ستيته و حروف .. وده ترتيبهم حسب الترتيب الزمنى للسؤال ... ربنا يخليكوا ليا ... و ارجو منكم الدعاء لعم ساندى انه ربنا يرحمه و يثبته عند السؤال و اقروا له الفاتحه

الجمعة، 16 يناير، 2009

آخر مرة

دعوه لكل من ظن او يظن او سيظن انه منبع الحكمه و اصل التواضع و امام الهدى الجديد و انه على الطريق الى الجنه اهدى هذه الايه ( قل هل ننبئكم بالأخسرين أعمالا ً ( * ) الذين ضل سعيهم في الحياة الدنيا وهم يحسبون انهم يحسنون صنعا ) ... سورة الكهف

Welcome Back







الأربعاء، 14 يناير، 2009

الحب ولع فى الدره يا بت يا سوسو

اسباب الخيانه عند الراجل

قريت البوست بتاع عمتى ستيته و استمتعت بتحليلها جدا و بعرضها لوجهات النظر المختلفه حول الزواج التانى ... و عشان عمتى ستيته نصحتنى انى اخرج من الموود فانا هاسمع نصيحتها و اخرج من المود و هاكمل على كلامها يمكن تعرف الراجل ممكن يخون او يتجوز على مراته ليه ( و اللى الستات بيعتبروه خيانه برضه ) و اليكم مقال عمر طاهر فى جريده الدستور عن اسباب الخيانه عند الراجل

سالتنى صديقه ليه الراجل ممكن يخون مراته ؟ .. الخيانه مرض عند الراجل زى مرض الشوبنج عند الستات
مع العشيقه الراجل لا يحتاج لفياجرا ، و اذا احتاج بيكون ليها فايده ، او كما قال الكاتب الساخر محمد السيد محمد ايش تعمل الفياجرا فى الوش العكر
الست دايما بتتهم الراجل انه خاين من غير مايخونها فبيضطر يخونها لانه كده كده واخد اللقب
الراجل بيخون عشان الحب حاجه و الجواز حاجه و الجنس حاجه
الراجل بيخون علشان كل المكتشفين العظماء كانوا رجاله
الراجل بيخون لانه لا كرامه لنبى فى وطنه ، و لان زمار الحى لا يطرب
الراجل بيخون علشان العشيقه فيها ميزة انها غالبا مابتبانش
الراجل بيخون لانه زى الشجره ما ينفعش يشيل عصفورة واحده
الراجل بيخون عشان مراته بتقرف
الراجل بيخون لان الستات عموما بتحب الراجل الواطى و هو بيجتهد علشان يخليها تحبه
الراجل بيخون لان مراته كتير بتتهمه انه قاعد فى البيت مابيعملش حاجه
الراجل بيخون علشان مراته مابتدخلش السرير غير لما تحس انها تعبانه و عايزة تنام
الراجل بيخون عشان اكتشف واحده بتعرف تعمل مساج
الراجل بيخون مراته عشان بقاله كذا سنه بيحاول يعرف هى بتبقى مبسوطه معاه ولا لا و ما بيعرفش ... الامر الذى يعنى ان الخيانه عند الراجل احيانا بتكون اختبار ذكورة
الراجل بيخون مراته لانها بترفض تاخد معاه دش ... و احيانا بترفض تاخد دش اصلا
الراجل بيخون مراته لما يحس انها زهقت و بتلمح بالطلاق ، بيخونها على سبيل تشجيعها على اتخاذ القرار
الراجل بيخون مراته لانه يجد عند العشيقه قدرا من المياصه و التلميحات الجنسيه ، التلميحات الوحيدة التى يجدها الراجل عند زوجته هى تلميحات بخصوص مصاريف البيت
الراجل بيخون مراته علشان لما قالها عايز اتجوزك و نعيش و نكبر مع بعض ماكانش عارف انها هتكبر اسرع منه
الراجل بيخون مراته علشان بتبقى حامل بالتسع شهور
الراجل بيخون مراته لانه بطبيعته مغامر و عاشق للتحديات
الراجل بيخون مراته لانه بيحترمها زياده عن اللزوم .. بيحترمها للدرجه اللى بتخليه يتكسف يقول لها ماتقومى ترقصى شويه
الراجل بيخون مراته علشان يتعلم حاجات تنفعهم هما الاتنين
الراجل بيخون مراته عشان كان فاكر نفسه اتجوز واحدة زى امه لحد ما مراته ابتدت تلبس فى البيت ترنجات زى اللى كان بيلبسها ابوه
الراجل بيخون مراته عشان بتفضل تقول هاخس هاخس .. و مابيحصلش
الراجل بيخون مراته عشان فيه جزء من ملابسها بيفكره بحبل الغسيل بتاع جدته
الراجل بيخون مراته لانها بتبرر عصبيتها دايما بالدورة الشهرية .. الراجل بيفتكر ان الموضوع ده مابيخلصش عشان مراته عصبيه طول الوقت
الراجل بيخون مراته عشان يتأكد انه بيحبها
الراجل بيخون لان عشيقته لما بترقص بترجعله ثقته فى نفسه ، لكن مراته لما بترقص بتخليه يفصل من كتر الضحك
الراجل بيخون مراته عشان بتاخد ساعه تجهز و بعد الساعه بيلاقيها زى الاول برضه
الراجل بيخون مراته علشان يقلل المسئوليات اللى عليها
الراجل بيخون مراته بدل ما حد تانى يخونها
الراجل بيخون مراته عشان احنا عايشين فى مجتمع ذكورى
الراجل بيخون مراته عشان عشيقته مابتطلبش تطفى النور
الراجل بيخون مراته عشان كده كده كان بيخون قبل الجواز .. ايه اللى اتغير يعنى
الراجل بيخون مراته علشان فى الاول كان بيبعدها عن حضنه عشان يعرف ينام ساعتين ، و دلوقتى بقت هى اللى بتبعده
الراجل بيخون مراته عشان متاكد انها بتحبه و هتسامحه

و بعد المقال ده انا ماعنديش حاجه ازودها ... اللى شايف فى اى سبب تانى للخيانه يا ريت يقولنا عليه عشان " العلم نورن " برضه

الثلاثاء، 13 يناير، 2009

آفات العرب

للعرب آفه كبرى و هى التى رصدها عمنا ابن خلدون و لخصها فى جمله واحده " آفه العرب حب الرئاسه " .... و للعرب منذ قديم الازل آفه اخرى عبر عنها الشاعر ببيتين شعريين
و لقد نصحت لهم بمنعرج اللوى ....... فلم يستبينوا الرشد الا ضحى الغد
و ما انا الا من غزيه ان غوت ........... غويت و ان ترشد غزيه ارشد
ننصح الناس بالحق و لكننا نتبعهم فى الباطل ..... ثقافه القطيع كما قالت الصديقه مياسى
ماليش نفس اتكلم اكتر من كده لانه اللى انا قلته زياده و اكتر من الزياده كمان .... ربنا يرحمنا برحمته

الاثنين، 12 يناير، 2009

اخبار

تم افتتاح المدونه التاريخيه الجديده الخاصه بي على جناح التبريزى و تابعه قفه
فى انتظار تعليقاتكم

الفكره .. الحقيقه .. الفرق بينهم

انا النهارده عايز اتكلم عن حاجه موجوده فى تاريخنا من زمان أوى ... اول ما اتقتل تالت الخلفاء الراشدين عثمان ابن عفان كان ابن عمه معاويه ابن ابى سفيان من اول المطالبين بجعله ولى الدم .. يعنى اللى ياخذ بقصاص عثمان و اتى بقميص عثمان الملطخ بالدم و رفعه و من يومها اشتهرت كلمه قميص عثمان و هى تعنى محاوله اكساب الباطل شرعيه الحق
نمشى حبه لادام فى الزمن نلاقى الدوله العباسيه التى جت بعد موت العباس عم الرسول باكتر من 100 سنه و طالبت بحقه فى الخلافه ... و كان معاها فى نفس الزمن و تنازعا الخلاف الدوله الفاطميه
نمشى شويه فى الزمن نلاقى بعد كده باكتر من 400 سنه جاء الحسن بن الصباح مؤسس الحشاشين المنشقه عن جماعه الاسماعيليه ذات الاصل الشيعى و معاه قميص عثمان جديد .. المرة دى هى الانتقام لنزار ابن الخليفه المستنصر الذى تم قتله و توليه اخيه المستعلى الحكم بدلا منه و انا متكلم عن الموضوع ده بالتفصيل فى مدونتى التاريخيه على جناح التبريزى و تابعه قفه
نمشى شويه كتار المره دى .. و نقفز الى عصر الملك فاروق الاول ملك مصر و السودان و اللى فى عهده ظهرت حركه الاخوان المسلمين و المرة دى قميص عثمان كان هو طرد الانجليز .. و من بعده محاربه اليهود فى فلسطين .. و بعد كده محاربه الثورة ايام جمال عبد الناصر و نظامه الدكتاتورى .. ثم فترة هدنه ايام الرئيس السادات لم تدم طويلا حتى تم اغتياله على يدهم فى مشهد لن ينسى من ذاكره الوطن ... و اخيرا ايام الرئيس الحالى مبارك عشان محاربه الفساد و نفوذ " النصارى " كما يطلقون على المسيحيين
هنلاحظ حاجه غريبه فى كل الحركات المتطرفه العنيفه دى انها كلها قويت فى عصور الضعف و الفساد من اخر ايام الدوله الامويه .. الى ضعف الدوله الفاطميه و نشأه القرامطه و الحشاشين الى عصر الفساد ايام الملك فاروق مرورا بايام سطوتهم اللى منحها ليهم الرئيس السادات الى ان اغتالوه و محاولتهم لفرض سيطرتهم على ايامنا الحاليه و لكن الرئيس مبارك اتعلم الدرس بعد ماشاف سلفه و هو يقتل امام عينيه و بالتالى مش ممكن يصدقهم ولا يامن ليهم
و نلاحظ برضه انه فى عصور قوة الحكم الجماعات دى بتختفى .. يعنى زى ما القرامطه و الحشاشين اختفوا ايام الدوله الايوبيه و على رأسها الملك الناصر صلاح الدين الايوبى ... ايام الرئيس جمال عبد الناصر مع كل الانجازات اللى اتحققت فى عصره ( مع تسليمى التام بوجود اخطاء بس مفيش حد مابيغلطش و مفيش زمن مثالى مفيهوش اخطاء بس العبره بالمحصله النهائيه و كشف الحساب اللى بيبين ما لهذه الحقبه و ما عليها ) .. اخر ايام الرئيس السادات عندما اطلق ايديهم فى الجوامع و الزوايا و الجامعات نفسها لمحاربه الشيوعيين و الناصريين و ضربهم بالاخوان ... ايامنا الحاليه اللى بتشهد هوان للاسلام الحقيقى و فساد قال عنه احد الكبار ( الدكتور زكريا عزمى ) انه للركب ... و اخر ملاحظه انه كل الجماعات دى مبنيه على فكرة ( و مش شرط تكون الفكره صحيحه فى حد ذاتها ) و بالتالى بتعيش كتير لانه قليلين اللى يعرفوا ان الفكره تحارب بالفكرة مش بالسلاح ( و طبعا انا مش بانفى حق الرد نتيجه لاستخدام هذه الجماعات للسلاح ) .. بس الرد على الفكره و مجادله الحجه بالحجه ده شئ مش موجود
و اخيرا اتمنى يجى يوم نقدر نتجادل فيه من غير ما نضرب بعض .. نقدر نتحاور من غير ما نشتم بعض .. نقدر نختلف من غير ما نقتل بعض
بس انا شبه متاكد انى هاموت قبل ما اشوف اليوم ده الا لو كانت رحمه ربنا بينا واسعهارحمنا برحمتك يا رب و االهم لا تحاسبنا بما فعل السفهاء منا

البلوجاتيه

الفقره الاولى "عزيزتى ..... قبل ما نتكلم على مواقف غيرنا نشوف احنا بنعمل ايه وساكتين على ايه مدونة ........ فى عز ضرب حماس وغزه والشهداء اللى بتبكى عليهم بتقول يبقى حماس والاخوان والجهاد إلى اسفل السافلين ربنا ينتقم من الحمساوية ومن الاخوان ومن الجهاد طبعا مفيش اسرائيل ولا امريكا انا بعتبرها سافله وخايبه وبقول ربنا ينتقم منها بدم الشهداء حضرتك بتخش عندها وشايفها ايه وبلاش نتكلم عن حكامنا وضعفهم لانكم اضعف من حكامكم بسكتكم وترحبكم بالقذره دىمستنى رائيك وموقفك الواضح والحاسم التدويين راى وموقف مش صحبة ولمه وتبادل زيارات بالذات فى موضوع خطير كده وبلاش تقولى ده راى دى عمالة وخيانة وقذراة وزبالة وشوفوا ده فى مصراوى شاهد عيان: حماس لم تقتل الضابط المصريhttp://www.masrawy.com/News/Egypt/Politics/2009/january/1/rafah.aspxوده لينك الموضوع ... اه قريت تعليقك عندها ويا ريت اهم من الكلام فعل ورد فعل وردك عليها مش بنفس غضبك فى بوستك ودعائك سلام " .... انتهى التعليق الاول
الفقره التانيه " ............... بالنسبه لمدونه القذره ....... انا بتكتب تعليقات عندها كتير جدا بس ولا تعليق ليا اتنشروالتعليق اللى انت شوفته ده ده الوحيد اللى هى نشرته سبحان الله وهى اصلا عامله اشؤاف على التعليقات يعنى مش تقول انى مش رديت عليها كويس لا والله ربنا العالم انى من اول ما دخلت التدوين وانا بنقضها اصلا ويمكن هى نشرت التعليق ده اللى انت شوفته عشان انا مغلطتش فيها زى ما كنت بغلط قبل كده " ..... الرد على التعليق الاول انتهى
متابعه على الرد من صاحبه التعليق الاول " عزيزتى ..... هو انتى كمان ممنوعه من التعليق عندها بس انتى بتنزلك تعليقات نا ممنوع تنزلى اى تعليق حتى لو قوتلها يا قمراصلى عندى دليل قذارتها لو تحبى ابعتهولك معلش انا فكرت لما شوفت التعليق ان بينك وبينك تواصل وانا غارف انها قذرة وصعب محترم يتقبلها وابعتيلى لينك مدونة ....... علشان احييه وكمان واجب غلينا نتكلم مع اللى نعرفهم وبيخشوا مدونتها ما يا ياخدوا موقف منها يا احنا ناخد موقف منهم ده بذمتك مش شئ قليل على غزه وشهدائها ايه رائيك هتخدى موقف من كل اللى يخش عندها شكرا وتحياتى سلام " ... انتهت المتابعه
رد على المتابعه " ....... دى مدونه الاخ ..... صاحب مدونه ........ زى ما طلبتيها ...... ومش عرفت اجيب لحضرتك لينك المدونه اللى رد فيها على قذره ..... لانه والله مسافر وانا متضامنه مع حضرتك وانا هاخد بالفعل موقف من كل اللى بيتابعوها وبيعلقوا عندها وحسبى الله ونعم الوكيل ده كفايه انها حاطه صوره النقاب واللحيه وبتقول عليهم جهل وتخلف وبتشتم فى الجماعات الاسلاميه زى الاخوان وحماس بجد ربنا ياخدها احسن هو ومدونتها لانها بتسبب فتنه كبيره اوى " ... انتهى الرد على المتابعه
متابعه على رد المتابعه " عزيزتى ....... شكرا على كلامك وموقفك ما لازم يكون لينا مواقف مع الزباله ومن بيحب يتعامل مع الزباله برضوا وهعمل قايمة سودة مع كل حد بيخش عندها ومتمسك بالدخول عندها رغم كل كلامها بحجة الحوار واختلاف الراى زى الضعفاء من الامة والحكام وانا مكسبش مدونيين واخسر نفسى مش للدرجه دى اتمسك بمعرفة مدونيين مش عارفيين الهجوم على الشهداء مصيبه اد ايه شكرا على موقفك وبخصوص كلمتك الهجوم على اللحيه والنقاب هعتبر اللى بيخش عندها ملحد بلا دين انسانيته تخليه ميخشش عندها لهجومها على القتيل مش القاتل سلام " .... انتهت المتابعه
رد جديد على الرد " ربنا يكرمك وجزاك الله خيرا وده واجب علينا والله تجاه المدونه القذره دى وحسبى الله ونعم الوكيل فيها وفى كل من يؤيدها والله ما احنا ناقصين الاشكال دى نورتنى بجد وسعيده بمرور حضرتك فى مدونتى المتواضعه " ... انتهى الرد
شكر " عزيزتى حبيت اشكرك على موقفك واتمنى ما تترجعيش عنه مهما كان المدون اللى بيخش عند ..... بالنسبالك سلام " ... انتهى الشكر
رد على الشكر " انا عند موقفى ومش هتنازل ابدا ان شاء الله نورتنى والله فى مدونتى وشكرا جدا لاهتمام حضرتك " .. انتهى الرد على الشكر
انا ماعملتش اى حاجه غير انى شلت الاسماء من التعليقات بس .... انا مش هاقول اى حاجه غير كام تعليق صغيرين جدا
الناس دى شايفه ان الحوار ده ضعف و حاجه مالهاش لازمه لانهم الظاهر على اد تدينهم الشديد ماسمعوش الايه " ادع إلي سبيل ربك بالحكمة والموعظة الحسنة وجادلهم بالتي هي أحسن " او " وَمَنْ أَحْسَنُ قَوْلًا مِمَّنْ دَعَا إِلَى اللَّهِ وَعَمِلَ صَالِحًا وَقَالَ إِنَّنِي مِنَ الْمُسْلِمِينَ * وَلَا تَسْتَوِي الْحَسَنَةُ وَلَا السَّيِّئَةُ ادْفَعْ بِالَّتِي هِيَ أَحْسَنُ فَإِذَا الَّذِي بَيْنَكَ وَبَيْنَهُ عَدَاوَةٌ كَأَنَّهُ وَلِيٌّ حَمِيمٌ " او ممكن يكونوا بيعتبروهم مدسوسين على القرآن و العياذ بالله
تانى حاجه الناس اللى اتكلموا و قالوا كلمه " قذره" فى اكتر من موضع تقريبا ماسمعوش حديث الرسول عن انه ينهى عن الغيبه و هى ذكر اخاك بما يكره و ان كان فيه .. او برضه جايز بيعتبروا الحديث ده اسناده ضعيف او منحول
تالت حاجه انهم اعتبروا كل اللى هيدخل المدونه بتاعت " القذره " على حد كلامهم ملحد و كافر و ماعندوش دين و برضه تقريبا نسيوا انه اتنين مسلمين واحد فيهم قال التانى انت كافر فقد باْ بها احدهما .. بس الظاهر انه عندهم معلومات من ربنا من المسلم و من الكافر و من الملحد
اخر حاجه صاحبه المدونه اللى كانت بتنشر و بتابع الردود و قالت انه ما اتنشرت ليها غير رد واحد عشان ماغلطتش فى صاحبه المدونه كتير زى كل مرة منقبه
و بعد ده كله بيقولك و الاخوان مالهم ..... يا خى ..... ( ولا بلاش دى على راى فريد شوقى الله يرحمه ) .. ملحوظه اخيره انا ما نشرتش اى اسماء لانى مش عايز اشهر بحد و لان الاتنين اللى كانوا بيتكلموا اقل من انى اذكرهم .. انا بس كنت بانشر موقف و طريقه تفكير مش اكتر ولا اقل

الأحد، 11 يناير، 2009

اخبارى

تم نشر الفصل الثالث من روايتى و يتبع بالفصل الرابع قريبا

بيب بيب ...... اهلى


السبت، 10 يناير، 2009

حكايه قصيره جدا

الساعه دلوقتى بعد واحده بليل .. و انا ماشى فى الشارع فاجأنى انى اشوفها واقفه لوحديها فى عز التلج ده .. كانت مستخبيه فى حما عربيه راكنه .. صغيرة لدرجه مش معقوله .. صوتها ضعيف و واطى اوى لدرجه انه قطع قلبى لما سمعته .. كانت كانها بتبذل مجهود عشان تطلعه و تسمعه لاى حد .. بصيت حواليا .. الناس اللى ماشيه قليله جدا و مع كده اللى ماشى مش بيلتفت ليها اصلا كانها مش موجوده و كانى انا بس اللى شايفها و سامعها ... معقوله وصلنا للدرجه من القسوة و تحجر القلب .. المهم اخدتها معايا البيت و روحت بيها ... مجرد ما دخلت فى الجو الدافى بتاع الشقه ابتدت تستعيد حيويتها تانى .. كانت ميته من الجوع .. بس لازم تستحمى الاول .. شدتها و جرتها جر غصب عنها و دخلت معاها الحمام و ابتديت احميها بايدى و اشيل التراب اللى على جسمها .. كانت بتقاومنى مقاومه رهيبه ... بس كانت اضعف من انى اعتبر المقاومه دى جديه .... بعد ما حمتها و نضفتها نشفت جسمها و ابتديت اسرح ليها شعرها و هى مش عاجبها و بتحاول تهرب منى بس انا كنت ماسكها كويس ... بعد كده قمت حطيتلها اكل و اكلت كتير جدا ... اد كده كانت جعانه .. بعد كده ابتدت تنعس ... اخدتها جنبى على السرير و نيمتها فى حضنى و الحقيقه انى كنت باحاول استفيد من الحراره اللى طالعه من جسمها و استعين بالحرارة دى فى مواجهه الصقيع اللى احنا عايشين فيه ... شويه ابتديت احس بانتظام انفاسها و سكونها التام ... دلوقتى اقدر انام و انا مطمن عليها ... كنت حاسس انه مش هاممنى انه حد يشوفنى معاها فى بيت واحد .. فى سرير واحد .. يشوفنا كيان واحد ... كل اللى كان هاممنى انها تنام فى حضنى و بس .. احساس ابوة .. يمكن .. احساس حب .. اكيد ... يا ترى فى احاسيس تانيه ... مايهمنيش و مش مهتم اعرف و سايب المعرفه دى للناس اللى غاويه تحليل
بكرة ان شاء الله لما تصحى هابقى اعرفكم عليها .. مع انى انا نفسى لسه ماعرفتش اسمها .. بس مش مشكله انا هاديها اسم من عندى






اسمها بسبس ... و هى قطتى الجديده

اعتذار

اجد لزاما و واجب مفروض لابد من اتمامه ان اعتذر للصديقه العزيزة البتanonymous على حدتى فى الرد على البوست الخاص بها .. و ذلك عملا بالمثل " يخانقنى فى شارع و يصالحنى فى حاره " .. فانا اعتذر علنا على مدونتى

الجمعة، 9 يناير، 2009

بعض المواقف من داخل المساجد

لسه حالا قارى تعليق لعمتى ستيته اللى نصحتنى فيه انى اقرا البوست بتاع المهندس احمد ابو العلا .. ماكدبتش خبر و رحت قريت البوست و عجبنى جدا
قبل اى حاجه انا مش باشوه صورة المساجد ولا اللى بيصلوا فى المساجد انا هاقول شويه حاجات حصلت قدامى و من غير اى تدخل منى اللهم انى باقوم بدور الراوى فقط لا غير و هاخلى وجهه نظرى للاخر
الموقف الاولانى لما كنت فى السعوديه باعمل عمرة من 3 سنين .. كنت باصلى فى جامع و الامام و هو بيقرا قرا ايه غلط .. قام دكتور سودانى اعرفه كان واقف جنبى رده .. الامام قراها غلط تانى .. الدكتور رده تانى ... الامام قراها غلط لتالت مره ... الدكتور سكت المرة دى .... خلصنا الصلاه و الامام بيسلم و مجرد ما خلص تسليم كمل و لف ناحيتنا ... قال " من اللى كان بيردنى ؟ " الدكتور قاله " انا " الامام قاله " و انت بتشتغل ايه " الدكتور قاله " دكتور " قاله " يعنى مش شيخ ، يبقى بتردنى ازاى ؟ " الدكتور قاله " انا حافظ كتاب الله و ممكن نخلى المصحف يحكم بينا " الشيخ قاله الخلاصه و جابله من الديل " احنا بنصلى هنا كده مش عاجبك روح صلى فى الجامع اللى على اول الشارع " .. انتهى الموقف ولا تعليق
الموقف التانى ... مجموعه من زمايل اخويا فى صلاه الجمعه .. الخطيب خلص و اقاموا الصلاه و هيبتدوا يصلوا و الامام بيقولهم حاذوا المناكب و سدوا الفرج بينكم ... واحد زميل اخويا واقف جنب الراجل اللى واقف فى الو الصف جنب الحيطه قرب على الراجل و حط قدمه قريبه من قدم الراجل .. الراجل بعد شويه قام صاحب اخويا قرب منه .. الراجل بعد تانى صاحب اخويا قرب منه تانى .. قام الراجل بصله و بعلو صوته فى الجامع اللى هو بيت ربنا ربنا و قاله " هى ال......... ( كلمه عاميه تنم عن فعل لا يتصف صاحبه بالرجوله و اسم الفاعل منها شتيمه ) فى الصلاه كمان ولا ايه ؟ " ... انتهى الموقف ولا تعليق
الموقف التالت ... اللى حكالى الموقف ده صديقى نادر ( و برضه الاسم مش غريب للى بيتابع
واحد جامعه ) .. عندهم جامع صغير فى يوم نادر رايح يصلى لقى راجل كبير من اهل المنطقه قاعد على باب الجامع بيطرد العيال انهم يدخلوا ( زى ما يكونوا داخلين بيت ابوه مش بيت ربنا ) نادر سأله ليه كده الراجل قاله احنا ناقصين عيال صغيره و خوته و وجع دماغ ( اهداء الى المهندس احمد اللى سال ممكن يخشوا يصلوا بعد كده ) .. على فكرة الراجل ده كان تاجر مخدرات و دخل السجن و لسه ليه نشاط " بس دى نقره و دى نقره " ... و الراجل ده بيعتبر نفسه متعهد المسجد ( زى عادل امام لما كان متعهد الحكومه فى شاهد ماشافش حاجه كده ) .. انتهى الموقف ولا تعليق
الموقف الرابع ... برضه نادر مع نفس الراجل متعهد المسجد .. الراجل بما انه المتعهد فكل صلاه يجرى على الميكروفون عشان يأذن ( مهو المتعهد بأه ) .. المهم الاوقاف بعتت امام للمسجد ده .. الراجل كان محروق جدا عشان الامام ده مش من اهل المنطقه و انه صغير فى السن و ان المتعهد عايز هو اللى يقول الخطبه بتاعت الجمعه ... انتهى الموقف و لا تعليق
الموقف الخامس .. و ده بخصوص استخدام بعض الائمه لالفاظ عاميه لا تتناسب مع قدسيه الجوامع .. كنت باصلى انا و اخويا و الامام كان بيتكلم عن الحروب و اهميه الايمان فى الحروب و بيدى مثال بحرب 73 لما كانوا الجنود بيقولوا الله اكبر ( كلام جميل .. كلام معقول .. مقدرش اقول حاجه عنه على رأى ليلى مراد الله يرحمها ) .. بعد كده الامام قال السر الخفى اللى خلانا انهزمنا فى حرب 67 هو ان الجنود بدل ما كانوا بيقولوا الله اكبر كانوا بيقولوا " هع " انا سمعت هع دى من هنا انا و اخويا و مقدرناش نمسك نفسنا من الضحك لغايه ما خرجنا من الجامع ( يا رب تكون صلاتنا اتقبلت فى اليوم ده ) .. انتهى الموقف و لا تعليق
الموقف السادس و الاخير عشان ماطولش عليكو .. صديق دخل المسجد عشان صلاه الجمعه .. الامام قعد يخطب خطبه طويله ( كانه ماسمعش ان الرسول يدعو الى عدم تطويل الخطب ) .. المهم الظاهر ان الامام كان ممل على نحو او اخر و صاحبى ماكنش نام كويس فابتدا ينعس ( و انا مش باعفى صاحبى من الغلط ) .. المهم ان الامام كان بيحكى عن الخيانه الزوجيه و قال كلمه الحبيب و هو يقصد بيها العشيق .. صاحبى صحى على كلمه الحبيب و قام قايل " صلى الله عليه و سلم " طبعا كان الجامع هس و كل الناس قعدت تبصله و ماقلكوش على اللى اتقاله بعد كده
ربنا يرحمنا برحمته

مواقف و عيوب

ما اكثر من مدوحنى شفاهة و ما اقل من فعلوها تحريرا ... محمود السعدنى
هذا البوست اهداء الى عمتى ستيته
ـــــــــــــــــــــــــــــــــــــــــــــــــــــ
بدايه خلونى اتفق معاكوا على حاجه .. محدش مفيهوش عيوب و محدش معصوم من الغلط
انا هاتكلم النهارده شويه عن نفسى ... قبل شهر سبتمبر 2003 كنت شخص غير اللى الشخص اللى موجود دلوقتى ... مش بابالغ لو قلت انه 99% من حياتى و تصرفاتى كانت غلط على اى مقياس و تحت اى ظروف ... ابرز عيوبى كانت انى مستهتر .. مش واخد حاجه جد ابدا فى حياتى .. اهم واحد فى حياتى كان انا و تانى اهم واحد برضه انا و تالت اهم واحد انا مره تالته و بعد كده ياتى الاخرون ... كنت مبسوط بحياتى و شايف انى عايشها بالطول و العرض .. كنت مغرور جدا و كنت ناسى ان الغرور ده اول خطيئه ارتكبت فى الوجود ( عندما اغتر ابليس بنفسه و عصى امر ربه ) .. كنت ناسى ان " لوسيفر " باللاتينيه معناها امير البهاء يعنى المتيه و المعجب بنفسه و المغرور جدا .. كنت ناسى ان الغرور ده اول الطريق لجهنم
لغايه يوم ما والدى مات و دفنته .. الموضوع ده كان اول موقف و اول صدمه خلتنى اعيد حساباتى فى كل حاجه .. ابتديت اتغير ، لدرجه ان اعز اصحابى ماكانوش مصدقين انى باتغير و فاكرينها حاله من حالات تفاعل ما بعد الصدمه و بعد كده كل حاجه هترجع لاصلها و عمرو هيرجع زى ماكان ... ابتديت اخلى افعالى تطابق اقوالى عشان مابقاش بوشين و منافق او على احسن تعبير مجرد انسان مؤمن بمدأ ميكافيلى .. حاجات كتير اتغيرت و حاجات كتير لا بس الفكرة انى دايما باحاول
تانى موقف اثر فيا و سبب ليا صدمه كهربائيه و خلانى اغير حاجات كتير من سلوكياتى كان لما كنت فى يوم ماشى مع صديقى وجدى ( و المتابعين ل
واحد جامعه الاسم مش هيكون غريب عليهم ) و قالى على موقف هو حضره من 3 سنين و مرضيش يقولى عليه عشان ما يجرحنيش و خلاصه الموقف انه فى اتنين اتكلموا عليا بطريقه مش حلوة و محدش قدر يغلطهم عشان اللى قالوه كان صح ... انا مش هاقول الموقف ولا هاقول على الاتنين اللى اتكلموا بس اللى وجعنى ان اللى اتكلموا عليا كانوا ناس مش فوق مستوى الشبهات و اسوا منى فى حاجات كتير و مع كده اتكلموا عليا و محدش قدر يدافع عنى ... الموقف ده وجعنى جدا و نفسى صعبت عليا أوى و ابتديت اتغير اكتر عشان اكون احسن عشان خاطر نفسى اولا مش عشان خاطر الناس
تالت موقف حصل من اسبوع ... و اكتشفت انى غلطان فيه جدا .. لانه بدون الدخول فى تفاصيل انا كنت بانصح ناس و باحل مشاكلهم و ناسى انى احل مشاكلى انا الاول و اكتشفت انى خالفت مبدأ مهم اوى فى حياتى .. " من نظر فى عيب نفسه انشغل عن عيب غيره " و الحكمه دى الامام على بن ابى طالب هو اللى قالها ... و ندمت انى حطيت نفسى فى الموقف الوحش ده و انى غلطت فى حق ناس كتير و قبل ماغلط فى حقهم غلطت فى حق نفسى .. و اعتذرت و ناوى اتبع الاعتذار الشفوى باعتذار عملى عشان الكلام لوحده مش كفايه من غير فعل
يا ترى انتو بأه ايه غلطاتكوا و ايه المواقف اللى اثرت فيكو لدرجه انكو تتغيروا ؟؟ ... انا مش مستنى اجابه انما و انتو قاعدين مع نفسكو كده فكروا على مهل و شوفوا انتو صح ولا غلط

الخميس، 8 يناير، 2009

كنت فرحان

تم رفع المحتوى بناء على ضغوط دوليه

لا تكذبى

كونى كما تبغين لكن لن تكونى .... فانا صنعتك من هواى و من جنونى
ولقد برئت من الهوى و من الجنون

كامل الشناوى

الصورة .. الحرب ... المعركه .. و اشياء اخرى

فى جمله انا مش فاكر انا قريتها فين بالظبط الا ان الجمله دى اثرت فيا تاثير كبير و بالتجربه العمليه اكتشفت اد ايه هى صحيحه و حقيقيه
الجمله دى بتتلخص فى الاتى : اول ما تبص على صورة من بعيد بتكون الصورة مش واضحه و تفاصليها مش باينه أوى .. تبتدى انت تقرب فالصورة توضح اكتر و يبتدى بيان جمالها و جمال الوانها ... تقرب اكتر فتبتدى تبان الشقوق الرفيعه اللى موجوده على الصورة و يبان الاماكن اللى الالوان باهته فيها و تفقد الصورة جزء من جمالها فى وعيك ... تحاول استعاده الصورة الجميله فتجد ان وعيك لا يساعدك على هذا و الحاجه النهائيه اللى بتفضل فى ذهنك هى اخر تفاصيل انت شفتها لانها هى دى الحقيقه .... اذا نجحت بمعجزة انك تستعيد الصورة الحلوة مره تانيه يبقى انت اصبحت على اول الطريق انك تضحك على نفسك و تحور الحقيقه لشئ اقرب لتصورك عشان تفرح ... اكيد مش هينفع نضحك على نفسنا و نقول الصورة مش مشققه و الوانها مش باهته انما دايما ينفع نبص ليها من زاويه تانيه و نحاول اكتشاف الجمال اللى فيها ... لانه فى النهايه مفيش حاجه قبيحه بنسبه 100% و بشكل مطلق اكيد فيها نسبه جمال ولو صغيرة
و اخيرا : اذا خسرت معركه فكن ذكيا بما يكفى كى لا تخسر الحرب كلها

الأربعاء، 7 يناير، 2009

ثقافه الاختلاف

و انا باقرا التعليقات على مدونه الصديقه قطه الصحراء لاحظت انه فى بعض التعليقات فيها سب و قذف مباشر و ده فعل يعاقب عليه القانون ... قطه الصحراء مشغله الاشراف على التعليقات برغم كده كان عندها قمه الديموقراطيه انها تنشر حتى التعليقات اللى بتتشتم فيها .. و هى من كرم اخلاقها و عشان ماتنزلش لمستوى اللى شتم مش بترد عليه
انا بحييها على الديموقراطيه بس باختلف معاها فى انها مش بترد لان كل اللى دخل الجيش ( و طبعا انا عارف انها مادخلتش الجيش ) عرف انه فى مبدا مهم فى العسكريه هو انه اذا ارتفعت الايدى تساوت الرتب و كمان " و الذى اغتالنى ليس ربا لقتلنى بمشيئته ..... ليس انبل منى ليقتلنى بسكينته .... ليس امهر منى ليقتلنى باستدارته الماكره "
و على فكره موضوع التعليقات السافله مش حكر على قطه الصحراء بس .. تقريبا كل الناس اللى ليها مدونات بيتهاجموا ... و حتى فى كلامنا العادى مع بعض دايما بنهاجم بعض مش بنتكلم و ساعات الكلام ممكن يتطور الى ضرب
هاديكوا مثال بالمدونات و طبعا انتو يمكن تكونوا عارفين حالات اكتر منى ... يعنى مثلا المدونات اللى بتتكلم فى مواضيع سياسيه زى مدونه قطه الصحراء تلاقى الاتهامات بانها عميله و يهوديه و حاجات من دى كتير .... و المدونات اللى بتتكلم شويه فى مواضيع دينيه زى صبرنى يا رب تلاقى الاتهامات بانها ما ينفعش تفتى ( مع انها ما بتفتيش ) و انها كافره ( مع انه لو اتنين مسلمين قال واحد فيهم للتانى انت كافر فقد باء بها احدهما ) و اتهامات تانيه كتير .... و فى مدونات مثلا عن المثليين تلاقى واحد داخل يقول " يا شواذ يا ولاد الكلب " على راى محمود عبد العزيز فى الساده الرجال ....
و فى صفه مشتركه فى اصحاب كل التعليقات البذيئه انهم دايما بيبانوا على انهم Anonymous او غير معروف .. طيب مدام انت راجل و قد الشتيمه بتشتم و انتى مستخبى ليه ؟؟؟ ..... و اصلا لو مش عاجبك الكلام اللى انت بتقراه بتقراه ليه و تعتبره كلام مهم لدرجه انه كلام يستاهل انك ترد عليه بالشتيمه و قله الادب و سوء الخلق و عدم التربيه
و اللى فاكر برنامج الاتجاه المعاكس بتاع فيصل القاسم اكيد فاهم كلامى من انه فى اتنين جايين عشان يشتموا بعض و بعدين يمشوا ... و عشان محدش يفتكر ان الشتيمه مقصورة على الناس اللى على العاديه فبرضه المثقفين بيشتموا بعض ( زى مثال الاتجاه المعاكس ) ... و لو حد فاكر انها حكر على الناس اللى على باب الله فبرضه الحكام بيشتموا ( زى ابو عزه بتاع العراق لما شتم امير الكويت ... و القذافى لما شتم الملك عبدالله بتاع السعوديه ايام ما كان لسه الامير .. و الموقفين كانوا فى اجتماعات القمه العربيه بتاعت جامعه الدول ) ... و لو فاكر انها بس بتحصل بين العيال و الناس الصغيره فى السن يقعد فى اى مكان يحبه و يسمع الناس الكبيرة و هى بتشتم بعض
تلاقى الاخوان بيشتموا فى الحكومه و اليساريين ( اللى بيسموهم كفرة و شيوعيين ) ، و الحكومه بتشتم الاخوان ( اللى مسمينهم المحظورة ) و بيشتموا باقى المعارضه معاهم ، و باقى المعارضه بيشتموا الناس كلها .. و انت بأه على حسب توجهك السياسى عشان تشوف انت هتشتم مين
يعنى الشتيمه و قله الادب حاجه متاصله فينا مش حاجه عارضه ولا ظرفيه ولا الكلام الفاضى اللى طبالين الزفه بيحاولوا يروجوه ... و المسلمين بيشتموا المسيحين ، و المسيحين بيسبوا و بيلعنوا للمسلمين مع انه " لكم دينكم و لى دين " ( و عشان محدش يفهمنى غلط انا مش باقول انه الواحد مايكونش عنده حميه على دينه بس الواقع اننا دخلنا فى دايرة مقفوله و عمرنا ماهنخرج منها ابدا و اللى يقول غير كده يا اما بيكدب او بيضحك على نفسه ) ... و تلاقى واحد طالع يقولك مهو فى بلاد بره برضه بيشتموا بعض ( مع انك بتكلمه على بلاد جوه ) .. حقيقه بره بيشتموا بعض و بيضربوا بعض و بيموتوا بعض كمان بس الفكرة فى حاجه اسمها احصائيا هما بيعملوا كده اد ايه ... يعنى عشان اللى مفهمش كلمه احصائيا بنسبه كام بيشتموا بعض و بنسبه كام بيتحاورا بالحجه و المنطق .. و نسبتنا احنا كام مدام احنا مصرين اننا نقارن نفسنا بيهم ( و اللى يغيظك اننا دايما بنقارن نفسنا بيهم فى السلبيات و عمرنا مافكرنا نقارن نفسنا بيهم فى اى حاجه ايجابيه - حتى الدين اللى بنقول اننا متمسكين بيه و هما لا ( مع اعتراضى على النقطه دى ) ده قول حق يراد به باطل لان " الدين المعامله " و بيتهايئلى كلنا شايفين احنا بنعامل بعض ازاى ) .... انا و انا باكتب البوست ده حاسس انى بدن فى مالطه و اخر حاجتين هاقولهم هما " لقد أسمعت لو ناديت حياً... ولكن لا حياة لمن تنادي ..... وناراً لو نفخت بها أضأت... ولكن أنت تنفخ في رمادِ " و زى ما سعد زغلول باشا قال " مفيش فايده " و ربنا يرحمنا من عنده

انا فرحان

تم رفع المحتوى بناء على الضغوط الدوليه

موضوع الساعه

اعتقد ان غزة هى موضوع الساعه ... الموضوع اللى موجود فى كل المنتديات و على صفحات الجرايد و فى الاذاعات و القنوات بمختلف توجهاتها و بين احاديث الناس و بعضها البعض و فى اغلب المدونات
و اعتقد ان اللى اتقال فيه سواء بالسلب او الايجاب اكتر من الكفايه ... عشان كده انا قررت قرار تاريخى
موضوع الساعه .... غزه
انا مش هاتكلم عنه عشان نفسى مش جايبانى

الثلاثاء، 6 يناير، 2009

الجواز و سنينه - مع الاعتذار للكاتب الكبير أحمد رجب -

مش عارف ابتدى ازاى فى الموضوع ده .. الموضوع ده ناس كتير اتكلمت فيه و ناس اكتر هتتكلم فيه لانه بيحصل كل يوم و هيفضل يحصل فعشان كده عمر الكلام ما هيخلص فيه
آخر يومين فى سنه 2008 و اول يومين فى سنه 2009 قريت و سمعت و عشت الموضوع ده اكتر من مرة و باكتر من شكل .... البدايه كانت فى البوست بتاعت الصديقه العزيزة البتanonymous كانت بتتكلم عن المشاكل اللى بتقابل المخطوبين و هيا كانت واخده صف البنات و متحامله اوى على الرجاله و اكيد كلامها صح بس فكرةالتعميم نفسها فكرة ماينفعش تكون مقبوله ، و انا هنا هاحاول احلل الحكايه من وجه نظرى اللى يمكن تكون غلط و يمكن ماتناسبش البعض لاننا مش نسخ كربون من بعض
نبتدى منين الحكايه ..... بيتهايئلى اننا نبتدى الحكايه من الاول خالص من قبل مايكون فى جواز او خطوبه .. من الفترة اللى بيكونوا عبارة عن ولد و بنت مفيش بينهم اى نوع من انواع الارتباط الرسمى ..... مواضيع الجواز بتنقسم الى فرعين كبار جدا و مالهمش تالت .. يا اما يكون جواز صالونات و ده بيكون الولد و البنت مايعرفوش بعض او ممكن يكونوا بيعرفوا بعض بس عادى مافيش بينهم اى علاقه حب او اعجاب متبادله ... او جواز مبنى على حب
نتكلم الاول على جواز الصالونات ... فى الجواز ده زى ما انا قلت قبل كده الولد و البنت ممكن يكونوا مايعرفوش بعض خالص او يكونوا يعرفوا بعض معرفه عاديه .. مفيش اى مشاعر مسبقه .. مفيش اى التزامات مسبقه ... كل حاجه بتبدأ واحده واحده ... فى بنات و اولاد كتير جدا بيرفضوا جواز الصالونات ده و بيعتبروه حاجه عفا عليها الزمن و اننا مش فى عصر الطربوش و اليشمك عشان الجواز ينفع انه حد يتجوزه اصلا و بيرفضوا مناقشه المبدأ من اساسه و لما تيجى تسالهم يقولوا " احنا لازم نتجوز عن حب " ، " انا ما ينفعش اتجوز شخص ماعرفوش " و كلام كتير بيدور حوالين نفس المحور ... ماشى انا موافق على كلامهم و على رأيهم بس فى حاجه مهمه هما مش واخدين بالهم منها .. ان اغلب اهالينا اتجوزو جواز الصالونات ده وانهم خلفونا و هما متجوزين جواز الصالونات ده و انهم برضه على ايامهم كان فى حب و عشق و غرام زى دلوقتى و ان الطرفين بيحبوا بعض اوى .. يردوا يقولوا " ده كان زمان " ، " الزمن بيتغير " ، " انا بابا و ماما كانو بيحبوا بعض قبل الجواز " ( و الملحوظه الاخيره بتكون ساعات صح بس زى ما اتفقنا مبدا التعميم مرفوض )
نسيب جواز الصالونات شويه و هنرجعله بعد شويه و نتكلم على جواز الحب .... الجواز ده بيكون فى الغالب مبتدى ايام الجامعه و ساعات من ثانوى و احيانا من الشغل او غير كده لانه نقط الالتقاء كتير جدا .. مش موضوعنا مبتدى فين بس هنتكلم على الغالبيه انه بيكون ابتدى و الطرفين لسه فى مرحله المراهقه او يا دوبك لسه خارجين منها ... المرحله دى بتتميز دايما ان اللون الغالب عليها بيكون البمبى ... الواحد مش شايف فى الدنيا غير العصافير اللى بتطير حواليه و كل عصفور و عصفورة بيبنوا عشهم سوا ... الواحد فى الفتره دى بيكون محتاج يحس باحساس الحب ( بغض النظر عن انه بيكون بيحب بجد ولا لا – المهم الاحساس مش حقيقته ) فابيبتدى يركب مشاعره على اول شخص ينفع انه يركب المشاعر دى عليه و يبتدى يخش فى موود الحب و يعيش اجمل لحظات حياته .... الموضوع ده ليه نهايه من اتنين ... يا اما الشخص يكتشف انه كان غلطان و انه مش بيحب الشخص ده ، يا اما يطلع احساسه صح و يكمل الموضوع .. مش هنتكلم هنا عن الصدمات اللى بناخدها فى الحب لان كل واحد فينا اكيد اتعرض لصدمه زى دى ... هنتكلم لو الموضوع طلع صح و الطرفين عايزين ينقلوا العلاقه للمستوى التانى اللى هو الارتباط الرسمى و تتويج الحب ده بالجواز
اول مرحله بتكون هى الخطوبه ... و المرحله دى بتكون مليانه مشاكل اغلب المشاكل دى ذات طابع مادى لانه كلنا شايفين حال البلد عامل ازاى بس ده برضه مش موضوعنا .... نتكلم على الخطوبه فى حاله جواز الصالونات ... جواز الصالونات ده بيكون مبنى على علاقات الاهل و بالتالى لو حصل قبول بين الطرفين ( اللى هما الولد و البنت ) بيتدوا الاهل يقعدوا سوا و يحطوا النقط على الحروف و يتفقوا على ترتيبات الجواز و مين هيعمل ايه و مين هيجيب ايه و كده .... فى حاله الجواز المبنى على حب الولد بيروح من غير اهله اول مرة زياره اسكشافيه لاهل العروسه و لو اهل العروسه عجبهم الولد و اخلاقه بيجيب اهله معاه تانى مرة و برضه يقعدوا و يتفقوا .... المفروض ان فى الحالتين الاهل بيتفقوا بس شتان ما بين حاله جواز الصالونات و جواز الحب ... فى جواز الصالونات الولد بيكون فاهم كويس انه اهله معاه قلبا و قالبا لانهم هما اللى مختارين العروسه و بالتالى بيكون مطمئن ... اما فى حاله جواز الحب الولد بيكون زى مايكون فى جهنم ... بيحب البنت و عايز يتجوزها و زى ما بيشوف فى الافلام لازم يضحى عشانها ( مش مهم يضحى ازاى ولا ب ايه المهم انه يضحى ) ، عايز يرضى اهل البنت عشان هما دول الحراس على البنت اللى هو بيحبها و عايز يتجوزها ، عايز يقنع اهله بالبنت و يكسبهم فى صفه – مع ملاحظه ان الاهل بيكونوا اغلب الاحيان بيبصوا للولد على انه لسه ابنهم الصغير و ماينفعش ياخد قرار مصيرى زى كده لوحده – و هو عايز يثبتلهم انه احسن الاختيار فنتيجه لكده الولد بيكون عايز يثبت للدنيا كلها انه صح ( و كلمه الدنيا كلها دى حقيقيه اهله و اهلها و البنت نفسها ) ... بالنسبه للبنت بأه فى حاله جواز الصالونات بيكون مفيش ضغط عليها من اى نوع .. الواد حلو .. وحش انتو اللى اختارتوه ... الواد هيوفى بالتزاماته او لا برضه انتو اللى اخترتوه ... و على كده طول الخط ..... فى حاله جواز الحب بيكون الوضع مختلف تماما ... البنت بتكون فى جهنم زى الولد بالظبط ... الواد وحش " شفتى اللى انتى جايبه " .... الواد مش لاحق يوفى بالتزامات الجواز " بصى المصيبه اللى انتى جايبهلنا " ... و برضه كده على طول الخط .... ده غير الضغط المعنوى اللى الاهل بيمارسوه على البنات ... " فلانه اصغر منك اتجوزت و انتى لسه " ، " كان ماله العريس اللى فلان / فلانه كان/ت جايبهولك " ، " و سبع البرمبه بتاعك هيخلص على امتى " و كلام كتير على نفس الوزن ... ده غير انها عايزه ترضى اهلها و تورى اهله انه اختار صح و انها بتحبه .. و برضه بتبص ان صاحبتها او قربتها اتجوزت و هى لسه و حاجات كتير تانيه
ده طبعا غير مشاكل الحموات سواء من ناحيه الولد او البنت بس انا مش هاتكلم على النقطه دى رغم انها لبها تاثير كبير بعد كده بس اى واحد هيقولك " انا بحب ابنى او بنتى و عايز احسن حاجه ليه " و ساعات كتير مابيحطش فى دماغه ان الطرف التانى برضه بيحب ابنه او بنته و عايز احسن حاجه ليه برضه و من هنا بتكون المشاكل
فتره الخطوبه عدت و خلصت بحلوها و بمرها و الجواز تم ... فى حاله جواز الصالونات الطرفين بيبتدوا يستكشفوا بعض و كل واحد فيهم بيبتدى يكون للطرف التانى الصورة الحقيقيه اللى هتفضل معاه على طول .. و الحقيقه ده مابيكونش مشكله كبيرة لان كل طرف مابيكونش عارف الطرف التانى اوى لدرجه انه يكون عنده صوره مسبقه .... جواز الحب بأه اوعى وشك ... كل طرف فيهم عارف الطرف التانى كويس و من هنا بتبدا الصدمه ... الواحد فى بيته اكيد بيكون غير الشارع و مع مراته اكيد غير مع المزة بتاعته او صاحبته – و ده مش نفاق بس الواحد اكيد بيقدر يعمل فى بيته اللى ماينفعش يعمله بره .. ادى اول صدمه
جواز الصالونات كل طرف مش منتظر من الطرف التناى الا ابسط الحقوق الاساسيه اللى مابيختلفش عليها اتنين ... جواز الحب كل طرف مستنى من الطرف التانى حاجات جايز تكون اكتر من اللى الطرف التانى مستعد يديها ادى تانى صدمه
جواز الصالونات لما بتحصل مشكله بيزعلوا من بعض و بعدين طرف يجى على نفسه و يصالح الطرف التانى عشان المركب تمشى و بعد كده بيعرف سبب المشكله عشان ماتتكررش .. جواز الحب لما بتحصل مشكله بيكون فى حاجه من اتنين .. يا اما الحب بيخلى المشكله صغيرة و بتتحل فى ساعتها يا اما الحب ده برضه بيخلى كل طرف مقموص و زعلان من الطرف التانى و مستنيه يصالحه " انا عملت كتير علشانه / علشانها .. يجى / تيجى على نفسه / نفسها شويه و يصالحنى / تصالحنى " ادى تالت صدمه
جواز الصالونات " انا يا ماما ابتديت اعرفه/اعرفها كويس " .... جواز الحب " هو/هى ابتدى/ ابتدت يتغير/تتغير " ادى رابع صدمه
و اخر حاجه دايما تلاقى جواز الصالونات اكتر استقرارا و استمرارا من جواز الحب ( و انا هنا باتكلم عن القاعده من الاستثناء ) ... و اللى بيقول جواز الصالونات مابيكونش فيه حب يبقى غلطان لان " الموده و الرحمه و السكينه " اللى بتنشا بيجى معاها الحب ... جايز مش الحب اللى زى الشلال فى حاله جواز الحب انما بيكون عامل زى النهر الهادى .. و دايما الشلال بيهدا بعد فتره و جايز يبقى راكد انما النهر دايما بيكون مستمر و بيغلب على اى حاجه تقابله
و عشان ماحدش يفهم انى مع جواز الصالونات ضد جواز الحب احب اقول انى مش مستسيغ فكرة جواز الصالونات و بيتهايئلى انى عمرى ما هاعملها ... انما انا كنت باتكلم بصراحه و باقول الحق
معلش ان البوست طويل المرة دى بس الموضوع يستاهل

الأحد، 4 يناير، 2009

كام مرة خنت مبادئك

طبعا كلنا عندنا مبادئ فى حياتنا .. يمكن مبادئ صح او غلط بس يفضل عندك مبادئ , حتى الشخص اللى بيقول انه ماعندوش مبدأ لازم هتلاقيه ماشى على مبدأ بس هو مش عارف او مش قادر يعرف انه اى واحد فى الدنيا عنده " pattern " او نمط بس هو مش قادر يستنبطه
و طبعا كلنا عارفين ان المبادئ لا تتجزأ و المبادئ ثابته مع اختلاف الاشخاص ... يعنى مثلا ان لو اتوضعت فى موقف معين مرتين بس الاشخاص مختلفين او اهدافى انا الشخصيه مختلفه المفروض انه يكون تصرفى واحد فى الموقفين مدام الموقفين متماثلين ... سؤالى هنا ليك - و افتكر انك قاعد لوحدك و محدش شايفك ولا عارف انت بتفكر فى ايه - يا ترى انت فعلا عندك مبدأ فى حياتك انت مصمم تمشى عليه و تطبقه مهما كانت النتايج ... و لو كده حصل انك خنت مبدأك كام مرة بصراحه و يا ترى خنته عشان مصلحه شخصيه هتجيلك من تغيير مبدأك حاجه بسيطه - او خلينا نسميها اعداه فهم للمبدأ نفسه - ولا خنته عشان انت كنت خايف ولا يا ترى خنته عشان انت اصلا مش مقتنع باهميه المبدأ ده و انت ماشى بالمثل اللى بيقول مطرح ما ترسى دقلها
عن نفسى انا خنت مبادئى قبل كده بس مش عشان مصلحه شخصيه انما عشان كان اصرارى على مبدأى هيجيبلى مشاكل فقلت اتجنبها ... بس بعد كده اكتشفت انى ماتجنبتش و خسرتى مبدأى و احترامى لنفسى فى الموقف ده لانى كنت جبان ... و من وقتها خليت مبدأى ثابت
انت بأه عملت ايه